1-2. Amba chikozyano chitugwasya kumvwisisisya lugwalo lwa 1 Petro 2:21.

ATUTEEDI ulikweenda abamwi mulusaka mpawo mulikuzulwidwa awumwi muntu uuluzi kabotu lusaka oolo. Nayoobweenda kunembo lyanu, mawulu aakwe nga alikudinda. Nimuyoobweenda mwazoobona mwasyaalila musule zyakuti muntu ulikumuzulwida tamuchimuboni pe. Tamukooyoowa pe. Nkamboonzi? Nkaambo mulakonzya kutobelezya mikondo naakuti mawulu aakwe.

² Andiswe tubakombi baJehova, tulikweenda munyika eeyi yeendelezegwa aaSaatani iili mbuli lusaka. Nikuba boobo, tulamulumba Jehova nkaambo wakatupa Muzulwidi uumaninide Jesu Kristu kuti tukonzye kutobelesya mikondo yakwe. (1 Pet. 2:21) Limwi bbuku lipandulula makani aamuBbayibbele litondeezya kuti Petro wakakozyanisya Jesu amuzulwidi. Jesu wakatusiila mikondo yakwe njitukonzya kutobela mbuli muzulwidi ngutwaamba kumasaangunino. Kwalino, atusandule mibuzyo iitatu iitobela: Chaambaanzi kutobela mikondo yaJesu? Nkamboonzi nitweelede kwiitobela? Alubo kujana twayitobela biyeni?

3. Chaambaanzi kutobela mikondo yawumwi muntu?

³ Chaambaanzi kutobela mikondo yawumwi muntu? Chimwi chiindi mabala aakuti ‘kweenda’ aliti ‘mawulu’ alabelesegwa muBbayibbele kwaamba zintu zyakachitwa awumwi muntu mubuumi bwakwe. (Matl. 6:9; Tus. 4:26) Zintu nzyachita umwi muntu mubuumi zilakonzya kukozyanisigwa amawulu naakuti mikondo njasiya chiindi nayobweenda. Nkinkaako, kutobela mikondo  yawumwi muntu chaamba kutobelezya zintu nzyachita.

4. Chaambaanzi kutobela mikondo yaJesu?

⁴ Chaambaanzi kutobela mikondo yaJesu? Mubufwiifwi nkutobelezya chikozyano chakwe. Lugwalo luzulwida chiiyo eechi lutondeezya kuti mwaapostolo Petro wakali kwaamba chikozyano chibotu nchaakatusiila Jesu chakulisimya naakali kupenzegwa. Pesi kuli zintu zyiingi Jesu nzyaakachita nzitukonzya kutobelezya. (1 Pet. 2:18-25) Tulakonzya kutobelezya chikozyano chaJesu muzintu zyoonse nzyaakali kwaamba anzyaakali kuchita.

5. Zilachita na kuti bantu bali aachibi batobelezye chikozyano chaJesu? Pandulula.

⁵ Mbuli bantu bali aachibi, zilachita na kuti tutobelezye chikozyano chaJesu? Iiyi zilachita. Mwabona na kuti Petro taakaamba kuti tutobele mikondo yaJesu munzila iimaninide. Pesi wakaamba kuti “mwiitobelesye mikondo yakwe.” Kuti twabeleka changuzu kuti tutobele mikondo yaJesu nikuba kuti tuli aachibi nga tulikutondeezya kuti tulaaswiilila majwi aakalembwa aamwaapostolo Johane aakuti: ‘Atuzumanane kweenda mbubonya mbwaakeenda walo Jesu.’—1 Joh. 2:6.

6-7. Nkamboonzi nitukonzya kwaamba kuti kutobela mikondo yaJesu kupa kuti tuswene aafwiifwi aJehova?

⁶ Kutobela mikondo yaJesu kuyoopa kuti tuswene aafwiifwi aJehova. Nkamboonzi nitwaamba oobo? Chakusaanguna, Jesu wakatusiila chikozyano chitugwasya kuti tukonzye kubotezya Leza. (Joh. 8:29) Nkinkaako, kuti twatobela mikondo yaJesu tuyoobotezya Jehova. Alubo tuli aachoonzyo chakuti Taateesu wakujulu uyooswena aafwiifwi abaabo babeleka changuzu kuti babe beenzinyina.—Jak. 4:8.

⁷ Chachibili, Jesu wakatobelezya chikozyano chaWisi munzila iimaninide. Eezi nzizyo zyakapa kuti Jesu aambe kuti: “Kufwumbwa ooyo wandibona wamubona awalo Taata.” (Joh.  14:9) Tulakonzya kutobelezya buntu bwaJesu anzila njaakali kubajataayo bamwi. Muchikozyano, wakeetelela mwaalumi wakali aachinsenda, wakafwida luzyalo mwanakazi wakali kuchiswa bulwazi butasilikiki ababbululu baLazaro. Nkinkaako, kuti twatobelezya chikozyano chaJesu nga tulikutobelezya chikozyano chaJehova. (Mk. 1:40, 41; 5:25-34; Joh. 11:33-35) Kuti twachita oobo tuyooswena aafwiifwi loko anguwe.

8. Nkamboonzi nitukonzya kwaamba kuti kutobela chikozyano chaJesu kutugwasya kuti ‘tuzunde’ nyika? Pandulula.

⁸ Kutobela mikondo yaJesu kuyootugwasya kuti tutazumizyi nyika kuti itukachizye kuchita kuyanda kwaJehova. Mubusiku bwakwe bwamamanino Jesu katanafwa, wakaamba kuti: “Mebo ndaizunda nyika.” (Joh. 16:33) Majwi aaya, atondeezya kuti Jesu taakazumizya mizeezo yabantu bali munyika azintu nzibakali kuchita kuti zimukachizye kuchita kuyanda kwaJehova. Alubo Jesu taakwe naakaluba mulimu ngwaakatumidwe aanyika wakusalazya zina lyaJehova. Kutegwani andiswe? Munyika muli zintu zyiingi zikonzya kutukachizya kubelekela Jehova. Pesi kuti twatobelezya chikozyano chaJesu kwiinda mukuzumanana kubelekela Jehova andiswe ‘tuyooyizunda’ nyika.—1 Joh. 5:5.

9. Tweelede kuchitaanzi kuti tuzoojane buumi butamani?

⁹ Kutobela mikondo yaJesu kuyoopa kuti tukajane buumi butamani. Umwi mwaalumi uunotede wakabuzya Jesu kuti niinzi nzyakeelede kuchita kuti azoojane buumi butamani. Mpawo Jesu wakamusandula kuti: ‘Boola ube sikunditobela.’ (Mt. 19:16-21) Jesu wakabuzya maJuda bakatali kusyoma kuti nguKristu kuti: “Imbelele zyangu. . . zilanditobela. Ndizipa buumi butamani.” (Joh. 10:24-29) Jesu wakabuzya Nikkodimasi mupati waNkuta Mpati yamaJuda wakali aachiyandisyo chakuziba atala anjiisyo zyakwe kuti muntu “woonse uumusyoma” uyoojana ‘buumi butamani.’ (Joh. 3:16) Tutondeezya kuti tuli aalusyomo muli Jesu kwiinda mukubelesya zintu nzyaakali kuyiisya akutobelezya zintu nzyaakali kuchita. Kuti twachita oobo, tuyoojana buumi butamani.—Mt. 7:14.

10. Tweelede kuchitaanzi kuti ‘tumuzibe’ kabotu Jesu? (Johane 17:3)

¹⁰ Kuti tukonzye kutobela mikondo yaJesu tweelede kusaanguna kumuziba. (Bala Johane 17:3.) ‘Kuziba’ Jesu tatukuchiti mubuzuba bumwi pe pesi nchintu nchitweelede kuzumanana kuchita. Tweelede kuzumanana kwiiya zyiingi atala anguwe kuswaanizya buntu bwakwe, mizeezo yakwe amilawu yakwe. Tweelede kubeleka changuzu kuti tumuzibe Jehova aMwanaakwe kazitakwe ndaba kuti twaba aachiindi chilamfu biyeni katuli mukasimpe.

11. Mabbuku aaMakani Mabotu aambuula atala aanzi?

¹¹ Jehova wakapa kuti mabbuku aaMakani  Mabotu aaswaanizya bbuku lyaMatayo, Marko, Luka alyaJohane alembwe muBbayibbele kuchitila kuti tumuzibe kabotu Mwanaakwe. Mabbuku aaya, aambuula atala abuumi bwaJesu amulimu ngwaakali kuchita. Alubo aambuula atala azintu nzyaakali kwaamba Jesu, nzyaakali kuchita ambaakali kulimvwa. Mabbuku aaya atugwasya kuti ‘tuyeeyesesye’ atala achikozyano chaJesu. (Heb. 12:3) Alubo aambuula atala amikondo yaJesu njaakatusiila. Nkinkaako, kubala mabbuku aaya kutugwasya kuti tumuzibe kabotu Jesu akuti tutobelesye mikondo yakwe.

12. Tweelede kuchitaanzi kuti tujane zyiiyo kuzwa muMabbuku aaMakani Mabotu?

¹² Kuti tujane zyiiyo kuzwa muMabbuku aaMakani Mabotu tweelede kuchita zyiingi kutali kwaabala luzutu. Tweelede kujana chiindi chakuyeeyesesya nitubala mabbuku aaya. (Kozyanisya a Joshua 1:8, makani aamunsi.) Lino atulange-lange zintu zibili zikonzya kutugwasya kuti tuyeeyesesye nitubala mabbuku aaMakani Mabotu akubelesya zintu nzitwayiya.

13. Kujana wachita biyeni kuti ubone zintu kazili kuchitika chiindi nubala Mabbuku aaMakani Mabotu?

¹³ Chakusaanguna, bona zintu kazili kuchitika chiindi nubala Mabbuku aaMakani Mabotu. Zibone kazili kuchitika alubo ulimvwe mbuli mbubakali kulimvwa bantu mbuli kubala atala ambabo. Kuti ukonzye kuchita oobo, yanduulisisya kubelesya mabbuku aagwisigwa aambunga. Langa-langa makani aazyungulukide nkani njulikubala atala anjiyo. Yanduula amwi makani aali atala abantu bakaliwo muchiindi eecho andawu nkuzyakachitikila. Chiindi nulikubala lumwi lwaano mulilimwi Bbuku lyaMakani Mabotu, langa mbayendelana makani aayo aamwi aali mulilimwi bbuku lyaMakani Mabotu. Kulakonzeka kuti umwi mulembi wabbuku lyaMakani Mabotu wakalemba amwi makani aatajaniki pe mulilimwi bbuku.

14-15. Niinzi nzitweelede kuchita kuti tubelesye zintu nzitwayiya?

¹⁴ Chachibili, bona mbukonzya kubelesya zintu nzwayiya kuzwa muMabbuku aaMakani Mabotu. (Joh. 13:17) Nwaamana kubala atala  ayimwi nkani kuzwa mulilimwi Bbuku lyaMakani Mabotu, libuzye kuti: ‘Kuli chiiyo na nchindikonzya kubelesya mubuumi bwangu? Kujana ndazibelesya biyeni nzindayiya kuti ndigwasye bamwi?’ Yeeya atala awumwi muntu nguzi ngukonzya kwaabilana aawe zintu nzwayiya mpawo umubuzye.

¹⁵ Lino atubelesye chikozyano chamukamufu wakali kufwaba wamuchiindi chaJesu, tubone mbutukonzya kubelesya zintu eezi zibili.

16. Niinzi zyakachitika zilembedwe mulugwalo lwa Marko 12:41?

¹⁶ Bona zintu kazili kuchitika. (Bala Marko 12:41.) MuNisani 11 33 C.E. kakuli kwasyaala mviki kuti Jesu afwe, Jesu wakamanisya chiindi chiingi kali kuyiisya mutempele pesi bapati bazikombelo bakali kumukazya. Bamwi bakamubuzya kuti ngwani wakamupede manguzu aakuchita zintu nzyaakali kuchita. Mpawo bamwi bakamubuzya mibuzyo njibakali kubonaanga ulakachilwa kwiisandula. (Mk. 11:27-33; 12:13-34) Jesu wakazwa akuya kulilimwi bbazu lyatempele. Kulakonzeka kuti wakayinka kubusena butegwa Lubuwa Lwabamakayintu, ooko nkwaakali kukonzya kubona zibikkilo zyamali. Jesu wakalikkede kalikulangisisya bantu bakali kubikka mali muzibikkilo zyamali. Wakali kubona bantu banotede kabali kubikka mali nyingi. Kulakonzeka kuti Jesu wakakkede aafwiifwi loko azibikkilo zyamali zyakuti wakali kumvwa musindo wamali yakali kuwaalwa aabantu.

17. Niinzi nzyaakachita mukamufu waambwa mulugwalo lwa Marko 12:42?

¹⁷ Bala Marko 12:42. Nikwakayinda chiindi chifwiifwi biyo, Jesu wakabona umwi mwanakazi wakali kufwaba. Mwanakazi ooyu wakali “mukamufwu.” (Lk. 21:2) Buumi bwakali kumuyumina mwanakazi ooyu, zyakuti kwakali kumuyumina kuti ajane ziyandikana mubuumi. Pesi mwanakazi ooyu wakayinka kuti akawaale tukkobili tubili ntwakalaato mulichimwi chibikkilo chamali. Kulakonzeka kuti tukkobili tubili ntwaakawaala teetwakalimvwisya pe naakatuwaala. Pesi Jesu wakaziba kuti mwanakazi ooyu wawaala tukkobili tubili tuniini. Tukkobili ootu twakali tumaLepita tubili alubo teetwakali kukkwana pe kuula katiiti kamwi biyo nikuba kuti muchiindi eecho tutiiti twakalichipide.

18. Kweendelana alugwalo lwa Marko 12:43, 44, Jesu wakatyeni atala akusanga nkwaakachita mukamufu?

¹⁸ Bala Marko 12:43, 44. Jesu wakabotelwa loko azyakachitwa aamukamufu ooyu. Kuzwa waawo, wakayita basikwiiya bakwe mpawo wababuzya kuti: “Mukamufwu ooyu mucete wabikka mali manji kwiinda baabo boonse.” Mpawo wakayungizya kuti: “Boonse [kapati banotede] babikka kuzwa kuli yaayo aaindilide, pele walo abucete bwakwe, wabikka zyoonse nzyaajisi, zyoonse nzyaayelede kuponenawo.” Chiindi mukamufu ooyu naakabikka mali yakwe yoonse njaakalaayo wakatondeezya kuti usyoma kuti Jehova ulamugwasya kuti ajane ziyandikana zyakumubili.—Int. 26:3.

19. Twiiyaanzi kuzwa kumajwi aakaambwa aaJesu atala amukamufu wakali kufwaba?

¹⁹ Belesya nzwayiya mubuumi bwako. Libuzye kuti, ‘Ndiiyaanzi kuzwa kumajwi aakaambwa aaJesu atala amukamufu uufwaba?’ Yeeya atala amukamufu ooyo. Zili aantanganana kuti mwanakazi ooyu wakali kuyanda kupa Jehova zintu zyiingi. Pesi wakachita zyoonse nzyakonzya, wakapa Jehova mali yoonse njaakalaayo. Alubo Jesu wakabona kuti kupa nkwaakachita mwanakazi ooyu kwakabotezya Wisi. Twiiyaanzi? Jehova ulabotelwa kuti twamupa zintu zibotu nzitulaazyo kazizwa aansi aamoyo. (Mt. 22:37; Kol. 3:23) Jehova ulabotelwa chiindi natubona katubeleka kusikila mputugolela. Alubo Jehova ulabotelwa chiindi natubona katubelesya  manguzu eesu achiindi chesu kuti tuchite zintu zyabukombi ziswaanizya kukambawuka akunjila miswaangano.

20. Kujana wazibelesya biyeni zintu nzwayiya kuzwa kulwaano lwamukamufu? Amba chikozyano.

²⁰ Kujana wazibelesya biyeni zintu nzwayiya kuzwa kulwaano lwamukamufu? Yeeya bantu mbuzi mbukonzya kusungwaazya kwiinda mukubalumbayizya akaambo kazintu zibotu nzibachitila Jehova. Muchikozyano, kuli muchizi wakomena na nguzi ulipa mulandu naakuti ulimvwa katachigwasyi pe akaambo kakuti ulachiswa naakuti tachikwe manguzu aakuti achite zyiingi mumulimu wakukambawuka? Kuli mukwesu nguzi na uuli aabulwazi butasilikiki ulikumana manguzu akaambo kakuti tachikonzyi pe kunjila miswaangano yoonse? Gwasya bantu bali boobo kwiinda mukwaamba “ijwi lili kabotu kukuyaka bamwi.” (Ef. 4:29) Ulakonzya kubabuzya zintu nzitwayiya kuzwa kulwaano lwamukamufu. Majwi aako alakonzya kubagwasya kubona kuti Jehova ulabotelwa azintu nzitumuchitila kazizwa aansi aamoyo. (Tus. 15:23; 1 Tes. 5:11) Kuti twalumba bamwi akaambo kakubelekela Jehova nikuba kuti zintu nzibachita nziniini nga tulikutondeezya kuti tulikutobelezya mikondo yaJesu.

21. Wakanza kuchitaanzi?

²¹ Tulamulumba Jehova akaambo kaMabbuku aaMakani Mabotu aambuula zyiingi atala abuumi bwaJesu. Alubo mabbuku aaya atugwasya kuti tutobele mikondo yaJesu. Kuti ujane zyiingi mulingawo, ulakonzya kwaabala chiindi nuchita Kukomba kwaMpuli naakuti chiiyo chako awulikke. Tutalubi kuti chiindi nitubala mabbuku aaya, tweelede kubona zintu kazilikuchitika akuzibelesya mubuumi bwesu kuchitila kuti tugwasikane. Tatweelede kugolela aakutobelezya zintu nzyaakali kuchita Jesu pesi tweelede kuswiilila nzyaakali kwaamba. Nkinkaako, muchiiyo chitobela tuyoolanga-langa atala anzitwiiya kuzwa kumajwi Jesu ngaakaamba katanafwa.