Zefaniya 1:1-18
1 Ndeli jwi lyaJehova lyakasikila Zefaniya* mwana waKkushi mwana waGedaliya mwana wa-Amariya mwana waHezekkiya mumazuba aaJosiya mwana wa-Amoni mwaami waJuda:
2 “Ndizoozikukulula chakumaninina zintu zyoonse zili aanyika,” mbaamba Jehova.
3 “Ndizookukulula bantu abanyama.
Ndizookukulula bayuni bawuluka mujulu abaswi bamulwizi,Azilebyo* kuswaanizya abantu babi;Ndizoogwisya bantu bali aanyika,” mbaamba Jehova.
4 “Ndizootandabika kuboko kwangu kuti ndilwane JudaNdizoolwana bantu boonse bakkala muJerusalema,Alubo mundawu eeyi, ndizoonyonyoona zintu zyoonse zyakasyaala zyaBbaala,Mazina aabapayizi babaleza bakuli zimwi zisi kuswaanizya abamwi bapayizi,
5 Abaabo bakotamina makamu aakujulu kabali aatululi twamaanda,Abaabo bakotamina Jehova akukonkezya kuti banoosyomeka kulinguweKumwi kabakonkezya kuti banoosyomeka akuli Malikkamu;
6 Abaabo baleka kutobela JehovaAabo batayanduuli Jehova nikuba kubuzya makani kulinguwe.”
7 Amuumune kunembo lyaMwaami Singuzuzyoonse Jehova, nkaambo buzuba bwaJehova buli aafwiifwi.
Jehova wabamba chipayizyo; wabasalazya aabo mbaatamba.
8 “Mubuzuba bwachipayizyo chaJehova ndizoobabeteka basilutwe,Bana bamwaami, abaabo boonse bazwaata zigogo zyakuli zimwi nyika.
9 Mubuzuba oobo ndizoobeteka bantu boonse batanta aabbimbili,*Aabo bazuzya kulwana alweeno mung’anda yasimalelo wabo.
10 Mubuzuba oobo,” mbaamba Jehova,“Kuzoomvwikka koompolola kwakulila kuzwa kuGeedi lyaBaswi,Koomoka kulila kuzwa kuNdawu Mpya yamuunzi,Akukolomoka kupati kuzwa kutulundu.
11 Amoomoke inywe nibantu bakkala muMakkiteshi,*Nkaambo basikuuzya boonse banyonyoonwa,*Aabo boonse bapima nsiliva banyonyoonwa.
12 Kuchiindi eecho ndizooyanduulisisya amalambe muJerusalema,Ndizoobabeteka aabo balyiibide, mumyoyo yabo baamba kuti,‘Jehova tazoochiti chintu chibotu pe alubo tazoochiti chintu chibi pe.’
13 Bunoti bwabo buzoobwezegwa aabamwi bantu amaanda aabo azoonyonyoonwa.
Bazooyaka maanda, pesi tabazookkali pe mulingawo;Bazoolima myuunda yamisaansa, pesi tabazooyinywi pe wayini iizwa kulinjiyo.
14 Buzuba bupati bwaJehova buli aafwiifwi!
Buli aafwiifwi, bulikuza chakufwaambana!*
Mudumo wabuzuba bwaJehova ulayoosya.
Mubuzuba oobo silumamba uzoowompolola kulila.
15 Buzuba oobo mbuzuba bwabukali,Mbuzuba bwamapenzi abwamakataazyo,Mbuzuba bwaguwo lili aamvula mpati abwalunyonyooko,Mbuzuba bwamudima abwakusiya,Mbuzuba bwamayoba abwamudima uusiya mbi,
16 Mbuzuba bwamweembo abwaloompololo lwankondo,Akulwana myuunzi iikwabilidwe akulwana ngazi zyamumakkona zilamfu.
17 Ndizoopa kuti bantu babe mumapenzi,Alubo bazooyenda mbuli boofu,Nkaambo nguJehova ngubabisizya.
Ganzi lyabo lizotilwa mbuli lusuko,Anyama yabo* mbuli mafumba.
18 Nsiliva yabo niiba ngolida yabo tayizoobafutuli pe mubuzuba bwabukali bwaJehova;Nkaambo nyika yoonse izoonyonyoonwa aamulilo wabusungu bwakwe,Nkaambo uzooyeta lunyonyooko, kwaamba choonzyo, lunyonyooko luyoosya, kuli baabo boonse bakkala aanyika.”
Makani Aamunsi
^ Nkukwaamba kuti, “Jehova Wasisa (Wabunganizya).”
^ Kulakonzeka kuti nzintu naakuti michito iili aachakuchita akukomba zibumbwa.
^ kulakonzeka kuti ndibbimbili aakkala chuuno chamwaami.
^ Kulakonzeka kuti eeyi nindawu yamuJerusalema iili aafwiifwi aGeedi lyaBaswi.
^ Naakuti, “bawumuzigwa”
^ Naakuti, “buzabuchijaana.”
^ MuchiHebberu, “Amala aabo.”
