Myeelwe 32:1-42
-
Ndawu zyakukkala kubuzwezuba kwaJodani (1-42)
32 Bana baRubbeni abana baGadi bakali aalubono lwiingi loko mpawo bakabona kuti ndawu yaJazeri aGiliyadi zyakali ndawu zibotu zyalubono.
2 Nkinkaako, bana baGadi abana baRubbeni bakayinka kuli Mozesi akuli Eliyezari mupayizi akuli basilutwe bambungano mpawo bakati:
3 “Chilawu cha-Ataroti, Dibboni, Jazeri, Nimura, Heshibboni, Eliyela, Sebbamu, Nebbo aBbeyoni,
4 nzilawu Jehova nzyaakazunda kunembo lyambungano yama-Israyeli, nindawu zibotu loko zyalubono alubo babelesi bako bali aalubono lwiingi.”
5 Bakayinkilila kunembo kwaamba kuti: “Kuti watufwida luzyalo, nyika eeyi ayibe njiyo iipegwa babelesi bako kaluli lukono. Utachiti kuti tuzubuke Mulonga waJodani.”
6 Mpawo Mozesi wakati kubana baGadi akubana baRubbeni: “Muli aachoonzyo na chakuti muyanda kuti babbululu banu bayinke kunkondo inywe musyaale kamukkede mpawaawa?
7 Nkamboonzi nimuyanda kupa kuti ma-Israyeli bamane manguzu mpawo bakachilwe kuzubukila munyika Jehova njayanda kubapa?
8 Nzizyo loko zyakachitwa aamawuso, chiindi nindakabatuma kuzwa kuKkadeshi-bbaneya kuti bakalange-lange nyika.
9 Nibakaya kuKalonga ka-Eshikkolo akubona nyika, bakapa kuti ma-Israyeli bamane manguzu kuti batanjili munyika Jehova njakali kuyanda kubapa.
10 Jehova wakanyema loko mubuzuba oobo zyakuti wakakonka kati:
11 ‘Baalumi bakazwa mu-Ijipita bali aaminyaka iili 20 kaziya kujulu, tabazooyiboni pe nyika njindakakonka kuli Abbrahamu, kuli Izakka akuli Jakkobo, nkaambo teebakandiswiilila amoyo woonse pe—
12 kunze kwaKkalebbu mwana waJefune muKkenizi aJoshuwa mwana waNuni, nkaambo bakaswiilila Jehova amoyo woonse.’
13 Nkinkaako, bukali bwaJehova bwakasikila ma-Israyeli mpawo wakapa kuti beendengane munkanda kwaminyaka iili 40 kusikila nilyakamana zyalani lyoonse lyakali kuchita zintu zibi mumeso aaJehova.
14 Lino inywe nibasizibi, mwaabuchita mbuli mawuso, nkaambo mulikupa kuti bukali bwaJehova buyungizye kuma-Israyeli.
15 Kuti mwaleka kumutobela, kwaamba choonzyo, uzoobasiya lubo munkanda mpawo muzoopa kuti bantu boonse aaba banyonyooke.”
16 Nikwakayinda chiindi, bakayinka lubo kulinguwe mpawo bakati: “Tuzumizye tuyake mabondo aamabwe aalubono lwesu amyuunzi yabana besu aano.
17 Pesi iswe tulayinkilila kunembo katulibambilide kulwana alubo tuzooyinka kunembo lyama-Israyeli kusikila tukabasisye aandawu yabo, bana babo nibanookkede mundawu zikwabililidwe kabakwabilidwe kubantu bakkala munyika eeyo.
18 Tatuzoobweedi pe kumaanda eesu, kusikila mu-Israyeli umwi awumwi wajana nyika yakwe kayili lukono.
19 Nkaambo tatukoopegwa lukono aamwi ambabo mutaleeliya aaJodani akuli zimwi ndawu, mbukunga iswe twalutambula kale lukono lwesu kubbazu lyakubuzwezuba aaJodani.”
20 Mozesi wakabasandula kati: “Kuti umwi awumwi wanu wachita zitobela, walibambila kuyoolwana nkondo kunembo lyaJehova
21 akuzubuka Jodani kunembo lyaJehova aachiindi natatande basinkondonyina kunembo lyakwe
22 kusikila nyika niitazundwe kunembo lyaJehova, mulakonzya kubweeda alubo tamuchinoolikwe mulandu pe kunembo lyaJehova a-Israyeli. Kuzwa waawo, nyika eeyi izooba lukono lwanu kunembo lyaJehova.
23 Pesi kuti teemwachita oobo, munooli mwabisizya Jehova. Akaambo kazeezi, amuzibe kuti chibi chanu chizoomutobela.
24 Nkinkaako, mulakonzya kuyakila bana banu myuunzi akuyakila zivuubwa zyanu mabondo, pesi mweelede kuchita nzimwasyomezya.”
25 Bana baGadi abana baRubbeni bakati kuli Mozesi: “Tubabelesi bako tulachita mbuli mbalikwaamba simaleleesu.
26 Bana besu, banakazi besu, lubono lwesu azivuubwa zyesu zyoonse zizoosyaala nkukooko kumyuunzi yaGiliyadi,
27 pesi babelesi bako bazoozubukila mutaleeliya, nkukwaamba muntu umwi awumwi uulibambilide kulwana nkondo kunembo lyaJehova, mbuli simaleleesu mbalikwaamba.”
28 Nkinkaako, Mozesi wakapa malayilile atala ambabo kuli Eliyezari mupayizi, kuli Joshuwa mwana waNuni akuli basilutwe bamaanda aamawisi aamisyobo yama-Israyeli.
29 Mozesi wakati kulimbabo: “Kuti bana baGadi abana baRubbeni bazubuka Mulonga waJodani andinywe, muntu umwi awumwi uulibambilide kulwana nkondo kunembo lyaJehova anyika niitazundwe kunembo lyanu, mpimpawo mpumutabape nyika yaGiliyadi kayili lukono.
30 Pesi kuti teebalibambila kulwana akuti teebayanda kuzubukila mutaleeliya andinywe, balakkala aandinywe munyika yaKkenani.”
31 Nibakamvwa oobo, bana baGadi abana baRubbeni bakasandula kuti: “Nzyaamba Jehova kubabelesi bako, nzizyo nzitutachite.
32 Tulalibambila kulwana mpawo tuzubuke kunembo lyaJehova, tuye kunyika yaKkenani, pesi lukono ndututakone, lunooli mutaleelino aaJodani.”
33 Nkinkaako, Mozesi wakapa bana baGadi abana baRubbeni ahafu yamusyobo waManase, mwana waJosefa, bwaami bwaSihoni mwaami wama-Amori abwaami bwa-Ogi mwaami waBbashani, nkukwaamba nyika amyuunzi iili muzilawu eezyo kuswaanizya amyuunzi iizyungulukide ndawu eeyo.
34 Bana baGadi bakayaka* Dibboni, Ataroti, Arowa,
35 Atiroti-shofani, Jazeri, Jogibbeha,
36 Bbeti-nimura aBbeti-harani, myuunzi iikwabilidwe alubo bakayaka mabondo aamabwe aamatanga aabo.
37 Bana baRubbeni bakayaka Heshibboni, Eliyela, Kkiriyatayimu,
38 Nebbo aBbaala-meyoni—mazina aaya akachinchwa—aSibbima alubo bakasaanguna kuchincha mazina aamyuunzi njibakayaka.
39 Bana baMakkiri mwana waManase bakaya kukulwana Giliyadi mpawo bakayizunda alubo bakatanda ma-Amori bakali mumo.
40 Nkinkaako, Mozesi wakapa Makkiri mwana waManase ndawu yaGiliyadi alubo wakasaanguna kukkala mumoomo.
41 Mpawo Jayiri mwana waManase wakabalwana, wabweza tuunzi twabo twamatente alubo wakasaanguna kutwiita kuti Havoti-jayiri.*
42 Nobba wakaya kukulwana mpawo wakazunda Kkenati amyuunzi yayo miniini* mpawo wakayuuzika zina lyakwe lyakuti Nobba.
Makani Aamunsi
^ Naakuti, “bakayakulula.”
^ Nkukwaamba kuti, “Tuunzi Twamatente TwaJayiri.”
^ Naakuti, “iizyungulukide.”
