1. Niinzi nzituzi?

 TULIZI kuti Jehova ulatuyanda akuti uyanda kuti tubotelwe mubuumi nkaambo tuli bakombi bakwe. (Rom. 8:35-39) Tuli aachoonzyo chakuti malayilile aamuBbayibbili alagwasya chiindi choonse kuti twaabelesya. (Is. 48:17, 18) Niinzi nzitweelede kuchita kuti twaswaana mapenzi ngitutayeeyeli?

2. Ngaali mapenzi ngitukonzya kuswaana alubo mapenzi aayo alakonzya kupa kuti tulibuzye mibuzyo iili?

² Bakombi baJehova boonse baswaana mapenzi. Muchikozyano, umwi mumpuli ulakonzya kutunyemya. Tulakonzya kuchiswa bulwazi bupa kuti tukachilwe kuchita zyiingi mumulimu waJehova. Tulakonzya kuchitikilwa penzi lilichitikila naakuti kupenzegwa akaambo kazintu nzitusyoma. Kuti twaswaana mapenzi aaliboobu, amwi ngatwalibuzya kuti: ‘Nkamboonzi nindili kuswaana zintu eezi? Zintu eezi zitondeezya kuti Jehova tachindiyandi na?’ Kuli nwaakali walibuzya munzila iili boobu na? Kuti kakuli boobu, utamani manguzu. Bakombi baJehova biingi basyomeka bakalimvwa munzila iikozyenie.—Int. 22:1, 2; Hab. 1:2, 3.

3. Twiiyaanzi kuzwa kulugwalo lwa Intembauzyo 34:19?

³ Bala Intembauzyo 34:19. Mwatubona na twaambo tupati tubili tuyandikana mulugwalo oolu? (1) Baluleme baswaana mapenzi. (2) Jehova ulabavuna kumapenzi. Jehova utugwasya biyeni? Imwi nzila nkwiinda mukutugwasya kuti tube aamaboneno aalikabotu atala abuumi mbutuli kupona munyika eeyi. Nikuba kuti Jehova utusyomezya kuti tunoobotelwa kuti katumukomba pesi tazyaambi kuti tatunooswaani  mapenzi. (Is. 66:14) Utugwasya kuti tugamike meso eesu kuchiindi chilikunembo aawo nituyoopona buumi mbwaakali kuyanda kuti tupone kusikila kukabe kutamani. (2 Kor. 4:16-18) Pesi kwachiindi eechino, ulatugwasya kuti twiinkilile kunembo katumubelekela buzuba abuzuba.—Malo. 3:22-24.

4. Tulalanga-langaanzi muchiiyo eechi?

⁴ Lino atubone zyiiyo nzitukonzya kwiiya kuzwa kubakombi baJehova basyomeka balembedwe muBbayibbili abamazubaano. Mbuli mbututayiye, tulakonzya kuswaana mapenzi ngitutayeeyeli pe. Pesi kuti twasyoma Jehova, takatulekelezyi pe. (Int. 55:22) Nitwanoolanga-langa zikozyano eezi, libuzye kuti: ‘Kaansinga ndali muchiimo chikozyenie ndalikunoochita biyeni? Zikozyano eezi nga zilandigwasya biyeni kuti ndisyome Jehova? Nziizili zyiiyo nzindikonzya kubelesya mubuumi bwangu?’

5. Mbuubuli buyumu-yumu mbwakaswaana Jakkobo akaambo kaLabbani? (Langa chifanikisyo chili aachivumbyo.)

⁵ Bakombi baJehova bakaswaanana aabuyumu-yumu mbubakatali kulangilila. Muchikozyano, Jakkobo wakalayililwa aawisi kuti akakukwate umwi musimbi wabana baLabbani. Labbani wakali bbululu wabo alubo wakali kukomba Jehova. Alubo wisi wakamusyomezya kuti Jehova wakali kuyoomulongezya loko. (Matl. 28:1-4) Jakkobo wakachita mbuli mbaakalayililwa. Jakkobo wakazwa muKkenani kaya kumuunzi waLabbani. Labbani wakali aabana basimbi babili, Leya aaRakkele. Jakkobo wakayanda Rakkele alubo wakazumina kumubelekela kwaminyaka iili 7 kuchitila kuti amukwate. (Matl. 29:18) Pesi zintu teezyakeenda mbuli mbaakali kulangilila pe Jakkobo. Labbani wakamusosa kwiinda mukumupa mwaanakwe musimbi mupati Leya. Mpawo nikwakayinda mviki, Jakkobo wakazoopegwa Rakkele alubo wakeelede kumubelekela kwaminyaka iili 7. (Matl. 29:25-27) Labbani wakayinkilila kunembo kusosa Jakkobo kumulimu ngwaakali kuchita. Labbani taakamujata kabotu Jakkobo kwaminyaka iili 20.—Matl. 31:41, 42.

6. Ngaali amwi mapenzi ngaakaswaana Jakkobo?

⁶ Jakkobo wakaswaanaamwi mapenzi. Wakali aampuli mpati loko pesi bana bakwe teebakali kukkala muluumuno pe. Bakawuzya mwanikaabo Josefa kuti akabe muzike. Bana bakwe babili, Simeyoni aLevi bakapa kuti mpuli yabo itabi aabulemu alubo bakapa kuti zina lyaJehova lisampawulwe. Jakkobo wakazoofwidwa aamwanakazi ngwaakali kuyandisya loko, Rakkele, chiindi naakali kutumbuka mwana wachibili. Alubo nzala mpati yakaba munyika yakapa kuti Jakkobo alongele kunyika ya-Ijipiti kali wachembaala.—Matl. 34:30; 35:16-19; 37:28; 45:9-11, 28.

7. Jehova wakatondeezya biyeni kuti wakali kumuyanda Jakkobo?

⁷ Jakkobo taakaleka pe kusyoma Jehova azisyomezyo zyakwe nikuba kuti wakaswaana mapenzi aasiyene-siyene. Jehova wakatondeezya kuti wakali kumuyanda Jakkobo. Muchikozyano, nikuba kuti wakali kusosegwa aaLabbani, Jehova wakamulongezya kwiinda mukumupa lubono lwiingi. Alubo kweelede Jakkobo wakamulumba loko Jehova chiindi naakaswaanana aamwanaakwe Josefa ngwaakali kuyeeyela kuti wakafwa chiindi. Kuba aabweenzinyina busimide aJehova nkuko kwakamugwasya kuti alisimye mumapenzi. (Matl. 30:43; 32:9, 10; 46:28-30) Andiswe kuti twaba aabweenzuma busimide aJehova, tulalisimya kuti twaswaana mapenzi ngitutalangilili pe.

8. Mwaami Davida wakali kuyanda kuchitaanzi?

 ⁸ Mwaami Davida taakachita zintu zyoonse nzyaakali kuyanda kuchitila Jehova. Muchikozyano, Davida wakali aachiyandisyo chakuyakila Leza wakwe tempele. Wakabuzya mupolofita Natani nzyaakali kuyanda kuchita. Natani wakamusandula kuti: “Kocita kufwumbwa cili mumoyo wako, nkaambo Leza mwini-mwini uli anduwe.” (1 Mak. 17:1, 2) Kweelede majwi aaya akamusungwaazya loko Davida. Amwi naakamvwa oobo wakasaanguna kulibambila kuchita mulimu ooyu mupati.

9. Davida wakachita biyeni naakamvwa mulumbe uumana manguzu?

⁹ Kakutanayinda chiindi, mupolofita waJehova wakaboola lubo amakani aamana manguzu. “Masiku ngoonya aayo,” Jehova wakabuzya Natani kuti Davida teenguwe pe wakali kuzoomuyakila tempele pesi umwi wabana bakwe nguwe wakali kuzoochita oobo. (1 Mak. 17:3, 4, 11, 12) Davida wakachita biyeni naakamvwa mulumbe ooyu? Wakachincha zintu nzyaakali kuyanda kuchita. Wakabikkila maanu kukubunganizya mali azimwi zibelesyo nzyaakali kuzoobelesya mwanaakwe Solomoni kukuchita mulimu ooyu.—1 Mak. 29:1-5.

10. Jehova wakamulongezya biyeni Davida?

¹⁰ Jehova naakazwa aakubuzya Davida kuti teenguwe pe wakali kuzoomuyakila tempele, wakapanga chizuminano anguwe. Jehova wakabuzya Davida kuti umwi wabana bakwe wakali kuzooyendelezya kukabe kutamani. (2 Sam. 7:16) Munyika mpya, muBweendelezi bwaJesu bwaMinyaka Iili 1 000, Davida uzoobotelwa loko nazooziba kuti Mwaami uulikweendelezya nguumwi wabana bakwe. Makani aaya atugwasya kubona kuti nikuba kuti tatukonzyi kuchitila Jehova zintu zyoonse nzituyanda kumuchitila, Leza wesu utubambilide zimwi zilongezyo nzitutakonzyi pe kuyeeyela.

11. Jehova wakabalongezya biyeni maKkristu bakusaanguna nikuba kuti Bwaami teebwakasika pe aachiindi nibakali kubulangilila? (Milimu 6:7)

¹¹ MaKkristu bamumwaanda wakusaanguna kuli zimwi zintu nzibakali kulangilila. Muchikozyano, bakali aachiyandisyo chakubona Bwaami bwaLeza kabuli kweendelezya pesi teebakazi pe kuti bwakali kuzooyendelezya lili. (Mil. 1:6, 7) Bakachita biyeni? Bakasungwaala mumulimu wakukambawuka. Chiindi nibakali kukambawuka makani mabotu, bakabona bukamboni bwakuti Jehova wakali kubalongezya.—Bala Milimu 6:7.

12. MaKkristu bakusaanguna bakachita biyeni chiindi nikwakaba nzala mpati?

¹² Aali chimwi chiindi, kwakaba “nzala mpati munyika yoonse.” (Mil. 11:28) Nzala eeyi teeyakabayinda kumbali pe maKkristu aaba bakusaanguna. Amuyeeyele buyumu-yumu mbubakaswaana akaambo kanzala eeyi. Bazyali kweelede bakali kukataazikana kuti bakali kuyoochijana kuli chakulya kuti basanine mpuli zyabo. Bachikula nibakali kuyanda kuyungizya mulimu wabo, kweelede bakali kukataazikana kuti bakali kuyoozichita biyeni. Amwi bakali kuyeeya kuti bakeelede kwiimikila mbichaani mpawo bazoosaangune nzala niyayinda. Kufumbwa zyiimo nzibakaswaana, maKkristu aaba bakapona kweendelana achiimo chakaliwo. Bakayinkilila kunembo kukambawuka kufumbwa mpubakali kukonzezya. Alubo bakabotelwa kwaabana zintu nzibakalaazyo abakombinyina bakali muJudiya.—Mil. 11:29, 30.

13. Nziizili zilongezyo nzibakajana maKkristu chiindi nikwakaba nzala mpati?

¹³ Nziizili zilongezyo nzibakajana maKkristu chiindi nikwakaba nzala mpati? Aabo bakajana lugwasyo bakabona Jehova mbaakali  kubagwasya. (Mt. 6:31-33) Kweelede eezi zyakapa kuti bamvwanane loko abakombinyina bakali kubagwasya. Alubo kweelede kuti aabo bakatola lubazu mumulimu wakugwasilizya bakabotelwa akaambo kakupa. (Mil. 20:35) Jehova wakabalongezya boonse kweendelana azyiimo zyakaliwo.

14. Niinzi zyakachitikila Bbanabbasi aPawulu nibakali kukambawuka alubo bakajana mpinduunzi? (Milimu 14:21, 22)

¹⁴ MaKkristu bamumwaanda wakusaanguna bakali kukkala kabapenzegwa alubo chimwi chiindi bakali kupenzegwa kabatalangilili pe. Amubone zyakachitikila Bbanabbasi amwaapostoli Pawulu chiindi nibakali kukambawuka kuListra. Chiindi nibakasika mumuunzi ooyu, bakabatambula kabotu akubaswiilila. Pesi nikwakayinda chiindi, basikukazya “bakasungilizya bantu” alubo bamwi babantu aabo bakatulula Pawulu amabwe akumusiya kababonaanga wafwa. (Mil. 14:19) Pesi Bbanabbasi aPawulu bakakukambawuka kumbi. Bakajana mpinduunzi? Bakagwasya “bantu biingi kuti babe basikwiiya” alubo majwi aabo azikozyano zyabo zyakagwasya bakombinyina. (Bala Milimu 14:21, 22.) Bantu biingi bakagwasigwa nkaambo Bbanabbasi aPawulu teebakaleka pe kukambawuka nikuba kuti bakali kupenzegwa. Andiswe kuti teetwaleka pe kuchita mulimu Jehova ngwaakatulayilila kuti tuchite, tuyoojana zilongezyo.

15. Twiiyaanzi kuzwa kuchikozyano chaMukwesu A. H. Macmillan?

¹⁵ Munyaka wa1914 nwaakali kuyabusweena, kuli zintu zyiingi nzibakali kulangilila bakombi baJehova. Atuyeeye atala achikozyano chaMukwesu A. H. Macmillan. Mbuli mbubakali kuyeeya bantu bakapona muchiindi chakwe, Mukwesu ooyu wakali kuyeeya kuti muchiindi chifwiifwi uzooyinka kujulu. Naakali kupa nkani muSeptember 1914 wakaamba kuti: “Kubaanga eeyi ninkani yangu yamamanino.” Pesi eeyi teenjiyo pe yakali nkani yakwe yamamanino. Mukuya kwachiindi Mukwesu Macmillan wakazoolemba kuti: “Bamwi besu twakafwambaana kuyeeya kuti twakali kuzooyinka kujulu pesi chintu nchitwakeelede kuchita nkuba aazyiingi zyakuchita mumulimu waMwaami.” Alino eezi nzizyo nzyaakachita. Mukwesu Macmillan wakalisungweete mumulimu wakukambawuka. Wakaba aachilongezyo chakusungwaazya bakwesu biingi bakali mujele akaambo kakutatola lubazu muli zyankondo. Taakaleka pe kunjila miswaangano yambungano nikuba kuti wakali wachembaala. Kuba aazyakuchita zyiingi mumulimu waMwaami kwakamugwasya biyeni Mukwesu Macmillan chiindi naakali kulindila bulumbu bwakwe? Naakali waba aafwiifwi kufwa mu1966, wakalemba kuti: “Lusyomo lwangu taakwe nilwakacheya pe.” Eechi nchikozyano chibotu nchitweelede kutobelezya andiswe ikapati kuti twaba aachiindi chilamfu katuli kulindila.—Heb. 13:7.

16. Mbuubuli buyumu-yumu mbwaakaswaana Mukwesu Jennings amwanakazi wakwe mbubakatali kulangilila? (Jakkobo 4:14)

¹⁶ Bakombi baJehova biingi balikulwisyana aamalwazi abasikila kabatayeeyeli pe. Muchikozyano, Mukwesu Herbet Jennings naakalemba atala azyakachitika mubuumi bwakwe, wakaamba atala ambaakali kubotelwa amulimu wabumishinali amwanakazi wakwe kuGhana. Pesi mukuya kwachiindi wakazoojatwa bulwazi bwazibuko. Mukwesu Jennings wakabelesya lugwalo lwa Jakkobo 4:14, kuti apandulule chiimo chakwe. Wakaamba kuti: “Lyakali ‘lyajuunza’ nditwakatali kulangilila pe.” (Bala.) Wakalemba kuti: “Twakeelede kuchitambula chiimo chesu  nkinkaako twakabamba kuti tuzwe kuGhana alubo tusiye beenzuma mbitwakali kumvwananaabo mpawo tubweede kuCanada [kuchitila kuti tukajane busilisi].” Jehova wakamugwasya Mukwesu Jennings amwanakazi wakwe kuti bayinkilile kunembo kumubelekela kabasyomeka nikuba kuti bakali muchiimo chiyumu.

17. Chikozyano chaMukwesu Jennings chakabagwasya biyeni bamwi?

¹⁷ Nzyaakaamba Mukwesu Jennings atala achiimo chakwe zyakagwasya bamwi. Muchikozyano, umwi muchizi wakalemba kuti: “Misozi yakandeenda chiindi nindakabala lwaano lwakwe. . . Kubona kuti Mukwesu Jennings wakeelede kusiya mulimu wakwe kuti akakusilikwe kwakandigwasya kuti ndibe aamaboneno aalikabotu atala achiimo changu.” Munzila iikozyenie, umwi Mukwesu wakalemba kuti: “Nindakabeleka kandili mwaalu kwaminyaka iili 10, ndakeelede kwiimikila kubeleka kandili mwaalu akaambo kakuchiswa boongo. Ndakali kubonaanga ndilikachidwe mubuumi. Maboneno aaya akali kupa kuti ndikachilwe kubala makani aali atala azyakachitikila bamwi. . . . Pesi kulisimya nkwaakachita Mukwesu Jennings kwakandisungwaazya.” Makani aaya atuyeezya kuti kulisimya nkutuchita mumapenzi kulakonzya kusungwaazya bamwi. Nikuba kuti buumi bulakonzya kutatweendela kabotu pesi tulakonzya kugwasya bamwi kuti babe aalusyomo akuti balisimye.—1 Pet. 5:9.

18. Mbuli mbukutondeezedwe muzifanikisyo, twiiyaanzi kuzwa kuli mukamufu wakuNigeria?

¹⁸ Malwazi aali mbuli kkorona akeeta buyumu-yumu kubakombi baJehova biingi. Muchikozyano, umwi mukamufu wakuNigeria wakali waamba kumaninwa aachakulya. Bumwi buzuba kuseeni mwanaakwe musimbi wakamubuzya kuti bakali kuyoolyaanzi kuti bajika kankomeki kamamanino karayisi kakali kasyaala. Muchizi ooyu wakasandula mwanaakwe kuti teebakachilikwe mali pe nikuba  chakulya, pesi bakeelede kutobelezya mukamufu wakuZarefati kwiinda mukujika rayisi njiyeeyo mpawo basyome Jehova amoyo woonse. (1 Bam. 17:8-16) Mubuzuba mbuboobo, kabatanayeeya biya pe kuti balyeenzi sikati, bakatambula chibbudu chakali aazyakulya zyakazwa kubakombinyina. Bakali kuzoolya chakulya eecho mumviki zibili. Muchizi ooyu wakaamba kuti taakazi pe kuti Jehova wakali kuswiilizya chiindi naakali kwaambuula aamwanaakwe. Kuti twasyoma Jehova nikuba kuti twaswaana mapenzi ngitutayeeyeli pe, tulaba aabweenzuma busimide anguwe.—1 Pet. 5:6, 7.

19. Ngaali mapenzi ngaakaswaana Mukwesu Aleksey Yershov?

¹⁹ Muminyaka miche yayinda, bakwesu abachizi balikupenzegwa munzila njibakatali kulangilila pe. Amuyeeye chikozyano chaMukwesu Aleksey Yershov wakuRussia. Bakombi baJehova bakkala kubusena oobo bakali aalwaangunuko chiindi Mukwesu Yershov naakabbabbatizigwa mu1994. Muminyaka yakazootobela, zintu zyakachincha kuRussia. Mu2020, ng’anda yaMukwesu Yershov yakasechegwa alubo mapulisa bakamubwezela zintu zyiingi nzyaakalaazyo. Mumyeezi yakazootobela, mfulumende yakamutamikizya mulandu. Chakapa kuti zintu zibije loko nchakuti wakatamikizigwa mulandu ooyo akaambo kamavidiyo aakali kubwezegwa aamuntu wakali waba aamunyaka kachitaanga uyanda kwiiya Bbayibbili. Oobu bwakali busosi bupati loko mbwaakachita muntu ooyo.

20. Niinzi chakagwasya Mukwesu Yershov kuti abe aabweenzinyina busimide aJehova?

²⁰ Kuli zintu zibotu na zyakaba akaambo kakulisimya kwaMukwesu Yershov? Iiyi. Bweenzinyina bwakwe aJehova bwakasima. Wakaamba kuti: “Ime amwanakazi wangu ngatwakomba kwaziindi zyiingi. Ndakabona kuti teetwakayinookonzya pe kulisimya kuchiimo chesu kaansinga teetwakagwasigwa aaJehova. Kwiiya Bbayibbili kandili aandikke kundigwasya kuti nditamani manguzu pe. Ngandayeeyesesya atala azikozyano zyabakombi baJehova basyomeka bachiindi. MuBbayibbili muli malayilile miingi loko aatondeezya mbukuyandikana kuti tukkale katubeteme akuti tusyome Jehova.”

21. Twayiyaanzi muchiiyo eechi?

²¹ Twayiyaanzi muchiiyo eechi? Buumi ngunamasandu. Nikuba oobo, Jehova unoobagwasya bakombi bakwe kuti bamusyoma. Mbuli mbutwabona mulugwalo luzulwida chiiyo eechi, “mapenzi aamululami manji, pele Jehova ulamuvwuna mulingawo oonse.” (Int. 34:19) Nkinkaako, toonse atubikkile maanu kunguzu nzyaalaazyo Jehova zyakutuvuna kutali kumapenzi eesu. Kuti twachita oobo, mbuli mwaapostoli Pawulu tulakonzya kwaamba kuti: “Ndili aamanguzu aakuchita zintu zyoonse akaambo kayooyo uundipa manguzu.”—Flp. 4:13.