1-2. Kweendelana alugwalo lwa Intembauzyo 34:8, niinzi nzitweelede kuchita kuti tubone bubotu bwaJehova?

ATUTEEDI umwi muntu wakupa chakulya nchutanaba abuzuba wachilya pe. Ulakonzya kuyeeyela mbuchinona kuti wachilanga mbuchibede, wamvwa bweema bwacho, waziba ziswaanizidwe naakuti wabuzya bamwi bakachilya. Pesi kuti uzibe kuti chilanona na choonzyo weelede kuchilabila.

² Ulakonzya kubona bubotu bwaJehova kuti wabala Bbayibbele amabbuku eesu naakuti kumvwa bamwi kabaambuula atala azintu zibotu Jehova nzyaakabachitila. Pesi kuti ulibonene kuti Jehova mubotu weelede ‘kulabila’ bubotu bwakwe. (Bala Intembauzyo 34:8.) Atubone chimwi chikozyano chikonzya kututondeezya mbutukonzya kulabila bubotu bwaJehova. Atuteedi, uyanda kunjila mumulimu wachiindi choonse. Pesi kuti ukonzye kuchita oobo weelede kuubya buumi bwako. Amwi ukkala kubala chisyomezyo chaJesu chakuti, kuti wabikka Bwaami mubusena bwakusaanguna Jehova uyookupa ziyandikana, pesi tunachibona pe chisyomezyo eechi kachili kuzuzikizigwa mubuumi bwako. (Mt. 6:33) Nikuba boobo, akaambo kakuti ulachisyoma chisyomezyo chaJesu ulasaanguna kwiibelesya kabotu mali, kukumbila kubeleka mazuba mache kumulimu akuchita zyiingi mumulimu wakukambawuka. Chiindi nulikuchita oobo, ulabona kuti Jehova taleki pe kukupa zintu ziyandikana. Alubo ‘uyoolabila’ bubotu bwakwe.

3. Kweendelana alugwalo lwa Intembauzyo 16:1, 2, mbaani Jehova mbaapa zilongezyo zyiingi?

³ Jehova “mubotu kuli boonse” kuswaanizya abaabo batamukombi. (Int. 145:9; Mt. 5:45) Pesi ubapa zilongezyo zyiingi aabo bamuyanda alubo bayanda kumubelekela aamoyo woonse. (Bala Intembauzyo 16:1, 2.) Kwalino, atulange-lange zimwi zintu zibotu Jehova nzyaakatuchitila.

4. Jehova ubachitilaanzi bantu basala kuswena aafwiifwi anguwe?

 ⁴ Kubelesya zintu Jehova nzyatuyiisya kulatugwasya mubuumi bwesu. Muchikozyano, chiindi nitwakasaanguna kwiiya atala anguwe twakasaanguna kumuyanda mpawo wakatugwasya kuti tuleke kuyeeya zintu zitali kabotu akuti tuleke kuchita zintu nzyatayandi. (Kol. 1:21) Alubo chiindi nitwakabbabbatizigwa wakatugwasya kuti tutanoolipi mulandu akaambo kazintu zibi nzitwakachita chiindi akuti tube abweenzinyina bulikabotu anguwe.—1 Pet. 3:21.

5. Tububona biyeni bubotu bwaJehova chiindi nituli mumulimu wakukambawuka?

⁵ Chiindi nituli mumulimu wakukambawuka tubona bubotu bwaJehova. Uli muntu ulaabweeme na? Bakombi baJehova biingi mbubabede. Kulakonzeka kuti kutanaba umwi waBakamboni baJehova wakali kubonaanga tuzookonzyi pe kwiinka kung’anda yamuntu ngutazi pe mpawo ukamukambawukile. Pesi lino nzizyo nzukkala kuchita. Alubo Jehova wakakugwasya kuti ukunoneezye mulimu wakukambawuka. Wakabona Jehova mbaakakugwasya munzila zisiyene-siyene. Wakakugwasya kuti ubatame chiindi nwaakaswaana muntu wakali kukukazya mumulimu wakukambawuka. Wakakugwasya kuti uyeeye lugwalo lweendelana achiimo chamwining’anda. Alubo wakakugwasya kuti uzumanane kukambawuka nikuba kuti wakaswaanana aabantu bataswiilili mulumbe ngwaakali kukambawuka.—Jer. 20:7-9.

6. Kutuyiisya nkwachita Jehova kutondeezya biyeni kuti utuchitila zintu zibotu?

⁶ Jehova wakatuchitila zintu zibotu kwiinda mukutuyiisya nzila zyakuyungizya luzibo lwesu mumulimu wakukambawuka. (Joh. 6:45) Kumiswaangano yaakati kamviki nga twabona zikozyano zibotu loko zyakwambuuzyania alubo nga twasungwaazigwa kuti tuzibelesye mumulimu wakukambawuka. Kumasaangunino, tulakonzya kuyoowa kubelesya nzila eezi mpya. Pesi kuti twazibelesya, tulakonzya kubona kuti zibeleka kabotu muchilawu chesu. Alubo kumiswaangano yambungano ayabbooma tusungwaazigwa kuti tubelesye nzila zisiyene-siyene zyakukambawuka nzitutajayide. Eezi zilakonzya kupa kuti tuyoowe lubo pesi kuti tweezya kuzibelesya nzila eezi, Jehova uyootulongezya. Lino atulange-lange zimwi zilongezyo nzitujana kuti tweezya kuyanduula zimwi nzila mpya zyakubelekela Jehova amanguzu eesu woonse kazitakwe ndaba pe azyiimo zyesu. Mpawo tulalanga-langa zintu nzitukonzya kuchita kuti tuchite zyiingi mumulimu wakukambawuka.

7. Nchiichili chilongezyo nchitujana kuti tweezya kuchita zyiingi mumulimu wakukambawuka?

⁷ Ulaswena aafwiifwi loko aJehova. Atubone chikozyano chawumwi mwaalu uutegwa Samuel, * amwanakazi wakwe bakkala kuColombia. Samuel amwanakazi wakwe bakali kupayona kabali mumbungano yabo. Pesi bakali kuyanda kulongela kuliimwi mbungano iiyanda basikupupulula biingi kuchitila kuti bakachite zyiingi mumulimu wakukambawuka. Kuti bachite oobo, bakeelede kulipeda kuti basiye zimwi zintu. Samuel wakaamba kuti: “Twakabelesya lugwalo lwa Matayo 6:33 alubo twakaleka kuula zintu zitayandikani. Pesi chintu chakali kutuyumina loko nkusiya ng’anda yesu. Twakali kwiiyanda alubo teetwakalikwe chikwelete pe chang’anda eeyo.” Nibakalongela kumbungano mpya bakali baabubelesya mali nche kwiinda njibakali kubelesya. Samuel wakaamba kuti: “Twakabona Jehova mbaakali kutuzulwida ambaakasandula nkombyo zyesu. Tuli aachoonzyo chakuti ulikubotelwa anzituchita alubo tulikubona kuti ulatuyanda kwiinda mbutwakali kuyeeya chiindi.”  Kuti walipeda kuchita zyiingi mumulimu wakukambawuka uyoobona kuti Jehova uyookupa zintu ziyandikana mubuumi alubo uyooswena aafwiifwi anguwe.—Int. 18:25.

8. Wayiyaanzi kuzwa kuli zyakaambwa aIvan aViktoria?

⁸ Kubelekela Jehova kuyoopa kuti ubotelwe. Atumvwe zyakaambwa aIvan amwanakazi wakwe Viktoria babeleka kabali mapayona kuKyrgyzstan. Bakali kupona aazintu ziche kuchitila kuti bakonzye kuchita kufumbwa mulimu ngubapegwa kuswaanizya amulimu wakuyaka. Ivan wakaamba kuti: “Twakali kubeleka changuzu mumilimu yoonse njitwakali kupegwa. Nitwakali kuchayizya twakali kumvwa kuti twazakala biya pesi twakali kubotelwa nkaambo twakalizi kuti tulikubelesya manguzu eesu kuti tubelekele Jehova. Alubo tulikubotelwa loko nkaambo twakajana beenzuma alubo tuli aazintu zyiingi zibotu zyakachitika mubuumi bwesu.”—Mk. 10:29, 30.

9. Niinzi nzyaakachita umwi muchizi kuchitila kuti achite zyiingi mumulimu wakukambawuka nikuba kuti ulachiswa alubo zyakeeta mpinduunzi?

⁹ Tulakonzya kubotelwa mumulimu waJehova nikuba kuti tuswaanana aazyiimo zikataazya. Muchikozyano, muchizi wakafwidwa amulumi uutegwa Mirreh uukkala kuWest Africa wakasaanguna kupayona chiindi naakayimikila kubeleka kali dokotela akaambo kakuti wakali wachembaala. Mirreh takonzyi pe kweenda kwachiindi chilamfu akaambo kakuti uchiswa bulwazi bwamajoyini zyakuti ukonzya kukambawuka aang’anda ang’anda kwa-awa iimwi biyo. Pesi umaninsya chiindi chiingi mubukambawusi bwaantanganana. Uli aabantu biingi bakubweedela azyiiyo zyaBbayibbele alubo bamwi wiiyaabo kabelesya fooni. Niinzi chakapa kuti ayande kuchita zyiingi mumulimu waJehova? Wakaamba kuti: “Ndilamuyanda Jehova aJesu Kristu. Alubo ndikkala kandikomba kuli Jehova kuchitila kuti andigwasye kuti ndichite zyiingi mumulimu wakwe.”—Mt. 22:36, 37.

10. Kweendelana alugwalo lwa 1 Petro 5:10, niinzi nzibajana bantu balipeda kuchita zyiingi mumulimu waJehova?

¹⁰ Jehova ulakuyiisya zimwi zintu zisiyene-siyene. Umwi payona uutegwa Kenny uubeleka kuMauritius wakabona kuti eezi nzyachoonzyo. Chiindi naakayiya kasimpe wakasiya yunivesiti, mpawo wakabbabbatizigwa akuba payona wachiindi choonse. Wakaamba kuti: “Ndileezya kuba mbuli mupolofita Isaya wakaamba kuti: ‘Ndime aano! Kondituma!’” (Is. 6:8) Kenny wakabeleka mumulimu wakuyaka kwaziindi zyiingi alubo wakagwasilizya mumulimu wakusandulula mabbuku eesu mumulaka wakwe. Kenny wakayungizya kati: “Ndakajana lwiiyo lwakandigwasya kuchita milimu eeyi.” Pesi taakajana luzibo lwakuchita milimu eeyi luzutu. Wakazoomaninsya kati: “Ndakayiya kuti kuli zimwi zintu nzinditakonzyi alubo ndakayiya kuti kuli buntu mbundeelede kubelekela kuba aabo kuchitila kuti ndibe mukombi waJehova ulikabotu.” (Bala 1 Petro 5:10.) Anduwe ulakonzya kulipeda kuchita zyiingi mumulimu waJehova kuchitila kuti akuyiisye zimwi zintu zyiingi.

11. Niinzi nzibakachita bachizi bakuSouth Korea kuti bakonzye kukambawuka alubo zyakeeta mpinduunzi? (Langa chifanikisyo chili achivumbyo.)

¹¹ Bakombi baJehova baba aachiindi chilamfu kabali mukasimpe ambabo beelede kwiiya nzila mpya zyakukambawuka. Chiindi nikwakaba Corona, baalu bayimwi mbungano kuSouth Korea bakalemba kuti: “Bamwi bakali kubonaanga tabachikonzyi pe kutola lubazu mumulimu wakukambawuka akaambo kakuchiswa lino baabukambawuka kababelesya mafooni naakuti makkompiyuta (videoconferencing). Bachizi batatu bali aaminyaka iili kuma80 bakayiya nzila eeyi mpya yakukambawuka alubo baabukambawuka kwamazuba miingi.” (Int. 92:14, 15) Ulayanda na kuchita zyiingi mumulimu waJehova kuchitila ubone zintu zyiingi zibotu nzyaatakuchitile? Atubone zimwi zintu nzukonzya kuchita kuchitila kuti uchite zyiingi mumulimu waJehova.

12. Jehova ubasyomezyaanzi bantu bamusyoma?

¹² Syoma Jehova. Jehova utusyomezya kutuchitila zintu zyiingi zibotu kuti twamusyoma akuti twamubelekela amanguzu eesu woonse. (Malk. 3:10) Muchizi uutegwa Fabiola wakuColombia wakabona Jehova mbaakazuzikizya chisyomezyo eechi mubuumi bwakwe. Wakali kuyanda kuba payona wachiindi choonse naazwa kubbabbatizigwa. Pesi nguwe wakali kugwasya mulumaakwe abana bakwe batatu kuti bajane ziyandikana. Chiindi naakali kuyanda kubweza pencheni wakakombelezya Jehova kuti amugwasye. Wakaamba kuti: “Chiindi chiingi mali yapencheni nga yanonoka kuzwa pesi yangu yakazwa kakuli kwayinda mweezi kuzwa nindakayi-apulayila. Zyakandigambya loko.” Nikwakayinda myeezi iibili, muchizi Fabiola wakasaanguna kupayona. Lino ulaaminyaka iili kuma70 alubo waba aaminyaka yiinda ku20 kali kupayona. Muchizi ooyu wakagwasya bantu bali 8 kuti babbabbatizigwe. Wakaamba kuti: “Chimwi chiindi nga tandikwe nguzu pesi Jehova ulikundigwasya buzuba abuzuba kuti ndizumanane kupayona.”

13-14. Nziizili zikozyano zikonzya kutugwasya kuti tusyome Jehova akuti tuchite zyiingi mumulimu wakwe?

¹³ Yiya kuzwa kuzikozyano zyabantu bakasyoma Jehova. MuBbayibbele muli zikozyano zyiingi zyabantu bakalipeda kubelekela Jehova amanguzu aabo woonse. Chiindi chiingi bantu aabo bakali kuchita chimwi chintu chakali kutondeezya kuti balamusyoma Jehova mpawo naakazoobalongezya. Muchikozyano, Abrahamu wakasiya muunzi wakulimbabo “nokuba kuti tanaakazyi nkwaakali kuunka,” mpawo Jehova wakazoomulongezya. (Heb. 11:8) Jakkobo  wakayimikizyania amungelo kusikila wamulongezya. (Matl. 32:24-30) Chiindi maIsrayeli nibakali baba aafwiifwi kunjila Munyika Yakasyomezegwa, bapayizi nibakalyata biyo mumulonga waJordani, maanzi akayimikila mpawo bantu boonse bakasaanguna kuzubuka.—Jos. 3:14-16.

¹⁴ Ulakonzya kwiiya kuzwa kuzikozyano zyabakombi baJehova bamazubaano bakasyoma muli nguwe abakalipeda kuti bachite zyiingi mumulimu wakwe. Muchikozyano, Payton amwanakazi wakwe Diana bakabala atala azikozyano zyabakwesu abachizi bakalipeda kuchita zyiingi mumulimu waJehova. Zimwi zikozyano zijanika muzyiiyo zitegwa “Bakalipeda Amoyo Woonse.” * Payton wakaamba kuti: “Chiindi nitwakali kubala zikozyano eezi, kwakali mbuli kuti twakali kulangilizya muntu ulikulya chakulya chinono loko. Kukkala katubala zikozyano eezi kwakapa kuti andiswe tuyande ‘kulabila akubona kuti Jehova mubotu.’” Mukuya kwachiindi Payton aDiana bakazooyinka kubusena buyanda basikupupulula biingi. Kuli nwaakali wazibala na zikozyano eezi naakuti kweebela vidiyo iiti Witnessing in Isolated Territory—Australia ayiti Witnessing in Isolated Territory—Ireland aajanika aajw.org? Zintu zyoonse eezi zilakonzya kukugwasya kuti uchite zyiingi mumulimu waJehova.

15. Kumvwanana abantu babikka Leza mubusena bwakusaanguna kutugwasya biyeni?

¹⁵ Mvwanana aabantu babikka Jehova mubusena bwakusaanguna. Nkuuba kuti tulye chakulya nchitutanaba abuzuba twachilya kuti twakkala katuliswaanizya abantu bachiyanda loko. Munzila iikozyenie, kuti twakkala katuliswaanizya aabantu babikka Jehova mubusena bwakusaanguna, ziyootugwasya kuti andiswe tuyande kuchita zyiingi mumulimu waJehova. Eezi nzizyo zyakachitika kumukwesu uutegwa Kent amwanakazi wakwe Veronica. Kent wakaamba kuti: “Beenzuma abamumpuli bakali kutusungwaazya kuti tweezye nzila mpya zisiyene-siyene zyakuchita zyiingi mumulimu waJehova. Twakabona kuti kumvwanana aabantu bakali kubikka Bwaami mubusena bwakusaanguna kwakapa kuti tweezye nzila mpya zyakuyungizya mulimu wesu.” Lino Kent aVeronica balikubeleka kabali mapayona aayandikana kuSerbia.

16. Kweendelana achikozyano chaJesu chili muli Luka 12:16-21, nkamboonzi nitweelede kulipeda kusiya zimwi zintu kuti tubelekele Jehova?

¹⁶ Lipede kusiya zimwi zintu. Kulipeda kusiya zimwi zintu kuti tubelekele Jehova tazyaambi kuti tweelede kusiya zintu zyoonse nzituyanda. (Muk. 5:19, 20) Pesi kuti twakachilwa kuchita zyiingi mumulimu waJehova akaambo kakuti tatuyandi pe kusiya chimwi chintu nchituyandisya, tulaba mbuli mwaalumi wakaambwa muchikozyano chaJesu wakabeleka changuzu kuti ajane zintu zyiingi pesi taakwe naakabikkila maanu kukukomba Leza. (Bala Luka 12:16-21.) Mukwesu uutegwa Christian uukkala kuFrance wakaamba kuti: “Teendakali kujana chiindi chiingi chakuba aamwi ampuli yangu alubo teendakali kubelekela Jehova amanguzu aangu woonse.” Christian amwanakazi wakwe bakazoosala kuti bapayone. Pesi kuti bachite oobo, bakeelede kusiya milimu yabo. Kuti bajane ziyandikana bakasaanguna kabbizinesi kazyakukkilina alubo bakayiya kukkutisikana akupona aazintu ziche. Nzibakachita zyakabagwasya na? Christian wakaamba kuti: “Lino tulikubotelwa amulimu wakukambawuka. Alubo kulatubotezya kugwasya bantu mbitwiiyaabo Bbayibbele ambitubweedela kuti bayiye atala aJehova.”

17. Niinzi zikonzya kutukachizya kuti tubelesye nzila mpya zyakukambawuka?

¹⁷ Lipede kubelesya nzila mpya zyakukambawuka. (Mil. 17:​16, 17; 20:​20, 21) Chiindi nikwakasaanguna bulwazi bwaCorona, umwi payona wakuUnited States uutegwa Shirley wakeelede kuchincha nzila yakwe yakukambawuka. Kumasaangunino, wakali kubonaanga takonzyi pe kukambawuka kabelesya fooni. Naakayiisigwa kubelesya nzila eeyi nibakaswayigwa aamulangizi wabbazu wakazoosaanguna kwiibelesya chiindi choonse. Shirley wakaamba kuti: “Kumasaangunino, ndakali kuyoowa pesi lino kukambawuka kandilikubelesya fooni kwabundinoneezya. Tulikukambawukila bantu biingi loko kwiinda chiindi nitwakali kukambawuka aang’anda ang’anda.”

18. Niinzi chikonzya kutugwasya kuti twaswaanana aabuyumu-yumu bukonzya kutukachizya kuti tuchite zyiingi mumulimu wakukambawuka?

 ¹⁸ Sala nzuyanda kuzoochita mpawo uzoozizuzikizye. Kuti waswaana limwi penzi ulakomba kuli Jehova kumukumbila kuti akugwasye kuti uzibe nzukonzya kuchita kuti usale kabotu. (Tus. 3:21) Umwi payona wachiindi choonse uutegwa Sonia uunjila akabunga kaambuula mulaka wachiRomany kuEurope wakaamba kuti: “Nga ndalemba nzindiyanda kuchita aapepa mpawo nga ndalibikka mpundikonzya kulibona chiindi choonse. Alubo aatebbulu lyangu ndili aachifanikisyo chili aamigwagwa iibili iya kumabazu asiyene. Chiindi nindiyanda kuchita chimwi chintu nga ndalanga aamigwagwa eeyi iibili mpawo ndayeeyesesya kuti nzinditasale ziyoopa kuti ndizuzikizye nzindiyanda kuchita na naakuti pe.” Sonia uleezya kukkala kali aamaboneno aalikabotu atala amapenzi ngaswaana. Wakaamba kuti: “Ndakalibuzya kuti mapenzi ngindiswaana ndaabone mbuli muduli na undikachizya kuti ndizuzikizye nzindiyanda kuchita naakuti ndeelede kwaabona mbuli bbilichi lindigwasya kuti ndizuzikizye nzindiyanda kuchita.”

19. Kujana twatondeezya biyeni kuti tulazilumba zintu zibotu Jehova nzyaakatuchitila?

¹⁹ Jehova utupa zintu zyiingi zibotu. Tulakonzya kutondeezya kuti tulazilumba kwiinda mukuchita zintu nzitukonzya kuti tumutembawule. (Heb. 13:15) Eezi ziswaanizya kuchita zintu zisiyene-siyene kuchitila kuti tuchite zyiingi mumulimu waJehova. Kuti twachita oobo, Jehova uyootuchitila zimwi zintu zyiingi zibotu. Buzuba abuzuba atuchite zintu zitape kuti ‘tulabile alubo tubone kuti Jehova mubotu.’ Kuti twachita oobo, tulakonzya kwaamba majwi aakaambwa aaJesu aakuti: “Cakulya cangu nkucita kuyanda kwayooyo wakandituma alimwi akumanizya mulimo wakwe.”—Joh. 4:34.