MaKristu atachichiti kabotu mubukombi azoojanika kuChiyubulusyo chiyoochitwa muApril 11 aBwabili. Bakali kuchijaana mumuzundano wabuumi, pesi bakaleka akaambo kazintu zisiyene-siyene alimwi zimwi zyaambwa mukabbuku kategwa Return to Jehovah. (Heb 12:1) Jehova ulabayanda bantu batachichiti kabotu mubukombi nkaambo wakabawula abulowa bwaMwanaakwe. (Inc 20:28, NW; 1Pet 1:18, 19) Kujana twabagwasya biyeni kuti baboole mumbungano?

Baalu balaayanduula akwaagwasya maKristu atachichiti kabotu mubukombi mbuli mbachita mweembezi uuyanduula mbelele yakapambuka kubutanga. (Lk 15:4-7) Eezi zitondeezya kuti Jehova ulabayanda. (Jer 23:3, 4) Toonse tulakonzya kubagwasya bantu bali boobu kutali baalu luzutu. Kubatondeezya luyando aluse kulamubotezya Jehova alimwi kweeta mpindu mbotu. (Tus 19:17; Inc 20:35, NW) Nkinkaako, ikuti kakuli umwi muntu ngukonzya kusungwaazya, weelede kufwambaana kumugwasya!

AMWEEBELE KAVIDIYO KATI SUNGWAAZYA MAKRISTU ATACHICHITI KABOTU MUBUKOMBI, MPAWO MUSANDULE MIBUZYO IITOBELA:

• Niinzi Abbey nzyaakachita chiindi naakabona umwi Kamboni ngwakatazi?

• Nkamboonzi nitweelede kusaanguna kubuzya baalu kuti katuyanda kuyoosungwaazya umwi muKristu utachichiti kabotu mubukombi?

• Abbey wakachita biyeni kuti alibambile kuyooswaya Laura kachibili?

• Abbey wakakutondeezya biyeni kukkazika moyo aluyando chiindi naakali kusungwaazya Laura?

• Twiiyaanzi kuchikozyano chaJesu chijanika muli Luka 15:8-10?

• Nimpindunzi zyakaba akaambo kakugwasya Laura?