Bamwi bayeeya kuti kubikka zintu zipupululwa aBakamboni kuli amwi mawebbusayiti naakuti kakubelesegwa nzila zyakwaambuuzyania teekubi pe nkaambo zintu nzitupa bantu tazibbadalisigwi. Nikuba boobo, kuchita oobo takweendelani pe amulawu uuli aansi amutwe uuti, Nzweelede Kuzumina * uuli aawebbusayiti yesu alubo eezi zyapa kuti zintu ziteendi kabotu. Mbuuli mbukulembedwe aamilawu eeyi, taakwe muntu uuzumizigwa “kubikka zifanikisyo, mabbuku aajanika aaIntaneti, matrademarks, nyimbo, mavidiyo naakuti amwi makani aajanika aawebbusayiti eeyi kuli imwi webbusayiti (kufumbwa mawebbusayiti, nzila zyakwaambuuzyania, mawebbusayiti akutuminana makani naakuti mavidiyo).” Nkamboonzi eezi nizitazumizigwi?

Makani woonse aajanika aawebbusayiti yesu aali mumulawu. Basiluleyo abasikukazya babikka zintu zigwisigwa aambunga kumawebbusayiti aabo kuti beene Bakamboni abamwi bantu. Makanze aamawebbusayiti aaya, ngakuti basikubala batabasyomi pe Bakamboni. (Int. 26:4; Tus. 22:5) Bamwi babelesya zintu nzitupupulula naakuti logo yesu yajw.org nibachita zyabbizinesi amumapulogilamu aajanika mumafooni naakuti mumatebbuleti. Kubikka mawebbusayiti eesu amatrademark mumulawu kupa kuti mawebbusayiti eesu akwabililwe. (Tus. 27:12) Kuti twazumizya bantu, nikuba Bakamboni kuti babikke zintu nzitupupulula kuli amwi mawebbusayiti naakuti twabazumizya kubelesya matrademarks aajw.org nibawuzizyania zintu, basimilawu  tabakabapi mulandu pe basikukazya abasimabbizinesi kuti banyonganya webbusayiti yesu.

Kudawuniloda zintu nzitupupulula kuli amwi mawebbusayiti kutali ajw.org kweeta mapenzi. Jehova wakasala “muzike musyomesi uucenjede” luzutu kuti atupe chakulya chitugwasya mubukombi. (Mt. 24:45) Kuti atupe chakulya chitugwasya mubukombi, “muzike” ooyu ubelesya mawebbusayiti aali mumulawu ategwa www.pr418.com, tv.pr418.com, a-wol.pr418.com. Alubo tuli amapulogilamu aatatu luzutu aali mumulawu aabelesegwa mumafooni naakuti mumatebbuleti ategwa—JW Language^®, JW Library^®, a-JW Library Sign Language^®. Taakwe muntu uukonzya kuchita zyabbizinesi kumapulogilamu aaya naakuti kubikka zintu zibi zisumpulwa aaSaatani. Kuti chakulya chitugwasya mubukombi chayinda kuli amwi mawebbusayiti chinooli chanyonganisigwa.—Int. 18:26; 19:8.

Alubo kubikka nzitupupulula kuli amwi mawebbusayiti kupa kuti basiluleyo abasikukazya baambe makani atali kabotu atala ambunga yaJehova. Bamwi bakwesu bakoongelezegwa kwaambuuzyania abasiluleyo aIntaneti alubo eezi zyakapa kuti zina lyaJehova lisampawulwe. Kwaambuuzyania aabantu aIntaneti, takukonzyi kupa kuti ‘tubasandule chamoyo mubombe aabo batukazya.’ (2 Tim. 2:23-25; 1 Tim. 6:3-5) Alubo kwakajanwa kuti kuli nzila zijanika aIntaneti zyakwaambuuzyania zyakubeja amawebbusayiti aakubeja aakabikkwa muzina lyambunga yesu, lyaKabunga Keendelezya alyabakwesu bali muKabunga Keendelezya. Nikuba boobo, kubakwesu bali muKabunga Keendelezya taakwe uuli apeji yakwe alikke naakuti uuli anzila yakwaambuuzyania iijanika aIntaneti alikke.

Kubuzya bantu kuti banjile aajw.org kupa kuti bamvwe “makani mabotu.” (Mt. 24:14) Zintu zijanika aaIntaneti zyakubelesya mumulimu wakukakambawuka zili kusumpulwa. Makanze eesu ngakuti bantu boonse bagwasigwe azintu eezi. Nkinkaako, mbuuli mbukulembedwe aansi amutwe uuti, Nzweelede Kuzumina, ulakonzya kutumizya muntu chimwi chintu chijanika aajw.org kubelesya e-mail naakuti linki. Kubuzya bantu kuti banjile aawebbusayiti yesu, kupa kuti bajane chakulya chitugwasya mubukombi chizwa ‘kumuzike musyomesi uuchenjede.’