Mpaali Aayeeme Buumi Bwako Bwakunembo?
Bamwi basyoma kuti zyamasalamusi nzizyo zyeendelezya buumi bwabo bwakunembo. Akaambo kakusyoma masalamusi, ngabachita zintu nzibayeeyela kuti zilakonzya kupa kuti bazoopone buumi bulikabotu kunembo.
NZIBASYOMA BANTU BIINGI
KULANGA BWEENDE BWANYENYEEZI: Bamwi basyoma kuti buumi bwabo bwakunembo, bweendelana aakuti nyenyeezi zyakakkede biyeni mumweezi ngubakazyalwa. Kuti baziba kuti zyakakkede biyeni, nga bayinka kulibasikulanga-langa nyenyeezi naakuti kubasondi kuti bakababuzye mapenzi ngibakonzya kuswaana mubuumi ambubakonzya kwaazunda kuchitila kuti bazwidilile mubuumi.
FENG SHUI: Bamwi basyoma kuti zifanikisyo nzibabikka aamiduli yamaanda aabo zilakonzya kupa kuti bazwidilile mubuumi. Umwi mwaalumi uutegwa Lo Wing, * wakuHong Kong, wakati: “Umwi mwaalumi simasalamusi wakandibuzya kuti, kuti ndabikka chifanikisyo chazyamasalamusi aachintoolo changu kulakonzya kundigwasya kuti ndijane mali nyingi.”
KUKOMBA MIZIMU: Bamwi basyoma kuti, kukomba mizimu kulakonzya kubakwabilila akupa kuti bajane zilongezyo. Van uukkala kuVietnam, wakati, “Ndakali kusyoma kuti, kulemeka mizimu kupa kuti ndipone buumi bulikabotu ampuli akuba aalyajuunza likwabililidwe.”
KUPONA LUBO KULIBUMWI BUSENA: Bantu biingi basyoma kuti buumi tabumani pe. Ulakonzya kufwa mpawo uzoozyalwe lubo. Basyoma kuti zintu zibi naakuti zibotu zilikubachitikila lino mubuumi zilikuba akaambo kabuumi mbubakali kupona chiindi.
Pesi biingi basyoma kuti njiisyo eezi nzyamasalamusi. Nikuba oobo, biingi baamba kuti tabazisyomi pe pesi bachiliswaanizya mumichito iili mbuli kubala tweengo twamumaboko, kusonda, kuya kumapolofita azimwi. Chimwi chiindi, ngababonaanga zintu eezi zilakonzya kubagwasya kuti bazibe kuti buumi bwabo buyooba biyeni kunembo.
NZIIZILI MPINDU ZILIKUBA?
Bantu basyoma zintu zyaambwa aajulu aawa, balikupona buumi bulikabotu na?
Atubone zyakachitikila Hào uukkala kuVietnam. Wakayinka kulibasikulanga-langa nyenyeezi, bazyamasalamusi akumizimu, kayanda kuti zintu zyoonse eezi, zimugwasye kuti azwidilile mubuumi. Pesi wakazwidilila na mubuumi? Hào wakati, “Bbizinesi yangu yakawa, ndakaba aazikwelete, kupambana mumpuli akukkala kandikataazikene.”
Quiming wakuTaiwan, anguwe wakali kusyoma basikulanga-langa bweende bwanyenyeezi, kusyoma kuti muntu ngawaakupona lubo kuti wafwa, kusyoma basimasalamusi akukomba mizimu. Naakazwa aakulanga-langa nkani eezi wakati: “Ndakabona kuti njiisyo eezi amichito eeyi ilakazyania alubo tazimvwisisiki pe. Ndakabona kuti bweende bwanyenyeezi mbwakubeja. Kunkani yakupona lubo kuli bumwi busena kuti wafwa, ndakabona kuti njakubeja nkaambo tazichiti pe kuti upone buumi bulikabotu kunembo iwe kakuli nga tuchiziyeeyede pe zintu nzwaakachita musule.”
“Ndakabona kuti njiisyo eezi amichito eeyi ilakazyania alubo tazimvwisisiki pe.”—QIUMING, TAIWAN
Hào, Qiuming abamwi bakabona kuti buumi bwesu tabuyeeme aazintu zyamasalamusi, bweende bwanyenyeezi, mizimu akuzyalwa lubo kuti wafwa. Eezi zyaamba kuti taakwe nzitweelede kuchita na kuti tuzoopone buumi bulikabotu kunembo?
Bamwi bantu babonaanga balakonzya kuzoopona buumi bulikabotu kuti bayiya loko akuti banota. Bamwi bakajana mpindu zili biyeni akaambo kakwiiya loko akunota?
^ par 5 Amwi mazina akachinchwa muchiiyo eechi amuzyiiyo zitobela.
^ par 16 Majwi aaya ajanika muBbayibbele muli Bagalatiya 6:7. Mulaamwi majwi kasimpi aaka kaamba kuti: “Kuti waganka namunywa, ulatebula namunywa; kuti waganka nyangu ulatebula nyangu.”
You May Also Like
NGAZIYAKULINDA
Basikupandulula Bweende Bwanyenyeezi Abasondi—Balizizi Na Choonzyo Zintu Ziyoochitika Kunembo?
Nzila nzibabelesya bantu kuti bazibe ziyoochitika kunembo zili kubagwasya na?
