Basikupandulula bweende bwanyenyeezi basyoma kuti nyenyeezi, mweezi amapulaneti zilakonzya kweendelezya buumi bwabantu. Bantu aaba basyoma kuti chiindi muntu nazyalwa, zilenge eezi zilikujulu zilakonzya kutondeeezya zintu zitazoochitike mubuumi bwakwe akuti uzooba muntu uulibiyeni. Nikuba kuti chiyanza chakupandulula bweende bwanyenyeezi chakatalikila kuBbabbiloni pesi chilizibinkene nikuba mazubaano. Kweendelana akuyanduulisisya kwakachitwa kuUnited States mu2012, kwakajanwa kuti muntu uumwi aakati kabantu bali 3 “uyeeyela” kuti chiyanza eechi chileendelana azyasayensi alubo bantu basika kumapesenti aali 10 “balazumina” kuti chileendelana asayensi. Pesi nisimpe na kuti chileendelana asayensi? Peepe. Atulange-lange bumwi bumboni.

• Mapulaneti anyenyeezi tazikwe manguzu akweendelezya buumi bwabantu mbuuli mbubasyoma basikupandulula bweende bwanyenyeezi.

• Nzibaamba nzintu zichitika mubuumi bwabantu.

• Nzibaamba basikupandulula bweende bwanyenyeezi ziyeeme kunjiisyo yakuti mapulaneti azyunguluka nyika. Pesi simpe ndyakuti mapulaneti azyunguluka zuba kutali nyika.

• Basikupandulula bweende bwanyenyeezi balakonzya kwaamba zintu zisiyene-siyene atala abuumi bwawumwi muntu.

• Basikupandulula bweende bwanyenyeezi baamba kuti muntu umwi awumwi uli achipanzi chakwe muzipanzi zili 12 zyeendelana abuzuba mbwakazyalwa alubo chipanzi chimwi achimwi chili achifanikisyo chacho. Mbukunga nyika ilachincha mpiibede nikwiinda minyaka nkinkaako, mazuba azifanikisyo nzibabelesya basikupandulula bweende bwanyenyeezi nga tazicheendelani pe achifanikisyo chiimininwa anyenyeezi. Zifanikisyo eezi baamba kuti zitondeezya mbabede muntu. Kwaamba choonzyo, bantu balakonzya kuba abube busiyene nikuba kuti bazyalwa mubuzuba bumwi alubo tatukonzyi kuziba mbatakabe muntu kwiinda mukulanga buzuba mbwakazyalwa. Kwiinda kuti babone bantu mbuuli mbubabede choonzyo, basikupandulula bweende bwanyenyeezi babelesya zintu nzibayeeyela. Kuchita oobu kuli kabotu na?

Kuzwa chiindi, bantu bakali kubuzya makani kubasondi. Bamwi basondi bakali kubelesya mala aabantu naakuti aabanyama alubo bamwi bakali kulanga mukombwe mbajokoola zilyo kuti bazibe zitachitike. Bamwi babuzya kubasondi naakuti kumapulofita kuti bazibe zitakachitike kunembo. Kuli kabotu na kubuzya kubasondi naakuti kumapulofita zintu zitakachitike kunembo? Peepe, takuli kabotu pe. Atulange-lange bumboni.

Baamba zintu zisiyene-siyene. Basondi basiyene-siyene balakonzya kwaamba zintu zikazyania. Nikuba kuti babelesya nzila iimwi pesi balakonzya kwaamba zintu zisiyene. Muchikozyano, kuti muntu wabuzya basikusonda babili atala amubuzyo uumwi, beelede kumubuzya nsandulo iikozyenie. Pesi teembubachita pe.

Basondi bayeeyela zintu zikonzya kuchitika. Muchikozyano, musondi ulakonzya kuziba chiimo chamuntu kwiinda mukulanga nzila njaambuulaayo ambaboneka kumeso. Alubo musondi ulakonzya kuchitaanga waziba zintu zili kuchitika kumuntu ooyo kakuli simpe walijana kwiinda muzintu nzyamubuzya. Basondi bakanota akaambo kakuti bantu biingi balabasyoma.

Zyaambwa abasikupandulula bweende bwanyenyeezi abasondi zitondeezya kuti buumi bwesu bwakunembo bwakabambwa kale. Nichoonzyo na? Bbayibbele lyaamba kuti tulakonzya kulisalila zintu nzituyanda kusyoma naakuti nzituyanda kuchita akuti nzila njitusalaayo njiyo iitondeezya kuti buumi bwesu bwakunembo bunooli biyeni.—Joshua 24:15.

Bakombi baLeza tababuzyi makani kuli basikupandulula bweende bwanyenyeezi akubasondi nkaambo balizi kuti Leza takuyandi pe kusonda. Bbayibbele lyaamba kuti: “Kutajanwi akati kanu muntu . . . uusonda, naba mung’anga, naba mulozi, naba mucape, naba simabibo, naba sibusangu, naba sibamooba, naba muntu uubuzya makani kubafu. Nkaambo kufumbwa muntu uucita ezi ncisesemyo kuli-Jehova.” a—Deuteronomo 18:10-12.