Makani Aakalembwa aaLukka 20:1-47
20 Bumwi buzuba naakali kuyiisya bantu mutempele akwaambilizya makani mabotu, bapati babapayizi abalembi kabalaamwi abaalu, bakasika
2 mpawo bakati kulinguwe: “Tubuzye, waajana kuli manguzu aakuchita zintu eezi? Naakuti ngwani wakakupa manguzu aayo?”
3 Wakabasandula kati: “Andime ndilamubuzya mubuzyo mpawo mundisandule:
4 Kubbabbatizya nkwaakali kuchita Johane kwakazwa kujulu na, naakuti kubantu?”
5 Mpawo bakasaanguna kwaambuuzyania muli chabo-chabo kabati: “Kuti twati, ‘Kujulu,’ ulatubuzya kuti, ‘Nkamboonzi nimwakaleka kumusyoma?’
6 Pesi kuti twati, ‘Kubantu,’ bantu boonse balatutulula mabwe nkaambo boonse balasyoma kuti Johane wakali mupolofita.”
7 Nkinkaako, bakasandula kuti tabazi pe kuti kwakali kuzwa kuli.
8 Mpawo Jesu wakati kulimbabo: “Andime tandikoomubuzya pe kuti manguzu aakuchita zintu eezi ndaajana kuli.”
9 Mpawo wakasaanguna kubuzya bantu chikozyanisyo eechi chakuti: “Umwi mwaalumi, wakalima muunda wamisaansa mpawo wakawusiila balimi, mpawo wakayinka kunyika iili kule kwachiindi chilamfu.
10 Nichakaba chiindi chamasaansa, wakatuma muzike wakwe kubalimi kuti bakamupe imwi michelo yamumuunda wamisaansa. Nikuba oobo, balimi bakamuuma mpawo bakamutanda katakwe nchalaacho pe.
11 Mpawo wakatuma umwi muzike. Anguyooyu bakamuuma alubo bakamufubaazya* mpawo bakamutanda katakwe nchalaacho pe.
12 Nikuba oobo, wakatuma umwi wachitatu pesi anguyooyu bakamuchisa mpawo bakamuwaalila aanze.
13 Mpawo mwinimuunda wamisaansa wakati, ‘Ndichite biyeni? Ndilatuma mwanaangu uuyandwa. Amwi ooyu bazoomulemeka.’
14 Balimi nibakamubona bakabuzyania kuti: ‘Ooyu ngusikukona. Atumujaye kuchitila kuti lukono lube lwesu.’
15 Nkinkaako, bakamuwaalila aanze aamuunda wamisaansa mpawo bakamujaya. Nkinkaako, mwinimuunda wamisaansa uzoobachita biyeni balimi aaba?
16 Uzoosika ajaye balimi aabo mpawo muunda wamisaansa uzoowupa bamwi.”
Bantu nibakamvwa zintu eezi bakati: “Zili boobu tazyeelede kuchitika pe!”
17 Pesi wakabalangisisya mpawo wakati: “Aambaanzi makani aaya aalembedwe aakuti: ‘Ibbwe ndibakakaka bayaki, lyaba bbwe liyandikana lyaakkona’?*
18 Muntu woonse uuwida aabbwe eelyo, uzootyokooka. Ooyo nguliwida, lizoomuziya.”
19 Ku-awa njiyeeyo, balembi abapati babapayizi bakali kuyanda kumujata pesi bakayoowa bantu, nkaambo bakabona kuti wakali kwaamba mbabo muchikozyanisyo eechi.
20 Nibakamaninsya kumulangisisya, bakatuma bantu mbibakawula chakusisikizya kuti bakachitaanga baliluleme, kuchitila kuti bamujate amajwi aakwe mpawo bamutole kumfulumende akumweendelezi.
21 Mpawo bakamubuzya kuti: “Muyiisi, tulizi kuti zintu nzwaambuula anzuyiisya zilikabotu akuti tusaluuli pe pesi uyiisya nzila yaLeza kweendelana akasimpe:
22 Zilazumizigwa na amulawu kuti tubbadale mitelo kuli Kkesari, naakuti pe?”
23 Pesi wakabona lweeno lwabo mpawo wakati kulimbabo:
24 “Amunditondeezye dinari. Chifanikisyo eechi amajwi alembedwe aawa nzizyani?” Bakati: “NzizyaKkesari.”
25 Wakati kulimbabo: “Nkinkaako, zintu zyaKkesari amuzipe Kkesari pesi zintu zyaLeza amuzipe Leza.”
26 Bakakachilwa kumucha mumajwi aakwe kunembo lyabantu alubo bakagamba ansandulo yakwe mpawo bakawumuna.
27 Nikuba oobo, bamwi baSadusi, aabo baamba kuti taakwe kubusigwa kwabantu bafwide, bakasika mpawo bakamubuzya kuti:
28 “Muyiisi, Mozesi wakatulembela kuti, ‘Kuti mukulana wawumwi wafwa mpawo wasiya mwanakazi katakwe mwana, mwanikaakwe weelede kukwata mwanakazi ooyo mpawo azyalile mukulanaakwe bana.’
29 Kwakali bana bachaalumi bali musanu ababili bakazyedwe aamwi. Wakusaanguna, wakakwata mpawo wakafwa katakwe mwana.
30 Mpawo wachibili
31 awachitatu bakamukwata. Boonse kabali musanu ababili bakamukwata pesi bakafwa kabatakwe mwana pe anguwe.
32 Kumamanino, anguwe mwanakazi ooyo wakazoofwa.
33 Nkinkaako, bafwide baakubusigwa, mwanakazi ooyo uzooba wani? Nkaambo boonse kabali musanu ababili bakalimukwete.”
34 Mpawo Jesu wakati kulimbabo: “Bana bamubwiime bwazintu oobuno* balakwata akukwatwa,
35 pesi aabo bakabonwa kuti baleelela kujana bwiime bwazintu oobo, akubusigwa kuzwa kubafu, tabakwati pe naakuti kukwatwa.
36 Kwaamba choonzyo, tabachizoofwi lubo pe nkaambo banooli mbuli ngilozi alubo mbana baLeza kwiinda mukuba bana bakubusigwa.
37 Pesi kunkani yakubusigwa kwabafwide, naaba Mozesi wakaziyubununa mumakani aali atala achiteyo chamaamvwa naakayita Jehova* kuti ‘nguLeza wa-Abbrahamu aLeza wa-Izakka aLeza waJakkobo.’
38 NguLeza wabawumi kutali wabafwide pe nkaambo boonse mbawumi kulinguwe.”*
39 Bamwi balembi bakamusandula kuti: “Muyiisi, waamba kabotu.”
40 Nkaambo bakali baabuyoowa kumubuzya nuuba mubuzyo uumwi.
41 Mpawo wakababuzya kuti: “Nkamboonzi nibaamba kuti Kkristu mwana waDavida?
42 Nkaambo mubbuku lyaNtembawuzyo, Davida lwakwe wakati, ‘Jehova* wakati kuMwaami wangu, “Kkala kukuboko kwangu kwachilisyo
43 kusikila ndichite kuti basinkondonyokwe babe mbuli chilyatililo chamawulu aako.”’
44 Kuti Davida kamwiita kuti Mwaami, ani mwanaakwe biyeni?”
45 Bantu boonse nibakali kuswiilila, wakabuzya basikwiiya bakwe kuti:
46 “Amubachenjelele balembi bayandisya kweendeenda kabazweete zigogo zilamfu alubo bayanda kujuzigwa kumisika, bayandisya zyuuno zili kunembo* muzikombelo andawu zilemekwa loko kuchilalilo,
47 banyonyoona maanda aabamukabafu alubo bakomba nkombyo ndamfu kabayanda kubonwa aabantu. Bantu aaba bazoopegwa chisubulo chipati loko.”
Makani Aamunsi
^ Naakuti, “teebakamulemeka pe.”
^ MuchiGrikki, “waba mutwe waakkona.”
^ Naakuti, “bachiindi eechino.” Langa Bupanduluzi Bwamabala.
^ Langa Bupanduluzi Bwamabala.
^ Naakuti, “mumeso aakwe.”
^ Langa Bupanduluzi Bwamabala.
^ Naakuti, “zyuuno zilemekwa.”
