Munyaka amunyaka, kutemwa minsamu myiingi, kapati kuti bantu kabalikukula ndawu zyakuti balime. Minyaka iisika ku75 yakayinda, hafu yamasaka aajanika kundawu nkwiiwa loko mvula akamana aakugonkwa.

Kuti lusaka lwanyonyoonwa, minsamu yoonse abanyama bakkala mumo nga banyonyoonwa.

Kuli zimwi ndawu minsamu nkuyakagonkwa loko, yakasaanguna lubo kukomena. Basayensi bakabona minsamu mbuyakafwambaana kukomena kundawu ooko nkuyakagonkwa. Bona zikozyano zitobela.

• Basikuyanduulisisya bakabona zintu zichitika kumasena kwakali masaka aakagonkwa kuti bantu balime mpawo bazoosiya. Kweendelana akuyanduulisisya kwakachitwa mundawu zili 2 200 ku-America aku-Africa nkwiili kububbila, kwakajanika kuti mundawu eezi zyakali kulimwa zilakonzya kuba masaka lubo muminyaka iitasiki ku10.

• Kweendelana amagazini yakapupululwa abasayensi, basikuyanduulisisya bayeeyela kuti muminyaka iisika ku100, masaka aakagonkwa alakonzya kubweeda lubo mbuli mbaakabede katanagonkwa.

• Lino-lino kuBrazil, basayensi bakayanduulisisya kabayanda kubona kuti masaka aakagonkwa alafwambaana na kukomena kuti bantu babyala minsamu mundawu mwakaagonkwa.

• Kabali kwaambuula atala abantu bakachita kuyanduulisisya ooku, baNational Geographic bakaamba kuti: “Basikuyanduulisisya bakabotelwa loko nkaambo bakabona kuti kubyala minsamu teekwakali kuyandikana pe.” Muminyaka iili 5 kupela, bakabona kuti mundawu eezi “mwakali mwazula minsamu” kakutakwe muntu wakayibyala.

Munyika yoonse, bantu bakeezya kuti bakwabilile masaka akaliwo kale akubyala minsamu mundawu mwakali mwagonkwa iimwi. Kweendelana azyakaambwa aaba-United Nations, kwaminyaka iili 25 yayinda, kugonkwa kwaminsamu kwakacheya amapesenti aayinda ku50.

Nikuba kuti balikweezya pesi tabali kukonzya pe kukwabilila masaka chakumaninina. Kabunga kaGlobal Forest Watch kakaamba kuti: “Namba yamasaka aalikunyonyooka teeyakaseluka loko pe kwaminyaka miche yayinda.”

Makkampani alikugonka minsamu kaayanda mapulanga aakuyasya, kaatapedwe mvumo amfulumende. Balikujana mali nyingi alubo kutangala ooku nkuko kuli kupa kuti masaka miingi anyonyooke.

“Jehova a Leza wakameneka zisamu zyamisyobo-misyobo anyika izyakali kukkomanisya kulanga alimwi izyakali zibotu kulya.”​—Matalikilo 2:9.

Mulengi wesu wakalenga masaka munzila yakuti akomene lubo nikuba kuti bantu baagonka. Uyanda kukwabilila masaka abanyama bakkala mumo.

Bbayibbili litondeezya kuti Leza tazoozumizyi bantu batangala kuti banyonyoone nyika azintu zipona zyoonse zili mulinjiyo. Langa chiiyo chitii, “Leza Usyomezya Kuti Nyika Tayizoonyonyoonwi Pe,” chili aapeji 15.