1-3. (a) Bachikula baswaana penzi lili biyeni alubo kujana zyakozyanisigwa aanzi? (Langa chifanikisyo chili kumatalikilo achiiyo.) (b) Niinzi chikonzya kugwasya bachikula kuti bazunde penzi eeli?

ATUTEEDI uyanda kuya kumuswaangano uuyandikana, uuli kubusena buli kule ankukkala. Kuti ukasike nkuko, weelede kutanta bbaasi. Nwaasika achilindilo chamabbaasi, wajana kakuteendeki akaambo kakuvula kwamabbaasi abantu bayanda kutanta mabbaasi. Kuziba nkuya, kulakonzya kupa kuti utante bbaasi iyookusisya nkuya. Pesi kuti watanta kufumbwa bbaasi, ulakonzya kusweeka.

² Bachikula balakonzya kukozyanisigwa abantu bayanda kutanta mabbaasi. Bachikula bali mulweendo lwabuumi kutali lwakutanta bbaasi. Chimwi chiindi balakonzya kukataazikana atala azintu nzibeelede kuchita anzibeelede kusala. Kuziba nzibayanda kuchita mubuumi kulakonzya kubagwasya kuti basale kabotu. Nibachikula, niinzi nzimuyanda kuchita mubuumi?

³ Chiiyo eechi chiyoosandula mubuzyo ooyu alubo chiyoosungwaazya bachikula kuti bachite zintu zibotezya Jehova. Zintu  eezi ziswaanizya nzila njibasalaayo kumakani aazyalwiiyo, mulimu, kuba ampuli azimwi. Alubo ziswaanizya kulibikkila zipeekezyo zyabukombi. Bachikula babikkila maanu muzintu zyabukombi bajana zilongezyo zyiingi alubo balazwidilila muzintu nzibachita.—Bala Tusimpi 16:3.

4. Tulalanga-langaanzi muchiiyo eechi?

⁴ Kulibikkila zipeekezyo zyabukombi kuchikomena kulagwasya. Nkamboonzi nikugwasya? Atulange-lange twaambo tutatu. Twaambo tubili tutondeezya kuti, kulibikkila zipeekezyo zyabukombi kusimya bweenzinyokwe aJehova. Alubo kaambo katatu katondeezya zilongezyo nzitujana kuti twalibikkila zipeekezyo katuchikomena.

5. Nkaakali kaambo kakusaanguna kapa kuti tulibikkile zipeekezyo zyabukombi?

⁵ Kaambo kakusaanguna katondeezya kuti kulibikkila zipeekezyo muzintu zyabukombi kutondeezya kuti tulamulumba Jehova akaambo kaluyando ndwaakatutondeezya azintu nzyatuchitila. Sintembawuzyo wakati: “Ncibotu kulumba Jehova . . . Nkaambo yebo, O Jehova, wandibotezya kukucita kwako, ndaimba cakukondwa kumilimo yamaanza aako.” (Int. 92:1, 4) Nibachikula, mweelede kuyeeyesesya atala azintu nzyamupede Jehova. Zintu eezi ziswaanizya buumi, lusyomo, Bbayibbele, mbungano abulangilizi. Kubikka zintu zyabukombi mubusena bwakusaanguna, kutondeezya kuti tulamulumba Jehova akaambo kazintu nzyatupede akuti tuli abweenzinyina bulikabotu anguwe.

6. (a) Kulibikkila zipeekezyo muzintu zyabukombi kugwasya biyeni? (b) Nziizili zipeekezyo nzibakonzya kulibikkila bachikula?

⁶ Kaambo kabili katondeezya kuti kulibikkila zipeekezyo kuchikomena, kupa kuti Jehova abotelwe akuti ube abweenzinyina bulikabotu anguwe. Mwaapostolo Pawulu wakati: “Nkaambo Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe.” (Heb. 6:10) Kufumbwa minyaka njulaayo, ulakonzya kulibikkila zipeekezyo zyabukombi. Christine wakalibikkila chipeekezyo chakubala atala amakani aaBakamboni basyomeka naakali aminyaka iili 10. Toby naakali aminyaka iili 12, wakalibikkila chipeekezyo chakubala Bbayibbele lyoonse katanabbabbatizigwa. Maxim wakabbabbatizigwa kali aminyaka iili 11 antoomwe amwanikaakwe Noemi wakali aminyaka iili 10. Boonse bakalibikkila chipeekezyo chakubelekela kuBbeteli. Bakanamatika foomu lyakubelekela kuBbeteli kumuduli wang’anda yabo kuti bayeeyesesye atala achipeekezyo chabo. Nibachikula, amube azipeekezyo zyabukombi akubeleka changuzu kuti muzizuzikizye.—Bala BaFilipi 1:10, 11.

7, 8. (a) Kulibikkila zipeekezyo kugwasya biyeni kuti kuube kusala zyakuchita? (b) Nkamboonzi umwi uuchikula naakasala kutayinka kuyunivesiti?

⁷ Kaambo katatu kapa kuti bachikula balibikkile zipeekezyo kali atala akusala zyakuchita mubuumi. Bachikula beelede kusala lwiiyo, mulimu azimwi. Kusala zyakuchita kuli mbuuli kusala nzila iilinjiyo mpuziswaanana nzila. Nkuuba kusala nzila iilikabotu kuti kukwizi nkuya. Nkinkaako, nkuuba kusala zyakuchita kuti kuli azipeekezyo. Lugwalo lwaTusimpi 21:5 lwaamba kuti: “Makanze aabasungu alaleta zilyo zinji.” Kulibikkila zipeekezyo kuchili muniini kupa kuti uzwidilile. Nzizyo zyakachitika kumuchizi uutegwa Damaris, wakeelede kusala kachili mukubusi.

⁸ Muchizi uutegwa Damaris wakalipaside naakamaninsya chikolo. Wakali kukonzya kuzumina kubbadalilwa amutabi kuti akayiye zyamulawu kuyunivesiti pesi wakasala kubeleka kubbenki. Nkamboonzi naakasala munzila eeyi? Wakati: “Kuzwa kandichili  muniini, ndakalibikkila chipeekezyo chakupayona. Nkinkaako kuti ndikonzye kupayona, ndakeelede kubeleka mulimu wamazuba mache. Kuba adigili lyabuloya kwakali kuyoopa kuti ndifole mali nyingi pesi teekwakali kuyoopa kuti ndijane mulimu wamazuba mache.” Lino Damaris waba aminyaka iili 20, kapayona. Damaris ulalisola na akusala nkwaakachita kachili muniini? Wakati: “Kubbenki ndiswaana maloya miingi. Mulimu ngubachita nikuli ngundichita andime kaansinga ndakazumina kwiiya zyamulawu. Biingi tabawubotelelwi pe mulimu ngubachita. Kulibikkila chipeekezyo chakupayona kwakandigwasya kuti nditakataazikani mbuuli mbubachita bamwi pesi kwakandijulila mweenya wakuti ndibone mbukubotezya kubelekela Jehova.”

9. Nkamboonzi bachikula nibeelede kulumbayizigwa?

⁹ Bachikula bali mumbungano zisiyene-siyene munyika yoonse, beelede kulumbayizigwa. Balalipeda kuli Jehova akulibikkila zipeekezyo zyabukombi. Bachikula aaba, balabotelwa chachoonzyo alubo batobelezya malayilile aazwa kuli Jehova muzintu zyoonse nzibachita. Malayilile aaya alabagwasya kuti basale kabotu kumakani alwiiyo, mulimu akuti babotelwe mubuumi. Solomoni wakalemba kuti: “Syoma Jehova amoyo wako woonse. Umuzyibye munzila zyako zyoonse, nkabela uyooenzya myeendelo yako.” (Tus. 3:5, 6) Bachikula bali mumbunga balayandikana kuli Jehova alubo ulabakwabilila, ulabazulwida akubalongezya.

10. (a) Nkamboonzi nitweelede kubikka mulimu wakukambawuka mubusena bwakusaanguna? (b) Niinzi chikonzya kutugwasya kuti tuzwidilile mumulimu wakukambawuka?

¹⁰ Uuchikula uyanda kubotezya Jehova ubikka mulimu wakukambawuka mubusena bwakusaanguna. Jesu Kristu wakati ‘makani mabotu akambawukwe chakusaanguna.’ (Mk. 13:10) Mulimu wakukambawuka ulayandikana, nkinkaako tweelede kuubikka mubusena bwakusaanguna. Kujana walibikkila chipeekezyo chakuzwa mumulimu wakukambawuka kwachiindi chiingi na? Kujana wapayona na? Kujana wachita biyeni kuti kukambawuka kakutakunoneezyi? Niinzi chikonzya kukugwasya kuti uzwidilile mumulimu wakukambawuka? Zintu zibili zitobela zilakonzya kukugwasya. Chakusaanguna, weelede kulibambila alubo chabili, utaleki kubuzya bamwi atala aJehova. Eezi zilakonzya kukugwasya kuti ubotelwe mumulimu wakukambawuka.

11, 12. (a) Kujana bachikula balibambila biyeni kuti bakambawuke? (b) Umwi uuchikula wakakambawuka biyeni kuchikolo?

¹¹ Ulakonzya kuyeeyesesya mbukonzya kusandula mibuzyo iibuzigwa abasichikolonyokwe nuli kulibambila. Muchikozyano, balakonzya kukubuzya kuti “Nkamboonzi nusyoma muli Leza?” Awebbusayiti yesu iitegwa jw.org, kuli makani agwasya bachikula kuti bakonzye kusandula mubuzyo ooyu. Langa alembedwe kuti BIBLE TEACHINGS > TEENAGERS. Muchipanzi eechi, kuli mutwe uti “Why Do I Believe in God?” Makani aaya ayookugwasya kulibambila mbukonzya kusandula. Muchipanzi eechi kuli lugwalo lwaBaHebrayo 3:4, lwaBaRoma 1:20 aIntembauzyo 139:14. Ulakonzya kwaabelesya kuti upandulwide bamwi nzusyoma. Alubo makani aaya alakonzya kukugwasya kuti usandule mibuzyo iisiyene-siyene.—Bala 1 Petro 3:15.

¹² Sungwaazya basichikolonyokwe kuti banjile awebbusayiti yesu iitegwa jw.org. Eezi nzizyo nzyaakachita Luca. Mukkilasi yabo bakali kwaambuula atala azikombelo zisiyene-siyene, mpawo Luca wakabona kuti bbuku ndibakali kubelesya lyakalembedwe makani atali ngawo atala aBakamboni  baJehova. Nikuba kuti kumasaangunino wakali kuyoowa, pesi Luca wakakumbila kumuyiisi wakwe kuti apandulule makani achoonzyo atala aBakamboni, mpawo muyiisi wakwe wakazumina. Luca wakapandulwida basichikolonyina nzyasyoma alubo wakabatondeezya webbusayiti yesu. Mpawo muyiisi wabo wakabuzya bana mbaakali kuyiisya kuti bakeebele kavidiyo kati Beat a Bully Without Using Your Fists. Luca wakabotelwa loko kuti wakakonzya kukambawukila basichikolonyina.

13. Nkamboonzi nitweelede kuzumanana kukambawuka nikuba katuli mubuyumu-yumu?

¹³ Nikuba kuti munzila muyenda mwaba zilebyo, utaleki pe. (2 Tim. 4:2) Nwaaswaana buyumu-yumu, bikkila maanu kuzipeekezyo nzulaazyo. Naakali aminyaka iili 17, umwi muchizi uutegwa Katharina wakalibikkila chipeekezyo chakukambawukila bantu mbaakali kubelekaabo. Umwi muntu ngwaakali kubelekaawe wakali kumubuzya majwi mabi pesi Katharina taakali kunyema pe. Kulinyona nkwaakachita kwakamusika aamoyo umwi mwaalumi ngwaakali kubelekaawe uutegwa Hans. Nkinkaako, Hans wakatalika kubala mabbuku eesu, akwiiya Bbayibbele alubo wakazoobbabbatizigwa. Nizyakachitika eezi, Katharina taakachili kubelekela kubusena oobo. Kakwiindide minyaka iili 13, Katharina wakabotelwa loko naakabona Hans muNg’anda yaBwaami, wakaswayide mumbungano yabo kuti azoope nkani. Eezi zitondeezya kuti kuzumanana nkwaakachita Katharina kukambawukila bantu mbaakali kubelekaabo, kwakagwasya.

14, 15. (a) Niinzi nzibeelede kuyeeya bachikula kuti kabali kweenwa abaselanyina? (b) Kujana bachikula bachita biyeni kuti bateenwi abaselanyina?

¹⁴ Chiiyo eechi chasungwaazya bachikula kuti babelekele Jehova. Eezi zyaamba kubikkila maanu muzipeekezyo zyabukombi. Zilakonzeka kuti bamwi baselanyokwe babikkila maanu muzintu nzibayanda alubo balakonzya kukusungilizya kuti uchite mbuuli mbubachita. Nkinkaako, weelede kusala kweendelana azipeekezyo zyako. Utazumini kweenwa abaselanyokwe. Yeeya chikozyano chaambwa kumatalikilo achiiyo eechi chabantu bayanda kutanta bbaasi. Tukonzyi kutanta bbaasi itayinki nkuya, akaambo kakuti bantu bali mubbaasi eeyo bali kubotelwa.

 ¹⁵ Kuli zintu zyiingi zikonzya kukugwasya kuti uteenwi abaselanyokwe. Muchikozyano, utayinki kumasena nkukonzya kweenwa. (Tus. 22:3) Yeeya mapenzi aakonzya kuba akaambo kakuchita zintu zitali kabotu. (Gal. 6:7) Alubo, weelede kuzumina kuti uyanda kugwasigwa. Kulibombya kuyookugwasya kuti utambule malayilile aazwa kubazyali akumaKristu basimide mubukombi.—Bala 1 Petro 5:5, 6.

16. Amba zyakachitika zitondeezya kuti kulibombya kulagwasya.

¹⁶ Kulibombya kwakapa kuti Christoph atambule malayilile aagwasya. Naakabbabbatizigwa, wakasaanguna kwiinka kubusena kuchitwa zyakunyanyaasya mubili. Bamwi bachikula kubusena ooko, bakamusungilizya kuti aze kukabunga kabo. Christoph wakabuzya umwi mwaalu atala ankani eeyi, mpawo mwaalu ooyo wakamubuzya kuti ayeeyesesye atala amapenzi aakali kukonzya kuba, mbuuli kuba amuzeezo wakuzundaana. Nikuba boobo, Christoph wakaliswaanizya akabunga aaka. Mukuya kwachiindi, Christoph wakabona kuti musobano ooyu wakali kusungwaazya zyakulwana. Wakabuzya baalu basiyene-siyene zyakali kuchitika pesi bakamubuzya malayilile aazwa muBbayibbele. Christoph wakati: “Jehova wakanditumina basikundigwasya balikabotu. Nikuba kuti ndakatola chiindi chilamfu, pesi ndakaaswiilila malayilile ngibakandibuzya.” Nibachikula, mulalibombya na kwiinda mukutambula malayilile aakonzya kumugwasya?

17, 18. (a) Jehova uyanda kuti bachikula bachiteenzi? (b) Niinzi nzibeelede kuchita bachikula kuti batazoolisoli nibakomena? Pa chikozyano.

¹⁷ “Sekelela, O Mulombe [naakuti musimbi], mubwanike bwako, amoyo wako ukondwe mumazuba aabwanike bwako.” (Muk. 11:9) Nibachikula, Jehova uyanda kuti mubotelwe. Chiiyo eechi chatondeezya imwi nzila iikonzya kupa kuti mubotelwe. Amuzumanane kubikkila maanu muzipeekezyo zyanu akusyoma Jehova muzintu zyoonse nzimuchita. Kuti mwalibikkila zipeekezyo kamuchili baniini, muyoobona Jehova mbayoomuzulwida, kumukwabilila akumulongezya. Mweelede kuyeeyesesya atala amalayilile aamuBbayibbele, aakuti: “Koyeeya Mulengi wako mumazuba aabulombe [naakuti aabusimbi] bwako.”—Muk. 12:1.

¹⁸ Nibachikula, muzookomena akuba bantu bapati. Zilawusisya kuti bamwi nga bazoolisola nibakomena akaambo kakuti bakasala munzila itali kabotu akuti teebakalibikkila zipeekezyo kabachili baniini. Pesi bachikula balibikkila zipeekezyo zyabukombi, tabakalisoli pe akaambo kakusala nkubakachita kabachili baniini. Eezi nzizyo zyakachitika kuli Mirjana wakali achipo kuzisobano. Wakabuzigwa kuti atole lubazu mumaOlympic Games pesi wakasala kubeleka mulimu wachiindi choonse. Lino kwayinda minyaka iili 30 alubo Mirjana uchili mumulimu wachiindi choonse amulumaakwe. Mirjana wakati: “Mpuwo, kulemekwa, manguzu abunoti nzyachiindi chifwiifwi alubo taziyandikani loko mubuumi. Kubelekela Leza akugwasya bantu muzintu zyabukombi nzipeekezyo ziyandikana chiindi choonse.”

19. Amba zilongezyo nzibakonzya kujana bachikula kuti balibikkila zipeekezyo zyabukombi kabachili baniini.

¹⁹ Bachikula bali mumbungano beelede kulumbayizigwa akaambo kakuzumanana kulwana abuyumu-yumu mbubaswaana akulipeda kubelekela Jehova. Bachikula bachita oobo kwiinda mukulibikkila zipeekezyo akubikka mulimu wakukambawuka mubusena bwakusaanguna. Alubo tabazumini kweenwa azintu zili munyika. Bachikula beelede kuziba kuti nzibachita zili ampindu. Bakombinyina balabagwasya alubo kuti basyoma Jehova, zyoonse nzibachita zilazwidilila.