Bantu biingi bali munyika bali aapenzi lyanzala alubo tabakwe aakukkala pe. Bamwi bayanda kugwasigwa kuti babe aabulangilizi bwabuumi bulikunembo. Kubeleka changuzu katugwasya bantu bali boobu kupa kuti Leza azootulongezye.

“Ooyo uufwida luzyalo muntu uupengede ukweletesya Jehova, eelyo walo uyoomupa bulumbu akaambo kazintu eezyo nzyacita.”​—TUSIMPI 19:17.

Jesu wakaambuula atala achikozyano chamwaalumi wakawumwa aamasosi. (Luka 10:29-37) Umwi mwaalumi naakamubona wakayimikila akugwasya muntu ooyo wakawumwa. Wakamugwasya nikuba kuti wakali wamusyobo uumbi.

Mwaalumi ooyu wakapa muntu wakawumwa munsamu wakusilika zilonda, ziyandikana zyakumubili alubo wakamubuzya majwi aakapa kuti atakataazikani loko sikulichisa.

Twiiyaanzi kuchikozyano eechi? Jesu wakatondeezya kuti tweelede kugwasya bantu bayanda lugwasyo munzila zisiyene-siyene. (Tusimpi 14:31) Magwalo atondeezya kuti Leza uyoomaninsya kufwaba amapenzi. Tulakonzya kulibuzya kuti, Leza uyoozichita biyeni eezi akuti uyoozichita lili? Muchiiyo chitobela, tuyoobona zilongezyo Mulengi wesu ulaaluyando nzyatubambilide.