Leza wakaambila Adamu kuti: “Mubuzuba mboyoolya kulincico, ncobeni uyoofwa.” (Matalikilo 2:17) Kaansinga Jehova wakalenga Adamu kuti achembaale akuti afwe taakali kuyoomupa mulawu ooyu. Adamu wakalizi kuti taakali kuyoofwa pe kuti waleka kulya muchelo ooyu.

Teekwakali kuyandikana pe kuti Adamu aEva balye muchelo nkaambo kwakali michelo myiingi mumunda . (Matalikilo 2:9) Kaansinga baleka kulya muchelo ooyu bakali kunootondeezya kuti balamuswiilila Ooyo wakabapa buumi. Alubo eezi zyakali kuyootondeezya kuti balazumina kuti Leza ababuzye zyakuchita.

Kuti tumvwisisisye nkani eeyi, atusaangune kulanga-langa zyakachitika mumuunda wamuEdeni, zyakazoopa kuti kube mapenzi miingi. Saatani Dyabbulosi wakabeja kabelesya nzoka. Bbayibbele lyaamba kuti: “Lino nzoka yakalicenjede kapati kwiinda banyama boonse bamusyokwe Jehova Leza mbaakalenga. Aboobo yakabuzya mukaintu kuti: ‘Sena ncobeni Leza wakaamba kuti tamweelede kulya kuzisamu zyoonse zyamumuunda?’”​—Matalikilo 3:1.

Eva wakasandula kuti: “Tulakonzya kulya micelo yazisamu zyoonse izili mumuunda. Pele Leza wakaamba boobu kujatikizya micelo yacisamu icili akati kamuunda: ‘Tamweelede kulya kulincico pe, nokuba kuciguma; buyo-buyo muyoofwa.’” Mpawo nzoka yakati kuli Eva: “Tamukonzyi kufwa pe. Nkaambo Leza ulizyi kuti buzuba mbomuyoolya kulincico, meso aanu ayoojaluka alimwi muyooba mbuli Leza, muyoozyiba bubotu abubi.” Saatani wakeena bazyali besu bakusaanguna kuti bayeeye kuti Jehova wakababejela akuti wakali kubayima zimwi zintu zibotu.​—Matalikilo 3:2-5.

Eva wakaswiilila nzoka. Wakalanga munsamu akubona kuti wakali mubotu loko. Nkinkaako wakachela muchelo mpawo wakalya. Bbayibbele lyaamba kuti: “Kumane nobakaba antoomwe amulumaakwe, wakamupa eelyo awalo wakalya.”​—Matalikilo 3:6.

Zilaantanganana kuti zyakamuchisa loko Leza kubona kuti naakabona kuti bana bakwe bakasala kutamuswiilila achaali! Wakachitaanzi? Wakabuzya Adamu kuti: ‘Uyoojokela kubulongo, nkaambo ooko nkookazwa. Nkaambo uli bulongo, aboobo uyoojokela kubulongo.’ (Matalikilo 3:17-19). Nkinkaako, “myaka yoonse njaakapona Adamu yakali 930, mpoonya wakafwa.” (Matalikilo 5:5) Adamu naakafwa taakayinka kujulu nikuba kupona kuli  bumwi busena. Pesi taakachiliwo pe mbuuli mbaakataliwo katanalengwa. Kuyungizya waawo, taakachili kupona pe mbuuli bulongo. Eezi zilachisa.

Kutaswiilila kwaAdamu aEva kwakapa kuti babe achibi akuti basweekelwe abuumi butamani. Bakasaanguna kuchiswa akuchembaala alubo bana babo bakajana chibi kuzwa kulimbabo. Kubisya kwabo kulatuswaanizya andiswe. Lugwalo lwa Baroma 5:12 lwaamba kuti: “Mbubonya cibi mbocakanjila munyika kwiinda mumuntu omwe [Adamu] alufwu kwiinda mucibi, eelyo lufwu lwakasikila bantu boonse nkaambo boonse bakabisya.”

Bbayibbele lyaamba kuti chibi alufu zili mbuuli “mulembo uuvwumbide bantu boonse alimwi acivwumbyo civwumbide masi oonse.” (Isaya 25:7) Eezi zitondeezya kuti taakwe muntu ukonzya kuchija chibi alufu. Bbayibbele liti kwiinda “muli Adamu boonse balafwa.” (1 Bakorinto 15:22) Mubuzyo usyaala uuli mbuuli wakabuzigwa amwaapostolo Pawulu naakati: “Ino nguni utiindivwune kumubili ooyu uunditola kulufwu oolu?” Mpali na uukonzya kutuvuna?​—Baroma 7:24.