1-2. Niinzi nzitweelede kuchita chiindi nitulindila nyika mpya?

 TUCHIBONA kachiyandikana loko chisyomezyo chaJehova chakuti uzoogwisya nyika eeyi mbi akweeta nyika mpya inooli aabululami. (2 Pet. 3:13) Nikuba kuti tatuzi pe kuti nyika mpya izoosika lili pesi bukamboni mbutuli kubona butondeezya kuti yaba aafwiifwi loko.—Mt. 24:32-34, 36; Mil. 1:7.

² Nikuba kuti twaba aachiindi chilamfu naakuti chifwiifwi katuli mukasimpe, toonse tweelede kusimya lusyomo lwesu muchisyomezyo chakuti nyika mpya izoosika. Nkamboonzi? Akaambo kakuti muntu uuli aalusyomo lusimide ulakonzya kumana lusyomo. Nzizyo zyakapa kuti mwaapostoli Pawulu aambe kuti kubula lusyomo ‘nchibi chitulambila chakufwambaana.’ (Heb. 12:1) Kuti lusyomo lwesu lutacheyi, tweelede kukkala katulanga-langa bukamboni butondeezya kuti nyika mpya yaba aafwiifwi.—Heb. 11:1.

3. Tulalanga-langaanzi muchiiyo eechi?

³ Muchiiyo eechi, tulalanga-langa zintu zitatu zikonzya kusimya lusyomo lwesu muchisyomezyo chaJehova chili atala anyika mpya: (1) kuyeeyesesya atala achinunuzyo, (2) kuyeeyesesya atala amanguzu ngalaawo Jehova alubo (3) kujana chiindi chakuchita milimu yabukombi. Mpawo tulalanga-langa mulumbe Jehova ngwakabuzya Habbakkukku uukonzya kusimya lusyomo lwesu mazubaano. Kwalino, atusaangune kulanga-langa zimwi zyiimo nzituswaana ziyanda kuti tutondeezye kuti tuli aalusyomo lusimide muchisyomezyo chanyika mpya.

 ZYIIMO ZIYANDA KUTI TUTONDEEZYE LUSYOMO LUSIMIDE

4. Nziizili zintu nzitusala ziyanda kuti tutondeezye kuti tuli aalusyomo lusimide?

⁴ Buzuba abuzuba tusala zintu ziyanda kuti tutondeezye kuti tuli aalusyomo lusimide. Muchikozyano, nga twasala bantu bakumvwananaabo, zyakulikondelezya, lwiiyo, muntu wakukwataanaawe, kusala kuba aabana amulimu. Kulayandikana kulibuzya kuti: ‘Kusala nkundichita kutondeezya kuti ndili aachoonzyo na chakuti nyika eeyi mbi yaba aafwiifwi kunyonyoonwa akuti lino-lino Leza uleeta nyika mpya? Ndisala zintu kweendelana aambubasala na bantu batasyomi pe kuti tuzoopona kukabe kutamani?’ (Mt. 6:19, 20; Lk. 12:16-21) Tulakonzya kusala munzila yabusongo kuti twasimya lusyomo lwesu akuba aachoonzyo chakuti nyika mpya yaba aafwiifwi.

5-6. Nkamboonzi nikuyandikana kuti tube aalusyomo lusimide muziindi zyamapenzi? Amba chikozyano.

⁵ Kuli mapenzi ngituswaana ayanda kuti tutondeezye kuti tuli aalusyomo lusimide. Tulakonzya kupenzegwa, kuchiswa bulwazi butasilikiki naakuti kuswaana bumwi buyumu-yumu bupa kuti tumane manguzu. Kumasaangunino, tulakonzya kuba aamanguzu aakuti tulisimye kupenzi eelyo. Pesi kuti penzi eelyo lyakkala kwachiindi chilamfu, ngazyayanda kuti tube aalusyomo lusimide kuchitila kuti tulisimye akuti twiinkilile kunembo katukomba Jehova katubotelwa.—Rom. 12:12 ; 1 Pet. 1:6, 7.

⁶ Kuti katuli mupenzi, tulakonzya kubonaanga nyika mpya tayizoosiki pe. Eezi zyaamba kuti ngatatuchikwe lusyomo na? Teembuzyaamba pe. Muchikozyano, kuti kwapya loko muchilimu, tulakonzya kubonaanga tachizoosiki pe chiindi champeyo. Pesi chiindi champeyo chilasika. Munzila iikozyenie, kuti twamana manguzu tulakonzya kubonaanga nyika mpya tayizoosiki pe. Pesi kuti katuli aalusyomo lusimide, ngatulizi kuti zisyomezyo zyaLeza zizoozuzikizigwa. (Int. 94:3, 14, 15; Heb. 6:17-19) Kuti twaba aamaboneno aaya, tulakonzya kubikka bukombi bwaJehova mubusena bwakusaanguna mubuumi bwesu.

7. Ngaali maboneno atali kabotu ngitweelede kutantamuka?

⁷ Tuyanda kuti tube aalusyomo lusimide chiindi nituchita mulimu wakukambawuka. Bantu biingi mbitukambawukila babonaanga “makani mabotu” ali atala anyika mpya ngakubeja. (Mt. 24:14; Ezk. 33:32) Nkinkaako, tatuyandi pe kuti tube aamaboneno aaya nkaambo apa kuti tuzumbuuzye kuti nzyaamba Jehova tazichitiki pe. Kuti tutantamuke maboneno aaya, tweelede kukkala katuli aalusyomo lusimide. Atubone nzila zitatu mutukonzya kuchita oobo.

YEEYESESYA ATALA ACHINUNUZYO

8-9. Kuyeeyesesya atala achinunuzyo kutugwasya biyeni kuti tusimye lusyomo lwesu?

⁸ Imwi nzila mutukonzya kusimya lusyomo lwesu nkwiinda mukuyeeyesesya atala achinunuzyo. Chinunuzyo chitugwasya kuba aachoonzyo chakuti zisyomezyo zyaLeza zizoozuzikizigwa. Kuti twayeeyesesya kuti nkamboonzi nitwakapegwa chinunuzyo akuti Jehova wakasweekelwa biyeni kuti atupe chinunuzyo, zilakonzya kusimya lusyomo lwesu alubo tulaba aachoonzyo chakuti chisyomezyo chaLeza chanyika mpya chizoozuzikizigwa. Nkamboonzi nitwaamba oobo?

⁹ Niinzi zyakachitika kuti tuzoojane chinunuzyo? Jehova wakatuma Mwanaakwe wakusaanguna, simuzyalwaalikke, muntu ngwakali kuyandisya loko kuti azoozyalwe aanyika kali muntu uumaninide. Naakali aanyika, Jesu wakalisimya kubuyumu-buyumu busiyene-siyene. Wakapenzegwa alubo wakajayigwa  munzila iichisa loko. Jehova wakasweekelwa loko kuti tujane chinunuzyo. Tazichiti pe kuti Taateesu siluyando azumizye kuti Mwanaakwe apenzegwe alubo afwe munzila iichisa loko kayanda kuti tupone kwachiindi chifwiifwi luzutu. (Joh. 3:16; 1 Pet. 1:18, 19) Kusweekelwa nkwaakachita Jehova, kuzoopa kuti abe aachoonzyo chakuti weeta nyika mpya.

KUYEEYESESYA ATALA AMANGUZU AAJEHOVA

10. Kweendelana alugwalo lwa Ba-efeso 3:20, niinzi Jehova nzyakonzya kuchita?

¹⁰ Nzila yachibili mutukonzya kusimya lusyomo lwesu nkwiinda mukuyeeyesesya atala amanguzu ngalaawo Jehova. Ulaamanguzu aakuzuzikizya zintu zyoonse nzyatusyomezya. Nichoonzyo, bantu biingi mazubaano babonaanga kuzoopona kukabe kutamani munyika mpya takuzoochitiki pe. Pesi Jehova ukkala katusyomezya zintu bantu nzibatakonzyi pe kuzuzikizya nkaambo nguLeza Singuzuzyoonse. (Job. 42:2; Mk. 10:27) Nkinkaako, tazitugambyi pe kuti Leza watusyomezya zintu zibonekaanga tazichitiki pe.—Bala Ba-efeso 3:20.

11. Amba chikozyano chitondeezya Leza mbaakazuzikizya zisyomezyo zyakwe. (Langa kabbokesi kati “ Zimwi Zisyomezyo Zyakazuzikizigwa.”)

¹¹ Atubone zimwi zintu Jehova nzyaakasyomezya bakombi bakwe bachiindi zyakali kubonekaanga tazichitiki pe. Jehova wakabuzya Abbrahamu aSara kuti bakali kuyooba aamwana mubuchembele bwabo. (Matl. 17:15-17) Alubo wakabuzya Abbrahamu kuti bazukulu bakwe bakali kuzoopegwa nyika yaKkenani. Kwaminyaka myiingi, bazukulu ba-Abbrahamu, nkukwaamba ma-Israyeli, bakali mubuzike ku-Ijipiti alubo kwakali kubonekaanga chisyomezyo chaJehova tachizoozuzikizigwi pe. Pesi chakazoozuzikizigwa. Alubo Jehova wakaambilizya kuti Elizabbeti wakali kuzooba aamwana nikuba kuti wakali wachembaala. Alubo wakabuzya nakalindu Mariya kuti wakali kuzooba aaMwana mulombe. Jehova wakaambilizya chisyomezyo eechi mumuunda wa-Edeni kakuchili minyaka myiingi kuti chizuzikizigwe.—Matl. 3:15.

12. Lugwalo lwa Joshua 23:14 a Isaya 55:10 lutuyiisyaanzi atala amanguzu ngalaawo Jehova?

¹² Kuti twayeeyesesya atala azisyomezyo zyoonse Jehova nzyakaamba ambakaazizuzikizya, zilatugwasya kubona kuti ulaamanguzu miingi alubo ngatwaba aalusyomo lusimide muchisyomezyo chakwe chili atala anyika mpya kuti chizoozuzikizigwa. (Bala Joshua 23:14; Isaya 55:10, 11.) Eezi zipa kuti tugwasye bamwi kuti ambabo babe aalusyomo lwakuti nyika mpya izoosika, teekulota pe. Jehova lwakwe nguwe wakaambilizya atala ajulu pya anyika mpya kuti: “Majwi aaya alasyomeka alubo ngachoonzyo.”—Chi. 21:1, 5.

CHITA ZINTU ZYABUKOMBI

13. Miswaangano yambungano itugwasya biyeni kuti tusimye lusyomo lwesu? Pandulula.

¹³ Nzila yachitatu iikonzya kutugwasya kuti tube aalusyomo lusimide nkujana chiindi chakuchita zintu zyabukombi. Muchikozyano, miswaangano yambungano itugwasya loko. Anna, waba aachiindi chilamfu kali mumulimu wachiindi choonse wakati: “Miswaangano ipa kuti ndibe aalusyomo lusimide loko. Nikuba kuti sikwaambuula kayiisya munzila iitandisiki aamoyo naakuti wambuula zintu nzindizi kale, ngandaswiilisisya akaambo kakuti zindigwasya kuti ndikamvwisisisye kabotu kasimpe kamuBbayibbili alubo zisimya lusyomo lwangu.” b Kuswiilila nsandulo zipegwa abakwesu abachizi kumiswaangano yambungano kusimya lusyomo lwesu.—Rom. 1:11, 12; 10:17.

14. Mulimu wakukambawuka utugwasya biyeni kuti tusimye lusyomo lwesu?

 ¹⁴ Kutola lubazu mumulimu wakukambawuka kusimya lusyomo lwesu. (Heb. 10:23) Barbara waba aaminyaka yiinda ku70 kakomba Jehova wakaamba kuti: “Ndakabona kuti kukkala kanditola lubazu mumulimu wakukambawuka kusimya lusyomo lwangu. Chiindi nindibuzya bantu zisyomezyo zyaJehova, lusyomo lwangu ngalwasima.”

15. Kubala Bbayibbili akuyanduulisisya kuli awulikke kulusimya biyeni lusyomo lwako? (Langa chifanikisyo.)

¹⁵ Kuli chimwi chintu chikonzya kutugwasya kuti tusimye lusyomo lwesu. Nkubala Bbayibbili akuyanduulisisya katuli aatulikke. Susan wakabona kuti kulagwasya kuba aapulogilamu yakubala Bbayibbili kali aalikke. Wakaamba kuti: “Munsondo ngandalibambila chiiyo chaNgaziyakulinda chamviki iitobela. Mumuvulo amuli Bwabili ngandalibambila miswaangano yaakati kamviki. Mpawo amwi mazuba asyala, ngandili kubala Bbayibbili akuyanduulisisya kandili andikke.” Kutobelezya pulogilamu eeyi kulikugwasya Susan kuti akkale kasimya lusyomo lwakwe. Irene waba aaminyaka myiingi kabelekela kumawofesi mapati wakabona kuti kubala atala abupolofita buli muBbayibbili kusimya lusyomo lwakwe. Wakaamba kuti, “Kulagambya kubona bupolofita bwaJehova boonse kabuli kuzuzikizigwa.”

“ZIYUME ZITETE CIYOOZUZIKIZYIGWA”

16. Nkamboonzi majwi Jehova ngaakabuzya Habbakkukku nabeleka akulindiswe mazubaano? (Mahebberu 10:36, 37)

¹⁶ Bamwi bakombi baJehova baba aachiindi chilamfu kabali kulindila kuti nyika eeyi mbi inyonyoonwe. Kweendelana amaboneno aabantu, chisyomezyo eechi chibonekaanga chanonoka kuzuzikizigwa. Pesi Jehova ulizi kuti mbubalimvwa bakombi bakwe. Wakabuzya mupolofita Habbakkukku kuti: “Cilengaano eeci ciyoocitika aciindi caco cibikkidwe, alimwi cifwambaanina kumamanino, eelyo tacikabeji pe. Nokuba kuti camuka, kozumanana kucilangila! Nkaambo ziyume zitete ciyoozuzikizyigwa. Tacikamuki pe!” (Hab. 2:3)  Makani aaya abeleka kuli Habbakkukku kupela na naakuti alabeleka akulindiswe mazubaano? Kazulwidwa aamuuya uusalala, mwaapostoli Pawulu wakabelesya malayilile aaya kumaKkristu bali kulindila nyika mpya. (Bala Mahebberu 10:36, 37) Tulakonzya kuba aachoonzyo chakuti nikuba kuti chisyomezyo eechi chabonekaanga chanonoka pesi “ziyume zitete ciyoozuzikizyigwa. Tacikamuki pe!”

17. Umwi muchizi wakaabelesya biyeni malayilile Jehova ngaakapa Habbakkukku?

¹⁷ Bakombi baJehova biingi balikubelesya malayilile ngakaamba Jehova aakuti ‘bazumanane kucilangila’ nikuba kuti baba aaminyaka myiingi kabali kulindila. Muchikozyano, Muchizi Louise wakasaanguna kubelekela Jehova mu1939. Wakaamba kuti: “Aachiindi eecho, ndakali kuyeeya kuti Amagedoni ilasika kanditanamanisya pe sekkondali. Pesi teeyakasika pe. Kwaminyaka myiingi, ndakabona kakugwasya loko kuti ndibale atala amakani aabantu bakalindila kwachiindi chilamfu kusikila Jehova naakazoozuzikizya zisyomezyo zyakwe. Nga ndabala atala aNowa, Abbrahamu, Josefa abamwi bakalindila Jehova kwachiindi chilamfu kusikila naakazoozuzikizya zisyomezyo nzyaakabasyomezezye. Kusyoma kuti zisyomezyo zyaJehova zizoozuzikizigwa kuli kundigwasya loko abamwi kuti tube aachoonzyo chakuti nyika mpya yaba aafwiifwi.” Bakombi baJehova baba aachiindi kabali mukasimpe bazuminana aazyakaambwa aamuchizi ooyu.

18. Kulanga zintu zyakalengwa kulusimya biyeni lusyomo lwesu muchisyomezyo chanyika mpya?

¹⁸ Nichoonzyo kuti nyika mpya tayinayasika pe. Pesi yeeya atala azintu nzitubona zili mbuli nyenyeezi, misamu, banyama abantu. Taakwe muntu uuzumbuuzya pe kuti zintu eezi mpuzili na choonzyo nikuba kuti kwakali chiindi mpuzyakataliwo pe. Pesi akaambo kakuti Jehova wakazilenga, lino mpuzili tulazibona. (Matl. 1:1, 26, 27) Alubo Leza wakasyomezya kuti uzooyeta nyika mpya. Uzoochizuzikizya chisyomezyo eechi. Munyika mpya, bantu bazoopona kukabe kutamani kabatachichiswi pe. Aachiindi nchabikkide Leza, nyika mpya izoobawo mbuli mbaakachita kuzintu zyakalengwa nzitubona.—Is. 65:17; Chi. 21:3, 4.

19. Niinzi zikonzya kukugwasya kuti ube aalusyomo lusimide?

¹⁹ Kuchilindila nyika mpya, chita zyoonse nzukonzya kuti usimye lusyomo lwako. Kkala kulumba chinunuzyo. Yeeyesesya atala amanguzu ngalaawo Jehova. Ba aazyakuchita zyiingi mumulimu waJehova. Kuti wachita oobo, uyooba aakati kabaabo “bakona zisyomezyo kwiinda mukuba aalusyomo amoyo mulamfu.”—Heb. 6:11, 12; Rom. 5:5.