Milimu yaBaapostoli 12:1-25
12 Kuchiindi eecho, mwaami Herodi wakasaanguna kupenzya bamwi bamumbungano.
2 Wakajaya Jakkobo mukulana* waJohane apanga.
3 Herodi naakabona kuti eezi zyababotezya maJuda, wakayinka lubo waakusunga Petro. (Eezi zyakachitika mumazuba aaPobwe lyaZinkwa Zitakwe Bumena.)
4 Wakamusunga wamubikka mujele mpawo wakasala tubunga tune twamasoja twakali kuchinchaana kumulinda. Kabunga kamwi akamwi kakali aamasoja aane. Makanze aakwe akali aakumweeta kubantu* Pasika kayili yayinda.
5 Nkinkaako, Petro wakakkala mujele, pesi mbungano yakali kumukombela kuli Leza amoyo woonse.
6 Herodi naakali waba aafwiifwi kumugwisya mujele, mansiku aayo, Petro wakalilede aakati kamasoja aabili, kaangidwe aancheni zibili. Alubo kumulyango, kwakali balindi bakali kulinda jele.
7 Lino bona, ngilozi yaJehova* yakaliimvwi mpawaawo, mpawo mumuni wakamweka muchitookesi. Ngilozi yakamuuma-wuma yamubusya kayiti: “Fwambaana, buka.” Mpawo ncheni zyakaloka kumaboko aakwe.
8 Mpawo ngilozi yakati: “Zwaata zigogo, uzwaate amanyatela.” Wakachita oobo. Mpawo kumamanino yakati: “Zwaata chigogo chako chaajulu, unditobele.”
9 Petro wakazwa muchitookesi kayabutobela ngilozi. Nikuba oobo, taakazi pe kuti zintu eezi zyakali kuchitwa aangilozi nzyachoonzyo, pesi wakali kuyeeya kuti ulikubona chilengaano.
10 Nibakayinda kabunga kakusaanguna akachibili kamasoja aakali kulinda, bakasika aageedi lyansimbi litola mumuunzi. Geedi eeli lyakajulika alilikke. Nibakazwa, bakakunuka aawumwi mugwagwa. Mpawo ngilozi yakamusiya mpawaawo.
11 Naakabona zyakali kuchitika, Petro wakati: “Lino ndaziba choonzyo, kuti Jehova* watumide ngilozi yakwe kuti izoondivune mukuboko kwaHerodi akuzintu zyoonse maJuda nzibakali kulangilila kuti zilachitika.”
12 Naakabona zintu eezi, wakayinka kung’anda yaMariya banyina aaJohane, ooyo wakali kutegwa Makko, ooko basikwiiya biingi nkubakabungene kabali kukomba.
13 Naakakonkomona aageedi, umwi musimbi mubelesi uutegwa Roda, wakasika kuti azoobone kuti ngwani wakali kukonkomona.
14 Naakamvwa kuti jwi eelyo ndilya Petro, wakabotelwa loko zyakuti taakalijula pe geedi, pesi wakachijaanina mung’anda waakubabuzya kuti Petro uliimvwi aageedi.
15 Mpawo bakati kulinguwe: “Ulipengede!” Pesi wakaliswini kwaamba oobo. Mpawo bakasaanguna kwaamba kuti: “Ningilozi yakwe.”
16 Pesi Petro wakaliimvwi mpawaawo kalikukonkomona. Nibakajula mulyango, bakamubona mpawo bakagamba loko.
17 Pesi wakabawumuzya kwiinda mukutambika kuboko, mpawo wakababuzya buzwide, Jehova* mbaakamugwisya mujele alubo wakati: “Zintu eezi amukazibuzye Jakkobo abakombima.” Mpawo wakazwa mung’anda waya kuliimwi ndawu.
18 Nibwakacha, masoja bakakataazikana loko kuti Petro waya kuli.
19 Herodi wakamuyanduula anzila zyoonse mpawo naakamubula, wakabuzya-buzya balindi mpawo wakalayilila kuti bakapegwe chisubulo. Mpawo Petro wakazwa kuJudiya wakunuka waya kuKkesariya, waakukkala nkuko kwamazuba.
20 Herodi wakalibanyemenede* bantu bakuTire abakuSidoni. Nkinkaako, bakaza kulinguwe kabali aamuzeezo uumwi alubo bakakombelezya Bblasto, mwaalumi wakali kulanga-langa zintu mung’anda yamwaami, kuti abagwasye kuba aaluumuno anguwe nkaambo nyika yabo yakali kujana chakulya kuzwa kunyika yamwaami.
21 Mubuzuba bwakasalidwe, Herodi wakazwaata chigogo chakwe chabwaami, wakkala aachuuno chakwe chakubetekela mpawo wakasaanguna kwaambuula kubantu.
22 Mpawo bantu bakabungene bakasaanguna koompolola kabati: “Eeli ndijwi lyaleza, teelyamuntu pe!”
23 Aachiindi nchicheecho, ngilozi yaJehova* yakamuuma nkaambo taakapa Leza bulemu mpawo wakaligwa aankonye, wafwa.
24 Pesi jwi lyaJehova* lyakayinkilila kunembo kumwayika akuvula.
25 Bbanabbasi aSawulu, nibakamaninsya mulimu wakugwasya bakombinyina bakuJerusalema, bakabweeda mpawo bakayinkaamwi aJohane ooyo uutegwa Makko.
Makani Aamunsi
^ ChiGrikki tachitondeezyi pe kuti ngwani wakali mupati.
^ Naakuti, “akumweeta aanze kuti azoobetekwe.”
^ Langa Bupanduluzi Bwamabala.
^ Langa Bupanduluzi Bwamabala.
^ Langa Bupanduluzi Bwamabala.
^ Naakuti, “wakali kuyanda kubalwana.”
^ Langa Bupanduluzi Bwamabala.
^ Langa Bupanduluzi Bwamabala.
