Nkamboonzi nikuyandikana kulibambila? Ulakonzya kuchiswa naakuti kuya kuchibbadela kutayeeyeli. Nkinkaako, libambile kakuchili lino kuchitila kuti nwaazoochiswa uuzoosilikwe kabotu. Kuchita oobo, kutondeezya kuti ulabulemeka buumi amulawu waJehova uuli atala aganzi.—Mil 15:28, 29.

Niinzi nzukonzya kuchita kuti ulibambile?

• Yeeyesesya alubo ukombe kutanafila kkaadi lyaganzi litegwa (DPA). a Basikupupulula babbabbatizidwe balakonzya kujana kkaadi eeli kumukwesu uulangania mabbuku kuswaanizya aakkaadi kategwa Identity Card (ic) kabana baniini

• Kuti kulaada, kumbila baalu kuti bakupe foomu litegwa Information for Expectant Mothers (S-401). Foomu eeli lilakugwasya kuti usale kabotu atala azyabusilisi chiindi nulaada anuyanda kutumbuka

• Kuti wachiswa zyakuti kwaabuyandikana kuti usilikwe kakubelesegwa ganzi naakuti kwabuyandikana kuti ukkale muchibbadela, buzya baalu kakuchili chiindi akubuzya basilisi kuti Bakamboni baJehova balakonzya kusika kuzookuswaya

Kujana baalu bakugwasya biyeni? Balakonzya kukugwasya kuti ufile kkaadi lyaganzi. Nikuba oobo, baalu tabakookusalila nzila zyabusilisi naakuti kwaamba maboneno aabo kumakani muntu umwi awumwi ngayelede kulisalila. (Ro 14:12; Ga 6:5) Kuti wabuzya baalu bamumbungano yako kuti bulwazi bwako buyanda kuti usilikwe kakubelesegwa ganzi, baalu bayoowambuuzyania aabakwesu bali muKkomiti yaHospital Liaison (HLC) kuti ujane lugwasyo. Alubo balakonzya kukupa foomu litegwa Information for Patients Requiring Surgery and/or Chemotherapy (S-407). Foomu eeli lilakonzya kukugwasya kuti kuli kujana busilisi nwaazwa ku-opaletwa.

Kujana bakwesu bali muKkomiti yaHLC bakugwasya biyeni? Bakwesu bali mukkomiti eeyi bakayiisigwa kuti bakonzye kwaambuuzyania abantu babeleka muzibbadela abasimilawu atala amaboneno eesu aazwa muBbayibbili aali atala aganzi. Balakonzya kwaambuuzyania aamadokotela atala anzila zisiyene-siyene zyakuti usilikwe kakutabelesegwi ganzi. Kuti kakuyandikana, balakonzya kukugwasya kuti ujane dokotela uukonzya kwaamvwisisisya makani aakusilikwa kakutabelesegwi ganzi.

AMWEEBELE VIDIYO ITII MBUTUKONZYA KUSALA NZILA ZYABUSILISI KAKUBELESEGWA GANZI, KUZWA WAAWO, MUSANDULE MUBUZYO UUTOBELA:

• Vidiyo eeyi yakugwasya biyeni kuti ulibambile kuti wachiswa kutayeeyeli mpawo kwayandikana kuti usilikwe kakubelesegwa ganzi?

  textarea-1