Levitikko 3:1-17
3 “‘Kuti chipo chakwe kachili chipayizyo chalumvwanano* alubo kalikucheeta kuzwa kung’ombe zyakwe kazitakwe ndaba kuti ngupule naakuti nimpwizi, weelede kweeta munyama uulikabotu kunembo lyaJehova.
2 Weelede kubikka kuboko kwakwe aamutwe wachipo chakwe alubo cheelede kujayilwa kumanjililo aatente lyakuswaanganina. Mpawo bana ba-Aroni bapayizi bazoosansiila ganzi lyacho mumabazu woonse aachipayililo.
3 Uleeta chipanzi chachipayizyo chalumvwanano kachili chipo chitentwa aamulilo kuli Jehova: luvumbula* amafuta woonse aazyungulukide mala
4 ansa zibili amafuta aali aafwiifwi anzizyo. Alubo ulagwisya mafuta aali aachini, aamwi ansa.
5 Bana ba-Aroni bazoochitenta aachipayililo kuti chisuke busi aamulilo aajulu aachipo chitentwa chili aajulu aankuni ziyaka mulilo. Nchipo chitentwa chili aabweema bununkilila* kuli Jehova.
6 “‘Kuti chipo chakwe nchayanda kupa Jehova kachili chipayizyo chalumvwanano, kayili mbelele naakuti mpongo, weelede kweeta pule naakuti mpwizi iilikabotu.
7 Kuti kalikweeta kagutu kachili chipo chakwe, weelede kukeeta kunembo lyaJehova.
8 Uzoobikka kuboko kwakwe aamutwe wachipo chakwe alubo cheelede kujayilwa kunembo lyatente lyakuswaanganina. Bana ba-Aroni bazoosansiila ganzi lyacho mumabazu woonse aachipayililo.
9 Uzoopa mafuta aachipayizyo chalumvwanano kaali chipo chitentwa aamulilo kuli Jehova. Uzoogwisya mafuta woonse aali kumuchila aafwiifwi amoongola, aluvumbula amafuta woonse aazyungulukide mala,
10 ansa zibili amafuta aali aafwiifwi anzizyo. Alubo uzoogwisya mafuta aali aachini aamwi ansa.
11 Mpawo mupayizi uzoochitenta aachipayililo kuti chisuke busi kachili chakulya,* nchipo chitentwa aamulilo kuli Jehova.
12 “‘Kuti chipo chakwe kayili mpongo, weelede kucheeta kunembo lyaJehova.
13 Uzoobikka kuboko kwakwe aamutwe wacho alubo cheelede kujayilwa kunembo lyatente lyakuswaanganina mpawo bana ba-Aroni beelede kusansiila ganzi lyacho mumabazu woonse aachipayililo.
14 Chipanzi ncheelede kweeta kachili chipo chitentwa kuli Jehova, cheelede kuba luvumbula amafuta woonse aazyungulukide mala,
15 ansa zibili amafuta aali aafwiifwi anzizyo. Alubo weelede kugwisya mafuta aali aachini aamwi ansa.
16 Mupayizi uzoozitenta aachipayililo kuti zisuke busi kazili chakulya, nchipo chitentwa aamulilo chili aabweema bununkilila.* Mafuta woonse ngaaJehova.
17 “‘Ngoyu mulawu wamumazyalani aanu woonse, mundawu zyanu zyoonse zyakukkala: Tamweelede kulya mafuta naakuti ganzi naba aaniini pe.’”
Makani Aamunsi
^ Naakuti, “chipayizyo chazipo zyaluumuno.”
^ Aaya mafuta aajisilidi aamala.
^ Naakuti, “bubotezya.”
^ MuchiHebberu, “chinkwa,” nkukwaamba chipanzi chaLeza chachipayizyo chalumvwanano.
^ Naakuti, “bubotezya.”
