Makani mabotu aakalembwa aaMateyo 19:1-30
19 Jesu naakamaninsya kwaambuula zintu eezi, wakazwa kuGalili alubo wakasika kumigaano yaJudiya, mutala aaJodani.
2 Alubo makamu aabantu akamutobela mpawo wakaasilika nkukooko.
3 Mpawo baFarisi bakasika kulinguwe kabali aamakanze aakumusunka, mpawo bakabuzya kuti: “Zilazumizigwa na amulawu kuti mwaalumi aleke mwanakazi wakwe akaambo kakaambo koonse?”
4 Mpawo wakasandula kuti: “Teemwakabala na kuti ooyo wakabalenga kumatalikilo, wakalenga mwaalumi amwanakazi
5 mpawo wakati: ‘Akaambo kakaambo aaka, mwaalumi uzoosiya wisi abanyina mpawo akakatile kumwanakazi wakwe alubo aaba babili bazooba mubili uumwi’?
6 Nkukwaamba kuti tabachili babili pe, pesi baba mubili uumwi. Nkinkaako, eezyo Leza nzyaasungaamwi mujokwe, kutabi muntu uuzyaanzaanisya pe.”
7 Bakati kulinguwe: “Nkamboonzi Mozesi naakalayilila kuti mwanakazi apegwe lugwalo lwakumutanda mpawo alekwe?”
8 Wakati kulimbabo: “Mozesi wakamuzumizya kuti muleke banakazi banu akaambo kakuti muli aamyoyo miyumu, pesi teembukwakabede pe kuzwa kumatalikilo.
9 Ndimubuzya kuti, kufumbwa mwaalumi uuleka mwanakazi wakwe, kutali akaambo kabwaamu,* mpawo wakwata uumbi, uchita bumambi.”
10 Mpawo basikwiiya bakati kulinguwe: “Kuti makani aamwaalumi amwanakazi wakwe kaali oobu, zilikabotu kutakwata.”
11 Wakati kulimbabo: “Teebantu boonse pe bakonzya kutobelezya majwi aaya, pesi mbaabo kupela bali aachipo eecho.
12 Nkaambo kuli bamwi batakwati akaambo kakuti bakazyalwa kabali mbuboobo, alubo kuli bamwi batakwati akaambo kakuti bakachitwa oobo abamwi bantu, alubo kuli bamwi batakwati akaambo kaBwaami bwakujulu. Ooyo uukonzya kukkala katakwete, akkale kali mbuboobo.”
13 Mpawo bana baniini bakeetwa kulinguwe kuti ababikke maboko akuti abakombele, pesi basikwiiya bakabakalalila.
14 Nikuba oobo, Jesu wakati: “Amubaleke bana baniini, muteezyi pe kubakasya kuti baze kulindime, nkaambo Bwaami bwakujulu mbwabantu bali boobu.”
15 Wakababikka maboko, mpawo wakazwa kundawu eeyo.
16 Lino bona, umwi muntu wakasika kulinguwe, mpawo wakati: “Muyiisi, nziizili zintu zibotu nzindeelede kuchita kuti ndijane buumi butamani?”
17 Wakati kulinguwe: “Nkamboonzi nundibuzya atala azintu zibotu? Kuli muntu uumwi biyo mubotu. Pesi kuti kuyanda kujana buumi, bamba milawu, utaleki pe.”
18 Mpawo muntu ooyo wakati kulinguwe: “Milawu iili?” Mpawo Jesu wakati: “Utajayi, utachiti bumambi, utabbi, utapi bukamboni bwakubeja,
19 lemeka wuso abanyoko, alubo weelede kuyanda simayakilane wako mbuli mbuliyanda.”
20 Mpawo mulombe ooyo wakati kulinguwe: “Ndilayibamba milawu yoonse eeyi, niinzi chimwi chasyaala?”
21 Jesu wakati kulinguwe: “Kuti kuyanda kuba muntu uumaninide, yinka ukawuzye zintu zyako, mpawo upe bafwaba, mpawo ulaba aabunoti kujulu alubo nwaamana, uze ube mutobeli wangu.”
22 Mulombe ooyo naakamvwa oobo, wakeenda kawuside nkaambo wakali aazintu zyiingi.
23 Mpawo Jesu wakati kuli basikwiiya bakwe: “Kwaamba choonzyo, ndimubuzya kuti, chizooba chintu chiyumu loko kuti muntu uunotede akanjile muBwaami bwakujulu.
24 Alubo ndimubuzya kuti, nkuuba loko kuti nkamela yiinde muliso lyanaliti kwiinda kuti muntu uunotede anjile muBwaami bwaLeza.”
25 Basikwiiya nibakamvwa makani aaya, bakagamba loko mpawo bakati: “Ani mpo ngwani uukonzya kufutulwa?”
26 Jesu wakabalangisisya, mpawo wakati kulimbabo: “Kubantu eezi tazikonzeki pe, pesi kuli Leza, zintu zyoonse zilakonzeka.”
27 Mpawo Petro wakasandula kuti: “Bona! Twakasiya zintu zyoonse mpawo twakutobela, ani tuzoojanaanzi?”
28 Jesu wakati kulimbabo: “Kwaamba choonzyo, ndimubuzya kuti, kuchiindi zintu nizitazoolengululwe, Mwanaamuntu aakukkala aachuuno chakwe chabwaami chabulemu, inywe nimwakanditobela muzookkala aazyuuno zili 12 zyabwaami, kamulikubeteka misyobo iili 12 ya-Israyeli.
29 Alubo muntu woonse wakasiya maanda naakuti bakulana naakuti banike naakuti bachizi naakuti wisi naakuti banyina naakuti bana naakuti myuunda akaambo kazina lyangu, uzoozijana kazyiindulwidwe tuli 100 alubo uzookona buumi butamani.
30 “Pesi biingi bakusaanguna bazooba bakumamanino alubo bakumamanino bazooba bakusaanguna.
Makani Aamunsi
^ ChiGrikki, por·nei′a. Langa Bupanduluzi Bwamabala.
