“Kabunga kaUnited Nations kalikusungwaazya bantu munyika yoonse kuti babelekelaamwi, balemeke zyeelelo zyabantu akuti tutasofwaazyi nyika yesu.” Bazichitilaanzi? Mu-newspaper iitegwa UN Chronicle, Maher Nasser wakati: “Kuchincha kwabwiime bwakunze, milandu, kusiyana kwamweelwe wabantu banotede abafwaba, kulwana, bantu bachija kulimbabo, bantu bapapila munyika yoonse amalwazi aatabukila azimwi,” zilikwiindilila kuvula munyika yoonse.

Bamwi basumpula muzeezo wakuti kube mfulumende iimwi, yeendelezya nyika yoonse. Bantu aabo baswaanizya Dante (1265-1321) wakuItaly syaabusongo muzintu zyakalengwa, sikwaanza tupeto alubo kali sipolitikisi a-Albert Einstein (1879-1955) syaabusongo muli zyasayensi. Dante wakali kusyoma kuti tazikonzeki pe kuti bantu babe aaluumuno munyika yaanzeene muli zyapolitikisi. Wakazubula majwi aaJesu Kristu aakuti, bwaami ‘bulyaanzaania bulanyonyooka.’—Luka 11:17.

Albert Einstein wakalemba lugwalo lwakali kuya kuGeneral Assembly of the United Nations nikwakayinda mazuba mache Nkondo Yanyika Yoonse Yabili kiimanide, aawo nikwakabelesegwa mabbomba aabili aali aanguzu loko (atomic bombs). Wakati: “Bamukabunga kaUnited Nations beelede kubambulula zintu chakufwambaana kuchitila kuti kupangwe mfulumende iisimide iikonzya kukwabilila bantu munyika yoonse.”

Zyakali kunoochita na kuti basipolitikisi aaba bapange mfulumende yakali kuyoowabelesya kabotu manguzu, kubeendelezya kabotu bantu akutabadyaaminina? Naakuti bakali kuyooba mbuuli bamwi beendelezi bachita zintu zibi? Mibuzyo eeyi ituyeezya majwi aakaambwa asikulanga-langa makani aachiindi wakuBritain uutegwa Lord Acton aakuti: “Manguzu alanyongania alubo manguzu miingi anyongania zintu zyiingi loko.”

Kuti munyika yoonse tube aaluumuno lwachoonzyo, tweelede kujatana. Niinzi chiyootugwasya kuti tuchite oobo? Zilakonzeka na? Bbayibbele lyaamba kuti, zilakonzeka. Ziyoochitika choonzyo. Ziyoochitika biyeni? Tazikachitwi aamfulumende zili aanyika, zyeendelezegwa aabantu bazyapolitikisi. Pesi zizoochitwa aamfulumende yakapangwa aaLeza. Kuyungizya waawo, mfulumende eeyo iyootondeezya kuti Leza nguwe alikke uuli aacheelelo chakweendelezya zintu zyoonse nzyaakalenga. Litegwani zina lyamfulumende eeyo? Bbayibbele lyaamba kuti mfulumende eeyo, ‘Mbwaami bwaLeza.’—Luka 4:43.

Jesu Kristu wakali kuyeeya atala aBwaami bwaLeza nakaamba majwi aali munkombyo yakwe yakukozyanisya aakuti: “Abuze Bwami bwako, alucitwe luyando lwako, ansi ano.” (Matayo 6:9, 10) Bwaami bwaLeza buyoobona kuti kuyanda kwaLeza kwachitwa aanyika kutali kuyanda kwabantu bayanda kupegwa manguzu kuti kujane mbabo luzutu.

Alubo Bwaami bwaLeza bwaambwa kuti, ‘Mbwaami bwakujulu.’ (Matayo 5:3) Nkamboonzi? Nkaambo bwaami oobu buyooyendelezya nyika pesi tabukayendelezyi kabuli aanyika pe, bunooyendelezya kabuli kujulu. Yeeyesesya nchaawamba makani aaya. Mfulumende eeyi tayinookumbili mali kubantu, mbuuli kubbadala mutelo. Bantu batakeendelezegwe aamfulumende eeyi banoowangunukide choonzyo!

Mbuuli mbulitondeezya bbala lyakuti “bwaami,” Bwaami bwaLeza nimfulumende iili aamwaami. Mwaami ooyo, nguJesu Kristu wakapegwa nguzu  aLeza. Kalyaamba atala aJesu, Bbayibbele lyaamba kuti:

• “Bweendelezi buyookala azifunzi zyakwe. . . Bwami bwakwe buyookomenesya, alwalo luumuno talukooyoomana.”—Isaya 9:6, 7.

• ‘Nkabela wakapegwa bweendelezi abulemu abwaami, kuti bantu bazisi zyoonse abamisyobo yoonse abamilaka yoonse bamumanine milimu. Bweendelezi bwakwe tabukamani pe.’—Daniele 7:14.

• “Bwami bwaansi bwaba bwa-Mwami [Leza] wesu abwaKristo wakwe.”—Ciyubunuzyo 11:15.

Kuti majwi aali munkombyo yaJesu yakukozyanisya akazuzikizigwe, Bwaami bwaLeza buyoowazuzikizya chakumaninina makanze aaLeza atala anyika. Mubwaami oobu, bantu boonse bayooyiya kwiibamba kabotu nyika, kuchitila kuti bukabe busena bulikabotu lubo.

Kwiinda zyoonse, Bwaami bwaLeza buyooyiisya bantu batakeendelezegwe aambubo. Bantu boonse bayooyiisigwa milawu iikozyenie. Takuchinoolikwe kutamvwanana akwaanzaana pe. Muli Isaya 11:9, Bbayibbele lyaamba kuti: ‘Tabakachiti chintu chili choonse chibi nikuba kunyonyoona . . . nkaambo nyika iyoozula luzibo lwaJehova mbubonya mbuuli maanzi mbaazuzya lwizi.’

Munyika yoonse, bantu banoojisini alubo banookkede muluumuno mbuuli nzibalombozya bamukabunga kaUnited Nations. Muli Intembauzyo 37:11 tubala kuti bantu aaba “bayookondwa muluumuno lunji.” Mukuya kwachiindi, mabala aali mbuuli kuti “milandu,” “kusofwaazigwa kwamuuya,” “kufwaba” aliti “nkondo,” tatuchinoowayeeyi pe. Pesi zintu eezi ziyoochitika lili? Ndiilili Bwaami bwaLeza nibuyooyendelezya nyika yoonse? Buyoozichita biyeni eezi? Alubo kujana bwakugwasya biyeni bweendelezi bwabwaami oobu? Atubone.