Milimu yaBaapostoli 2:1-47
2 Mubuzuba bwaPobwe lyaPentekkoste, boonse bakalaamwi aandawu iimwi.
2 Muchiindi chifwiifwi biyo, kwakaba musindo uuzwa kujulu, uuli mbuli kuunga kwaguwo pati mpawo wakazula ng’anda yoonse mubakakkede.
3 Bakabona tulilo tuyaka tuli mbuli tulimi. Tulilo ootu twakasansaana mpawo twakakkala aali umwi awumwi wabo.
4 Mpawo boonse bakazula muuya uusalala alubo bakasaanguna kwaambuula mumilaka iisiyene-siyene, kweendelana amuuya mbuwakali kupa kuti bakonzye kwaambuula.
5 Kuchiindi eecho, maJuda bakali kuyoowa Leza bazwa muzisi zyoonse zili aanyika, bakali kukkala muJerusalema.
6 Nikwakaba musindo ooyu, nkamu yabantu yakabungana alubo yakagamba nkaambo umwi awumwi wabo wakabamvwa kabalikwaambuula mulaka wakwe.
7 Kwaamba choonzyo, bantu aaba bakagamba loko mpawo bakati: “Amubone, bantu boonse aaba balikwaambuula tabazwi kuGalili na?
8 Ani mpo zyeenda biyeni kuti umwi awumwi wesu amvwe mulaka wakwe?
9 TobaPatiya, tobaMidiya, toba-Elamu, abantu bakuMesopotamiya, bakuJudiya abakuKkapadokkiya, bakuPonto abazwa muchilikiti cha-Asiya,
10 bakuFuligiya abakuPamfiliya, baku-Ijipita abamuzilawu zyakuLibbiya zili aafwiifwi aKkurene, beenzu bazwa kuRoma, maJuda abaabo bakasandukila kubukombi bwamaJuda,
11 tobaKkrete atoba-Arabbiya, tulikubamvwa kabalikwaambuula zintu zigambya atala aLeza mumilaka yesu.”
12 Kwaamba choonzyo, boonse bakagamba alubo bakali kubuzyania kuti: “Zyaambaanzi eezi?”
13 Nikuba oobo, bamwi bakali kubafubaazya kabati: “Bakolwa wayini.”*
14 Pesi Petro wakayimikila kalaamwi abali Kkumi Awumwi mpawo wakaambuula aambabo ajwi pati kati: “Nibaalumi bamuJudiya andinywe moonse nimukkala muJerusalema, amuswiilisisye alubo mumvwisisisye nchaamba majwi aangu.
15 Bantu aaba tabakoledwe pe mbuli mbumuyeeyela nkaambo zichili kuma 9 kuseeni.*
16 Pesi nzezi zyakaambwa kakubelesegwa mupolofita Joweli naakati:
17 “Leza wati, ‘Kumazuba aakumamanino, ndizootila muuya wangu kubantu bamisyobo yoonse mpawo bana banu balombe abasimbi bazoopolofita, alubo balombe bali aakati kanu bazoobona zilengaano amanene aali aakati kanu azoolota ziloto,
18 nikuba kubazike bangu bachaalumi abachanakazi ndizootila muuya wangu aalimbabo mumazuba aayo alubo bazoopolofita.
19 Ndizoochita zigambyo kujulu azitondeezyo aanyika, nkukwaamba ganzi, mulilo, amayoba aabusi.
20 Zuba lizoochinchwa kuti lisiye, amweezi uzoochinchwa kuti ube ganzi, kabutanasika buzuba bupati bwaJehova* alubo bugambya.
21 Alubo muntu woonse wiita zina lyaJehova* uzoofutulwa.’”
22 “Nibaalumi bamu-Israyeli, amuswiilile majwi aaya: Jesu wakuNazareta, wakatondeezegwa aantanganana kulindinywe aLeza kwiinda mumilimu iigambya azigambyo azitondeezyo nzyaakachita Leza aakati kanu kabelesya nguwe, mbuli mbumuzi.
23 Leza wakakanza alubo wakaziba kakuchili chiindi kuti mwaalumi ooyu mwakali kuzoomutola kuli basizibi kuti mumugankamine aachisamu akumujaya.
24 Pesi Leza wakamubusya kwiinda mukumwaangununa kumachise aalufu,* nkaambo teezyakali kuchita pe kuti ayinkilile kunembo kajiswi aalufu.*
25 Nkaambo Davida naamba atala anguwe, waamba kuti: ‘Jehova* ulikunembo lyangu chiindi choonse nkaambo ulikukuboko kwangu kwachilisyo kuti nditazungaanisigwi pe.
26 Nkinkaako, moyo wangu wakabotelwa alubo lulimi lwangu lwakabotelwa loko. Ndinookkede kandili aabulangilizi,
27 nkaambo tuzoondisiyi muKabanda* alubo tuzoolekeli uusyomeka wako kuti abole.
28 Wandizibya nzila zyabuumi, alubo uzoopa kuti ndikondwe loko kunembo lyako.’
29 “Nibaalumi, nibakombima, amundizumizye ndaambuule kandaangunukide atala asianene Davida. Davida wakafwa, wazikkwa alubo kabanda kakwe mpukachili aakati kesu ambulisunu.
30 Pesi akaambo kakuti wakali mupolofita alubo wakalizi kuti Leza wakamusyomezya kwiinda mukukonka, kuti umwi waluzubo lwakwe uzoomukkazika aachuuno chakwe chabwaami,
31 wakabona kakuchili chiindi alubo wakaambuula atala akubusigwa kwaKkristu kuti taakasiigwa muKabanda* alubo mubili wakwe teewakabola pe.
32 Leza wakamubusya ooyu Jesu alubo toonse tuli bakamboni bamakani aaya.
33 Nkinkaako, akaambo kakuti wakasumpwidwa kukuboko kwaLeza kwachilisyo akutambula muuya uusalala ngwaakasyomezya kuzwa kuli Taata, lino wawutila aalindiswe mbuli mbumubwene akumvwa.
34 Nkaambo Davida taakatanta kuya kujulu pe, pesi we lwakwe wakati, ‘Jehova* wakati kuMwaami wangu: “Kkala kukuboko kwangu kwachilisyo,
35 kusikila ndichite kuti basinkondonyokwe babe mbuli chilyatililo chamawulu aako.”’
36 Nkinkaako, bantu boonse bamung’anda ya-Israyeli abazibe choonzyo kuti, Leza wakapa kuti ooyu Jesu ngumwakagankamina aachisamu, abe Mwaami aKkristu.”
37 Nibakamvwa zintu eezi, bakayaswa moyo mpawo bakabuzya Petro abamwi baapostoli kuti: “Nibaalumi, nibakombima, tweelede kuchitaanzi?”
38 Petro wakati kulimbabo: “Amusanduke alubo umwi awumwi wanu abbabbatizigwe muzina lyaJesu Kkristu kuchitila kuti zibi zyanu zilekelelwe mpawo mulatambula chipo chamuuya uusalala chitabbadalisigwi pe.
39 Nkaambo chipo eechi chakasyomezegwa ndinywe abana banu, abantu boonse bakkala kule, abamwi boonse Jehova* Leza wesu mbakonzya kwiita kuti baze kulinguwe.”
40 Nkinkaako, wakaamba amwi majwi miingi kuti abape bukamboni buzwide alubo wakali kubasungwaazya kati: “Amulitantamuke zyalani eeli lipambanikide, kuchitila kuti mufutulwe.”
41 Nkinkaako, aabo bakatambula majwi aakwe kababoteledwe bakabbabbatizigwa alubo mubuzuba oobo kwakayungizigwa bantu basika ku 3 000.
42 Alubo bakali kulipeda kuzintu baapostoli nzibakali kuyiisya, bakali kubunganaamwi,* bakali kulyaamwi alubo bakali kukombaamwi.
43 Kwaamba choonzyo, bantu boonse bakasaanguna kuyoowa alubo baapostoli bakasaanguna kuchita zigambyo azitondeezyo zyiingi.
44 Bantu boonse bakaba basyomi, bakalaamwi alubo bakali kwaabana zintu zyoonse nzibakalaazyo.
45 Alubo bakali kuuzya myuunda azintu nzibakalaazyo, mpawo mali njibakali kujana bakali kwaabila bamwi boonse kweendelana anzyaakali kuyandikana umwi awumwi.
46 Buzuba abuzuba, bakali kubunganaamwi mutempele kabali aamuzeezo uumwi, alubo bakali kulya mumyuunzi iisiyene-siyene kabaabana chakulya chabo amoyo woonse kababoteledwe loko,
47 kabalikutembawula Leza alubo kabayandwa abantu boonse. Alubo buzuba abuzuba Jehova* wakali kuyungizya bamwi bakali kufutulwa.
Makani Aamunsi
^ Naakuti, “wayini mpya.”
^ MuchiGrikki, “lino ni-awa yachitatu.”
^ Langa Bupanduluzi Bwamabala.
^ Langa Bupanduluzi Bwamabala.
^ Zilakonzya kwaamba kuti, “kutukole twalufu.”
^ Naakuti, “tukole ootu tukkale katumwaangide chiindi choonse.”
^ Langa Bupanduluzi Bwamabala.
^ Naakuti, “muHadesi.” Langa Bupanduluzi Bwamabala.
^ Naakuti, “muHadesi.” Langa Bupanduluzi Bwamabala.
^ Langa Bupanduluzi Bwamabala.
^ Langa Bupanduluzi Bwamabala.
^ Naakuti, “kwaabana zintu nzibakalaazyo.”
^ Langa Bupanduluzi Bwamabala.
