Levitikko 26:1-46
26 Tamweelede kulipangila baleza babuyo. Tamweelede kulipangila chikozyano chibezedwe naakuti musemu uusalala. Alubo tamweelede kubikka bbwe libezedwe munyika yanu kuti mulifugamine, nkaambo ndime Jehova Leza wanu.
2 Mweelede kubamba masabata aangu akulemeka* ndawu yangu iisalala. Ndime Jehova.
3 “‘Kuti mwayinkilila kunembo kweenda mumilawu yangu akubamba malayilile aangu akwaatobela,
4 ndilamuwisizya mvula aachiindi chayo cheelede alubo nyika izoomupa butebuzi bwayo aminsamu yamumuunda izoomuzyalila michelo yayo.
5 Chiindi chakupola chizooyinkilila kunembo kusikila kuchiindi chakutebula masaansa alubo chiindi chakutebula masaansa chizooyinkilila kunembo kusikila kuchiindi chakubyala. Mukuyungizya, muzoolya chinkwa chanu kusikila mukkute alubo muzookkala kamulyiibide munyika yanu.
6 Ndizoobikka luumuno munyika alubo muzoolala kakutakwe muntu umuyoosya pe. Ndizoogwisya banyama bamusokwe bayoosya munyika alubo taakwe muntu utazoomulwane aapanga munyika yanu.
7 Kwaamba choonzyo, muzootandaanya basinkondonyokwe alubo bazoowa apanga kunembo lyanu.
8 Bantu bali musanu aakati kanu bazootandaanya bali 100 mpawo bali 100 bazootandaanya bali 10 000 alubo basinkondonyokwe bazoowa apanga kunembo lyanu.
9 “‘Ndizoomulongezya* alubo ndizoopa kuti muzyalane akuti muvule alubo ndizoobamba chizuminano changu andinywe.
10 Nimuchilya zilyo zyachiindi zyamunyaka wakiinda, mweelede kugwisya zyachiindi kuchitila kuti mukonzye kubikka zipya.
11 Ndizoobikka tente lyangu lyakukombela aakati kanu alubo tandizoomukaki pe.
12 Ndizooyenda aakati kanu akuba Leza wanu alubo inywe muzooba bantu bangu.
13 Ndime Jehova Leza wanu wakamugwisya munyika ya-Ijipita kuti mutayinkilili kunembo kamuli bazike babo alubo ndakatyola jokwe lyanu akupa kuti mweende kamulangide kunembo.
14 “‘Nikuba oobo, kuti teemwandiswiilila akuleka kubamba malayilile aaya woonse
15 alubo kuti mwakaka milawu yangu akuzonda nzila zyangu zyakubeteka zyakuti mwakachilwa kubamba milawu yangu yoonse mpawo mwatyola chizuminano changu,
16 ime ndizoochita zitobela kulindinywe: Ndizoopa kuti mukataazikane akupa kuti muchiswe bulwazi bwakakweekwe* abwakupya mubili akupa kuti meso aanu ataboni kabotu akuti mumane manguzu. Muzoobyala mbuto zyanu, pesi taakwe nchimutazootebule pe nkaambo basinkondonyokwe bazoolya zilyo zyanu.
17 Ndizoomufutatila alubo muzoozundwa abasinkondonyokwe. Aabo bamuzonda bazoomulyatuuka mpawo muzoochija, pesi kakutakwe uliikumwaandilila pe.
18 “‘Kuti teemwandiswiilila nikuba kuti zyoonse eezi zyachitika, ndizoomusubula kwaziindi zili musanu azibili akaambo kazibi zyanu.
19 Ndizoopa kuti muleke kulisumpula akupa kuti majulu aanu abe mbuli nsimbi akuti nyika yanu ibe mbuli kkopa.*
20 Muzoobelekela maliminya, mbukunga nyika yanu tizooyeti butebuzi bwayo aminsamu yanyika tizoozyali michelo pe.
21 “‘Pesi kuti mwayinkilila kunembo kundikazya akutandiswiilila ndizoomuuma kwaziindi zili musanu azibili kweendelana azibi zyanu.
22 Ndizootuma banyama bamusokwe aakati kanu, bazoojaya bana banu akumaninsya zivuubwa zyanu akupa kuti mube bache alubo migwagwa yanu izoosyaala kayitachikwe bantu beenda mulinjiyo.
23 “‘Kuti mwakaka kutambula lulayo lwangu nikuba kuti ndachita eezi alubo mwayinkilila kunembo kundikazya,
24 andime ndizoomukazya alubo ndizoomuuma kwaziindi zili musanu azibili akaambo kazibi zyanu.
25 Ndizoomubweedezya apanga akaambo kakutyola chizuminano. Kuti mwabungana mumyuunzi yanu, ndizootuma chilwazi aakati kanu alubo ndizoomwaaba mukuboko kwabasinkondonyokwe.
26 Kuti ndanyonyoona nkuchizwida chinkwa* chanu,* banakazi bali kkumi bazoojika chinkwa chanu mu-oveni mpawo bazoowabanisya chinkwa kweendelana akulema kwacho. Muzoolya, pesi tamuzookkuti pe.
27 “‘Kuti teemwandiswiilila nikuba kuti ndachita zintu zyoonse eezi alubo mwayinkilila kunembo kundikazya,
28 ndizoomukazya changuzu alubo ime lwangu ndizoomusubula kwaziindi zili musanu azibili akaambo kazibi zyanu.
29 Muzoolya nyama yabana banu balombe ayabana banu basimbi.
30 Ndizoonyonyoona ndawu zyanu zyakukombela akugwisya tubikkilo twanu twatununkilizyo alubo ndizoolundika zidumbu zyanu aazibumbwa zyanu zisesemya* alubo ndizoomufutatila nkaambo mulandisesemya.
31 Ndizoopa kuti myuunzi yanu inyonyoonwe aapanga akupa kuti ndawu zyanu zisalala zibe matongo alubo tandikoobumvwa pe bweema bununkilila bwazipayizyo zyanu.*
32 Ime lwangu ndizoopa kuti nyika ibe tongo alubo basinkondonyokwe bakkede mulinjiyo bazooyilanga kabagambide.
33 Ndizoopa kuti mumwayike aakati kazisi, ndizoosomona panga kuti limulwane alubo nyika yanu izooba tongo amyuunzi yanu izoonyonyoonwa.
34 “‘Aachiindi eecho, nyika izoobbadala masabata aayo mazuba woonse ngiinooli tongo. Aachiindi inywe nimunooli munyika yabasinkondonyokwe, nyika izoopumuna,* mbukunga yeelede kubbadala masabata aayo.
35 Izoopumuna mazuba woonse ngiinooli tongo nkaambo teeyakapumuna pe mumasabata aanu nimwakakkede mulinjiyo.
36 “‘Pesi aabo batafutuke, ndizoopa kuti myoyo yabo iyoowe munyika zyabasinkondonyina. Bazoochija nibamvwa musindo watu lipupulusigwa aaluuwo. Bazoochija aanga muntu uliikuchija panga mpawo bazoowa, pesi kakutakwe muntu ulikubaandilila.
37 Bazoolebana mbuli bantu balikuchija panga nikuba kuti taakwe ulikubaandilila pe. Tamuzookonzyi kukazya basinkondonyokwe.
38 Muzooloba aakati kazisi alubo nyika yabasinkondonyokwe izoomunyonyoona.
39 Aabo batasyaale bazoosiigwa kuti babole akaambo kakubisya kwanu. Kwaamba choonzyo, bazoobola akaambo kakubisya kwamawisi.
40 Bazoolyaambilila zibi zyabo azibi zyamawisi. Mukuyungizya, bazoozumina kuti teebakasyomeka pe kwiinda mukundikazya.
41 Mpawo andime ndakabakazya kwiinda mukubatola munyika yabasinkondonyina.
“‘Amwi aachiindi eecho, myoyo yabo iitapalwidwe* izoolibombya mpawo bazoobbadale zibi zyabo.
42 Mpawo ndizooyeeya chizuminano changu aJakkobo achizuminano changu a-Izakka alubo ndizooyeeya chizuminano changu a-Abbrahamu alubo ndizooyiyeeya nyika.
43 Nibakasiide nyika, nyika yakali kubbadala masabata aayo alubo yakakkede kayili tongo kabatawo alubo bakali kubbadala zibi zyabo nkaambo bakaka nzila zyangu zyakubeteka akuzonda milawu yangu.
44 Pesi nikuba kuti zyoonse zyachitika, nibanooli munyika yabasinkondonyina, tandizoobakakilaatu pe, nikuba kubatanda zyakuti balamana boonse. Nkaambo kuchita oobo, kulakonzya kutyola chizuminano changu andinywe nkaambo ndime Jehova Leza wanu.”
45 Kuti bagwasigwe, ndizooyeeya chizuminano nchindakapangana amasianyinakulu mbindakagwisya munyika ya-Ijipita zisi kazilangide, kuchitila kuti nditondeezye kuti ndime Leza wabo. Ndime Jehova.’”
46 Aaya ngiimalayilile, nzila zyakubeteka amilawu Jehova nzyaakabikka aakati kakwe ama-Israyeli muChilundu chaSinayi kwiinda muli Mozesi.
Makani Aamunsi
^ MuchiHebberu, “akuyoowa.”
^ MuchiHebberu, “Ndizoomucheba.” Bamwi bati, “Ndizoomukombweda.”
^ Naakuti, “bwatiibbi.”
^ Naakuti, “mukuba.”
^ Naakuti, “chakulya.”
^ MuchiHebberu, “kasamu kanu kachinkwa.” Kweelede kuti ootu twakali tusamu twakali kubelesegwa kulondola chinkwa.
^ Bbala lyachiHebberu lyakabelesegwa aawa, lilakonzya kweendelana aliti “mafumba” alubo lilakonzya kubelesegwa kwaamba chintu chisesemya.
^ Naakuti, “bweema bwazipayizyo zyanu tabuchinoondibotezyi pe.”
^ Naakuti, “izoobamba sabata.”
^ Naakuti, “myoyo yabo miyumu.”
