Makani mabotu aaBwaami alikukambawukwa munyika yoonse mbuuli Jesu mbakaambide. (Matayo 24:14) Bbuku lyaDaniele lyaamba kuti Bwaami oobu nimfulumende yaLeza. Chaandaano chabili chabbuku eeli, chitondeezya maami alaamanguzu akali kuyooyendelezya kuzwa kubweendelezi bwakuBbabbiloni kusikila kuchiindi chesu. Vesi 44 yaamba kuti:

“Lino mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.”

Businsimi oobu abumwi buli muBbayibbele, butondeezya kuti Bwaami bwaLeza buyoonyonyoona mfulumende zyabantu akupa kuti bantu bakapone buumi bulikabotu munyika. Bantu bayooba abuumi buli biyeni baakweendelezegwa aaBwaami bwaLeza? Atubone zimwi zisyomezyo ziyoozuzikizigwa.  Eezi zyaamba kuti bantu bayoopona kukabe kutamani muparadayizi aanyika. Eechi nchisyomezyo chizwa kuMulengi wesu uli aluyando, Jehova Leza.

• NKONDO ZIYOOMANA

  Intembauzyo 46:9: “[Leza] ulalesya inkondo mane kusikila kumamanino aanyika, uladunsaula mata akutyolaula masumo, ulatenta inkalaki mumulilo.”

  Ubonaanga buumi bwakali kunooba biyeni kaansinga mali aluzibo zibelesegwa kukupanga zilwanisyo zyabelesegwa kukugwasya bantu kutali kupanga zintu zibajaya? Bantu bayoopona buumi buli boobu kwaakweendelezya Bwaami bwaLeza.

• KUCHISWA KUYOOMANA

  Isaya 33:24: “Takukooyooba naba omwe akati kabantu banyika uuamba kuti, Ndaciswa.”

  Ubonaanga buumi buyooba biyeni kuti kakutachikwe muntu uuchiswa bulwazi bwamoyo, kkensa, malangazuba aamwi malwazi? Zibbadela abusilisi ziyoomaninwa mulimu. Bantu batakapone munyika njitulangilila bayooba amibili iitakwe malwazi.

• NZALA IYOOMANA

  Intembauzyo 72:16: “Maila avule ansi, atala lyazilundu.”

  Munyika kuyooba chakulya chiingi chikkwana bantu boonse. Nzala amalwazi ayetwa akaambo kakubulika kwachakulya ziyoomana.

• MACHISE, BUUMBA ALUFU ZIYOOMANA

  Ciyubunuzyo 21:4: “[Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”

Businsimi oobu buyoozuzikizigwa chachoonzyo na? Nikuba kuti bantu biingi balakuyanda kupona buumi busyomezedwe muBbayibbele pesi tabasyomi chachoonzyo kuti bayoopona kukabe kutamani. Kuba amaboneno aaliboobu teekubi pe, nkaambo taakwe muntu wakaponede buumi buli boobu uukonzya kutupandulwida.

Bantu balimubuzike bwachibi alufu alubo baba achiindi chilamfu kabali mumachise akufwaba nkinkaako, eezi zyapa kuti babonaanga buumi mbubapona bulikabotu. Pesi aaya taakali makanze aaMulengi wesu Jehova Leza.

Kuti tube achoonzyo chakuti zintu nzyaakatusyomezya zizoozuzikizigwa, Leza wakaamba kuti jwi lyangu, “talikooyooboola kulindime cabuyo pe, liyoozuzikizya makanze aangu akucita kabotu makani ngendalitumina.”—Isaya 55:11.

Bbayibbele lyaamba kuti Jehova nguLeza “uutabeji.” (Tito 1:2) Mbukunga wakatusyomezya zintu zibotu, nchamaanu kulibuzya kuti: Nichoonzyo na kuti bantu bayoopona muparadayizi aanyika? Kujana twachita biyeni kuti tukabone zisyomezyo zyaLeza kazilikuzuzikizigwa? Mibuzyo eeyi iyoosandulwa muchiiyo chitobela.