Tekkinoloji Nga Ilabunyongania Biyeni Bweenzinyokwe Abamwi?
Tekkinoloji ilikutugwasya loko nkaambo twaabukonzya kwaambuuzyania aabamwi katusendelana mameseji, kulembelana ma-email akufoonenana katubelesya mavidiyo. Alubo kwakawuba kuti bantu babili bakonzye kwaambuulaamwi nikuba kuti bakkala munyika zisiyene. Bantu babelesya tekkinoloji munzila eeyi bayibelesya kabotu.
Pesi bamwi tabayibelesyi kabotu pe tekkinoloji. Eezi ngazyazoopa kuti . . .
-
batabeeteleli pe beenzinyina.
-
balendelelwe akulikubona kabatachigwasyi.
-
babikkile maanu kuzintu nzibayanda kutali kuzintu ziyandwa aabamwi.
NZWEELEDE KUZIBA
KWEETELELA
Kuba aalweetelelo zyaamba kumvwisisisya umwi muntu mbalikulimvwa. Eezi tazikonzeki pe kuti katuli bbizi kusendelana mameseji abamwi akulanga zimwi zintu zibikkwa aanzila zyakwaambuuzyania zyamazubaano.
Kuti kuli kweendelezegwa aatekkinoloji, ulakonzya kubonaanga kusandula mameseji nguumwi mulimu ngweelede kubikka aapulogilamu yako yazintu nzuchita buzuba abuzuba. Makanze aako ngakusandula muntu woonse wakusendela meseji kutali kuti ugwasye muntu uyanda kugwasigwa.
NZWEELEDE KUYEEYA: Nga ulatondeezya biyeni kuti ‘ulabeetelela’ bamwi chiindi nubasendela mameseji?—1 PETRO 3:8.
KULIBONA KUTAGWASYI
Bamwi basikuyanduulisisya bakaamba kuti, muntu uumaninsya chiindi chiingi kabelesya nzila zyakwaambuuzyania zyamazubaano ngawazoolibona katachigwasyi. Basikuyanduulisisya aaba bakazoobona kuti kulangisisya mapikicha azimwi zintu zibikkwa aabantu aanzila zyakwaambuuzyania zyamazubaano kulakonzya kupa kuti bamwi bantu “balimvwe mbuli kuti taakwe zintu zilaamutwe pe nzibali kuchita mubuumi.”
Kulanga mapikicha mabotu abikkwa aabamwi kulakonzya kupa kuti muntu abonaanga wasyaalila akuti abonaanga buumi tabuli kumunoneezya pe. Alubo zintu bantu nzibabikka aanzila zyakwaambuuzyania zyamazubaano zilakonzya kupa kuti abonaanga buumi mbubapona bantu aabo tabukwe mapenzi pe.
NZWEELEDE KUYEEYA: Chiindi nubelesya nzila zyakwaambuuzyania zyamazubaano, nga ulachita biyeni kuti utalyeezyanisyi aabamwi?—BAGALATIYA 6:4.
KUBIKKILA MAANU KUZINTU NZUYANDA
Umwi muyiisi wakaamba kuti, bamwi bana bachikolo bayanda kumvwanana aamuntu ubachitila zintu nzibayanda luzutu. Bamwi bantu balakonzya kubelesya beenzinyina mbuli mbubabelesya mafooni naakuti makkompiyuta aabo nkaambo bayanda kumvwanana aabamwi chiindi nibayanda lugwasyo luzutu. Pesi kuti muntu ooyo katachikonzyi pe kubagwasya ngatabachiyandi pe kumvwanana aanguwe.
NZWEELEDE KUYEEYA: Zintu nzubikka aanzila zyakwaambuuzyania zyamazubaano zitondeezya kuti uli muntu uuyanda zyakuzundaana na naakuti uubikkila maanu kuzintu nzyayanda luzutu?—BAGALATIYA 5:26.
NZUKONZYA KUCHITA
LANGA-LANGA NZILA NJUYIBELESYAAYO TEKKINOLOJI
Kuti tekkinoloji wayibelesya munzila iilikabotu, ilakugwasya kuti ukonzye kwaambuula aabenzinyokwe.
MALAYILILE AAMUBBAYIBBELE: “Luyando . . . talubikkili buyo maano kuzintu nzyoluyanda.”—1 BAKORINTO 13:4, 5.
Aazintu zilembedwe aansi aawa, sala zintu nzuyanda kuzoobelesya naakuti ulembe zimwi nzubonaanga zilakonzya kuzookugwasya.
-
Jana chiindi chiingi chakwaambuula aabantu mulomo mpande kutali kumaninsya chiindi chiingi kwaambuulaabo kubelesya mameseji naakuti ma-email
-
Bikka fooni kule naakuti uyibikke aasayilenti kuti kuli kwaambuula aabamwi
-
Chesya chiindi nchumaninsya kulanga zintu ziwaalwa aabamwi aanzila zyakwaambuuzyania
-
Bamuswiilizyi uulikabotu
-
Waambuula aamweenzinyokwe nguzi uli mubuyu-muyumu
