Nyika Eeyi Izoonyonyoonwa Na?
Amwi ulizi kuti Bbayibbele lyaambuula atala akumana kwanyika. (1 Johane 2:17) Nga lyaambuula atala akumana kwabantu na aanyika? Nyika izoosyaala kayitakwe chintu na naakuti izoonyonyoonwa?
NSANDULO IIZWA MUBBAYIBBELE YAMIBUZYO EEYI NGUPEEPE!
Niinzi Chitazooleke Kumana?
MBANTU
Bbayibbele lyaamba kuti: “Leza mwini-mwini, Ooyo wakabumba nyika, iwakaipanga akwiikkazikizya, Ooyo watakailenga buyo kakunyina kaambo, pele iwakaibumba kutegwa kaikkalwa bantu.”—ISAYA 45:18.
NYIKA
Bbayibbele lyaamba kuti: “Izyalani lilainda, izyalani limbi lilaboola, pele nyika inooliko lyoonse mane kukabe kutamani.”—MUKAMBAUSI 1:4.
EEZI ZYAAMBA KUTI: Kweendelana azyaambwa aaBbayibbele, nyika tayizoonyonyoonwi pe alubo inookkalwa aabantu kukabe kutamani. Nkinkaako, zyaambaanzi kuti mamanino aanyika?
BONA EEZI: Bbayibbele lyaamba kuti mamanino aanyika eeyi alikozyenie azyakachitika mumazuba aaNowa. Aachiindi eecho, nyika yakali “yazula bubi.” (Matalikilo 6:13) Pesi Nowa wakali mululami. Leza wakafutula Nowa ampuli yakwe mpawo wakanyonyoona bantu babi boonse kabelesya zambangulwe. Bbayibbele nilyaamba atala azyakachitika muchiindi eecho, litii: “Inyika yakuciindi eciya yakanyonyoonwa noyakapaizyigwa maanzi aazambangulwe.” (2 Petro 3:6) Aaya akali mamanino aanyika yamuchiindi eecho. Niinzi chakanyonyoonwa? Mbantu bakali kuchita zintu zibi kutali nyika lwayo pe. Chiindi Bbayibbele nilyaambuula atala amamanino aanyika, talyaambi kunyonyoonwa kwanyika lwayo pe. Pesi lyaamba kunyonyoonwa kwabantu bachita zintu zibi kuswaanizya azintu zibi nzibachita.
Niinzi Chitazoomane?
MAPENZI ABUBI
Nzilyaamba Bbayibbele: “Kusyeede kaindi kaniini buyo, ibantu babi tabakabi limbi pe; uyoolanga nkobakabede, pele tabakabiko pe. Pele babombe myoyo bayookona nyika, eelyo bayoobotelwa kapati muluumuno lunji.”—INTEMBAUZYO 37:10, 11.
EEZI ZYAAMBA KUTI: Zambangulwe lyamuchiindi chaNowa teelyakagwisya bubi chakumaninina pe. Nilyakayinda Zambangulwe, bantu babi bakasaanguna lubo kuyumisizya bamwi. Lino-lino, Leza uzoobumaninsya bubi boonse. Mbuli mbaakaamba sintembawuzyo naakati: “Ibantu babi tabakabi limbi pe.” Leza uzoomaninsya bubi boonse kabelesya Bwaami bwakwe. Bwaami oobo nimfulumende yakujulu iizooyendelezya bantu baluleme.
BONA EEZI: Beendelezi bamazubaano bazoozumina na kuzwa aazyuuno zyabo kuti kuzooyendelezye Bwaami bwaLeza? Bbayibbele litondeezya kuti tabazoozumini pe. Bazoosala munzila yabufuba-fuba kwiinda mukukazya Bwaami bwaLeza. (Intembauzyo 2:2) Niinzi chitazoochitike? Bwaami bwaLeza buzoonyonyoona mfulumende zyabantu zyoonse “bwalo bulikke buyakwiima nji mane kukabe kutamani.” (Daniele 2:44) Nkamboonzi mfulumende zyabantu nizyeelede kunyonyoonwa?
BWEENDELEZI—Bwabantu Bweelede Kumana
Nzilyaamba Bbayibbele: “Muntu weenda tapedwe nguzu zyakusololela noziba ntaamu zyakwe.”—JEREMIYA 10:23.
EEZI ZYAAMBA KUTI: Bantu teebakalengelwa kuti balyeendelezye pe. Tabakonzyi pe kuzulwida bantunyina akumaninsya mapenzi aabo.
BONA EEZI: Bbuku litegwa Britannica Academic lyakatondeezya kuti taakwe mfulumende iikonzya “kumaninsya kufwaba, nzala, malwazi, mapenzi aalichitikila, nkondo naakuti kulwana.” Bbuku eeli lyakayungizya kuti: “Bamwi . . . bayeeya kuti, kuti mfulumende zyoonse zyajatana, zilakonzya kuzwa aachintu chikonzya kumaninsya bubi buli munyika.” Nikuba kuti mfulumende zyoonse zyajatana, munyika muchinooyendelezya bantu balaachibi batakonzyi pe kumaninsya mapenzi aawambwa aajulu. Bwaami bwaLeza mbubo abulikke bukonzya kumaninsya mapenzi woonse aali munyika.
Kweendelana azyaambwa aaBbayibbele, mamanino aanyika naakuti mamanino aabweende bwazintu zili munyika eeyi teechintu cheelede kuyoowegwa aabantu bachita zintu zilikabotu pe. Pesi beelede kubotelwa nkaambo kakuti bantu babi azintu zibi zinooli zyagwisigwa mpawo kwasyaala bantu balikabotu batazookkale munyika mpya.
Zizoochitika lili eezi? Mubuzyo ooyu ulasandulwa muchiiyo chitobela.
