Levitikko 14:1-57
14 Jehova wakayinkilila kunembo kwaambuula aaMozesi kati:
2 “Ngoyu mulawu weelede kutobelezegwa aasichipele mubuzuba bwakusalazigwa kwakwe, chiindi nayelede kweetwa kumupayizi.
3 Mupayizi weelede kwiinka aanze aakkeempu kuti akamulange-lange. Kuti sichipele wapona kubulwazi bwachipele,
4 mupayizi ulamulayilila kuti aze aabayuni babili bawumbulu basalala, chisamu chamukkedari, busumyo busalala ahisopu kuti azoosalazigwe.
5 Mupayizi weelede kulayilila kuti umwi muyuni ajayilwe muchibelesyo chabulongo aajulu aamaanzi aazwa mukasawu.
6 Pesi weelede kubweza muyuni muumbulu aamwi achisamu chamukkedari, busumyo busalala ahisopu mpawo azinike aamwi muganzi lyamuyuni wajayigwa aajulu aamaanzi aazwa mukasawu.
7 Kuzwa waawo, ulalisansiila kwaziindi zili musanu azibili aamuntu uulikulisalazya kuchipele alubo weelede kumwaamba kuti ulasalala mpawo weelede kuleka muyuni muumbulu kuti wuuluke wiinke mulusaka.
8 “Muntu uulikulisalazya weelede kuwacha zigogo zyakwe, agele masusu aakwe woonse, asambe aamaanzi mpawo ulasalala. Kuzwa waawo, ulanjila mukkeempu, pesi weelede kunookkala aanze aatente lyakwe kwamazuba aali musanu aabili.
9 Mubuzuba bwamusanu aabili, weelede kugela masusu aakwe woonse amalezu ankoye. Naamaninsya kugela masusu aakwe woonse, weelede kuwacha zigogo zyakwe, asambe aamaanzi mpawo ulasalala.
10 “Mubuzuba bwamusanu aatatu, weelede kubweza tugutu tubili tulikabotu akabelele kamwi kapwizi kali aamunyaka uumwi azipanzi zitatu zyazipanzi zili kkumi zya-efa* yafulawa nante iiswaanizidwe aamafuta yachipo chazilyo amafuta aakkwana loogu* iimwi.
11 Mpawo mupayizi uutaambe muntu ooyo kuti ulasalala, uleeta muntu ooyo uulikulisalazya aamwi azipo kunembo lyaJehova kumanjililo aatente lyakuswaanganina.
12 Mupayizi weelede kubweza kagutu kamwi akape kakali chipo chamilandu, aamwi amafuta aakkwana loogu alubo weelede kuziyumba ooku akooku kazili chipo chakuyumba kunembo lyaJehova.
13 Mpawo ulajaya kagutu mundawu oomo chipayizyo chachibi achipo chitentwa muzijayilwa, mundawu iisalala. Nkaambo mbuli chipayizyo chachibi, chipo chamilandu nchamupayizi. Nchintu chisalalisya.
14 “Kuzwa waawo, mupayizi weelede kubweza limwi ganzi lyachipo chamilandu alinane kukutwi kwachilisyo kwamuntu ooyo uulikulisalazya akuchaala chakukuboko kwakwe kwachilisyo aachaala chakukuulu kwakwe kwachilisyo.
15 Alubo mupayizi weelede kubweza amwi mafuta aakkwana loogu aatile mukuboko kwakwe kwachimweensi.
16 Mpawo mupayizi weelede kunika kanwe kakwe kakukuboko kwachilisyo mumafuta aali mukuboko kwakwe kwachimweensi mpawo ulasansiila mafuta aali aakanwe kakwe kwaziindi zili musanu azibili kunembo lyaJehova.
17 Mupayizi weelede kunana amwi mafuta aasyaala mukuboko kwakwe kukutwi kwachilisyo kwamuntu uulikulisalazya akuchaala chakukuboko kwakwe kwachilisyo, aachaala chakukuulu kwakwe kwachilisyo mpaamulambikide ganzi lyachipo chamilandu.
18 Mafuta aasyaala mukuboko kwamupayizi weelede kwaananika mumutwe wamuntu uulikulisalazya alubo mupayizi ulamaninsya milandu yamuntu ooyo kunembo lyaJehova.
19 “Mupayizi weelede kupayizya chipayizyo chachibi akumaninsya milandu yamuntu uulikulisalazya kukusofwaala kwakwe, kuzwa waawo, weelede kujaya chipo chitentwa.
20 Alubo mupayizi weelede kupa chipo chitentwa achipo chazilyo aachipayililo alubo weelede kumaninsya milandu yamuntu ooyo mpawo muntu ooyo ulasalala.
21 “Nikuba oobo, kuti kafwaba, katakonzyi kujana zintu ziyandikana, weelede kweeta kagutu kachipo chamilandu kuti kabe chipo chakuyumba kuchitila kuti kupegwe chipo chakumaninsya milandu yakwe aamwi achakkumi cha-efa* yafulawa nante iiswaanizidwe aamafuta kachili chipo chazilyo aloogu yamafuta
22 anziba zibili naakuti bana bankwilimba babili kweendelana anzyakonzya kujana. Imwi ilaba yachipayizyo chachibi mpawo imwi ilaba yachipo chitentwa.
23 Mubuzuba bwamusanu aatatu, weelede kuzyeeta kumupayizi kumanjililo aatente lyakuswaanganina kunembo lyaJehova kuti asalazigwe.
24 “Mupayizi weelede kubweza kagutu kachipo chamilandu aloogu yamafuta aziyumbe ooku akooku kazili chipo chakuyumba kunembo lyaJehova.
25 Mpawo mupayizi weelede kujaya kagutu kachipo chamilandu alubo abweze limwi ganzi lyachipo chamilandu alinanike kukutwi kwachilisyo kwamuntu uulikulisalazya, akuchaala chakukuboko kwakwe kwachilisyo, akuchaala chakukuulu kwakwe kwachilisyo.
26 Mpawo mupayizi weelede kutila mafuta mukuboko kwakwe kwachimweensi.
27 Kuzwa waawo, ulasansiila mafuta aali mukuboko kwakwe kwachimweensi kwaziindi zili musanu azibili kabelesya kanwe kakwe kachilisyo kunembo lyaJehova.
28 Alubo mupayizi weelede kubweza amwi mafuta aali mukuboko kwakwe aananike kukutwi kwachilisyo kwamuntu uulikulisalazya, akuchaala chakuboko kwakwe kwachilisyo, akuchaala chakukuulu kwakwe kwachilisyo aandawu mpaamunanika ganzi lyachipo chamilandu.
29 Mafuta aasyaala mukuboko kwakwe, mupayizi ulaananika aamutwe wamuntu uulikulisalazya, kuchitila kuti kumaninsigwe milandu yamuntu ooyo kunembo lyaJehova.
30 “Weelede kupa nziba iimwi naakuti mwana wankwilimba uumwi kweendelana anzyakonzya kujana,
31 kufumbwa njakonzya kweeta, imwi ilaba yachipayizyo chachibi mpawo imwi ilaba yachipo chitentwa aamwi achipo chazilyo. Alubo mupayizi weelede kumaninsya milandu yamuntu uulikulisalazya kunembo lyaJehova.
32 “Ooyu nguumulawu uuli atala amuntu wakali aabulwazi bwachipele, pesi uutakonzyi kujana zintu ziyandikana kuti azoosalazigwe.”
33 Mpawo Jehova wakati kuli Mozesi a-Aroni:
34 “Nimwazoonjila munyika yaKkenani njindilikumupa kayili lukono anindazoozumizya ng’anda yamunyika yanu kuti ibe aabulwazi bwachipele,
35 muntu uuli aang’anda eeyo weelede kwiinka kumupayizi mpawo akaambe kuti, ‘Kuli bulwazi bwaboneka aang’anda yangu.’
36 Mupayizi ulalayilila kuti kugwisigwe zintu zyoonse zili mung’anda eeyo katanasika kuzooyilanga-langa, kuchitila kuti atazoowambi kuti zintu zyoonse zili mung’anda eeyo zilisofweede. Kuzwa waawo, mupayizi weelede kunjila kuti alange-lange ng’anda eeyo.
37 Weelede kulanga-langa aawo aapambanikide alubo kuti muduli wang’anda kawubbide aali zimwi ndawu zili aatuntu twamusyobo wamuntondo uuvweleene aawasokwe tete naakuti tusalala-salala,
38 mupayizi weelede kuzwa aye kumulyango wang’anda alubo ulalayilila kuti ijalwe kutabi muntu uunjila kwamazuba aali musanu aabili.
39 “Mupayizi weelede kuboola lubo kuzoolanga-langa ng’anda eeyo mubuzuba bwamusanu aabili. Kuti bulwazi bwasaalila aamuduli wang’anda,
40 mupayizi ulapa malayilile aakuti mabwe aaba aabulwazi akolomonwe asowelwe aanze aamuunzi, kundawu kusowelwa zintu zisofweede.
41 Mpawo weelede kulayilila kuti ng’anda ipalwe mwiili mukati alubo bulongo bunooli bwapalwa busowelwe aanze aamuunzi kundawu kusowelwa zintu zisofweede.
42 Beelede kubikka amwi mabwe aawo mpubakagwisya aakaliwo alubo weelede kubelesya bumwi bulongo akuba aachoonzyo kuti ng’anda eeyo yazilululwa.
43 “Nikuba oobo, kuti bulwazi oobo bwaboola lubo aang’anda eeyo, kakuli mabwe aakusaanguna akagwisigwa alubo kayili yakapalwa mpawo yazilululwa lubo,
44 mupayizi weelede kunjila ayilange-lange lubo. Kuti bulwazi oobo bwasaalila mung’anda, nchipele chibi loko chili mung’anda. Ng’anda eeyo ilisofweede.
45 Mpawo weelede kulayilila kuti ng’anda eeyo imwayigwe, mabwe aayo, zisamu zyayo abulongo boonse bwakabelesegwa kukuzilulula ng’anda eeyo, zibwezegwe zikasowelwe aanze aamuunzi kundawu kusowelwa zintu zisofweede.
46 Pesi kufumbwa muntu uunjila mung’anda eeyo mumazuba nikutazumizigwi kuti kunjile muntu, muntu ooyo ulasofwaala kusika goko.
47 Kufumbwa muntu uulala mung’anda eeyo naakuti muntu uulida mung’anda eeyo, weelede kuwacha zigogo zyakwe.
48 “Nikuba oobo, kuti mupayizi wanjila alubo wabona kuti bulwazi teebwakasaalila mung’anda kuzwa niyakazilululwa lubo, weelede kwaamba ng’anda eeyo kuti ilasalala nkaambo bulwazi bwakamana.
49 Kuti asalazye ng’anda eeyo kuzwa kukusofwaala, weelede kubweza bayuni babili, chisamu chamukkedari, busumyo busalala ahisopu.
50 Muyuni uumwi weelede kumujayila muchibelesyo chabulongo aajulu aamaanzi aazwa mukasawu.
51 Mpawo weelede kubweza chisamu chamukkedari, hisopu, busumyo busalala amuyuni muumbulu, azinike muganzi lyamuyuni wajayigwa amumaanzi aazwa mukasawu mpawo weelede kulisansiila aang’anda kwaziindi zili musanu azibili.
52 Alubo ulasalazya ng’anda eeyo kuzwa kukusofwaala* kabelesya ganzi lyamuyuni, maanzi aazwa mukasawu, muyuni muumbulu, chisamu chamukkedari, hisopu abusumyo busalala.
53 Mpawo weelede kuleka muyuni muumbulu aanze aamuunzi kuti wuuluke wiinke mulusaka alubo ulagwisya kusofwaala kwang’anda* eeyo mpawo ilasalala.
54 “Ooyu nguumulawu uuli atala akufumbwa bulwazi bwachipele, abulwazi bwamumutwe, naakuti buli aakalezu,
55 chipele chachigogo naakuti chang’anda,
56 kuzimba, kuba aatukoto-koto amabata-mabata,
57 kuchitila kuti muzibe chintu chisofweede achisalala. Ooyu nguumulawu uuli atala achipele.”
Makani Aamunsi
^ Zipanzi zitatu zyazipanzi zili kkumi zya-efa, zyeelene aamalita aali 6.6. Langa Makani Aakuyungizya B14.
^ Loogu iimwi yeelene aamalita aali 0.31. Langa Makani Aakuyungizya B14.
^ Chakkumi cha-efa cheelene aamalita aali 2.2. Langa Makani Aakuyungizya B14.
^ MuchiHebberu, “kuchibi.”
^ MuchiHebberu, “ulamaninsya milandu yang’anda.”
