Mwalizi Na?
Nkamboonzi baalumi bakatali ma-Israyeli nibakabeleka kabali masooja aaMwaami Davida?
AAKATI kamasooja akatali ma-Israyeli aaMwaami Davida, kwakali baalumi bali mbuli Zelekki waku-Amoni, Uriya wakuHeti a-Itima wakuMowabbu. a (1 Mak. 11:39, 41, 46) Alubo masooja aaDavida akali kuswaanizya ‘bana Kereti, bana Peleti abana Gati.’ (2 Sam. 15:18) Kweelede kuti bantu bakuKkeleti abakuPeleti bakali aabubbululu amaFilisiti. (Ezk. 25:16) Alubo bantu bakuGati bakali kukkala mudolopo lyakuFilisiti litegwa Gati.—Jos. 13:2, 3; 1 Sam. 6:17, 18.
Nkamboonzi Davida naakazumizya baalumi aaba kuti babe masooja aakwe? Nkaambo wakali aachoonzo chakuti bakali kusyomeka kulinguwe alubo chiyandikana loko nchakuti bakali kusyomeka kuli Jehova. Muchikozyano, limwi bbuku lipandulula Bbayibbili lyakaamba kuti atala abantu bakuKkeleti abakuPeleti: “Bakali kusyomeka kuli Davida muziindi ziyumu loko chiindi naakali kweendelezya.” Bakatondeezya biyeni kuti bakali kusyomeka kuli Davida? Chiindi “baalumi bana Israyeli boonse” nibakaleka kutobela Mwaami Davida akutobela “mwaalumi simanyongwe wazina lya Sheba,” bantu bakuKkeleti abakuPeleti bakakkala kabasyomeka kuli Davida alubo bakamugwasya kuti ayimikizye kupapila kwaSheba. (2 Sam. 20:1, 2, 7) Aali chimwi chiindi, mwana waMwaami Davida uutegwa Adonija wakeezya kulibikka kuba mwaami muchindawu chaSolomoni. Nikuba oobo, bantu bakuKkeleti abakuPeleti bakakkala kabasyomeka kuli Davida alubo bakagwasilizya mukubikka Solomoni kuti abe mwaami nkaambo nguwe wakali wasalwa aaJehova kuti azoobe mwaami uutobela.—1 Bam. 1:24-27, 38, 39.
Umwi mwaalumi wakatali mu-Israyeli wakakkala kasyomeka kuli Davida ngu-Itai wakuGati. Itai amasooja aakwe aali 600 bakagwasya Mwaami Davida chiindi mwana waDavida, Abbisalomu naakapapila akoongelezya myoyo yabaalumi bachi-Israyeli kuti bamubikke kuba mwaami. Kumasaangunino, Davida wakabuzya Itai kuti atamulwanini pe munkondo eeyi nkaambo taakali mu-Israyeli pe. Pesi Itai wakaamba kuti: “Masimpe mbubonya Jehova mbwali muumi alimwi mbubonya anduwe omwami simalelaangu mboli muumi, kufwumbwa kubusena nkoya kuba omwami simalelaangu, kofwide naa koli muumi, nkukonya ooko andime nkondiya kuba!”—2 Sam. 15:6, 18-21.
Itai wakali kusyomeka kumwaami wakananikwa aaJehova, Davida
Nikuba kuti bantu bakuKkeleti, bakuPeleti abakuGati teebakali ma-Israyeli pe, pesi bakalizi kuti Jehova nguLeza wakasimpe akuti Davida wakali munanike waJehova. Kweelede kuti Davida wakabalumba loko baalumi aaba akaambo kakuti bakali kusyomeka kulinguwe.
a Mulawu waLeza waambidwe muli Deuteronomo 23:3-6 wakali kukasya bantu baku-Amoni abakuMowabbu kuti banjile mumbungano yama-Israyeli. Nikuba oobo, kubonekaanga mulawu ooyu wakali kubakasya kuti babe bachisi eechi zili mumulawu alubo teewakali kubakasya pe bantu aaba kuti baliswaanizye aabakombi baLeza naakuti kukkalaabo. Langa Insight on the Scriptures, Voluyimu 1, p. 95.
