Kutalikila mumweezi waSeptember, Kabbuku Kamuswaangano waBuumi Amulimu Wesu kanootondeezya nzila mpya yakukambawuka iilamutwe utii: “Yiisya Kasimpe.” Makanze eesu ngakubuzya bamwi kasimpe kayandikana kazwa muBbayibbele katubelesya mubuzyo alugwalo lusandula mubuzyo ooyo.

Ikuti muntu watondeezya chiyandisyo, tulakonzya kubamba kuzoomubona lubo kwiinda mukumupa limwi bbuku naa kumutondeezya kavidiyo kajanikaa jw.org. Tweelede kubweeda kakutanayinda mazuba miingi kuchitila kuti twiinkilile kunembo kwaambuuzyania atala ankani njitwakaambuula. Zitondeezyo zipya zyakukambawuka azyakuchita zyabali muchikolo, zinoobwezegwa muzifwiinsyo zijanika kumamanino azyaandano mubbuku litegwa IBbayibbele Nga Lilatuyiisyaanzi? Mubbuku eeli, tulakonzya kujana imwi mibuzyo amagwalo ziyootugwasya twanoochita kubweedulula naa kwiiya amuntu katubelesya Bbayibbele luzutu.

Nzila iitola kubuumi butamani njimwi biyo. (Mt 7:13, 14) Mbukunga tukambawuka kubantu balaazikombelo zisiyene-siyene alimwi balaamaponeno asiyene, nkinkaako tweelede kwaambuula kasimpe kazwa muBbayibbele munzila iitasike mumoyo wawumwi awumwi wabo. (1Tim 2:4) Mbuli mbotubelesya mitwe yamuBbayibbele isiyene-siyene akuyungizya luzibo lwesu ‘mukupandulula makani aalusinizyo mbukweelede’ tuyoobotelwa alimwi tuyoozwidilila mukubayiisya kasimpe bantu.—2Tim 2:15.