Ubonaanga buumi nibunga buli biyeni kaansinga taakwe zuba? Zuba lipa kuti misamu ibe aamatu, ibe aamaluba akuti izyale michelo. Alubo zuba lipa kuti misamu ikonzye kudonsa maanzi kayibelesya miyanda. Maanzi aadonswa aamiyanda nga apa kuti matu afwefweme.

Leza wakatupa mvula kuchitila kuti aanyika kumene chakulya. Leza wakapa kuti kube chiindi chamayinza, muchiindi eechi kuba michelo iinona loko alubo eezi ngazyapa kuti tubotelwe.

Bazyali biingi balakataazikana atala ambubakonzya kusanina bana babo akubayandwiida zyakuzwaata. Atubone nzyaawamba Magwalo, atii: “Amulangisye bayuni bauluka mujulu; tabasyangi mbuto naa kutebula nokuba kuyobola mumatala, nokuba boobo Uso wakujulu ulabasanina. Sena tamuyandiki kwiinda mbabo?”​—Matayo 6:25, 26.

“Amwiiye kumaluba-luba aamusyokwe mbwaakomena . . . ; pele ndimwaambila kuti naba [Mwaami] Solomoni mubulemu bwakwe boonse kunyina naakasamide mbuli limwi lyayaaya. Lino ikuti naa Leza mbwazisamika oobu zimena musyokwe . . . , sena takaindi kumusamika nywebo?”​—Matayo 6:28-30.

Mbukunga Leza ulakonzya kutusanina akutusamika, zilaantanganana kuti ulakonzya kutugwasya muzintu zyoonse nzituyanda mubuumi. Kuti twachita kuyanda kwaLeza, ulakonzya kutupa nzila zyakuti tukonzye kulima naakuti kutugwasya kuti tujane mulimu uutazoope kuti katujana zintu nzituyandikana.​—Matayo 6:32, 33.

Kulanga-langa zintu zili mbuli zuba, mvula, tuyuni amaluba zipa kuti tuyande Leza. Muchiiyo chitobela, tuyoobona nzila njaakali kubelesya Mulengi wesu kuti aambuule aabantu.