Lino-lino, Bwaami bwaLeza, mbutwakali kulangilila kuzwa chiindi, chaamba mfulumende njaakapanga Leza, buyooyendelezya nyika yoonse. Buyoopa kuti bantu munyika yoonse bakakkale aamwi muluumuno, kabajisini. Alubo, kweendelana amajwi aali muli Intembauzyo 72:7, ‘luumuno luyoovula.’ Ndiilili Bwaami bwaLeza nibuyooyendelezya nyika yoonse? Buyoozichita biyeni eezi? Alubo kujana bwakugwasya biyeni Bweendelezi oobu?

Bbayibbele lyakaambilizya zintu zyakali kuyootondeezya kuti Bwaami bwaLeza bwaba aafwiifwi. Zintu eezi zyoonse zipanga “citondezyo,” ziswaanizya nkondo zili kuchitika munyika yoonse, nzala, malwazi, mizuzumo yanyika akuvula kwabantu bataswiilili milawu.—Matayo 24:3, 7, 12; Luka 21:11; Ciyubunuzyo 6:2-8.

Bumwi businsimi bwaamba kuti: ‘Kumazuba aakumamanino kuyooba ziindi zikataazya. Nkaambo bantu bayooba basikuliyanda, basimuyanda mali, . . . Batamvwi bamawisi, batalumbi, batasyomeki, batakwe luyando lwakuzyalwaalo, batanyoneki, basikubejelezya, batalinyoni, basibukali, batayandi bubotu, . . . basikulisumpula, bayandisya misalo yaansi kwiinda Leza.’ (2 Timoteo 3:1-4) Bantu bachita michito eeyi mpubali kuzwa chiindi. Pesi mazubaano balikuvula loko.

Businsimi oobo bwakasaanguna kuzuzikizigwa mu1914. Basikulanga-langa makani aachiindi, bazyapolitikisi abalembi bakaamba mbuzyakachincha zintu munyika, mumunyaka ooyo. Muchikozyano, sikwiiya makani aachiindi uutegwa Peter Munch wachiDanish, wakalemba kuti: “Nkondo yakachitika mu1914, yakachincha zyiingi mubuumi bwabantu. Kawutanasika munyaka ooyo, bantu bakali kuyeeya kuti zintu zizoobota munyika, . . . pesi kwakasaanguna mapenzi, zintu ziyoosya, kuzondana akutakwabililwa kwabantu munyika yoonse.”

Kuli lumwi lubazu, zyiimo eezi zyakali kuyoopa kuti kube luumuno. Akutondeezya kuti Bwaami bwaLeza bwaba aafwiifwi kweendelezya nyika yoonse. Jesu wakaamba chimwi chintu chibotu muchitondeezyo chakwe chakuti mamanino abaafwiifwi naakati: “Nkabela aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.”—Matayo 24:14.

Makani mabotu aayo, ngiimakani mapati Bakamboni baJehova ngibakambawuka. Kuyungizya waawo, magazini njibabelesya loko iitegwa Ngaziyakulinda Yaambilizya Bwaami bwaJehova. Lino ijanika mumilaka yiinda ku 338 alubo magazini eeyi yaambuula atala azintu zyiingi zibotu, Bwaami bwaLeza nzibuyoochitila bantu aanyika.

Nsandulo iswaanizya twaambo tune tupati tutobela:

1. Bwaami tabukeendelezegwi aabeendelezi banyika bamazubaano.

2. Beendelezi banyika tabakaleki pe kuyanda kweendelezya alubo chabufuba-fuba bayooyezya kulwana aBwaami bwaLeza.—Intembauzyo 2:2-9.

3. Bwaami bwaLeza buyoonyonyoona mfulumende zinooyanda kwiinkilila kunembo kweendelezya bantu. (Daniele 2:44; Ciyubunuzyo 19:17-21) Nkondo eeyo itegwa niArmagedoni.—Ciyubunuzyo 16:14, 16.

4. Bantu boonse balibombya kuBwaami bwaLeza bayookwabililwa munkondo yaArmagedoni akunjila munyika mpya iinooli aaluumuno. Bbayibbele lyaamba kuti bantu aabo ‘ninkamu mpati’ alubo kulakonzeka kuti banoosika kumamiliyoni.—Ciyubunuzyo 7:9, 10, 13, 14.

Chintu chakusaanguna chiyandikana kuti muntu ayendelezegwe aaBwaami bwaLeza, nkuyiisigwa. Jesu wakakomba kuli Leza kati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.”—Johane 17:3.

Bantu balagwasikana munzila zyiingi chiindi nibamuziba kabotu Jehova Leza mbuuli Muntu. Atulange-lange nzila zibili: Yakusaanguna, ngababa aalusyomo lusimide mulinguwe. Lusyomo oolo luyeeme mubumboni, lubagwasya kumvwisisisya kuti Bwaami bwaLeza mbwachoonzyo akuti bwaba aafwiifwi kweendelezya. (BaHebrayo 11:1) Yabili, kuyanda Leza abantu mbibayakilenaabo, kulasima. Kuyanda Leza kupa kuti bamuswiilile amoyo woonse. Kuyanda bantu mbibayakilenaabo kupa kuti babelesye malayilile aaJesu aakuti: “Mbubonya mbomuyanda kuti bantu bamucitile, anywebo amubacitile mbubonya.”—Luka 6:31.

Mbuuli Ndeende uuli aaluyando, Mulengi wesu uyanda kuti zintu kazitweendela kabotu. Uyanda kuti tupone buumi bwaambwa aaBbayibbele kuti ‘mbuumi bwachoonzyo.’ (1 Timoteo 6:19) Buumi mbutupona mazubaano ‘teebuumi bwachoonzyo’ pe. Nkaambo mamiliyoni aabantu mazubaano balikuswaana buyumu-yumu mubuumi. Kuti ujane nzwisa ‘yabuumi bwachoonzyo,’ yeeya zimwi zintu zibotu nzibuyooyeta Bwaami bwaLeza, kubantu batakeendelezegwe aambubo.