Levitikko 13:1-59
13 Jehova wakayinkilila kunembo kwaambuula aaMozesi a-Aroni kati:
2 “Kuti muntu wazimba aamubili, waba aatukoto-koto naakuti tubata aamubili tukonzya kuba bulwazi bwachipele,* weelede kutolwa kuli Aroni mupayizi naakuti kuli umwi wabana bakwe bapayizi.
3 Mupayizi weelede kulanga-langa bulwazi aachikanda chamuntu ooyo. Kuti boya buli aalibulwazi bwachincha bwatuba alubo bulwazi kabuboneka kuti bulibbide muchikanda, bunooli mbulwazi bwachipele. Mupayizi weelede kubulanga-langa mpawo ulaamba kuti muntu ooyo ulisofweede.
4 Kuti tubata tuli aachikanda chakwe katutuba, bulwazi oobo kabutabbide muchikanda alubo boya buli aachikanda kabutatubide, mupayizi ulabikka muntu ooyo uuli aabulwazi kundawu yakwe alikke kwamazuba aali musanu aabili.
5 Mupayizi weelede kumulanga-langa mubuzuba bwamusanu aabili alubo kuti kwaboneka kuti bulwazi oobo bwayimikila akuti teebwasaalila aachikanda, weelede kumubikka kundawu yakwe alikke kwaamwi mazuba aali musanu aabili.
6 “Mupayizi weelede kumulanga-langa lubo mubuzuba bwamusanu aabili alubo kuti bulwazi oobo bwamana, teebwasaalila aachikanda, weelede kumwaamba kuti ulasalala, kali kalonda biyo. Muntu ooyo weelede kuwacha zigogo zyakwe, asalale.
7 Pesi kuti tukoto-koto twasaalila aachikanda* kakuli wakaliinkide kumupayizi kuti akabonwe kuti ulasalala na, weelede kubweeda lubo* kumupayizi.
8 Mupayizi ulatulanga-langa alubo kuti tukoto-koto ooto twasaalila aachikanda, weelede kwaamba kuti muntu ooyo tasalali pe. Nchipele.
9 “Kuti muntu waba aabulwazi bwachipele, weelede kweetwa kumupayizi,
10 mpawo mupayizi ulamulanga-langa. Kuti kakuli kkoto lituba aachikanda alubo kalipa kuti boya buli aakkoto eelyo butube alubo aawo aali kkoto kwaba chilonda chijulikide,
11 mbulwazi bwachipele chitamani buli aachikanda chakwe alubo mupayizi weelede kwaamba kuti muntu ooyo ulisofweede. Tayelede kumubikka kundawu yakwe alikke pe, nkaambo ulisofweede.
12 Kuti chipele chasaalila aachikanda choonse alubo bulwazi oobo bwasaalila mubili woonse kuzwa kumutwe kusika kumawulu, kufumbwa mupayizi mpakonzya kubona
13 alubo mupayizi wamulanga-langa wabona kuti chipele chasaalila chikanda choonse, weelede kwaamba kuti muntu ooyo uuli aabulwazi ulasalala.* Mbukunga chikanda choonse chachincha chatuba, ulasalala.
14 Pesi kuti waba aachilonda chijulikide, ulasofwaala.
15 Kuti mupayizi wabona chilonda chijulikide ulamwaamba kuti ulisofweede. Chilonda eecho chijulikide chilisofweede. Nchipele.
16 Pesi kuti chilonda eecho chijulikide chachincha chatuba, muntu ooyo weelede kuza kumupayizi.
17 Mupayizi weelede kumulanga-langa alubo kuti chilonda eecho chachincha chatubuluka, mupayizi weelede kwaamba kuti muntu ooyo uuli aabulwazi ulasalala. Unooli wasalala.
18 “Kuti muntu waba aakalonda-mpongo* aachikanda mpawo kapona,
19 pesi kuti aawo aakali kalonda-mpongo kwaba kkoto lituba naakuti tukoto tusalala-salala katutuba, weelede kulitondeezya kumupayizi.
20 Mupayizi weelede kukalanga-langa alubo kuti kwaboneka kuti kalibbide muchikanda akuti boya buli aalinkako bwachincha bwatuba, mupayizi weelede kwaamba kuti muntu ooyo ulisofweede. Bunooli mbulwazi bwachipele bwakatalikila aakalonda-mpongo.
21 Pesi kuti mupayizi wakalanga-langa mpawo wabona kuti boya buli aalinkako tabutubide pe akuti takabbide pe muchikanda akuti kalikumana, mupayizi weelede kubikka muntu ooyo kundawu yakwe alikke kwamazuba aali musanu aabili.
22 Kuti kakali kusaalila aachikanda, mupayizi weelede kwaamba kuti muntu ooyo ulisofweede. Mbulwazi bwachipele.
23 Pesi kuti tukoto ooto katuli aandawu iimwi katutasaalide, kunooli nkuzimba biyo kwakalonda-mpongo mpawo mupayizi weelede kumwaamba kuti ulasalala.
24 “Naakuti, kuti umwi muntu waba aabuya* mpawo aawo mpaapya kwaboneka tukoto tusalala-salala naakuti tutuba,
25 mupayizi ulaalanga-langa. Kuti boya buli aatukoto ooto bwachincha bwatuba mpawo kwaboneka kuti chilonda eecho chilibbide munyama, nchipele chakatalikila aabuya alubo mupayizi weelede kwaamba kuti muntu ooyo ulisofweede. Mbulwazi bwachipele.
26 Pesi kuti mupayizi wachilanga-langa mpawo wabona kuti boya buli aatukoto ooto tabutubide pe, akuti chilonda tachibbide pe muchikanda akuti chilikubunda, mupayizi weelede kubikka muntu ooyo kundawu yakwe alikke kwamazuba aali musanu aabili.
27 Mupayizi weelede kumulanga-langa mubuzuba bwamusanu aabili alubo kuti kakuli tukoto ooto twakasaalila aachikanda, mupayizi weelede kwaamba kuti muntu ooyo ulisofweede. Mbulwazi bwachipele.
28 Pesi kuti tukoto ooto katuli aandawu iimwi alubo kuti teetwasaalila aachikanda alubo katuli kumana, kunooli nkuzimba biyo kwabuya, mupayizi weelede kwaamba kuti muntu ooyo ulasalala, nkaambo kunooli nkuzimba biyo kwabuya.
29 “Kuti mwaalumi naakuti mwanakazi waba aabulwazi mumutwe naakuti aakalezu,
30 mupayizi weelede kubulanga-langa bulwazi oobo. Kuti bwaboneka kuti bulibbide muchikanda akuti boya buli mpawo bwachincha bwaba bwamuntondo kabupupulukide, mupayizi weelede kwaamba kuti muntu ooyo ulisofweede. Nchipele chamumutwe naakuti chaakalezu.
31 Pesi kuti mupayizi wabona kuti bulwazi oobo tabubbide loko muchikanda akuti taakwe boya busiya pe aawo aapambanikide, mupayizi weelede kubikka muntu ooyo uuli aabulwazi kundawu yakwe alikke kwamazuba aali musanu aabili.
32 Mupayizi weelede kubulanga-langa lubo bulwazi oobo mubuzuba bwamusanu aabili alubo kuti aawo aapambanikide teekwasaalila akuti boya buli aandawu eeyo teebwachincha kuba bwamuntondo alubo kuti aandawu aali bulwazi kakuboneka kuti tabubbide loko muchikanda,
33 muntu ooyo weelede kugelwa, pesi tayelede kugelwa pe aawo aali bulwazi. Mpawo mupayizi weelede kubikka muntu ooyo kundawu yakwe alikke kwamazuba aali musanu aabili.
34 “Mupayizi weelede kubulanga-langa lubo bulwazi mubuzuba bwamusanu aabili alubo kuti bulwazi oobo buli mumutwe aakalezu kabutasaalide aachikanda akuti kabutabbide muchikanda, mupayizi weelede kwaamba kuti muntu ooyo ulasalala alubo weelede kuwacha zigogo zyakwe mpawo ulasalala.
35 Pesi kuti bulwazi bwakwe bwasaalila aachikanda kuzwa naakalisalazya,
36 mupayizi weelede kumulanga-langa. Kuti bulwazi bwasaalila aachikanda, mupayizi tacheelede kulanga kuti boya buli aandawu eeyo bwachincha na akuba bwamuntondo. Muntu ooyo ulisofweede.
37 Pesi kuti naazwa aakulangwa-langwa kwajanika kuti bulwazi oobo tabusaalide pe akuti boya buli aandawu eeyo bulasiya, bulwazi oobo bunooli bwakapona. Muntu ooyo ulasalala alubo mupayizi weelede kwaamba kuti muntu ooyo ulasalala.
38 “Kuti mwaalumi naakuti mwanakazi waba aatubata aamubili alubo tubata ooto katutuba,
39 mupayizi weelede kubalanga-langa. Kuti tubata ooto katutachitubi, chinooli nchintambwe biyo chakaba muchikanda. Muntu ooyo ulasalala.
40 “Kuti mwaalumi wakuluuka masusu mumutwe, waba aampabang’a,* ulasalala.
41 Kuti wakuluuka masusu aajulu aankumu mpawo waba aampabang’a mpawaawo, ulasalala.
42 Pesi kuti waba aakkoto lisalala-salala kalituba aampabang’a naakuti aankumu, nchipele chatalikila mumutwe naakuti aankumu yakwe.
43 Mupayizi weelede kumulanga-langa alubo kuti kuzimba ooko kalili kkoto lisalala-salala akutuba-tuba aampabang’a, aakatwikkilo, naakuti aankumu yakwe alubo kakubonekaanga nchipele chili aachikanda chakwe,
44 muntu ooyo ngusichipele. Ulisofweede alubo mupayizi weelede kwaamba kuti muntu ooyo ulisofweede akaambo kabulwazi buli mumutwe wakwe.
45 Pesi sichipele uuli aabulwazi, zigogo zyakwe zyeelede kudelulwa, tayelede kukkama masusu alubo weelede kulivumba kumulomo kalikoompolola kati, ‘Ndilisofweede, ndilisofweede!’
46 Ulasofwaala mazuba woonse ngali aabulwazi. Mbukunga ulisofweede, weelede kukkala kwakwe alikke. Weelede kukkala aanze aakkeempu.
47 “Kuti bulwazi bwachipele bwajatilila aachigogo, kufumbwa kuti nchawuulu naakuti nchamulembo muuba,
48 kufumbwa kuti mpaabusumyo bwiingide naakuti bulamfu bwawuulu naakuti bwamulembo muuba, naakuti aachikumba naakuti kufumbwa aachintu chachikumba
49 akuti kwalibonia kabata kabulwazi kamusyobo wamuntondo kawuli wasokwe tete, naakuti kasalala-salala, aachigogo, aachikumba, aabusumyo bwiingide naakuti bulamfu naakuti aali kufumbwa chintu chachikumba, nkukwaamba kuti chaba aabulwazi bwachipele, cheelede kutondeezegwa kumupayizi.
50 Mupayizi weelede kubulanga-langa bulwazi oobo alubo weelede kuchibikka aachilikke chintu eecho chili aabulwazi kwamazuba aali musanu aabili.
51 Kuti wabulanga-langa bulwazi oobo mubuzuba bwamusanu aabili mpawo wabona kuti bwakasaalila aachigogo, aabusumyo bwiingide naakuti bulamfu, naakuti aachikumba (kazitakwe ndaba kuti chikumba eecho chibelesegwaanzi), bulwazi oobo nchipele chibi loko, tachisalali pe.
52 Weelede kutenta chigogo eecho naakuti busumyo bwawuulu naakuti bwamulembo muuba naakuti kufumbwa chintu chachikumba aawo bulwazi mpubwakatalikila, nkaambo nchipele chibi loko. Cheelede kutentwa mumulilo.
53 “Pesi kuti mupayizi wachilanga-langa mpawo kuti bulwazi teebwasaalila aachigogo naakuti aabusumyo bwiingide naakuti bulamfu naakuti aali kufumbwa chintu chachikumba,
54 mupayizi weelede kulayilila kuti chintu eecho chaba aabulwazi chiwachwe alubo weelede kuchibikka aachilikke kwaamwi mazuba aali musanu aabili.
55 Kuzwa waawo, mupayizi weelede kuchilanga-langa lubo chintu eecho chakali aabulwazi chakawachwa chasalala. Pesi kuti aawo aapambanikide teekwachincha nikuba kuti bulwazi teebwakasaalila, chintu eecho chilisofweede. Weelede kuchitenta mumulilo nkaambo chakaligwa, kazitakwe ndaba kuti chakaligwa mukati naakuti aanze.
56 “Pesi kuti mupayizi wachilanga-langa alubo kuti aawo aapambanikide amana kuzwa nichakawachwa, weelede kudelula chigogo eecho, naakuti chikumba naakuti kudunsula busumyo bwiingide naakuti bulamfu.
57 Nikuba oobo, kuti kabuchilibonia kuli limwi bbazu lyachigogo, naakuti aabusumyo bwiingide naakuti bulamfu naakuti aali kufumbwa chintu chachikumba, bulikusaalila, weelede kuchitenta mumulilo chintu eecho chaba aabulwazi.
58 Pesi kuti bulwazi oobo bwamana aachigogo, naakuti aabusumyo bwiingide naakuti bulamfu, naakuti aali kufumbwa chintu chachikumba chawachwa, cheelede kuwachwa lubo mpawo chilasalala.
59 “Ooyu nguumulawu uuli atala abulwazi bwachipele, buli aachigogo chawuulu naakuti chamulembo muuba, naakuti aabusumyo bwiingide naakuti bulamfu naakuti aali kufumbwa chintu chachikumba, kuchitila kuti chaambwe kuti chilasalala naakuti chilisofweede.”
Makani Aamunsi
^ Bbala lyachiHebberu lyakuti “chipele” lilakonzya kwaamba zintu zyiingi. Alubo lilakonzya kwaamba malwazi aasiyene-siyene aatabukila aajanika aachikanda chamuntu. Alubo lilakonzya kuswaanizya amwi malwazi aajanika muzigogo amumaanda.
^ Naakuti, “bulwazi bwasaalila aachikanda.”
^ Naakuti, “kachibili.”
^ Naakuti, “tatabukizyi bamwi pe.”
^ Bamwi bati “tumba.”
^ Buya nchilonda chakupya.
^ Bamwi bati “palo.”
