1. Tuli achilongezyo chanzi?

KUBA mumbungano yaJehova nchilongezyo chipati. Tuli muparadayizi yamubukombi iilaabantu bali aluumuno ababotelwa. Nguuli mulimu ngulaawo mumbungano?

2. Mwaapostolo Pawulu wakali kubelesya-belesya chikozyano chili mumagwalo ngaakazulwidwa kulemba?

² Tulakonzya kwiiya zyiingi atala amulimu ngutulaawo mumbungano kwiinda mukulanga chikozyano nchaakali kubelesya-belesya mwaapostolo Pawulu mumagwalo ngaakazulwidwa kulemba. Mumagwalo aayo, Pawulu wakakozyanisya mbungano amubili wamuntu. Alubo wakakozyanisya bantu bali mumbungano azipanzi zyamubili.—Rom. 12:4-8; 1 Kor. 12:12-27; Ef. 4:16.

3. Muchiiyo eechi tulalanga-langa zyiiyo zili zitatu?

³ Muchiiyo eechi tulalanga-langa zyiiyo zitatu ziyandikana nzitujana kuzwa kuchikozyano chakalembwa aPawulu. Chakusaanguna, tulayiya kuti umwi awumwi ulaamulimu * ngwachita mumbungano yaJehova. Chachibili, tulalanga-langa kuti niinzi nzitweelede kuchita kuti katubonaanga takwe mulimu ngutuchita mumbungano? Chachitatu, tulabona kuti nkamboonzi nitweelede kukkala katujisikini mukuzuzikizya mulimu ngutulaawo mumbungano?

4. Lugwalo lwa Baroma 12:4, 5 lutuyiisyaanzi?

⁴ Chiiyo chakusaanguna nchituyiya muchikozyano chakalembwa aPawulu nchakuti, umwi awumwi ulaamulimu uuyandikana ngwachita mumbungano yaJehova. Naakasaanguna chikozyano chakwe, Pawulu wakaamba kuti: “Mbubonya mumubili omwe mbotujisi zizo zinji, pele zizo zyoonse eezyi tazibeleki mulimo omwe, mbubonya buyo aswebo, nokuba kuti tuli banji, tuli mubili omwe muli Kristo, pele toonse tuli zizonyina kuli umwi aumwi.” (Rom. 12:4, 5) Pawulu wakali kwaambaanzi? Wakali kwaamba kuti umwi awumwi ulaamulimu uusiyene awawumwi mumbungano pesi toonse tulayandikana.

5. ‘Nzipegoonzi’ Jehova nzyaakapa mbungano?

⁵ Kuti twamvwa atala abantu bali amulimu mumbungano, nga twayeeya aabo bazulwida mumbungano. (1 Tes. 5:12; Heb. 13:17) Nisimpe, kwiinda muli Kristu, Jehova wakapa mbungano yakwe “zipego mubantu.” (Ef. 4:8) “Zipego mubantu” ziswaanizya Kabunga Keendelezya, bagwasilizi baKabunga Keendelezya, Kkomiti yaMutabi, balangizi bamabazu, bakwesu bayiisya kuzikolo zyambunga, baalu ababelesi babelekela. Bakwesu aaba boonse bakasalwa amuuya uusalala kuti beembele mbelele zyaJehova ziyandikana akuti basimye mbungano.—1 Pet. 5:2, 3.

6. Kweendelana alugwalo lwa 1 Batesalonika 2:6-8, bakwesu bakasalwa amuuya uusalala babeleka changuzu kuti bachiteenzi?

⁶ Muuya uusalala usala bamwi bakwesu kuti bachite milimu iisiyene-siyene. Mbuli zipanzi zyamubili zisiyene-siyene ziswaanizya mawulu amaboko mbuzigwasya mubili woonse, ambabo bakwesu basalwa amuuya uusalala babeleka changuzu kuti bagwasye mbungano. Tabaliyandwiidi bulemu pe. Pesi babeleka changuzu kuti basungwaazye akusimya bakombinyina. (Bala 1 Batesalonika 2:6-8.) Tulamulumba Jehova akaambo kabakwesu aaba basimide mubukombi alubo babikka ziyandwa abamwi mubusena bwakusaanguna.

7. Bantu biingi bali mumulimu wachiindi choonse balikujana zilongezyoonzi?

⁷ Bamwi mumbungano balakonzya kusalwa kuti babe mamishinali, mapayona aayandikana naakuti mapayona aachiindi choonse. Bamwi bakwesu abachizi bamunyika yoonse bakasala kuba mapayona kwabuumi bwabo boonse. Eezi zyakapa kuti bagwasye bantu biingi kuti babe basikwiiya baJesu Kristu. Nikuba kuti bamwi babakwesu aaba tabakwe zintu zyiingi zyakumubili pesi Jehova ulikubalongezya. (Mk. 10:29, 30) Tulabayanda bakwesu abachizi aaba alubo tulabalumba akaambo kamilimu njibachita mumbungano.

8. Nkamboonzi sikupupulula umwi awumwi nayandikana kuli Jehova?

⁸ Bakwesu bazulwida mumbungano amapayona mbabo na abalikke bali amulimu wakuchita mumbungano? Teembubo pe! Sikupupulula umwi awumwi ulayandikana kuli Leza alubo ulaamulimu ngwachita mumbungano. (Rom. 10:15; 1 Kor. 3:6-9) Amwi amakanze aambungano aayandikana loko ngakuchita bantu kuti babe basikwiiya baMwaami wesu Jesu Kristu. (Mt. 28:19, 20; 1 Tim. 2:4) Boonse basikupupulula bali mumbungano, babbabbatizidwe abatanabbabbatizigwa babeleka changuzu kuti babikke mulimu wakukambawuka mubusena bwakusaanguna.—Mt. 24:14.

9. Nkamboonzi nitubabona kabayandikana bachizi bali mumbungano?

⁹ Jehova wakapa bachizi mulimu uuyandikana loko mumbungano. Ulabayanda  banakazi, mamaama, bamukabafu abachizi batakwetwe bamubelekela chakusyomeka. MuBbayibbele muli zikozyano zyiingi zyabanakazi bakabotezya Leza. Baambwa kuti nzikozyano zibotu zyabantu bali abusongo, lusyomo, basungweete, balaachibindi, bapa alubo bachita milimu mibotu. (Lk. 8:2, 3; Mil. 16:14, 15; Rom. 16:3, 6; Flp. 4:3; Heb. 11:11, 31, 35) Tulamulumba Jehova akaambo kabachizi mbitulaabo mumbungano batondeezya buntu oobu bubotu.

10. Nkamboonzi nibayandikana bakwesu abachizi bachembeede?

¹⁰ Kuyungizya waawo, tuli achilongezyo chakuba abakwesu abachizi bachembeede mumbungano. Muli zimwi mbungano muli bakwesu abachizi bachembeede baba achiindi kababelekela Jehova alubo balikuzumanana kumubelekela. Bamwi bakwesu abachizi aaba bachili bapya mukasimpe. Boonse balakonzya kuswaanana aamapenzi aba akaambo kakuchembaala. Mapenzi aaya alakonzya kupa kuti batachiti zyiingi mumbungano amumulimu wakukambawuka. Pesi bakwesu abachizi aaba bachembeede bachita zyoonse nzibakonzya mumulimu wakukambawuka alubo babeleka changuzu kusungwaazya akuyiisya bamwi. Tulagwasigwa akaambo kaluzibo lwabo. Balayandikana kuli Jehova akulindiswe.—Tus. 16:31.

11-12. Bachikula bali mumbungano yanu bakakusungwaazya biyeni?

¹¹ Amuyeeye atala abachikula bali mumbungano. Baswaanana abuyumu-yumu nkaambo balibbizya aabantu beendelezegwa aSaatani Dyabbulosi abasumpula mizeezo yakwe mibi. (1 Joh. 5:19) Pesi toonse tulasungwaazigwa nitubabona kabasandula kumiswaangano, kabazwa mumulimu wakukambawuka anibapandulula nzibasyoma chiindi nibakazigwa. Nisimpe, nibachikula muchita mulimu uuyandikana loko mumbungano yaJehova.—Int. 8:2.

¹² Bamwi bakwesu abachizi babonaanga takwe mulimu ngubachita mumbungano. Niinzi chikonzya kutugwasya kuti tulimvwe katuyandikana mumbungano? Atubone.

13-14. Niinzi chikonzya kupa kuti bamwi babonaanga tabagwasyi pe mumbungano?

¹³ Atulange-lange chiiyo chachibili nchitwiiya kuzwa kuchikozyano chakalembwa aPawulu. Wakaamba atala apenzi ndibalaalyo bantu biingi mazubaano lyakubonaanga tabagwasyi pe mumbungano. Pawulu wakalemba kuti: “Ikuti kuulu kwaamba kuti, ‘Akaambo kakuti tandili janza, mebo tandili cibeela camubili pe,’ aaka kaambo takakonzyi kupa kuti kuulu kutabi cibeela camubili pe. Alimwi ikuti kutwi kwaamba kuti, ‘Akaambo kakuti tandili liso, mebo tandili cibeela camubili pe,’ aaka kaambo takakonzyi kupa kuti kutwi kutabi cibeela camubili pe.” (1 Kor. 12:15, 16) Majwi aPawulu atuyiisyaanzi?

¹⁴ Kuti wakozyanisya nzuchita azichitwa abamwi zipa kuti ukachilwe kubona mulimu uuyandikana nguchita mumbungano. Bamwi mumbungano balakonzya kuba achipo chakuyiisya, chakubamba kabotu zintu achakuumbulizya akusungwaazya bamwi. Amwi iwe ulibona kutakonzyi pe kuchita zintu nzibachita. Eezi zitondeezya kuti ulalibombya akuti ulazumina kuti bamwi kuli nzibakwiinda. (Flp. 2:3) Pesi weelede kunanzelela. Kuti wakkala kulikozyanisya abantu bachita zintu nzutakonzyi pe zilakonzya kupa kuti umane manguzu. Alubo zilakonzya kupa kuti ubonaanga takwe mulimu nguchita pe mumbungano. Niinzi chikonzya kukugwasya kuti uzunde penzi eeli?

15. Kweendelana alugwalo lwa 1 Bakorinto 12:4-11, niinzi nzitweelede kuziba atala azipo nzituli aazyo?

¹⁵ Amuyeeye biyo, Jehova wakapa maKristu bakusaanguna zipo zyamuuya usalala zigambya, pesi taakabapa zipo zifanana pe. (Bala 1 Bakorinto 12:4-11.) Nikuba kuti Jehova wakapa maKristu aaba zipo zisiyene-siyene pesi boonse bakali kuyandikana. Mazubaano tatuchipegwi zipo zyamuuya zigambya pe. Pesi malayilile aaya achibeleka ambuli sunu. Nikuba kuti tuli azipo zisiyene-siyene, toonse tulayandikana kuli Jehova.

16. Ngaali malayilile akalembwa amwaapostolo Pawulu ngitweelede kutobelezya?

 ¹⁶ Muchiindi chakukozyanisya nzituchita azichitwa aabamwi tweelede kutobelezya malayilile akaambwa amwaapostolo Pawulu aakuti: “Umwi aumwi alingule nzyacita lwakwe mwini, mpoonya ulajana kaambo kamupa kukondwa lwakwe mwini, ikutali akaambo kakulyeezyanya amuntu uumbi.”—Gal. 6:4.

17. Kutobelezya malayilile akaambwa aPawulu kutugwasya biyeni?

¹⁷ Kuti twatobelezya malayilile akaambwa amwaapostolo Pawulu akulanga-langa zintu nzituchita tulakonzya kubona kuti kuli zintu nzituchita nzibatakonzyi pe bamwi. Muchikozyano, zilakonzeka kuti mwaalu tapi kabotu pe nkani kumiswaangano pesi uchita kabotu mumulimu wakukambawuka. Alubo kulakonzeka kuti tazibambi kabotu pe zintu mbuli bamwi baalu mumbungano pesi ulaaluyando aluzyalo zyakuti bakwesu abachizi balaangunukide kukumbila lugwasyo kuli nguwe. Alubo kulakonzeka kuti ulaangunukide kutambula beenzu. (Heb. 13:2, 16) Kuti twabona zintu nzitukonzya azipo nzitulaazyo, tulabotelwa nkaambo nga twabona kuti kuli mulimu ngutuchita mumbungano. Eezi zilapa kuti tutabachitili bbivwe bakwesu bali azipo zisiyene azyesu.

18. Niinzi chikonzya kutugwasya kuti tube bayiisi bali kabotu?

¹⁸ Kufumbwa mulimu ngutuchita mumbungano, toonse tweelede kuba achiyandisyo chakuchita zyiingi akubelekela kuba bayiisi bali kabotu. Kuti tuzwidilile, Jehova ulatuyiisya kabelesya mbunga yakwe. Muchikozyano, kumiswaangano yaakati kamviki tujana malayilile atugwasya kuti tuzwidilile mulimu wakukambawuka. Ulikweezya na kubelesya malayilile aaya?

19. Niinzi nzukonzya kuchita kuti weelele kuzoonjila Chikolo chaBakambawusi baBwaami?

¹⁹ Imwi nzila Jehova njatuyiisyaayo nkwiinda mukubelesya Chikolo chaBakambawusi baBwaami. Chikolo eechi chinjilwa abakwesu abachizi bali mumulimu wachiindi choonse alubo bali aminyaka iili 23 kusika ku65. Ulakonzya kubonaanga tuzoofwi wachinjila pe chikolo eechi. Muchiindi chakuyeeya zintu zikonzya kupa kuti ukachilwe kuchinjila, yeeya zintu zipa kuti uyande kuchinjila. Pulana nzukonzya kuchita kuti weelele kuchinjila. Kwiinda mukugwasigwa aaJehova akubeleka changuzu ulakonzya kuzoochinjila nikuba kuti wakali kubonaanga tukoozoochinjila pe.

20. Lugwalo lwa Baroma 12:6-8 lutuyiisyaanzi?

²⁰ Chiiyo chachitatu nchitwiiya kuchikozyano chakaambwa aPawulu chijanika muli Baroma 12:6-8. (Bala.) Mulugwalo oolu Pawulu wakatondeezya lubo kuti maKristu bali azipo zisiyene-siyene. Pesi aawa Pawulu wakatusungwaazya kuti tubelesye zipo nzitulaazyo kuti tusungwaazye akusimya bamwi mumbungano.

21-22. Twiiyaanzi kuchikozyano chaRobert achaFelice?

²¹ Atubone chikozyano chamukwesu ngututaambe kuti Robert. Mukwesu ooyu wakabeleka kwachiindi chilamfu kali mumishinali pesi wakazookumbilwa kuti akabelekele kuBbeteli yakuli mbabo. Nikuba kuti bakwesu bakamubuzya kuti taakachinchwa akaambo kakukachilwa pesi wakaamba kuti: “Ndakakataazikana kwamyeezi myiingi kandiyeeya kuti ndakachinchwa akaambo kakukachilwa. Chimwi chiindi ndakali kuyeeya kuzwa kuBbeteli.” Niinzi chakamugwasya kuti abotelwe lubo? Umwi mwaalu wakamuyeezya kuti luzibo ndutwakajana mumilimu yesu yachiindi lutugwasya kuti twiibeleke kabotu milimu  yesu mipya. Robert wakabona kuti wakeelede kubikkila maanu kuzintu nzyaakali kuchita aachiindi eecho kutali kuzintu nzyaakali kuchita chiindi.

²² Mukwesu Felice Episcopo wakaswaanana apenzi lifanana alyaRobert. Felice amwanakazi wakwe bakagilajuweta kuChikolo chaGiliyadi mu1956 mpawo bakazoobeleka kabali balangizi beendeenda kuBolivia. Mu1964 bakaba amwana. Felice wakati: “Zyakatuchisa kusiya mulimu ngutwakali kuyandisya loko. Zyakanditolela munyaka kandilookulisola. Pesi Jehova wakandigwasya kuti ndichinche maboneno aangu akuti ndizitambule zyakandichitikila.” Kuli nunga walimvwa mbuli Robert naakuti mbuli Felice na? Kuli nunga wamana manguzu na akaambo kakuti tuchichiti mulimu ngwaakali kuchita chiindi mumbungano? Kuti kakuli boobo, kubikkila maanu kuzintu nzulookuchita lino mukubelekela Jehova akugwasya bakombinyokwe kuyoopa kuti ubotelwe. Beleka changuzu kuti ubelesye zipo zyako kugwasya bamwi. Eezi ziyoopa kuti ubotelwe akuti usimye mbungano.

23. Tweelede kuyeeyesesya atalaanzi, alubo tuyooyiyaanzi muchiyo chitobela?

²³ Toonse tulayandikana kuli Jehova. Uyanda kuti tulimvwe katuli mumpuli yakwe. Kuti twalipa chiindi chakuyeeyesesya atala ambutukonzya kusimya bakwesu abachizi mpawo twabeleka changuzu kuti tuzichite, tuyoobona kuti tulayandikana mumbungano. Pesi tubabona biyeni bamwi mumbungano? Nga tulatondeezya biyeni kuti tulabayanda akubalemeka? Muchiiyo chitobela tuzooyiya atala ankani eeyi iiyandikana.