Mbukonzya Kulikwabilila Kumalwazi
Bbayibbele teebbuku lyabusilisi pe pesi lilakonzya kukugwasya kuti ulikwabilile kumalwazi. Bona njiisyo zyamuBbayibbele zikonzya kukugwasya kuti ulikwabilile kumalwazi.
UBAMBE KABOTU MUBILI WAKO
NZILYAAMBA BBAYIBBELE: “Kunyina muntu wakasulide kale mubili wakwe mwini, pele ulausanina akuubamba kabotu.”—Baefeso 5:29.
CHAAMBAANZI?: Njiisyo eeyi yamuBbayibbele ikusungwaazya kuti ulikwabilile kumalwazi. Kumwi kuyanduulisisya kwakachitwa kwakatondeezya kuti bantu balakonzya kuchiswa akaambo kanzila njibasala kuponaayo. Pesi kusala kabotu kutugwasya kuti tulikwabilile kumalwazi.
NZUKONZYA KUCHITA:
-
Lya chakulya chiyaka mubili. Weelede kulya chakulya chiyaka mubili alubo nywa maanzi miingi.
-
Kkala kawu-ekisesayiza. Ku-ekisesayiza kulakugwasya kuti ukkale kawusimide kazitakwe ndaba kuti ulimulema, ulaabulwazi butasilikiki naakuti wachembaala. Nikuba kuti beenzinyokwe, bamumpuli amadokotela balakonzya kukusungwaazya kuti ku-ekisesayiza pesi nduwe weelede kuzichita!
-
Jana chiindi chiingi chakoona. Bantu batajani chiindi chiingi chakoona balakonzya kujatwa aamalwazi. Bamwi bantu nga babula chiindi chakoona nkaambo ngabasala kuchita zimwi zintu muchiindi chakuti boone. Pesi kujana chiindi chiingi chakoona kulakukwabilila kumalwazi.
SIYA MICHITO IISOFWAAZYA MUBILI
NZILYAAMBA BBAYIBBELE: “Atulisalazye kuzintu zyoonse zisofwaazya mubili amuuya.”—2 Bakorinto 7:1.
CHAAMBAANZI?: Kuti wasala kutabelesya zintu zikonzya kusofwaazya mubili wako zili mbuuli polya naakuti tombwe ulakonzya kulikwabilila kumalwazi aalikujaya bantu biingi mazubaano.
NZUKONZYA KUCHITA: Lemba buzuba mbuuyanda kuzooleka kufwepa mpawo ubumake akkaalenda. Kuti kwasyaala buzuba bumwi, sowa zintu zyoonse ziswaanizya polya, nchelwa, mapepa aakupangilila azimwi nzubelesya chiindi nuyanda kufwepa. Utaliswaanizyi pe abantu bafwepa. Buzya beenzinyokwe abamumpuli kuti wasala kuleka kufwepa kuchitila kuti bakugwasye.
ZIMWI NJIISYO ZYAMUBBAYIBBELE
Kuti kuuyanda Bbayibbele ulakonzya kuli kumbila kuli uumwi waBakamboni baJehova mundawu nkukkala
LIKWABILIE KUZINTU ZIKONZYA KUKUCHISA.
“Ikuti naa wayaka ŋanda mpya, ciluli weelede kuciyakila citabililo kutegwa ŋanda yako itabi amulandu wabulowa nkaambo muntu ulakonzya kuloka kuzwa alinjiyo.”—DEUTERONOMO 22:8.
UTAFWAMBAANI KUNYEMA.
“Ooyo uutafwambaani kunyema musongo kapati, pele ooyo uutakkaziki moyo utondezya bufwubafwuba bwakwe.”—TUSIMPI 14:29.
UTALISYI.
“Utabi . . . akati kabantu balya nyama cabulyato.”—TUSIMPI 23:20.
