CHIIYO 32
Luyando Lwanu Aluvule
“Eeci ncondizumanana kupailila, kuti luyando lwanu luzumanane kuvwula lyoonse.”—FLP. 1:9.
LWIIMBO 106 Amube Aluyando
ZITAYIIGWE *
1. Mbaani bakatalisya mbungano yakuFilipi?
CHIINDI mwaapostolo Pawulu, Sila, Lukka aTimotewo nibakasika kuFilipi, bakajana bantu biingi bakali aachiyandisyo chakumvwa makani aaBwaami. Baalumi aaba bane basungu, bakabeleka changuzu kuti batalisye mbungano alubo basikwiiya boonse bakasaanguna kunjila miswaangano aamuunzi wamwanakazi uutegwa Lidiya wakali kubatambula kabotu beenzu.—Mil. 16:40.
2. Mbungano eeyi yakaswaana buyumu-yumu buli biyeni?
2 Kakutanayinda chiindi, mbungano eeyi mpya yakaswaana buyumu-yumu. Saatani wakapa kuti bantu bakatali kuyanda kasimpe bawukazye changuzu mulimu wakukambawuka wakali kuchitwa aamaKristu basyomeka. Pawulu aSila bakasungwa, bakawumwa aziponda mpawo bakabikkwa mujele. Nibakaangununwa, bakaswaya basikwiiya bapya kuti bakabasimye. Kuzwa waawo, Pawulu, Sila aTimotewo bakazwa mudolopo eelyo pesi Lukka wakasyaala. MaKristu bamumbungano eeyi mpya bakachita biyeni? Kabagwasigwa amuuya uusalala, teebakaleka pe kukomba Jehova. (Flp. 2:12) Pawulu wakabotelwa loko anzibakachita!
3. Bafilipi 1:9-11 itondeezya kuti Pawulu wakakombelaanzi?
3 Nikwakayinda minyaka iili 10, Pawulu wakalemba lugwalo lwakali kuya kumbungano yakuFilipi. Chiindi nubala lugwalo oolu, ulakonzya kubona mbaakali kubayanda bakombinyina. Wakalemba kuti: ‘Ndilamuyandisisya nyoonse aluyando lwamumoyo luli mbuli ndwajisi Kristo Jesu.’ (Flp. 1:8) Wakabalembela kuti wakali kubakombela. Alubo wakakombela kuti Jehova abagwasye kuti luyando lwabo luvule, babikke zintu ziyandikana mubusena bwakusaanguna, batabi aamulandu, batalebyi bamwi akuti bazyale michelo iiluleme. Andiswe mazubaano tulakonzya kugwasigwa amajwi aPawulu. Lino atubale majwi ngaakalembela mbungano yakuFilipi. (Bala Bafilipi 1:9-11.) Kuzwa waawo, tulalanga-langa twaambo ntwaakaamba akubona mbutukonzya kutubelesya.
LUYANDO LWANU ALUVULE
4. (a) 1 Johane 4:9, 10 itondeezya biyeni kuti Jehova ulatuyanda? (b) Tweelede kumuyanda zili biyeni Leza?
4 Jehova wakatondeezya kuti ulatuyanda naakatuma Mwanaakwe kuti azoofwide zibi zyesu. (Bala 1 Johane 4:9, 10.) Luyando ndwaakatutondeezya lupa kuti andiswe tumuyande. (Rom. 5:8) Leza tweelede kumuyanda zili biyeni? Jesu wakasandula mubuzyo ooyu naakabuzya muFarisi kuti: “Weelede kuyanda Jehova Leza wako amoyo wako woonse, abuumi bwako boonse alimwi amizeezo yako yoonse.” (Mt. 22:36, 37) Tweelede kuyanda Leza amoyo woonse. Alubo buzuba abuzuba tweelede kwiinkilila kunembo katumuyanda. Pawulu wakabuzya bamumbungano yakuFilipi kuti luyando lwabo lwakeelede ‘kunooyabuvula.’ Tweelede kuchitaanzi kuti twiinkilile kunembo kuyanda Leza?
5. Tweelede kuchitaanzi kuti twiinkilile kunembo kuyanda Jehova?
5 Kuti tumuyande Leza, tweelede kumuziba. Bbayibbele lyaamba kuti: “Kufwumbwa muntu uutatondezyi luyando tanamuzyiba Leza pe, nkaambo Leza nduyando.” (1 Joh. 4:8) Mwaapostolo Pawulu wakati tweelede kuba “aluzyibo lwini-lwini alimwi akumvwisya koonse,” kuchitila kuti twiinkilile kunembo kuyanda Jehova. (Flp. 1:9) Nitwakatalika kwiiya Bbayibbele, twakasaanguna kumuyanda Leza nikuba kuti teetwakazi zyiingi atala abuntu bwakwe bubotu. Kwiiya zyiingi atala anguwe, kwakapa kuti tumuyande loko. Eezi zipa kuti kubala Bbayibbele chiindi choonse akuyeeyesesya atala anzitubala, tukubone kakuli aakati kazintu ziyandikana!—Flp. 2:16.
6. 1 Johane 4:11, 20, 21 itugwasya biyeni kuti luyando lwesu luvule?
6 Luyando lupati Leza ndwaakatutondeezya lupa kuti tuyande bakombima. (Bala 1 Johane 4:11, 20, 21.) Tulakonzya kuyeeya kuti kuyanda bakombima kulalichitikila akulikke nkaambo tukomba Jehova akuti tuleezya kutobelezya buntu bwakwe bubotu. Alubo tutobelezya chikozyano chaJesu wakatutondeezya luyando naakatufwida. Nikuba boobo, kulakonzya kutuyumina kuswiilila mulawu wakuti tuyande bamwi. Atulange-lange zyakachitika mumbungano yakuFilipi.
7. Twiiyaanzi kululayo Pawulu ndwaakabuzya Yuwodiya aSintike?
7 Yuwodiya aSintike bakali bachizi basungu ‘bakabeleka changuzu’ amwaapostolo Pawulu. Nikuba boobo, aali chimwi chiindi bakakachilana zyakuti teebakachili kumvwanana pe. Mulugwalo ndwaakalembela mbungano mubakabede bachizi aaba, Pawulu wakati Yuwodiya aSintike bakeelede kuba “amuzeezo omwe.” (Flp. 4:2, 3) Alubo Pawulu wakabuzya mbungano yoonse kuti: “Amuzumanane kucita zintu zyoonse cakutatongooka akukazyanya.” (Flp. 2:14) Lulayo oolu Pawulu taakalupa bachizi aaba basyomeka luzutu pesi abamumbungano boonse kuti bayinkilile kunembo kabatondeezyania luyando.
Nkamboonzi nitweelede kukkala katuli aamaboneno aalikabotu atala abakombima? (Langa fuka 8) *
8. Niinzi chikonzya kupa kuti kutuyumine kuyanda bakombima alubo ngatulalizunda biyeni penzi eeli?
8 Chimwi chiindi kulakonzya kutuyumina kuyanda bakwesu akaambo kakulangisisya zibi nzibachita, mbuuli zyakachitika kuli Yuwodiya aSintike. Buzuba abuzuba toonse tulabisya. Kulangisisya zibi nzibachita bakombima kupa kuti kutuyumine kubatondeezya luyando. Muchikozyano, zilakonzya kutunyemya kuti mukwesu waluba kugwasilizya mukusalazya Ng’anda yaBwaami. Kuti twasaanguna kulangisisya zibi zyoonse nzyachita mukwesu ooyo, kulakonzya kutuyumina kwiinkilila kunembo kumuyanda. Kuti anduwe waba amizeezo iili boobo, yeeyesesya atala akaambo kayandikana kakuti: Jehova ulazibona zibi nzituchita azichitwa amukombima. Nikuba kuti tulabisya, Jehova nga uchimuyanda mukombinyokwe kuswaanizya anduwe. Nkinkaako, tweelede kubayanda bamwi mbuuli mbachita Jehova akukkala katuli amaboneno aalikabotu atala abakombima. Kubeleka changuzu kuti tuyande bakombima, kupa kuti tukkale katujisini.—Flp. 2:1, 2.
“ZINTU ZIYANDIKA KAPATI”
9. “Zintu ziyandika kapati” Pawulu nzyaakabuzya mbungano yakuFilipi ziswaanizyaanzi?
9 Pawulu wakazulwidwa amuuya uusalala kuti abuzye bakombinyina bakuFilipi amaKristu woonse kuti, ‘basinizye zintu ziyandika kapati.’ (Flp. 1:10) Zintu eezi ziyandikana ziswaanizya kusalazigwa kwazina lyaJehova, kuzuzikizigwa kwamakanze aakwe, luumuno akujatana mumbungano. (Mt. 6:9, 10; Joh. 13:35) Kupona kweendelana azintu eezi ziyandikana kutondeezya kuti tulamuyanda Jehova.
10. Tweelede kuchitaanzi kuti Jehova atubone mbuuli bantu batakwe mulandu?
10 Alubo Pawulu wakati, tatweelede kuba “amulandu uuli woonse.” Pesi eezi tazyaambi kuti tweelede kuba bantu bamaninide, batakwe chibi. Nisimpe kuti tazikonzeki pe kuti tube mbuuli Jehova uutakwe chibi. Pesi Jehova unootubona mbuuli bantu batakwe mulandu kuti twamuyanda amoyo woonse akubikka zintu ziyandikana mubusena bwakusaanguna. Imwi nzila iitondeezya kuti tuli aaluyando, nkutachita zintu zilebya bamwi.
11. Nkamboonzi nituteelede kulebya bamwi?
11 Malayilile aakuti tutalebyi bamwi ninchenjezyo iiyandikana loko. Niinzi chinga chilapa kuti tulebye bamwi? Tulakonzya kuchita oobo kwiinda muzintu nzitulikondelezyaazyo, munsamino yesu amilimu njitusala. Chimwi chiindi nzituchita nga teezibi pe. Pesi zitayandikani nkuchita zintu zilebya bamwi. Jesu wakati kuti twalebya imwi mbelele yakwe, ngachayinda kubota kuti twasungililwa bbwe pati munsingo akuwaalilwa mulwizi!—Mt. 18:6.
12. Twiiyaanzi kuchikozyano chamukwesu amukayintu wakwe mapayona?
12 Atubone umwi mukwesu amukayintu wakwe mapayona mbubakaswiilila nchenjezyo yaJesu. Mapayona aaba bakali mumbungano iimwi amukwesu amukayintu bakachili bapya mukasimpe. Bakamboni aaba bapya bakakomena kabatazumizigwi kuchita zimwi zintu. Bakamboni aaba bapya bakali kusyoma kuti maKristu tabeelede kweebela kufumbwa chitegwa nimuvi. Bakagamba nibakamvwa kuti mapayona aaba bakiinkide kukweebela muvi. Mapayona aaba bakaleka kwiinka kukweebela mamuvi kusikila Bakamboni aaba nibakazooyiisya myoyo yabo kuti ibagwasye kubona zintu munzila iili kabotu. (Heb. 5:14) Nzibakachita mapayona aaba zyakatondeezya kuti bakali kubayanda beenzinyina bakachili bapya kutali mumajwi luzutu pesi kwiinda mumichito.—Rom. 14:19-21; 1 Joh. 3:18.
13. Munzilaanzi mutukonzya kupa kuti muntu abisye?
13 Imwi nzila iikonzya kupa kuti muntu alebwe, nkuchita zintu zipa kuti abisye. Zichitika biyeni eezi? Atulange chikozyano chitobela. Umwi sikwiiya Bbayibbele wakali wabeleka changuzu kuti aleke kuba sibukande. Wakabona kuti wakeelede kulekela limwi kunywa bukande. Wakachincha chakufwambaana mpawo wakabbabbatizigwa. Aali chimwi chiindi, umwi mukwesu wakamutamba kupaati kuti bazoobotelwe abakombinyina. Mukwesu wakamutambide wakamubuzya kuti anywe bukande. Wakati: “Lino waba muKristu alubo waabugwasigwa amuuya waJehova. Muuya uusalala nguwo uupa kuti muntu alinyone. Kuti kulinyona, weelede kunywa mbichaani.” Kaansinga mukwesu ooyu wakaswiilila malayilile aaya aatali kabotu akunywa bukande zyiindilide, teezyakali kunoomweendela kabotu pe.
14. Miswaangano yachiKristu itugwasya biyeni kuti tubelesye malayilile aali muli Bafilipi 1:10?
14 Miswaangano yachiKristu itugwasya kuti tubelesye malayilile aali muli Bafilipi 1:10 munzila zisiyene-siyene. Nzila yakusaanguna, chakulya chamubukombi chitugwasya kubona zintu ziyandikana mumeso aaJehova. Yachibili, tuyiisigwa mbutweelede kubelesya zintu nzitwiiya kuti tutabi bantu bali amulandu. Alubo yachitatu, tugwasigwa kuti ‘tutondeezye luyando akucita milimo mibotu.’ (Heb. 10:24, 25) Kuti bakombima batusungwaazya, zipa kuti tubayande akuti tuyande Jehova. Kuyanda Jehova abakombima munzila iili boobu kupa kuti tutachiti zintu zilebya bamwi.
ATWIINKILILE KUNEMBO ‘KUZULA MICELO IILULEME’
15. ‘Kuzula michelo iiluleme’ chaambaanzi?
15 Pawulu wakakombela kuti bamumbungano yakuFilipi ‘bazule micelo iiluleme.’ (Flp. 1:11) Nisimpe kuti “micelo iiluleme” yakali kuswaanizya mbubakali kumuyanda Jehova abakombi bakwe.Eezi zyakali kuswaanizya kubuzya bamwi atala alusyomo ndubalaalo muli Jesu abulangilizi bwabo. Alubo muli Bafilipi 2:15 kubelesedwe majwi aati, ‘kumweka mbuli mimuni munyika eeyi.’ Majwi aaya atuyeezya makani Jesu ngaakabuzya basikwiiya bakwe aakuti bakali “mumuni wanyika.” (Mt. 5:14-16) Alubo wakababuzya kuti bagwasye bantu kuti babe “basikwiiya,” akuti bakali kuyooba “bakamboni . . . kusikila kumasena aakulamfwu kapati aanyika.” (Mt. 28:18-20; Mil. 1:8) Tuzyala “micelo iiluleme” chiindi nitutola lubazu mumulimu ooyu uuyandikana loko.
Pawulu ulikulemba lugwalo luya kumbungano yakuFilipi chiindi nasungidwe mung’anda kuRoma. Achiindi nchicheecho, ulikukambawukila basikumulinda abantu bamuswayide. (Langa fuka 16)
16. Bafilipi 1:12-14 itondeezya biyeni kuti tulakonzya kumweka mbuuli mimuni muzyiimo ziyumu? (Langa chifanikisyo chili aachivumbyo.)
16 Kufumbwa zyiimo nzituswaana, tulakonzya kumweka mbuuli mimuni. Chimwi chiindi zintu nzitubonaanga zitukachizya kukambawuka makani mabotu, zilakonzya kuchincha akupa kuti tukambawuke. Muchikozyano, mwaapostolo Pawulu wakalisungidwe mung’anda kuRoma chiindi naakalemba lugwalo lwakali kuya kumbungano yakuFilipi. Pesi ncheni teezyakamukachizya kukambawukila basikumulinda abantu bakali kumuswaya. Pawulu wakakambawuka chabusungu nikuba kuti wakali muzyiimo ziyumu alubo eezi zyakagwasya bakombinyina kuti babe achibindi ‘cakwaamba jwi lya Leza cakutayoowa.’—Bala Bafilipi 1:12-14; 4:22.
Chiindi choonse, tweelede kuyanduula nzila zyakukambawuka chabusungu (Langa fuka 17) *
17. Amba chikozyano chamazubaano chitondeezya basikupupulula bazyala michelo nikuba muzyiimo ziyumu.
17 Bakwesu abachizi biingi batondeezya chibindi mbuuli mwaapostolo Pawulu. Bakkala muzisi mubatakonzyi kukambawuka aantanganana naakuti aang’anda ang’anda. Ngabayanduula zimwi nzila kuti bakambawuke makani mabotu. (Mt. 10:16-20) Muchisi chimwi chili aazyiimo zili boobo, umwi mulangizi wabbazu wakabuzya sikupupulula umwi awumwi kuti abe aachilawu chakwe nchakambawukila chiswaanizya babbululu bakwe, mbayakilenaabo, basichikolonyina, mbabelekaabo abamwi mbazibenaabo. Nikwakayinda minyaka iibili, mbungano zyakavula loko mubbazu eelyo. Zilakonzeka kuti tatukkali muchisi chili azyiimo zili boobo pe. Nikuba boobo, tujana chiiyo chiyandikana kubakombima aabo chakuti: Chiindi choonse, tweelede kuyanduula nzila zyakukambawuka chabusungu, katusyoma kuti Jehova ulatupa manguzu aatugwasya kuti tuzunde zintu zyoonse zikonzya kutukachizya kukambawuka.—Flp. 2:13.
18. Tweelede kukanza kuchitaanzi?
18 Lino nchichiindi chakuti tukanze kubelesya malayilile aajanika mulugwalo Pawulu ndwaakalembela mbungano yakuFilipi. Atubikkile maanu kuzintu ziyandikana kapati, tutabi amulandu, tutalebyi bamwi akwiinkilila kunembo katuzyala michelo yabululami. Kuchita oobo, kupa kuti luyando lwesu luvule akuti Taateesu Jehova uuli aluyando alemekwe.
LWIIMBO 17 “Ndilayanda”
^ par 5 Mazubaano, tweelede kubayanda loko bakombima. Lugwalo lwakalembelwa mbungano yakuFilipi, lutugwasya kuti tuzumanane kuba aaluyando nikuba kakuli kuyumu kuchita oobo.
^ par 54 BUPANDULUZI BWAZIFANIKISYO: Nibalikusalazya Ng’anda yaBwaami, mukwesu Mudimba waleka kusalazya mpawo wasaanguna kwaambuula awumwi mukwesu amwanaakwe. Eezi zyapa kuti Muzamba ulikubeleka anyeme. Wayeeya kuti, ‘Mudimba weelede kuleka kwaambuula, abeleke.’ Nikwayinda chiindi, Muzamba wabona Mudimba kaatondeezya luzyalo kwiinda mukugwasya muchizi uuchembeede. Eezi zyapa kuti Muzamba abone buntu bubotu bwaMudimba.
^ par 58 BUPANDULUZI BWAZIFANIKISYO: Muchisi Bakamboni nkubatakonzyi kukambawuka aantanganana, mukwesu wakambawukila mweenzinyina munzila iipa kuti bamwi bataziboni. Nikwayinda chiindi, mukwesu ooyu wakambawukila umwi mwaalumi ngwabelekaawe nibali kulyookezya.
