BAKOMBI baJehova beelede kuba amoyo mulamfu nkaambo ‘mazuba aakumamanino’ alikwiindilila kubija. (2 Tim. 3:1-5) Tupona abantu baliyanda, bayandisya kukazyania abatalinyoni. Bantu bali abube buli boobo, tabakwe moyo mulamfu pe. Nkinkaako, maKristu beelede kulibuzya kuti: ‘Nditondeezya kutaba amoyo mulamfu na mbuuli bantu bamunyika eeyi? Moyo mulamfu niinzi? Alubo kujana ndachita biyeni kuti ndibe abube oobu buyandikana kumaKristu?’

Kweendelana ambulibelesedwe muBbayibbele, bbala lyakuti moyo mulamfu lyaamba zyiingi kutali kulisimya nitwaswaana buyumu-yumu. Muntu uli amoyo mulamfu ulalisimya kumwi kali abulangilizi. Tayeeyi kuligwasya lwakwe mwini pesi ubabikkila maanu bamwi nikuba kabamuchitila zintu zitali kabotu. Alubo usyoma kuti bazoobambulula akumvwanana lubo. Nkinkaako, Bbayibbele lyaamba kuti luyando lupa kuti muntu abe amoyo mulamfu. * (1 Kor. 13:4) Alubo lyaamba kuti moyo mulamfu ‘muchelo wamuuya.’ (Gal. 5:22, 23) Tweelede kuchitaanzi kuti tube abube oobu?

Kuti tube amoyo mulamfu, tweelede kukomba katukumbila muuya uusalala uuzwa kuli Jehova ngwapa bantu bamusyoma. (Lk. 11:13) Mbukunga muuya uusalala uli amanguzu, andiswe tweelede kubeleka kweendelana anzitwakumbila. (Int. 86:10, 11) Eezi zyaamba kuti tweelede kubeleka changuzu buzuba abuzuba kuti bube oobu bukkalilile mumyoyo yesu. Nikuba kuti twaba amoyo mulamfu pesi tweelede kuchita zyiingi kuti tuzumanane kuba abube oobu. Niinzi chimwi chikonzya kutugwasya kuti tuchite oobo?

Tulakonzya kuba amoyo mulamfu kwiinda mukutobelezya chikozyano chaJesu. Naakali kupandulula “buntu bupya” buswaanizya kuba amoyo mulamfu, mwaapostolo Pawulu wakati, ‘luumuno lwaKristu lweendelezye mumyoyo yesu.’ (Kol. 3:10, 12, 15) Tulakonzya kuzumizya kuti luumuno ‘lweendelezye’ mumyoyo yesu kwiinda mukutobelezya chikozyano chaJesu chakusyoma kuti Leza uyoolulamika zintu zyoonse nzitukataazya muchiindi cheelede. Kutobelezya chikozyano chaJesu kupa kuti tube amoyo mulamfu muzyiimo zyoonse nzituswaana.—Joh. 14:27; 16:33.

Nikuba kuti tulangilila kukkala munyika mpya Leza njaakatusyomezya pesi tweelede kuba amoyo mulamfu nkaambo Jehova wakatutondeezya moyo mulamfu. Bbayibbele litusyomezya kuti: “Jehova taamusya ngaakasyomezya kale, mbobayeeya bamwi kuti wamuka, pe, pele ucimukazikila moyo, nkaambo tayandi kuti bantu bafwidilile, ulayanda  kuti boonse bajane ciindi cakweempwa.” (2 Pet. 3:9) Kuyeeyesesya Jehova mbaakatutondeezya moyo mulamfu kupa kuti andiswe tube amoyo mulamfu kuli bamwi. (Rom. 2:4) Nziizili zimwi zyiimo ziyanda kuti tube amoyo mulamfu?

Zyiimo nzituswaana buzuba abuzuba ziyanda kuti tube amoyo mulamfu. Muchikozyano, kuti kuyanda kwaamba chimwi chintu, weelede kuba amoyo mulamfu kuti utabanjili munkanwa bamwi nibali kwaambuula. (Jak. 1:19) Alubo weelede kuba amoyo mulamfu kuti bamwi bakombinyokwe kabali azilengwa nzutayandi. Muchiindi chakuti ubanyemene, weelede kuyeeya Jehova aJesu mbubakubona kubisya kwesu. Tabazibikkili maanu zintu ziniini nzitubisya. Pesi balanga zibotu nzituchita alubo batupa chiindi chakuti tubambulule.—1 Tim. 1:16; 1 Pet. 3:12.

Tweelede kuba amoyo mulamfu kuti umwi muntu waamba kuti twakachita chimwi chintu chibi. Kuti eezi zyachitika, chiindi chiingi tulanyema akulisalazya. Pesi Jwi lyaLeza lyaamba kuti tutachiti oobo. Lyaamba kuti: ‘Kukkazika moyo nkubotu kwiinda kulisumpula. Utafwambaani kunyema chiindi chakubijilwa, nkaambo mumyoyo yabafuba-fuba mobukkede bukali.’ (Muk. 7:8, 9) Nikuba kuti twatamikizigwa pesi tweelede kuyeeyesesya katutanasandula. Jesu wakaabelesya malayilile aaya, bamwi nibakamwaambila majwi aatali kabotu.—Mt. 11:19.

Bazyali beelede kuba amoyo mulamfu nibayanda kululamika bana babo kuti babona kuti balikuba amizeezo iitali kabotu akulombozya zintu zibi. Atulange-lange chikozyano chaMattias, uubelekela kuBbeteli yakuScandinavia. Kachili mukubusi, Mattias wakali kusekwa kuchikolo akaambo kazintu nzyasyoma. Kumatalikilo bazyali bakwe teebakali kuzibona pe eezi. Pesi bakeelede kumugwasya mwanaabo nkaambo kukazigwa kuchikolo kwakapa kuti azumbuuzye kuti nzyasyoma nzyakasimpe na. Gillis wisi aMattias wakati: “Chiimo eechi chakali kuyanda kuti tube amoyo mulamfu.” Mattias wakali kubuzya kuti “Leza ngwani? Tuzizi biyeni kuti Bbayibbele ndiJwi lyaLeza choonzyo? Tuzizi biyeni kuti eezi nzizyo Leza nzyayanda kuti tuchite?” Alubo wakali kubuzya wisi kuti: “Nkamboonzi nimundisungilizya kuti ndisyome zintu nzimusyoma kanditayandi?”

Gillis wakati: “Mwaneesu wakali kubuzya mibuzyo kanyemede pesi taakali kunyemena ndiswe pe wakali kunyemena njiisyo zizwa muBbayibbele zyakali kupa kuti akataazikane mubuumi.” Gillis wakamugwasya biyeni mwanaakwe? Wakati: “Ime amwanaangu twakali kukkala aansi katuli kuzuwa kwachiindi chilamfu. Chiindi chiingi ndakali kubuzya mibuzyo kuti ndimvwe mbaakali kulimvwa ambaakali kuyeeya.” Chimwi chiindi, ndakali kumubuzya makani aakuti ayeeyesesye nitutazoowazuwe lubo. Alubo chimwi chiindi ndakali kumubuzya kuti andipe mazuba kuti ndiyeeyesesye atala anzyaawamba. Kuzuwa nkutwakali kuchita kwakapa  kuti Mattias atalike kuzimvwisisisya kabotu njiisyo ziswaanizya chinunuzyo, bweendelezi bwaLeza aluyando lwaJehova. Zyakatola chiindi alubo kwakali kuyumu pesi mukuya kwachiindi wakatalika kumuyanda Jehova. Ime amukayintu wangu tuli kubotelwa nkaambo kuba amoyo mulamfu kwakapa kuti tukonzye kugwasya mwaneesu kachili mukubusi kuti achinche.

Gillis amukayintu wakwe bakagwasya mwanaabo alubo bakali kusyoma kuti Jehova unoobagwasya. Naakali kupandulula zyakiinda, Gillis wakati: “Ndakali kubuzya Mattias kuti kumuyanda kwakapa kuti katukomba chiindi choonse kuti Jehova amugwasye kuti abe amaboneno aalikabotu.” Bazyali aaba balabotelwa nkaambo bakatondeezya bube buyandikana bwakuba amoyo mulamfu.

MaKristu bakasimpe beelede kuba amoyo mulamfu chiindi nibagwasya bamumpuli naakuti beenzinyina bachiswa. Atulange-lange chikozyano chamuchizi Ellen * wakuScandinavia.

Muminyaka iili 8 yakiinda, mulumi waEllen wakawumwa astroke kwaziindi zibili zyakapa kuti boongo bwakwe butabeleki kabotu. Eezi zipa kuti kumuyumine mulumi waEllen kutondeezya luzyalo, kubotelwa nikuba kuumbaala. Alubo Ellen ukkala kakataazikene. Wakati: “Eezi zyapa kuti ndibe amoyo mulamfu akuti kandikomba chiindi chiingi.” Wakayungizya kuti: “Ndiyandisya majwi aali muli BaFilipi 4:13 aakuti: ‘Zintu zyoonse buyo ndazikonzya nkaambo kanguzu nzipedwe kuli-Kristo.’” Manguzu aaya apa kuti Ellen asyome Jehova kuti unoomugwasya chiindi choonse.—Int. 62:5, 6.

Jehova nchikozyano chimaninide chakuba amoyo mulamfu nchitweelede kutobelezya. (2 Pet. 3:15) MuBbayibbele, muli zikozyano zyiingi zili atala aJehova mbaakatondeezya moyo mulamfu. (Neh. 9:30; Is. 30:18, NW) Muchikozyano, Jehova wakamvwa biyeni Abrahamu naakali kubuzya mibuzyo miingi chiindi Jehova naakali kuyanda kunyonyoona muunzi waSodoma? Chakusaanguna, Jehova taakamunjila munkanwa Abrahamu naakali kwaambuula. Pesi Jehova wakatondeezya kuba amoyo mulamfu chiindi Abrahamu naakali kwaambuula. Kuzwa waawo, Jehova wakatondeezya kuti wakali kuswiilila Abrahamu naakali kwaambuula mpawo Jehova wakamubuzya kuti taakali kuyoowunyonyoona pe muunzi waSodoma nikuba kuti kwajanika bantu baluleme bali 10 mumuunzi ooyo. (Matl. 18:22-33) Nisimpe Jehova nchikozyano chibotu nkaambo wakaswiilila alubo taakanyema pe!

Kuba amoyo mulamfu mbube buyandikana maKristu mbubeelede kubelekela kuti babe aabo chiindi choonse. Kuti twabeleka changuzu kuti tube amoyo mulamfu, tuyoolemeka Taateesu uulikujulu uuli amoyo mulamfu. Alubo tuyooba akati ‘kabaabo bakajana zisyomezyo akaambo kakuba alusyomo amoyo mulamfu.’—Heb. 6:10-12.