Zefaniya 3:1-20
3 Uli aapenzi muunzi uupapila, uusofweede, uudyaaminina!
2 Teewakaswiilila jwi; teewakazumina kulayigwa.
Teewakasyoma muli Jehova pe; teewakaswena aafwiifwi aLeza wawo.
3 Basilutwe bawo bali mulinguwo mbalavu bavuluma.
Babetesi bawo mbaawumpe bamansiku;Tabasiyi nichiba chifuwa chakukukunya kusika kuseeni.
4 Bapolofita bawo tabalemeki pe, mbampelenge.
Bapayizi bawo basofwaazya zintu zisalala;Batyola mulawu.
5 Jehova uliluleme aakati kamuunzi; tachiti zintu zitaluleme pe.
Buzuba abuzuba kuseeni ulazibya mbeta zyakwe,Eezyo zili mbuli mumuni wazuba uutaleki kuba.
Pesi muntu uutaluleme takwe bweeme pe.
6 “Ndakanyonyoona zisi; ngazi zyazyo zyamumakkona zyakanyonyoonwa.
Ndakanyonyoona migwagwa yazyo, zyakuti taakwe muntu wakachili kwiinda mulinjiyo.
Myuunzi yazyo yakasyaala kaali matongo, kamutachikwe muntu, kakutachikwe uukkala mumo.
7 Ndakati, ‘Kwaamba choonzyo, uzoondiyoowa uzumine kulayigwa,’*
Kuchitila kuti ndawu yawo yakukkala itanyonyoonwi pe—Ndizoomubeteka* akaambo kazintu zyoonse eezi.
Pesi bakayindilila biya kuchita bubi.
8 ‘Nkinkaako, amukkale kamundilindila,’ mbaamba Jehova,‘Kusikila mubuzuba mbundizoonyampuka kuti ndibweze zintu nzindazunda kuli basinkondoma,*Nkaambo ndikanzide kuti ndizibunganizye aamwi zisi, ndaabunganizye aamwi maami,Kuti zisi ndizitile bukali bwangu, kunyema kwangu koonse kuyaka mbuli mulilo;Nkaambo nyika yoonse izoonyonyoonwa aamulilo wabusungu bwangu.
9 Nkaambo kuchiindi eecho, ndizoochincha mulaka wabantu kuti ube mulaka uusalala,Kuchitila kuti boonse kabayita zina lyaJehova,Akuti kabamubelekela kabajisini.’*
10 Kuzwa kuchilawu chamilonga yaku-Itopiya,Aabo bandikombelezya, nkukwaamba mwana musimbi wabantu bangu bamwayikizyenie, bazoondeetela chipo.
11 Mubuzuba oobo tuchizoofwisigwi bweeme peAkaambo kamichito yako yoonse njwaakachita nwaakandipapila,Nkaambo kuchiindi eecho, ndizoogwisya bantu balisumpula, balidunda bali mulinduwe;Alubo tuchizoolisumpuli lubo pe muchilundu changu chisalala.
12 Mulinduwe ndizoosiya bantu balibombya abalichesya,Mpawo bazooyuba muzina lyaJehova.
13 Aabo basyeede ba-Israyeli, tabachizoochiti zintu zitaluleme pe;Tabazoowambi zyakubeja, amunkanwa lyabo tamuzoojaniki lulimi lwalweeno pe;Bazoolya akulyoonenena, alubo taakwe muntu uutazoobakonge pe.”
14 Wompolola chakukondwa, O mwana musimbi waZiyoni!
Wompolola chakukondwa, O Israyeli!
Kondwa ubotelwe amoyo wako woonse, O mwana musimbi waJerusalema!
15 Jehova wagwisya chisubulo nchwaakapedwe.
Watanda sinkondonyokwe.
Mwaami wa-Israyeli, Jehova, ulaanduwe.
Taakwe nuchizooyoowa mapenzi pe.
16 Mubuzuba oobo, Jerusalema uzoobuzigwa kuti:
“Utayoowi pe, O Ziyoni.
Maboko aako atalebuki pe.
17 Jehova Leza wako uli aanduwe.
Mbuli silumamba uuli aamanguzu, uzookufutula.
Uzoobotelwa akaambo kanduwe akukondwa kupati.
Uzoowumuna muluyando lwakwe.
Uzoobotelwa akaambo kanduwe akoompolola kwakukondwa.
18 Ndizoobabunganizya aamwi aabo balila akaambo kakutabawo kumapobwe aako;Teebakaliwo pe kulinduwe akaambo kakunyampula masampu aabo.
19 Bona! Kuchiindi eecho ndizoobalwana aabo boonse bamudyaaminina;Ndizoomufutula ooyo uusunkuta,Ndizoobabunganizya aamwi aabo bamwayikizyenie.
Ndizoopa kuti batembawulwe akuba aampuwo*Munyika yoonse mubakali kufwisigwa bweeme.
20 Kuchiindi eecho, ndizoomuboozya kung’anda,Kuchiindi eecho, ndizoomubunganizya aamwi.
Nkaambo ndizoopa kuti mube aampuwo* akuti mutembawulwe aakati kabantu boonse baanyika.Chiindi nimwazoolibonena ameso aanu kandili kuboozya bantu banu bakatolwa mubuzike,” mbaamba Jehova.
Makani Aamunsi
^ Naakuti, “kululamikwa.”
^ Naakuti, “Ndizoomusubula.”
^ Amwi malembe ati, “mbundizoonyampuka kandili kamboni.”
^ Naakuti, “kabamukomba kabajisini.”
^ MuchiHebberu, “aazina.”
^ MuchiHebberu, “aazina.”
