MuMulawu waMusa, mwaalumi wakali kuyanda kuleka mukayintu wakwe, wakeelede kujana lugwalo lwakulekana. Eezi zyakali kugwasya kuti batalekani kufumbwa mpubayandila. Muchiindi chaJesu, beendelezi bazikombelo bakali kupa kuti bantu balekane kufumbwa mpubayandila. Baalumi bakali kuleka bakayintu babo kakutakwe kaambo. (“lugwalo lwakumutanda” makani aakwiiya ajanika muli Mk 10:4, nwtsty; “uuleka mukayintu wakwe,” “wachita bumambe alimwi wabisizya mukayintu wakwe” makani aakwiiya ajanika muli Mk 10:11, nwtsty) Mulugwalo lwaMarko 10:2-12, Jesu wakatondeezya kuti lukwatano lulayandikana nkaambo nguJehova wakalutalisya. Mwaalumi amwanakazi bakeelede kuba “nyama yomwe” kabakkalaamwi kabatalekani. Kweendelana alugwalo lwaMatayo, Magwalo azumizya bantu bakwetene kuti balekane kuti umwi wachita ‘bwaamu.’—Matayo 19:9.

Mazubaano bantu biingi bali amaboneno aali mbuuli abaFarisi kutali mbuuli aJesu. Bantu bakwetene batakombi Jehova, balalekana kufumbwa mpubayandila kuti kabatachimvwanani. Pesi maKristu, lukwatano balubona kaluyandikana alubo baleezya kubelesya malayilile aazwa muBbayibbele kuti kwaba kutamvwanana mulukwatano lwabo. Amweebele kavidiyo kati, Luyando Akulemekana Zipa Kuti Mpuli Ijatane mpawo musandule mibuzyo iitobela:

• Kujana mwaabelesya biyeni malayilile aajanika muli Tusimpi 15:1 mulukwatano lwanu alubo nkamboonzi nimweelede kuchita oobo?

• Kujana kwamugwasya biyeni kubelesya malayilile aajanika muli Tusimpi 19:11?

• Kuti kamutachimvwanani mulukwatano lwanu, njiili mibuzyo njimweelede kulibuzya kutali kuyeeya kulekana?

• Kubelesya malayilile aajanika muli Matayo 7:12, kujana kwakugwasya biyeni kuti ube mwaalumi naakuti mukayintu uulikabotu?