Nkamboonzi Jesu katanafwa naakazubulula majwi aaDavida aalembedwe muli Intembauzyo 22:1?

Jesu katanafwa wakaamba majwi aali muli Matayo 27:46 aakuti: “Leza wangu, Leza wangu, ino wandilekelezyela nzi?” Kwiinda mukwaamba majwi aaya, Jesu wakali kuzuzikizya majwi aaDavida aajanika muli Intembauzyo 22:1. (Mk. 15:34) Bamwi bayeeya kuti Jesu wakaamba majwi aaya akaambo kakuti taakachilikwe lusyomo lusimide muli Jehova. Pesi eezi teenzizyo pe nkaambo Jesu wakalikazi kaambo kakapede kuti ayande kujayigwa alubo wakalilipedelede kufwa. (Mt. 16:21; 20:28) Alubo Jesu wakalizi kuti Jehova wakali kuyoomugwisizya “lukwakwa lwakumukwabilila” kuchitila kuti ajayigwe. (Job. 1:10) Jehova taakamukwabilila pe Jesu kuchitila kuti Jesu atondeezye kuti ulasyomeka nikuba kuti wakali kuyoojayigwa munzila iichisa.—Mk. 14:35, 36.

Nkamboonzi Jesu naakaamba majwi aali muli Intembauzyo? Nikuba kuti tatuzi pe pesi atulange-lange tumwi twaambo tweelede kuti ntuto twakapa kuti aambe oobo. *

Kulakonzeka kuti Jesu wakaamba majwi aaya kuti atondeezye kuti Jehova takoomukwabilila pe kuti atajayigwi. Jesu wakeelede kupa buumi bwakwe kuti bube chinunuzyo katagwasigwi aaJehova. Nkinkaako, wakeelede kufwa kuchitila kuti “afwide muntu uuli woonse.”—Heb. 2:9.

 Kulakonzeka Kuti Jesu wakaamba majwi aaya kayanda kuti bantu bayeeye majwi woonse aajanika muli Intembauzyo 22. MaJuda bakapona muchiindi eecho, bakali kujata majwi aazyaandaano zyalntembauzyo amutwe. Chiindi nibakali kumvwa vesi iimwi luzutu yaIntembauzyo bakali kufwambaana kuyeeya majwi aajanika muchaandaano choonse. Nkinkaako, kulakonzeka kuti Jesu wakaamba majwi aaya kuchitila kuti agwasye batobeli bakwe kuti bayeeye atala abupolofita bujanika muIntembauzyo eeyo bwaambuula atala alufu lwakwe. (Int. 22:7, 8, 15, 16, 18, 24) Alubo kumamanino aaIntembauzyo 22 kuli majwi aatembawula Jehova alubo aatondeezya kuti Jehova Mwaami wanyika yoonse.—Int. 22:27-31.

Kulakonzeka kuti Jesu wakaamba majwi aaya kayanda kutondeezya kuti takwe mulandu. Jesu katanajayigwa wakabetekwa zitali mumulawu alubo wakapegwa mulandu wakuti wasampawula Leza. (Mt. 26:65, 66) Bankuta mpati yamaJuda bakamubeteka mansiku alubo chiindi nibakali kumubeteka teebakali kutobelezya milawu. (Mt. 26:59; Mk. 14:56-59) Nkinkaako, kulakonzeka kuti Jesu wakaamba majwi aaya kuchitila kuti atondeezye kuti takwe mulandu pe ngwaakachita weelela kuti ajayigwe.

Kulakonzeka kuti Jesu wakaamba majwi aaya kayanda kutondeezya kuti mapenzi ngaakaswaananaawo Davida taambi kuti taakachili kutambulika pe kuli Jehova. Majwi ngaakaamba Davida atondeezya kuti taakachilikwe lusyomo na? Peepe, nkaambo naakamaninsya kwaamba majwi aaya wakatondeezya kuti ulamusyoma Jehova kuti uli aanguzu zyakumukwabilila alubo Jehova wakazumanana kumulongezya. (Int. 22:23, 24, 27) Munzila iikozyenie, Jesu “Mwana wa Davida,” wakajayigwa munzila iichisa aachisamu chakupenzezya. Eezi teezyakali kwaamba kuti tachitambuliki pe kuli Jehova.—Mt. 21:9.

Kulakonzeka kuti Jesu wakali kuyanda kutondeezya kuti Wisi wakamulekelezya kuchitila kuti atondeezye kuti ulasyomeka kulinguwe. Taakali makanze aaJehova pe kuti Mwanaakwe apenzegwe akuti ajayigwe. Pesi eezi zyakazoochitika akaambo kakuti Adamu aEva teebakaswiilila Leza. Nikuba kuti Jesu taakwe mulandu ngwaakachita pe, pesi wakeelede kupenzegwa akujayigwa kuchitila kuti atondeezye kuti zyakaambwa aaSaatani nzyakubeja akuti ape buumi bwakwe kabuli chinunuzyo. (Mk. 8:31; 1 Pet. 2:21-24) Kuti eezi zikonzeke, Jehova wakeelede kuleka kukwabilila Jesu kwakayindi kaniini.

Kulakonzeka kuti Jesu wakali kuyanda kuti batobeli bakwe babikkile maanu kukaambo kakapede kuti Jehova amulekele kuti apenzegwe akuti ajayigwe. * Jesu wakalizi kuti kugankaminwa aachisamu chakupenzezya mbuli chigwebenga kwakali kuyoolebya bamwi. (1 Kor. 1:23) Jesu wakali kuyanda kuti batobeli bakwe babikkile maanu kukaambo kakapa kuti ajayigwe kutali kunzila njakajayigwaayo. (Gal. 3:13, 14) Eezi zyakali kuyoobagwasya kuti bamubone mbuli Mufutuli kutali chigwebenga.

Kufumbwa kaambo kakapa kuti Jesu aambe majwi aajanika muli lntembauzyo, wakalizi kuti wakali kuchita kuyanda kwaJehova kwiinda mukuzumina kuti afwe aachisamu chakupenzezya. Naakamana kwaamba majwi aalntembauzyo eeyi, Jesu wakati: “Zyazuzikizyigwa!” (Joh. 19:30; Lk. 22:37) Nkinkaako, kuleka kumukwabilila nkwaakachita Jehova kwakayindi kaniini kwakapa kuti Jesu akonzye kuchita zyoonse nzyakatumidwe aanyika. Alubo kwakapa kuti azuzikizye zyoonse zilembedwe atala anguwe “mu Mulawo wa Musa amu Basinsimi amu Intembauzyo.”—Lk. 24:44.