Kuli nunga wakataazikana na atala akuti buumi bwako abwampuli yako buyooba biyeni kunembo? Uyeeyela kuti uzoonota na naakuti unoofwaba, uzoobotelwa na naakuti unookataazikana luzutu? Uzoopona kwachiindi chilamfu na naakuti uzoofwambaana kufwa? Bantu biingi baba achiindi chilamfu kabakataazikana atala amibuzyo eeyi.

Mazubaano, basyaabusongo balayanduulisisya akubuzya bantu zintu ziyoochitika kunembo. Zimwi zintu nzibaamba zilachitika pesi zimwi tazichitiki pe. Muchikozyano, mu1912 Guglielmo Marconi, wakasaanguna kupanga matelegilafu wakati: “Nzila yakwaambuuzyania eeyi izoopa kuti kutazoobi nkondo.” Alubo mwiiminini wakkampani iitegwa Decca Record, wakakaka kuti kabunga kabasikwiimba kategwa Beatles balekkoode nkaambo wakali kubonaanga nyimbo zyabo teezyakali kuyoozwidilila pe.

Bantu biingi biinka kubasondi kuti bakabuzye zintu ziyoochitika kunembo. Mamagazini amapepa twaambo alaazintu zyiingi zyakusonda nkinkaako bantu biingi balaabelesya mabbuku aaya kuti bazibe ziyoochitika kunembo. Basondi babelesya tukkaadi, manamba naakuti tweengo twamumaboko kuti babuzye bantu zitakachitike kunembo.

Chiindi, bantu bakali kuyanda kuziba zintu zyakali kuyoochitika kunembo, bakali kubuzya basondi naakuti bapayizi bakali kwaambuula abaleza babo. Muchikozyano, Mwaami Croesus wakuLydia wakapa musondi wakali kukkala kuDelphi, kuGreece zipo kayanda kuziba kuti wakali kuyoozunda na naakali kuyoolwana amwaami Kkoresi wakuPersiya. Musondi ooyu wakabuzya Croesus kuti wakali kuyoomuzunda Kkoresi. Croesus wakiinka kalibuzya kuti uyoomuzunda mwaami ooyu pesi wakakuzundwa.

Zyakaambwa amusondi ooyu teezyakagwasya pe, nkaambo kufumbwa zyakali kuyoochitika aakati kabo umwi wakali kuyoozunda munkondo eeyo. Croesus wakabbadalila zintu zyakamunjizya mumapenzi. Mazubaano, nzila nzibabelesya bantu kuti bazibe ziyoochitika kunembo zili kubagwasya na?