Mabala aachiHebbrayo alakonzya kwaamba baluleme abasizibi. Eezi zyakapa kuti amwi mabala muBbayibbele litegwa New World Translation abambululwe akaambo katwaambo tutobela:

1. Bbayibbele litegwa New World Translation lyamu2013 libelesya mabala ayendelana amulawu wamulaka. Bbala lyachiHebbrayo lyakuti “asher” libelesedwe kumasaangunino aavesi 12, lilakonzya kutugwasya kuti tumvwisisye lugwalo lwaIntembauzyo 144:12-15 amavesi aali kumasaangunino. Bbala lyakuti asher lilakonzya kusandululwa munzila zisiyene-siyene. Muchikozyano, lilakonzya kwaamba “bantu.” MuBbayibbele lyachiindi kwakabelesegwa bbala lyaamba “bantu” bachita zintu zibi. Nkinkaako, zilongezyo zyaambidwe muvesi 12 kusika ku14 zyakali mbuuli kuti zyakali kuyoojanwa abantu bachita zintu zibi baambidwe mumavesi akusaanguna. Nkinkaako bbala lyakuti asher lilakonzya kwaamba mpindu naakuti zintu zikonzya kuchitika kunembo alubo lilakonzya kusandululwa kuti “mpawo” naakuti “aboobo.” Bbala lyakuti “aboobo” lilibelesedwe muBbayibbele litegwa New World Translation lyamu2013 akulaamwi maBbayibbele.

2. Bbayibbele litegwa New World Translation lyamu2013 lileendelana ambwiilembedwe ntembawuzyo. Bbala lyakuti “aboobo” libelesedwe kumatalikilo aavesi 12, lyaamba bantu baluleme batakajane zilongezyo zyaambidwe muvesi 12 kusika ku14 alubo mbabo bakumbila ‘kuvunwa akufutulwa’ kuzwa kumaanza amubi (muvesi 11). Muvesi 15 bbala lyakuti “balikkomene” lyaambidwe tubili pesi lyaamba chintu chimwi. Nkinkaako, kubotelwa ooku nkwabantu “bajisi Jehova kali Leza wabo!” Alubo magwalo achiHebbrayo taakalikwe mpawuzyo zitondeezya kuti mabala akaambwa awumwi muntu. Nkinkaako, basanduluzi bakeelede kuziba kuti chiHebbrayo chilembedwe munzila yatupeto, kuziba zyakali kwaambwa alubo bakeelede kukozyanisya aamwi mavesi aamuBbayibbele.

3. Mabala akabelesegwa muBbayibbele lyaNew World Translation yamu2013, aleendelana amabala aali mulaamwi mavesi awambuula atala azilongezyo nzibayoojana bakombi baLeza basyomeka. Kweendelana abusanduluzi bwaNew World Translation yamu2013, bbala lyakuti asher litondeezya bulangilizi Davida mbwaakali aabo bwakuti Leza wakali kuyoovuna maIsrayeli kuli basinkondonyina akuti wakali kuyoolongezya bakombi bakwe kuti babotelwe akuti bakkale kabotu. (Lev. 26:9, 10; Dt. 7:13; Int. 128:1-6, NW) Muchikozyano, muBbayibbele lyaNew World Translation lyamu2013, lugwalo lwaDeuteronomo 28:4, lwaamba kuti: “Bayoolongezyegwa bana banu, butebuzi bwanu alimwi abana babanyama banu bavwubwa alimwi abana bang’ombe zyanu abambelele zyanu.” Nikwakali kweendelezya Mwana waDavida, Solomoni, maIsrayeli bakali aluumuno alubo bakakkede kabotu. Bweendelezi bwaSolomoni bwakali kwiiminina bweendelezi bwaMesiya.—1 Bam. 4:20, 21; Int. 72:1-20.

Nkinkaako, kubambululwa kwamabala aali muli Intembauzyo 144, teekwakachincha zintu nzitusyoma pe. Nikuba boobo, Intembawuzyo yoonse itondeezya kuti bulangilizi mbubali aabo bakombi baJehova buyoozuzikizigwa baakunyonyoonwa bantu babi alubo baluleme bayoopona muluumuno alubo bayookkala kabotu kukabe kutamani.—Int. 37:10, 11.