1. Nga ulachita biyeni kuti ube mweenzinyina wawumwi muntu?

CHINTU nchusaanguna kuchita kuti kuyanda kuba mweenzinyina wawumwi muntu nkujana chiindi chakuba anguwe. Kuti mwakkala kamubuzyania nzimuyeeya azyakamuchitikila mubuumi mulamvwanana. Pesi kuyanda kuba mweenzinyina waJesu kulisiyene azeezi nkaambo teekuuba pe. Nkamboonzi?

2. Niinzi chintu chakusaanguna chikonzya kupa kuti kutuyumine kuba beenzinyina baJesu?

² Chintu chakusaanguna chikonzya kupa kuti kutuyumine kuba beenzinyina baJesu nkuti tatunamubona pe. MaKristu miingi bakapona muchiindi chabaapostolo, teebakamubona pe Jesu. Nikuba boobo mwaapostolo Petro wakati: “Nokuba kuti kunyina nomwakamubona, mulamuyanda. Nokuba kuti kwaciindi cino tamumubwene, pele mulamusyoma.” (1 Pet. 1:8) Eezi zitondeezya kuti tulakonzya kuba abweenzinyina busimide aJesu nikuba kuti tatukonzyi pe kumubona.

3. Amba chintu chachibili chikonzya kupa kuti kutuyumine kuba beenzinyina baJesu.

³ Chintu chachibili chikonzya kupa kuti kutuyumine kuba beenzinyina baJesu nkuti tatukonzyi pe kwaambuula aawe. Chiindi nitukomba tubuzya Jehova nzituyeeya. Nisimpe tukomba kwiinda muzina lyaJesu pesi tukomba kuli Jehova.  Jesu tayandi pe kuti tukombe kuli nguwe. Nkamboonzi natayandi? Nkaambo nkombyo nchipanzi chabukombi alubo Jehova nguwe alikke weelede kukombwa. (Mt. 4:10) Nikuba boobo, tulakonzya kutondeezya kuti tulamuyanda Jesu.

4. Niinzi chintu chachitatu chikonzya kupa kuti kutuyumine kuba beenzinyina baJesu, alubo tulalanga-langaanzi muchiiyo eechi?

⁴ Chintu chachitatu chikonzya kupa kuti kutuyumine kuba beenzinyina baJesu nkuti Jesu ukkala kujulu, nkinkaako tatukonzyi pe kujana chiindi chakuba anguwe. Pesi tulakonzya kuziba zyiingi atala aJesu nikuba kuti tatukonzyi pe kuba anguwe. Tulabona zintu zili 4 nzitukonzya kuchita kuti tube abweenzuma busimide aJesu. Pesi atusaangune kulanga-langa kuti nkamboonzi nikuyandikana kuba abweenzuma busimide aKristu.

5. Nkamboonzi nitweelede kuba beenzinyina baJesu? (Langa kabbokesi kati “ Kuba Mweenzinyina waJesu Kupa Kuti Ube Mweenzinyina waJehova” akati “ Ba Amaboneno Alikabotu Atala Amulimu waJesu.”)

⁵ Kuba beenzinyina baJesu kupa kuti tube abweenzuma bulikabotu aJehova. Biyeni? Atulange-lange twaambo tubili. Kaambo kakusaanguna, Jesu wakabuzya baapostolo bakwe kuti: “Taata mwini ulamuyanda akaambo kakuti mwali kundiyanda mebo.” (Joh. 16:27) Alubo wakayungizya kuti: “Kunyina uuboola kuli Taata ccita kuti wainda mulindime.” (Joh. 14:6) Kweezya kuyanda kuba mweenzinyina waJehova kutamvwanani aJesu kuli mbuli kweezya kunjila mung’anda kutabelesyi mulyango. Jesu wakabelesya chikozyano chifanana chiindi naakali kulipandulula kuti “ndili mulyango wambelele.” (Joh. 10:7) Kaambo kachibili nkakuti Jesu  wakatobelezya buntu bwaWisi munzila iimaninide. Wakabuzya basikwiiya bakwe kuti: “Kufwumbwa ooyo wandibona wamubona awalo Taata.” (Joh. 14:9) Nkinkaako nzila ikonzya kutugwasya kuziba Jehova nkwiiya atala abuumi bwaJesu. Kwiiya zyiingi atala aJesu, kupa kuti tumuyande loko Jehova. Alubo kuti twaba abweenzuma busimide aJesu, tuyoomuyanda loko Jehova.

6. Nkaakali kamwi kaambo katondeezya kuti nkamboonzi nikuyandikana kuba beenzinyina baJesu? Pandulula.

⁶ Kuti nkombyo zyesu zisandulwe, tweelede kuba beenzinyina baJesu. Eezi zyaamba kuti tweelede kuchita zyiingi kutali kwaamba kuti “kwiinda muzina lyaJesu” luzutu kumamanino ankombyo zyesu. Tweelede kuziba kuti Jehova ubelesya Jesu kusandula nkombyo zyesu. Jesu wakabuzya baapostolo bakwe kuti: “Kufwumbwa ncomulomba muzina lyangu, ndiyoocicita cintu eeco.” (Joh. 14:13) Nikuba kuti Jehova nguwe umvwa akusandula nkombyo zyesu, wakapa Jesu manguzu aakuti azuzikizye kuyanda kwakwe. (Mt. 28:18) Katanasandula nkombyo zyesu usaanguna kubona kuti tulaatobelezya na malayilile aJesu. Muchikozyano, Jesu wakati: “Kuti kamulekelela bantu milandu yabo, awalo Uso uuli kujulu uyoomulekelela; pele kuti kamutalekeleli bantu milandu yabo, awalo Uso takamulekeleli milandu yanu.” (Mt. 6:14, 15) Nkinkaako kulayandikana kapati kuti tujate bamwi mbuli Jehova aJesu mbubatujata.

7. Mbaani batazoogwasigwe achinunuzyo?

⁷ Bantu balaabweenzinyina buli kabotu aJesu mbabo abalikke batazoogwasigwe achinunuzyo. Tuzizi biyeni? Jesu wakaamba kuti ‘wakali kuyootuulila beenzinyina buumi bwakwe.’ (Joh. 15:13) Bantu basyomeka bakapona chiindi Jesu kaatanasika aanyika bazooyiya atala anguwe akumuyanda. Bantu aaba batazoobusigwe baswaanizya Mozesi, Rahabbu, Abrahamu aSara alubo bakombi baJehova basyomeka aaba bazooba amweenya wakuba beenzinyina baJesu kuti bazookonzye kujana buumi butamani.—Joh. 17:3; Mil. 24:15; Heb. 11:8-12, 24-26, 31.

8-9. Mbuli mbukupandulwidwe muli Johane 15:4, 5, kuba beenzinyina baJesu kupa kuti tuchiteenzi alubo nkamboonzi nikuyandikana?

⁸ Tulabotelwa kubelekaamwi aJesu mumulimu wakukambawuka awakuyiisya bantu atala amakani mabotu aaBwaami. Chiindi Jesu naakali anyika wakali kuyiisya bantu. Alubo kuzwa naakaya kujulu, mbuli mutwe wambungano Jesu ulikuzumanana kuzulwida mulimu wakukambawuka awakuyiisya. Ulabona akubotelwa akaambo kakubeleka changuzu nkuchita kugwasya bamwi kuti bamuzibe akuti bazibe Wisi. Kuti tukonzye kuchita mulimu ooyu tugwasigwa aJehova aJesu.—Bala Johane 15:4, 5.

⁹ Jwi lyaLeza lituyiisya kuti tweelede kuzumanana kuyanda Jesu kuchitila kuti tubotezye Jehova. Nkinkaako atulange-lange zintu zili 4 nzitweelede kuchita kuti tube beenzinyina baJesu.

10. Niinzi chintu chakusaanguna nchitweelede kuchita kuti tube beenzinyina baJesu?

¹⁰ (1) Muzibe kabotu Jesu. Tulakonzya kuzichita eezi kwiinda mukubala bbuku lyaMatayo, Marko, Luka aJohane. Kuti twayeeyesesya makani ali muBbayibbele aali atala abuumi bwaJesu, tulakonzya kumuyanda akumulemeka nkaambo wakali kubajata kabotu bantu. Muchikozyano, nikuba kuti wakali Simalelo wabo takwe naakali kubona basikwiiya bakwe mbuli bazike. Pesi wakali kubabuzya nzyaakali kuyeeya ambaakali kulimvwa.  (Joh. 15:15) Jesu taakali kubotelwa pe chiindi basikwiiya nibakali mumachise alubo wakali kulilaabo. (Joh. 11:32-36) Nikuba bantu bakali kumukazya bakalizi kuti wakali kumvwanana abantu bakali kumuswiilila. (Mt. 11:19) Kuti twatobelezya Jesu kunzila njaakali kubajataayo basikwiiya bakwe zipa kuti tumvwanane abamwi, tukkutisikane, tubotelwe akuti tumuyande akumulemeka Kristu.

11. Niinzi chintu chachibili chikonzya kutugwasya kuti tube beenzinyina baJesu alubo nkamboonzi nikuyandikana?

¹¹ (2) Tobelezya Jesu muzintu nzuyeeya anzuchita. Kuti twamuziba kabotu akutobelezya nzila njaakali kuyeeyaayo Jesu tuyooba abweenzinyina busimide anguwe. (1 Kor. 2:16) Nga tulamutobelezya biyeni Jesu? Atubone chikozyano. Jesu wakali kuyeeya kugwasya bamwi kutali kubikka nzyayanda mubusena bwakusaanguna. (Mt. 20:28; Rom. 15:1-3) Eezi zyakapa kuti abe muntu ulipeda akulekelela bamwi. Taakali kufwambaana pe kunyema atala azintu zyakali kwaambwa abamwi. (Joh. 1:46, 47) Alubo takwe naakali kuyeeya kuti bantu tabakonzyi kuchincha akaambo kazibi nzibakali kuchita chiindi. (1 Tim. 1:12-14) Jesu wakati: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Joh. 13:35) Nkinkaako libuzye kuti, “Ndilokuchitobelezya na chikozyano chaJesu kwiinda mukwezya amanguzu aangu woonse kubamba luumuno abakwesu abachizi?”

12. Niinzi chintu chatatu chikonzya kutugwasya kuti tube beenzinyina baJesu alubo nga tulachichita biyeni?

¹² (3) Gwasya maKristu bananikidwe. Jesu ubona kugwasya maKristu bananikidwe mbuli kugwasya nguwe. (Mt. 25:34-40) Nzila mpati njitukonzya kugwasya maKristu bananikidwe nkubeleka changuzu mumulimu wakukambawuka awakuchita bantu kuti babe basikwiiya, Jesu ngwakalayilila batobeli bakwe kuti bawuchite. (Mt. 28:19, 20; Mil. 10:42) MaKristu bananikidwe tabakonzyi pe kuchita mulimu ooyu ulookuchitwa munyika yoonse kuti teebagwasigwa ‘ambelele zimbi.’ (Joh. 10:16) Kuti kuli umwi wambelele zimbi, chiindi choonse nutola lubazu mumulimu wakukambawuka nga utondeezya kuti tuyandi maKristu bananikidwe luzutu pesi aJesu.

13. Nga tulabelesya biyeni malayilile ajanika muli Luka 16:9?

¹³ Alubo tulakonzya kuba beenzinyina baJehova aJesu kwiinda mukubelesya zintu zyesu kugwasilizya mumulimu ngubali kuzulwida. (Bala Luka 16:9.) Muchikozyano, tulakonzya kupa zipo kumulimu wamunyika yoonse. Zipo eezi zigwasilizya mulimu wakukambawuka makani mabotu mumasena atakwe basikupupulula, wakuyaka akubambulula maanda abelesegwa mubukombi bwakasimpe akupa zintu zyesu kubantu bachitikilwa penzi. Alubo tulakonzya kusanga mali kuti igwasilizye mumbungano yesu naakuti kugwasya bantu mbitubona kuti bayanda lugwasyo mumbungano yesu. (Tus. 19:17) Eezi ninzila nzitukonzya kubagwasya aazyo maKristu bananikidwe.

14. Kweendelana alugwalo lwa Baefeso 4:15, 16, niinzi chintu chachi 4 chikonzya kutugwasya kuti tube beenzinyina baJesu?

¹⁴ (4) Gwasilizya mabambe achitwa mumbungano yachiKristu. Tulakonzya kuba abweenzuma busimide aJesu mbuli mutwe wambungano chiindi nitubelekaamwi abakwesu basalidwe kuti batuzulwide. (Bala Baefeso 4:15, 16.) Muchikozyano, tuli kweezya kubelesya Maanda aBwaami ngitulaawo munzila iipa kuti kutayakwi maanda aambi miingi. Nkinkaako zimwi mbungano zyakaswaanizigwa  aamwi alubo zilawu zyakukambawukila zyakachincha. Mabambe aaya akapa kuti tuzibelesye kabotu zipo zisangwa abakombima. Pesi eezi zyakapa kuti bamwi basikupupulula bachinche kuchitila kuti beendelane azyiimo zipya. Kulakonzeka kuti bakwesu aaba basyomeka bakanjila muliimwi mbungano kwaminyaka myiingi alubo bakali bazibilana abakwesu abachizi bamumbungano eeyo. Pesi lino bakakumbilwa kuti banjile ayimwi mbungano. Jesu ulabotelwa kubona basikwiiya bakwe kabatobela malayilile aaya.

15. Bweenzuma bwesu aJesu buzoosima biyeni muchiindi chilikunembo?

¹⁵ MaKristu bananikidwe aamuuya usalala balaabulangilizi bwakukkala aJesu kukabe kutamani kabeendelezya aamwi anguwe muBwaami bwaLeza. Banookkala amwi aKristu kabamubona akwaambuulaawe. (Joh. 14:2, 3) Aabo balaabulangilizi bwakupona aanyika bazoobona luyando lwaJesu. Nikuba kuti tabanoomuboni pe Jesu, bweenzinyina bwabo anguwe bunoosimide chiindi nibanoobotelwa kupona buumi mbubakasyomezegwa aJehova aJesu.—Is. 9:6, 7.

16. Nzilongezyoonzi nzitujana akaambo kakuba beenzinyina baJesu?

¹⁶ Tujana zilongezyo zyiingi kuti twaba beenzinyina baJesu. Muchikozyano, tulagwasigwa aluyando ndwatutondeezya akutugwasya nkwachita mazubaano. Tulaachilongezyo chakupona kukabe kutamani. Alubo kwiinda zyoonse bweenzuma bwesu aJesu buzoopa kuti tube achilongezyo chipati chakuba beenzinyina baJehova. Nchilongezyo chipati loko kuba beenzinyina baJesu.