1. Nkamboonzi Jehova naakalenga zimwi zintu zipona?

KULI chiindi Jehova naakali alikke. Pesi takwe nikwakali kumubbowa pe nkaambo tayandi kugwasigwa abamwi bantu kuti abotelwe. Pesi Jehova wakayanda kuti kube zimwi zintu zipona alubo zibotelwa. Akaambo kaluyando wakasala kulenga zimwi zintu zipona.—Int. 36:9; 1 Joh. 4:19.

2. Jesu abangelo bakamvwa biyeni chiindi Jehova naakalenga zimwi zintu?

² Chakusaanguna, Jehova wakalenga Mwanaakwe Jesu. Mpawo kali amwi aMwanaakwe, Jehova wakalenga “zintu zimbi zyoonse” kuswaanizya mamiliyoni aabangelo. (Kol. 1:16) Jesu wakabotelwa kujana mweenya wakubeleka aamwi aWisi. (Tus. 8:30) Ambabo bana baLeza, bangelo bakabotelwa nkaambo bakaliwo chiindi Jehova aMubelesi Ulaaluzibo Jesu, nibakali kulenga julu anyika. Bangelo bakatondeezya biyeni kuti bakabotelwa? Bakasaanguna ‘koongolola cakukondwa’ chiindi Jehova naakalenga nyika alubo kweelede kuti bakazumanana kubotelwa chiindi Jehova naakali kulenga zimwi zintu, kuswaanizya abantu mbaakazoolenga kumamanino. (Job. 38:7; Tus. 8: 31, makani aamunsi.) Zilenge eezi zyoonse zitondeezya kuti Jehova ulaaluyando abusongo.—Int. 104:24; Rom. 1:20.

3. Kweendelana alugwalo lwa 1 Bakorinto 15:21, 22, chinunuzyo chaJesu chitugwasya biyeni?

³ Jehova wakali kuyanda kuti bantu babotelwe kukabe kutamani munyika mbotu njaakalenga. Pesi chiindi Adamu aEva nibakapapila Wisi siluyando, zyakapa kuti babe achibi akuti batabi  abuumi butamani kuswaanizya abana babo. (Rom. 5:12) Jehova wakachita biyeni? Chakufwambaana, wakaamba kuti wakali kuzoobavuna biyeni bantu. (Matl. 3:15) Jehova wakali kuyoopa Mwanaakwe Jesu kuti abe chinunuzyo chakali kuyoovuna bana baAdamu aEva kuzwa kuchibi alufu. Eezi zyakali kuyoopa kuti umwi awumwi ajane mweenya wakulisalila kumubelekela kuchitila kuti akajane buumi butamani.—Joh. 3:16; Rom. 6:23; bala 1 Bakorinto 15:21, 22.

4. Njiili mibuzyo njitutasandule muchiiyo eechi?

⁴ Chisyomezyo chaLeza chakuti kuzooba bubuke chipa kuti kube mibuzyo myiingi. Muchikozyano, tulakonzya kulibuzya kuti: Kweelede kuti bantu bayoobusigwa biyeni? Tuzoobaziba na babbululu besu nibazoobusigwa? Nkamboonzi bubuke nibuzoopa kuti tubotelwe? Alubo kuyeeyesesya atala abubuke kutugwasya biyeni kuti tubone kuti Jehova ulaaluyando, busongo amoyo mulamfu? Lino atusandule mibuzyo eeyi.

5. Nkamboonzi nitukonzya kwaamba kuti bantu bayoobusigwa mbichaani-mbichaani, munzila iibambikene?

⁵ Chiindi Jehova naazoobusya mamiliyoni aabantu kabelesya Jesu, kweelede kuti tabazoobusigwi aachiindi chimwi pe. Nkamboonzi? Nkaambo kuti bantu bavula munyika aachiindi chimwi zilakonzya kupa kuti kube lupyopyongano. Alubo Jehova tachiti zintu munzila iitabambikene. Ulizi kuti, kuti kukkale kakuli luumuno, zintu zyeelede kuchitwa munzila iibambikene. (1 Kor. 14:33) Chiindi naakabeleka aamwi aJesu, Jehova Leza wakatondeezya kuti ulaabusongo amoyo mulamfu kwiinda mukulenga zintu zili munyika mbichaani-mbichaani katanalenga bantu. Munzila iikozyenie, Jesu uyootondeezya buntu  oobu Mubweendelezi Bwakwe Bwaminyaka ili 1 000 chiindi naatazoobeleke aamwi abantu batazoofutuke Armagedoni kubambulula nyika kuchitila kuti batambule bantu batazoobusigwe.

6. Kweendelana alugwalo lwa Milimo 24:15, mbaani bamwi batazoobusigwe aJehova?

⁶ Kwiinda zyoonse, bantu batazoofutuke Armagedoni bazooba aachilongezyo chakuyiisya bantu batazoobusigwe atala aBwaami bwaLeza amilawu yakwe. Nkamboonzi? Nkaambo biingi batazoobusigwe banooli bantu ‘bataluleme.’ (Bala Milimo 24:15.) Beelede kuzoochincha zintu zyiingi mubuumi bwabo kuchitila kuti bazookonzye kugwasigwa achinunuzyo chaJesu. Amuyeeye kuti unooli mupati biyeni mulimu wakuyiisya mamiliyoni aabantu batamuzi pe Jehova. Bantu batazoobusigwe bazooyiisigwa mbuli mbutuchita zyiiyo zyaBbayibbele na? Bantu batazooyiisigwe bazoonjila azimwi mbungano na kuti bayiisigwe kuchitila kuti bayiisye bantu batazoobusigwe musule lyabo? Tuzoozibona aachiindi eecho. Pesi nchituzi nchakuti, kumamanino aaBweendelezi bwaKristu bwaMinyaka iili 1 000, “nyika iyoozula luzyibo lwa Jehova.” (Is. 11:9) Tunooli azyiingi zyakuchita muminyaka iili 1 000.

7. Nkamboonzi nikuyooyandikana kuti bakombi baJehova bazoobe alweetelelo nibanooyiisya bantu batazoobusigwe?

⁷ Mubweendelezi bwaKristu bwaMinyaka iili 1 000, bakombi baJehova boonse banooli aanyika beelede kuzoochincha kuchitila kuti babotezye Jehova. Boonse beelede kuzooba alweetelelo nibayiisya bantu bataluleme batazoobusigwe kuchitila kuti bazookonzye kubagwasya kutobelezya milawu yaJehova. (1 Pet. 3:8) Zilaantanganana kuti bantu batazoobusigwe bazoobona kuti bakombi baJehova balalibombya akuti ‘babelekela lufutuko lwabo’ alubo eezi ziyoopa kuti ambabo bayande kukomba Jehova.—Flp. 2:12.

8. Nkamboonzi nitukonzya kwaamba kuti bantu bazoobaziba babbululu babo bakafwa nibazoobusigwa?

⁸ Kuli twaambo twiingi tupa kuti tuzumine kuti tuyoobaziba babbululu besu bakafwa nibazoobusigwa. Muchikozyano, kuti twalanga-langa bantu bakabusigwa chiindi, kubonekaanga Jehova uyoobusya bantu kabali mbuli mbubakabede, kabaambuula akuyeeya mbuli mbubakali kuchita kabatanafwa. Alubo Jesu wakaamba kuti kufwa kufanana aakoona akuti kubusigwa kufanana akusinsimunwa kung’onzi. (Mt. 9:18, 24; Joh. 11:11-13) Kuti muntu wasinsimunwa kung’onzi ubuka katachinchide pe alubo zintu nzyali kuyeeya katanawona nga uchiziyeeyede. Atuyeeye chikozyano chaLazaro. Wakali waba amazuba aane kafwide alubo mubili wakwe wakali watalika kubola. Pesi bachizi bakwe bakamuziba chiindi Jesu naakamubusya alubo zilaantanganana kuti anguwe wakabaziba.—Joh. 11:38-44; 12:1, 2.

9. Nkamboonzi bantu bayoobusigwa nibayoobuka kabatamaninide?

⁹ Jehova wakasyomezya kuti takwe muntu uyoopona mubweendelezi bwaKristu uyakwaamba kuti: “Ndaciswa.” (Is. 33:24; Rom. 6:7) Eezi zitondeezya kuti bantu batazoobusigwe banooli amibili iitakwe malwazi. Eezi tazyaambi kuti bayoobuka kabamaninide pe. Kuti babusigwa kabamaninide babbululu babo balakonzya kuzookachilwa kubaziba. Kweelede kuti bantu bazoomaninina mbichaani-mbichaani muBweendelezi bwaKristu bwaMinyaka iili 1 000. Niyazoomana minyaka iili 1 000, Jesu uyoobweedezya Bwaami kuli Wisi. Aachiindi eecho, Bwaami bunooli bwamaninsya mulimu wabo kuswaanizya akupa kuti bantu  bamaninine.—1 Kor. 15:24-28; Ciy. 20:1-3.

10. Bubuke buyoopa kuti ulimvwe biyeni?

¹⁰ Yeeyela mbuyoolimvwa wakubonana lubo ababbululu bako banooli babusigwa. Uyoosekelela na naakuti ilookweenda misozi akaambo kakubotelwa? Uyooyimba nyimbo zyakutembawula Jehova na? Zilaantanganana kuti uyoomuyanda loko Taateesu aMwanaakwe akaambo kachipo chabubuke.

11. Kweendelana amajwi aali muli Johane 5:28, 29, bantu batazoopone kweendelana amalayilile aaLeza bazoojanaanzi?

¹¹ Yeeyela mbubayoobotelwa bantu batazoobusigwe chiindi nibayoosamununa buntu bwachiindi akupona kweendelana amilawu yaLeza. Bantu batazoopone kweendelana amilawu yaLeza bazookonzya kupona kukabe kutamani muParadayizi. Pesi bantu batazoopapile Jehova bayoonyonyoonwa kuchitila kuti batazoopambanisyi luumuno lunooli muParadayizi.—Is. 65:20; bala Johane 5:28, 29.

12. Jehova uyoobalongezya biyeni bantu banooli aanyika?

¹² MuBweendelezi bwaJesu, bakombi baJehova bayoobona kuzuzikizigwa kwamajwi ajanika muli Tusimpi 10:22 aakuti: “Cileleko icizwa kuli Jehova ncecivwubya, alimwi tayungizyi macise kulincico pe.” Kabagwasigwa amuuya uusalala, bakombi baLeza bayoosima mubukombi chaamba kuti bayooba abuntu buli mbuli bwaKristu alubo mbichaani-mbichaani bayoomaninina. (Joh. 13:15-17; Ef. 4:23, 24) Buzuba abuzuba bayoochincha akuba amibili iisimide. Buumi buyoononeezya. (Job. 33:25) Kuyeeyesesya atala abubuke nga kulakugwasya biyeni?

13. Kweendelana alugwalo lwa Intembauzyo 139:1-4, bubuke buyootondeezya biyeni kuti Jehova utuzi kabotu?

¹³ Mbuli mbutwabona musule, chiindi Jehova nayoobusya bantu, uyoobabusya kabali amizeezo abuntu mbubakali aabo kabatanafwa. Eezi zituyiisyaanzi atala aJehova? Zituyiisya kuti Jehova ulazibona alubo tazilubi pe nzituyeeya, mbutulimvwa, nzitwaambuula anzituchita. Nkinkaako chiindi nayoobusya bafwide nkuuba kuti akabweedezye mizeezo abuntu mbubakali aabo. Mwaami Davida wakalizi kuti Jehova umuzi kabotu umwi awumwi wesu. (Bala Intembauzyo 139:1-4.) Kuziba kuti Jehova utuzi kabotu kutugwasya biyeni lino?

14. Kuziba kuti Jehova utuzi kabotu kweelede kupa kuti tulimvwe biyeni?

¹⁴ Kuti twayeeyesesya atala akuti Jehova utuzi biyeni, tatweelede kukataazikana pe katuyeeya kuti ubikkila maanu kukupambanisya kwesu. Nkamboonzi? Yeeya kuti Jehova ulaandaba andiswe. Tabulubi pe buntu bubotu umwi awumwi mbwalaabo bupa kuti tuyandikane kuli nguwe. Jehova ulazibona zintu zyakatuchitikila mubuumi zipa kuti tube mbuli mbutubede. Kuziba eezi kulatuumbulizya. Tatweelede kubonaanga tuli atulikke pe. Buzuba abuzuba Jehova nga ulaandiswe kayanda kutugwasya.—2 Mak. 16:9.

15. Bubuke butondeezya biyeni kuti Jehova ulaabusongo?

¹⁵ Bantu biingi balakuyoowa kufwa. Nkinkaako bantu beendelezegwa aSaatani bayoosezya bamwi bantu kuti balabajeya chiindi nibayanda kuti baambe naakuti bachite chimwi chintu. Pesi swe tatuyoowi pe  kuti batuyoosezya kuti balatujeya. Nkaambo tulizi kuti nikuba kuti batujeya, Jehova uzootubusya. (Ciy. 2:10) Tuli achoonzyo chakuti takwe chintu nchibakonzya kuchita chikonzya kupa kuti bweenzuma mbutuli aabo aJehova bumane. (Rom. 8:35-39) Kutupa bulangilizi bwabubuke kutondeezya aantanganana kuti Jehova musongo. Eezi zipa kuti tube achibindi akuti nzila Saatani njabelesya kuti atukachizye kubelekela Jehova itabeleki pe kulindiswe.

¹⁶ Njiili mibuzyo njuweelede kulibuzya alubo nsandulo zyako zilakugwasya biyeni kuti ubone kuti ulamusyoma na Jehova?

¹⁶ Kuti bantu bakazya Jehova bakuyoosezya kuti bayanda kukujeya, kujana walipeda na kufwa? Nga ulaziba biyeni kuti ulakonzya kulipeda? Chimwi chikonzya kukugwasya nkulibuzya kuti, ‘Zintu zyoonse nzindisala buzuba abuzuba zitondeezya kuti ndilamusyoma na Jehova?’ (Lk. 16:10) Alubo ulakonzya kulibuzya kuti, ‘Nzila njindiponaayo itondeezya kuti ndilachisyoma na chisyomezyo chaLeza chakuti uyootupa zintu ziyandikana kuti twabikka Bwaami mubusena bwakusaanguna?’ (Mt. 6:31-33) Kuti wasandula kuti iiyi kumibuzyo eeyi, zitondeezya kuti ulamusyoma Jehova akuti tukooyoowa pe kuti bakuyoosezya kunembo.—Tus. 3:5, 6.

17. (a) Bubuke butondeezya biyeni kuti Jehova ulaamoyo mulamfu? (b) Kujana twatondeezya biyeni kuti tulamulumba Jehova akaambo kakuba amoyo mulamfu?

¹⁷ Jehova wakabikka kale buzuba achiindi natazoonyonyoone nyika eeyi mbi. (Mt. 24:36) Akaambo kakuti ulaamoyo mulamfu uzoolindila kusikila chiindi eecho chikasike. Ulaachiyandisyo chakubusya bantu bafwide pesi takooyoozichita pe kuti kachitanasika chiindi eecho. (Job. 14:14, 15) Ulikulindila kusikila chiindi chakubusya bantu chizoozisike. (Joh. 5:28) Kuli twaambo twiingi tupa kuti tulumbe Jehova akaambo kakuti ulaamoyo mulamfu. Amuyeeye kuti: Akaambo kakuti Jehova ulaamoyo mulamfu, zyakapa kuti bantu biingi kuswaanizya andiswe ‘tukonzye kuchincha.’ (2 Pet. 3:9) Jehova uyanda kuti bantu biingi bajane mweenya wakujana buumi butamani. Atutondeezye kuti tulakubona kuti kuba amoyo mulamfu kwaJehova kulagwasya. Kujana twatondeezya biyeni? Kwiinda mukubeleka changuzu kuyanduula bantu balibambilide “kutambula buumi butamani” akubagwasya kuti bayande Jehova akumubelekela. (Mil. 13:48) Eezi ziyoopa kuti bagwasigwe akaambo kamoyo mulamfu waJehova mbuli mbutwakagwasigwa.

18. Nkamboonzi nitweelede kubatondeezya moyo mulamfu bamwi?

 ¹⁸ Jehova uyooyinkilila kunembo katondeezya moyo mulamfu kusikila nitutazoobe bantu bamaninide kumamanino aaminyaka iili 1 000. Kusikila chikasike chiindi eecho, Jehova uyoozumanana kutulekelela. Nkinkaako andiswe tweelede kutobelezya chikozyano chaJehova kwiinda mukutondeezya bamwi moyo mulamfu. Atubone chikozyano chawumwi muchizi ulaamulumi wakali apenzi lyakukataazikana mumizeezo zyakuti wakazooleka kunjila miswaangano yambungano. Wakati: “Eezi zyakandichisa loko.” Wakayungizya kuti, “Zintu nzitwakabambide kuti tuchite mumpuli yesu teetwakazoozichita pe.” Pesi muchiindi choonse eechi mwanakazi ooyu wakamutondeezya moyo mulamfu mulumaakwe. Wakazumanana kusyoma Jehova alubo taakamana manguzu. Mbuli Jehova, taakabikkila maanu kuzintu mulumaakwe nzyaakali kukachilwa kuchita pesi wakabikkila maanu kuzintu zibotu nzyaakali kuchita. Muchizi ooyu wakati: “Mulumaangu ulaabuntu bubotu alubo ulikubeleka changuzu kuti abe kabotu mbichaani-mbichaani.” Kulayandikana kuti tubatondeezye moyo mulamfu bamumpuli naakuti bamumbungano balikulwana abuyumu-yumu busiyene-siyene.

19. Tweelede kukanza kuchitaanzi?

¹⁹ Jesu abangelo bakabotelwa chiindi nyika niyakalengwa. Pesi yeeya mbubayoobotelwa nibayoobona nyika kiizwide bantu bamaninide, bayanda Jehova abamubelekela. Yeeyela mbubayoobotelwa aabo batazooyinke kujulu kuti bakeendelezye aKristu nibayoobona bantu banooli aanyika kabali kugwasigwa aBwaami bwaLeza. (Ciy. 4:4, 9-11; 5:9, 10) Alubo yeeyela buumi mbubunoobede kakutachikwe kulila, kuchiswa, kukataazikana alufu. (Ciy. 21:4) Kusika aachiindi eecho, atutobelezye chikozyano chaTaateesu ulaaluyando, busongo amoyo mulamfu. Kuti twachita oobo, ziyoopa kuti tuzumanane kubotelwa nikuba katuswaanana amapenzi. (Jak. 1:2-4) Tulachilumba kaka chisyomezyo chaJehova chakuti “kuyooba bubuke”!—Mil. 24:15.