Mupolofita Mozesi wakaamba kuti, Leza ulatulongezya kuti twaswiilila milawu yakwe. (Deuteronomo 10:13; 11:27) Tatuswiilili Leza pe akaambo kakuti tuyoowa kuti ulatusubula. Buntu mbwalaabo Leza mbubo bupa kuti tumuswiilile nkaambo tulamuyanda alubo tatuyandi kuchita zintu zimunyemya. “Nkaambo kuyanda Leza caamba kuti katubamba milawo yakwe.”​—1 Johane 5:3.

Utulongezya biyeni Leza akaambo kakuswiilila? Atulange-lange nzila zibili.

“Mebo, nde Jehova ndime Leza wako ndime ndikuyiisya kuti ugwasyigwe, . . . uukusololela munzila moyelede kweendela.”—ISAYA 48:17.

Jehova Leza, Mulengi wesu ulituzi alubo utupa malayilile ngituyandikana. Kuti katuyanda kuti malayilile aazwa kuli Leza atupe kuti tube basongo, tweelede kubala Magwalo Aasalala kuti tuzibe kuti Leza uyanda kuti tuchiteenzi mpawo tubelesye nzitubala.

“Ibakkomene mbaabo baswiilila jwi lya Leza akucita ncolyaamba!”​—LUKA 11:28.

Mazubaano mamiliyoni aabantu baswiilila Jwi lyaLeza balikubotelwa. Muchikozyano, atulange-lange chikozyano chamwaalumi wakuSpain wakali kufwambaana kunyema alubo wakali kubajata munzila yalunya bamwi kuswaanizya amwanakazi wakwe. Limwi zuba wakabala atala amakani aakalembwa aamupolofita Mozesi aali atala akulibombya nkwaakali kuchita Josefa mwana waJakkobo. Josefa wakawuzigwa kali muzike alubo wakazoobikkwa mujele pesi wakazumanana kulibombya, wakali aaluumuno alubo wakali kulekelela. (Matalikilo, zyaandaano 37-45) Mwaalumi ooyu wakaamba kuti, “Kuyeeya atala achikozyano chaJosefa kwakandigwasya kuti ndibelekele kuba muntu uulibombya, ulaaluzyalo alubo uulinyona. Eezi zyakapa kuti ndibotelwe mubuumi.”

Magwalo Aasalala atugwasya kuti tubone mbutweelede kubajata bamwi. Atubone makani miingi atala ankani eeyi muchiiyo chitobela.