Muchiiyo chayinda, twakaambuula atala aCroesus mbakazundwa amwaami wakuPersiya nikuba kuti musondi wakuDelphi wakamubuzizye kuti wakali kuyoozunda. Pesi Bbayibbele lili abusinsimi buli atala amwaami wakuPersiya bwakazuzikizigwa munzila iigambya.

Kakuchisyeede minyaka iisika ku200, Kkoresi katanazyalwa, musinsimi muHebbrayo uutegwa Isaya wakalemba kuti Kkoresi wakali kuyoozunda muunzi waBbabbiloni akuti wakali kuyoowuzunda biyeni.

Isaya 44:24, 27, 28: “Mbuboobu mbwaamba Jehova . . . Uuambila lwizi kuti, Yuminina, atulongalonga twako njootuyuminizya; Uuamba aa-Koresi kuti, Ngumweembeli wangu uuti cite coonse ncinjanda, uuti ambile Jerusalemu kuti, Uyooyakululwa, akwaambila intempele kuti, Intalisyo zyako ziyoosimpwa.”

Umwi sikulanga-langa makani aazyachiindi muGrikki uutegwa Herodotus wakaamba kuti, basilumamba baKkoresi bakapambula Mulonga waEfrata wakazyungulukide muunzi waBbabbiloni. Eezi zyakapa kuti basilumamba baKkoresi bakonzye kuzubuka mulonga akunjila mumuunzi. Naakazunda muunzi waBbabbiloni, Kkoresi wakaangununa maJuda bakali mubuzike alubo wakabalayilila kuti babweede kulimbabo akuti bakayakulule muunzi waJerusalemu wakali waba aminyaka iili 70 kawuli tongo.

Isaya 45:1: “Mbuboobu Jehova mbwaambila munanike wakwe Koresi, nguwenya ngundajata kujanza lyalulyo kuti mfwiinsye bamasi kubusyu bwakwe akwaangununa bami muzibuno nkamujalwide milyango akukasya zitendele kujalwa.”

Basilumamba bakuPersiya bakanjila mumuunzi nkaambo mageedi akasiidwe bukwazi. Kaansinga banaBbabbiloni bakalizi kuti Kkoresi wakali kuyanda kunyonyoona muunzi wabo, bakali kukonzya kujala mageedi. Pesi muunzi wabo teewakakwabililidwe pe.

Oobu mbuumwi businsimi buli muBbayibbele bwakazuzikizigwa. a Businsimi buli muBbayibbele bulisiyene azyaambwa abantu nkaambo buzwa kuli Leza wakaamba kuti: “Ndime uulungulula makani aamamanino nikuba kuzwa kumatalikilo, uumulwiida makani naatana kuba.”—Isaya 46:10.

 Taakwe muntu uukonzya kwaamba oobu kunze kwaLeza uumwi wakasimpe uutegwa Jehova. Zina eeli lyaamba kuti “Upa Kuti Kube.” Eezi zitondeezya kuti ulakonzya kupa kuti zintu zichitike kweendelana ambayanda. Alubo tulakonzya kuba achoonzyo chakuti uyoozuzikizya kufumbwa zintu nzyatusyomezya.

Ulizi na kuti Bbayibbele lityeni atala achiindi nchitulikupona? Muminyaka iili 2 000 yayinda, Bbayibbele lyakasinsima kuti “kumazuba aakumamanino kuyooba ziindi zikataazya.” Mazuba akumana kwanzi? Teekumana kwanyika pe naakuti kwabantu, pesi nkumana kwamapenzi alikukataazya bantu. Atulange-lange bumwi businsimi butondeezya kuti tulikupona “kumazuba aakumamanino.”

2 Timoteo 3:1-5: “Kumazuba aakumamanino . . . bantu bayooba basikuliyanda, basimuyanda mali, basimantumbwaambwa, basikakomokomo, basikasankusanku, batamvwi bamawisi, batalumbi, batakombi, basikancimwa, basimfundiilili, abasiluvuya lwakutaminizya, batalyeendeleli, basitunyetunyetu, batayandi bubotu, basimusuzyanya, basikainya, basikulisumpula, bayandisya misalo yaansi kwiinda Leza, balijisi ciwa cabukombi pele inguzu zyambubo balazikazya.”

Tuzumini na kuti mazubaano bantu balikutondeezya bube buli boobu? Nichoonzyo na kuti bantu biingi balaliyanda, bayandisya mali akuti balalisumpula? Tuzumini na kuti bantu biingi tabayandi kuswiilila bamwi pesi mbaamumvwa zyabo? Zilaantanganana kuti bana tabachibaswiilili pe bazyali babo alubo bantu biingi bayandisya zyakulikondelezya kwiinda Leza. Alubo zintu eezi zilikwiindilila kubija buzuba abuzuba.

Matayo 24:6, 7: “Alimwi mulamvwa inkondo ampuwo zyankondo. . . . Nkaambo cisi cizoolwana acisinyina, abwami buzoolwana abwaminyina.”

Kuyeeyelwa kuti nkondo zyakachitika kuzwa mu1914 zyakajaya bantu biinda ku100 miliyoni, mweelwe wiinda mweelwe wabantu bakkala muzisi zimwi. Zilaantanganana kuti eezi zyakapa kuti bantu babe mubuumba amumapenzi. Pesi eezi zyakapa kuti bantu baleke na kulwana?

Matayo 24:7: “Kuzooba inzala.”

BaWorld Food Programme bakati: “Nikuba kuti munyika kuli chakulya chikonzya kukkwana bantu boonse pesi bantu bali 815 miliyoni naakuti muntu uumwi akati kabantu bali 9 ulala anzala buzuba abuzuba. Alubo muntu uumwi akati kabantu batatu uli abulwazi bweetwa akaambo kanzala.” Kuyeeyelwa kuti munyaka amunyaka bana basika ku3 miliyoni balafwa akaambo kanzala.

Luka 21:11: “Kuyooba mizuzumo mipati.”

Munyaka amunyaka kuchitika mizuzumo yanyika mipati iisika ku50 000. Mizuzumo iili 100 ipa kuti maanda adilike alubo kuli muzuzumo wanyika mupati uuchitika munyaka amunyaka. Kuzwa mu1975 kusika mu2000, kuyeeyelwa kuti kwakafwa bantu bali 471 000 akaambo kamizuzumo yanyika.

Matayo 24:14: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.”

Bakamboni baJehova biinda ku8 miliyoni balikukambawuka makani mabotu aaBwaami bwaLeza munyika yoonse kuzisi zisika ku240. Baambilizya makani mabotu kumadolopo, kumyuunzi iili kule, musokwe akuzilundu. Bbayibbele lyaamba kuti Leza wabona kuti mulimu wakukambawuka wamana, “mamanino azoosika.” Eezi zyambaanzi? Zyaamba kuti mfulumende zyabantu ziyoonyonyoonwa akuti kuyoosaanguna kweendelezya Bwaami bwaLeza. Nziizili zisyomezyo ziyoozuzikizigwa aBwaami bwaLeza? Bala chiiyo chitobela.