CHIIYO 33
Jehova Ulabalanga Bantu Bakwe
“Liso lya Jehova lilangide baabo bamuyoowa.”—INT. 33:18
LWIIMBO 4 “Jehova Mweembezi Wangu”
ZITAYIIGWE *
1. Nkamboonzi Jesu naakakumbila Jehova kuti alange batobeli bakwe?
MUBUSIKU katanafwa, Jesu wakakumbila Wisi wakujulu Jehova kuti alange batobeli bakwe. (Joh. 17:15, 20) Kuzwa chiindi, Jehova wakali kubakwabilila akubalangania batobeli bakwe. Nikuba oobo, Jesu wakakumbila Wisi kuti alanganie batobeli bakwe nkaambo wakalizi kuti bakali kuzoopenzegwa munzila njumu. Jesu wakalizi kuti batobeli bakwe bakeelede kugwasigwa aaJehova kuti bazunde masunko aazwa kuli Dyabbulosi.
2. Kweendelana alugwalo lwa Intembauzyo 33:18-20, nkamboonzi nituteelede kuyoowa mapenzi?
2 Mazubaano, nyika yaSaatani ilikupa kuti buumi bubayumine maKkristu bachoonzyo. Tuswaana mapenzi aatumana manguzu alubo aakonzya kupa kuti tuleke kusyomeka kuli Jehova. Nikuba oobo, mbuli mbututabone muchiiyo eechi, taakwe nchitweelede kuyoowa pe! Jehova ulitulangide, ulaabona mapenzi ngituswaana alubo ulilibambilide kutugwasya. Lino atulange-lange zikozyano zibili zyamuBbayibbili zitondeezya kuti, “liso lya Jehova lilangide baabo bamuyoowa.”—Bala Intembauzyo 33:18-20.
NUBONAANGA ULI AAWULIKKE
3. Niinzi zikonzya kupa kuti tubonaanga tuli aatulikke?
3 Nikuba kuti uli aakati kampuli mpati yabakombi baJehova, chimwi chiindi ulakonzya kubonaanga uli aawulikke. Muchikozyano, bachikula balakonzya kubonaanga bali aabalikke chiindi nibapandulula nzibasyoma kunembo lyabasichikolonyina naakuti chiindi nibalongela kuliimwi mbungano. Bamwi besu kweelede tulikulwana aamizeezo iitali kabotu chuumunizi, katuli kuyoowa kubuzya bamwi nkaambo tubonaanga tabakootumvwisisisya pe. Chimwi chiindi, tulakonzya kubonaanga taakwe muntu ulaandaba andiswe. Kwaamba choonzyo, kufumbwa kaambo kapa kuti tubonaanga tuli aatulikke, kalakonzya kutumana manguzu. Jehova tayandi pe kuti tulimvwe munzila iili boobu. Nkamboonzi?
4. Nkamboonzi mupolofita Elija naakaamba kuti: “Ndasyaala buyo endikke”?
4 Atuyeeye chikozyano chamwaalumi uusyomeka uutegwa Elija. Elija wakali waba aamazuba aayinda ku40 kalikuchija Jezebbeli nkaambo wakali wakonkezya kumujaya. (1 Bam. 19: 1-9) Elija naakasika mumpako, wakalila kuli Jehova kati: “Ndasyaala buyo endikke.” (1 Bam. 19:10) Pesi kwakachili bamwi bapolofita. Obbadiya wakali wakwabilila bapolofita bali 100 kuti batajayigwi aJezebbeli. (1 Bam. 18:7, 13) Ani mpo nkamboonzi Elija naakabonaanga wakali aalikke? Elija wakali kuyeeya kuti bapolofita boonse bakali bafutulwa aaObbadiya bakali bajayigwa na? Wakalibona kuba aalikke na akaambo kakuti bantu teebakaliswaanizya aanguwe kuti bakombe Jehova, chiindi naakalitondeezya kuti nguLeza wakasimpe kuchilundu chaKkameli? Wakali kubonaanga taakwe muntu uuzi mapenzi ngaakalikuswaana na? Wakali kubonaanga taakwe muntu wakali aandaba anguwe na? Bbayibbili talyaambi pe kuti niinzi chakapa kuti Elija alimvwe oobo. Nikuba oobo, iswe nchituzi nchakuti Jehova wakali kumvwisisisya chakali kupa kuti Elija alimvwe kali aalikke alubo wakazi kabotu mbaakali kuyoomugwasya.
Kugwasya Elija nkwaakachita Jehova, nga kulatugwasya biyeni chiindi nitubonaanga tuli aatulikke? (Langa fuka 5-6)
5. Jehova wakachitaanzi kuti agwasye Elija kuti atabonaanga wakali aalikke?
5 Jehova wakagwasya Elija munzila zyiingi. Wakasungwaazya Elija kuti aambuule. Kwaziindi zibili, wakabuzya Elija kuti: “Ino ucita nzi okuno?” (1 Bam. 19:9, 13) Jehova wakali kuswiilila chiindi Elija naakali kwaamba zyakali kumukataazya mumoyo wakwe. Mpawo Jehova wakamusandula kwiinda mukumutondeezya kuti wakali aanguwe akuti wakali aamanguzu. Alubo wakabuzya Elija kuti wakachili aabamwi bakombinyina biingi. (1 Bam. 19:11, 12, 18) Zilaantanganana kuti Elija wakatulwa chibbudu chilema, chiindi naakabuzya Jehova zyakali kumukataazya anaakamvwa Jehova kali kumusandula nkombyo yakwe. Jehova wakapa Elija milimu iiyandikana. Wakamubuzya kuti akananike Hazayeli kuti abe mwaami waSiriya, Jehu kuti abe mwaami wa-Israyeli, a-Elisha kuti abe mupolofita.(1 Bam. 19:15, 16) Kwiinda mukumupa milimu eeyi, Jehova wakali kuyanda kugwasya Elija kuti abikkile maanu kuzintu zibotu. Leza wakamupa mweenzinyina wakweendaawe, Elisha. Niinzi nzitukonzya kuchita kuti Jehova atugwasye chiindi nitubonaanga tuli aatulikke?
6. Niinzi nzitukonzya kukombela chiindi nitubonaanga tuli aatulikke? (Intembauzyo 62:8)
6 Jehova uyanda kuti ukombe kulinguwe. Ulaabona mapenzi ngulikuswaana, alubo usyomezya kuti uyookumvwa nukomba kulinguwe. (1 Tes. 5:17) Leza ulaachiyandisyo chakuswiilila bakombi bakwe. Niinzi nzukonzya kukombela kuti wabona mbuli kuti uli aawulikke? Buzya Jehova zintu zili mumoyo wako mbuli mbaakachita Elija. (Bala Intembauzyo 62:8.) Mubuzye zintu zilikukukataazya akuti zilikupa kuti umvwe biyeni. Kumbila Jehova kuti akugwasye kuti ubone nzweelede kuchita chiindi nuli muchiimo chili oobo. Muchikozyano, kuti kuchikolo kubonaanga uli aawulikke alubo kuyoowa kukambawuka, kumbila Jehova kuti akupe chibindi chakuti waambuule kuwangunukide abusongo bwakuti upandulule zintu nzusyoma chabupampu. (Lk. 21:14, 15) Kuti kulaazimwi zintu zikukataazya, kumbila Jehova kuti akugwasye kwaambuula aawumwi muKkristu uusimide mubukombi. Ulakonzya kubuzya Jehova kuti agwasye muntu ooyo ngulikubuzya nsiswa yako kuti akumvwisisisye. Buzya Jehova zintu zyoonse zili mumoyo wako, ubone mbatasandule nkombyo zyako alubo uzumine kugwasigwa aabamwi. Kuti wachita oobo, tukaliboni kawuli aawulikke pe.
Kulizimwi na nzukonzya kuchita kuti uyungizye mulimu wako wakukambawuka? (Langa fuka 7)
7. Wayiyaanzi kuzwa kuli Mauricio?
7 Toonse twakapegwa mulimu uuyandikana aJehova ngutweelede kuchita. Jehova ulazibona zyoonse nzituchita mumbungano amumulimu wakukambawuka. (Int. 110:3) Kuba aazyiingi zyakuchita mumulimu ooyu uuyandikana kujana kwatugwasya biyeni kuti tutabonaanga tuli aatulikke? Amuyeeye chikozyano chamukwesu uuchikula uutegwa Mauricio. * Naakazwa aakubbabbatizigwa, mweenzinyina ngwaakali kumvwananaawe loko wakasaanguna kusiya kasimpe mbichaani-mbichaani. Mauricio wakaamba kuti, “Nindakamubona kali kusiya kasimpe ndakayoowa loko. Ndakali kulibuzya kuti, ‘Ndiyookonzya na kupona kweendelana akulipeda nkundakachita akuti ndikkale kandili mumbunga yaJehova?’ Ndakalibona kandili aandilikke alubo ndakali kuyeeya kuti taakwe wakali kukonzya kundimvwisisisya.” Niinzi chakagwasya Mauricio? Mauricio wakayinkilila kunembo kwaamba kuti, “Ndakaba aazyiingi zyakuchita mumulimu wakukambawuka, eezi zyakandigwasya kuti nditabikkili maanu kuzintu zyakali kukonzya kundimana manguzu. Ndakasaanguna kubotelwa akutalibona kandili aandilikke chiindi nindakali kubeleka aabamwi mumulimu wakukambawuka.” Nikuba kuti tatuchikonzyi kuzwa aamwi abamwi mumulimu wakukambawuka mbuli mbutwakali kuchita chiindi, pesi kutola lubazu mumulimu ooyu kwiinda mukuchita bukambawusi bwakulemba magwalo akufoona, kulakonzya kutusimya. Nchiichili chimwi chintu chakagwasya Mauricio? Mauricio wakaamba kuti, “Nga ndaba aazyiingi zyakuchita mumbungano. Zipanzi nzindipegwa kumiswaangano, nga ndalibambila akuzipa amoyo wangu woonse. Eezi zindigwasya kubona kuti Jehova abakombima balandiyanda.”
NITULI MUMAPENZI MAYUMU CHWA
8. Niinzi zikonzya kuchitika kuti twaswaana mapenzi?
8 Kumazubaano aakumamanino, tulangilila kuswaana mapenzi. (2 Tim. 3:1) Nikuba oobo, mapenzi ngitutayeeyeli alakonzya kutusikila katulyiibide. Mukulaba kwaliso, tulakonzya kuba aapenzi lyamali, kujatwa bulwazi bubi akufwidwa. Aachiindi chiliboobu, tulakonzya kukataazikana akumana manguzu, kapati kuti mapenzi aayo azabutobelana naakuti aaza aachiindi chimwi. Nikuba oobo, tweelede kuyeeya kuti Jehova ulitulangide. Uyootugwasya kuti tube aachibindi chakulisimya.
9. Amba amwi mapenzi ngaakaswaana Jobu.
9 Amuyeeye Jehova mbaakagwasya mwaalumi uusyomeka Jobu. Jobu wakaswaana mapenzi mayumu chwa muchiindi chifwiifwi biyo. Mubuzuba bumwi, wakamvwa atala azintu zibi ziyoosya zyakanyonyoona lubono lwakwe, babelesi bakwe kuswaanizya abana bakwe. (Job. 1:13-19) Muchiindi chifwiifwi biyo chakatobela, Jobu kachilila mapenzi ngaakalangenaawo, wakachiswa bulwazi bubi bwakali kumumana mubili. (Job. 2:7) Chiimo chakwe chakali chibi loko zyakuti wakaamba kuti: “Buumi bwandicima; tandiyandi kuzumanana kupona.”—Job. 7:16.
Jehova wakagwasya Jobu kuti abone kuti wakali kumuyanda kwiinda mukumubuzya atala ambaazibamba zilenge zyakwe munzila yaluyando (Langa fuka 10)
10. Jehova wakamugwasya biyeni Jobu kuti alisimye mumapenzi? (Langa chifanikisyo chili aachivumbyo)
10 Jehova wakalilangide. Wakagwasya Jobu kuti alisimye kumapenzi woonse, nkaambo wakali kumuyanda. Jehova wakayeezya Jobu atala abusongo bwakwe butamani ambazibamba zilenge zyakwe munzila yaluyando. Alubo wakaambuula atala abanyama biingi bagambya. (Job. 38:1, 2; 39:9, 13, 19, 27; 40:15; 41:1, 2) Jehova wakabelesya mwaalumi uusyomeka uutegwa Elihu kuti asimye Jobu akumusungwaazya. Elihu wakabuzya Jobu kuti, Jehova taleki pe kubapa bulumbu babelesi bakwe basyomeka. Nikuba oobo, Jehova wakapa kuti Elihu ape Jobu lulayo munzila yaluyando. Elihu wakagwasya Jobu kuti ataliyeeyi loko kwiinda nzyakeelede kuchita nkaambo wakali muniini loko kuti weelanisigwa aaJehova, Mulengi wazintu zyoonse. (Job. 37:14) Jehova wakapa Jobu mulimu wakuchita, wakeelede kukombela beenzinyina batatu bakali babisya. (Job. 42:8-10) Ani mazubaano, Jehova utugwasya biyeni kuti twasikilwa mapenzi?
11. Bbayibbili nga lilatuumbulizya biyeni muchiindi chamapenzi?
11 Jehova taambuuli aandiswe mulomo mpande mbuli mbaakachita kuli Jobu, pesi waambuula aandiswe kabelesya Jwi lyakwe Bbayibbili. (Rom. 15:4) Ulatuumbulizya kwiinda mukutupa bulangilizi bwakuti zintu ziyoobota. Amuyeeye biyo majwi aakonzya kutuumbulizya chiindi nituli mumapenzi. Mumagwalo, Jehova utusyomezya kuti, taakwe chimwi chintu naakuti mapenzi mayumu chwa, aakonzya “kutwaanzaania kuluyando lwaLeza.” (Rom. 8:38, 39) Alubo waamba kuti, “ulaafwaafwi abaabo boonse bamwiita” munkombyo. (Int. 145:18) Jehova utubuzya kuti, do twasyoma nguwe, tulakonzya kulisimya mumapenzi woonse ngituswaana alubo tulakonzya kubotelwa chiindi nituli mumapenzi. (1 Kor. 10:13; Jak. 1:2, 12) Jwi lyaLeza lituyeezya kuti mapenzi eesu ngachiindi chifwiifwi biyo kuti twaayeezyanisya aazilongezyo zitamani nzyayootupa kunembo. (2 Kor. 4:16-18) Jehova utusyomezya kuti uyoobanyonyoona aabo boonse bapa kuti tuswaane mapenzi, nkukwaamba Saatani Dyabbulosi abaabo boonse bamutobelezya. (Int. 37:10) Kuli magwalo ngwaakajata aamutwe na, atazookugwasye waakuswaana mapenzi kunembo?
12. Jehova uyanda kuti tuchiteenzi kuti Jwi lyakwe litugwasye munzila iizwide?
12 Jehova uyanda kuti tujane chiindi chakuti tubale, tuyanduulisisye akuti tuyeeyesesye atala azintu nzituli kwiiya. Kuti twabelesya zintu nzituli kwiiya, lusyomo lwesu luyoosima alubo tuyooswena aafwiifwi aTaateesu uulikujulu. Kuti twachita zintu zyoonse eezi, tuyookonzya kulisimya kumapenzi woonse ngituswaana. Mukuyungizya, Jehova ubapa muuya wakwe uusalala aabo basyoma Jwi lyakwe. Muuya ooyo ulakonzya kutugwasya kuti tulisimye kwiinda mukutupa, “manguzu aayinda manguzu eesu.”—2 Kor. 4:7-10.
13. Chakulya chamubukombi nchitupegwa ‘aamuzike uusyomeka alubo uuchenjede,’ chitugwasya biyeni kuti tulisimye mumapenzi?
13 “Muzike uusyomeka alubo uuchenjede,” ulikugwasigwa aaJehova kuti atupe chakulya chamubukombi, chiswaanizya mabbuku, mavidiyo amiimbo, zitugwasya kuti tube aalusyomo lusimide akuti tutooni pe mubukombi. (Mt. 24:45) Tweelede kuchibelesya chakulya eechi chamubukombi nchitupegwa aachiindi cheelede. Umwi muchizi waku-United States naakali kulumba akaambo kachakulya eechi wakaamba kuti: “Lusyomo lwangu lwakasunkwa kwaziindi zyiingi muminyaka eeyi iili 40 kandibelekela Jehova.” Muchizi ooyu wakaswaana mapenzi mayumu mubuumi bwakwe, syaanyinakulu wakajayigwa aamota yakali kweenzegwa aamuntu uukoledwe, bazyali bakwe bakajeegwa aabulwazi bubi loko, anguwe wakachiswa kkensa kwaziindi zibili. Niinzi chakagwasya muchizi ooyu kuti alisimye? Wakaamba kuti: “Jehova wakali aandime chiindi choonse. Chakulya chamubukombi nchitupegwa aamuzike uusyomeka alubo uuchenjede chakandigwasya kuti ndilisimye. Chakulya eechi chipa kuti ndilimvwe mbuli Jobu ooyo wakaamba kuti: ‘Kusikila ndikafwe, tandikaleki kusyomeka pe!’”—Job. 27:5.
Niinzi nzitweelede kuchita kuti tube chilongezyo mumbungano? (Langa fuka 14)
14. Jehova ubabelesya biyeni bakombima kuti batugwasye muchiindi chamapenzi? (1 Batesalonikka 4:9)
14 Jehova wakayiisya bantu bakwe mbubeelede kutondeezyania luyando akuumbulizyania muchiindi chamapenzi. (2 Kor. 1:3, 4; bala 1 Batesalonika 4:9.) Mbuli Elihu, bakwesu abachizi balaachiyandisyo chakutugwasya kuti tukkale katusyomeka chiindi nituli mumapenzi. (Mil. 14:22) Muchikozyano, mbungano yamuchizi Diane yakamusungwaazya akumugwasya kuti akkale kasimide mubukombi chiindi mulumaakwe naakachiswa loko. Muchizi ooyu wakati, “Zintu zyakali ziyumu. Pesi twakabona kuboko kwaJehova mumyeezi eeyo miyumu. Mbungano yesu yakatugwasya loko. Kutuswaya, kutufoonena, azimwi zitondeezya kuti balaandaba andiswe zyakatugwasya kuti tulisimye. Mbukunga tandikonzyi pe kweenzya moota, bakwesu bakali kuba aachoonzyo chakuti ndilajanika kumiswaangano amumulimu wakukambawuka.” Nchilongezyo chipati loko kuba aakati kabakombi baJehova balaaluyando.
KULUMBA JEHOVA AKAAMBO KALUYANDO LWAKWE
15. Nkamboonzi nituli aachoonzyo chakuti tuyookonzya kulisimya mumapenzi?
15 Toonse tuyooswaana mapenzi kunembo. Nikuba oobo, mbuli mbutwayiya tatukaalwani aatulike pe. Jehova unooli aandiswe mbuli mbachita taata ulaaluyando kubana bakwe. Unooli aandiswe chiindi choonse kuti amvwe nkombyo zyesu zyakulilila lugwasyo akuti atugwasye. (Is. 43:2) Tuli aachoonzyo chakuti tuyookonzya kulisimya mumapenzi, nkaambo Jehova wakatupa zintu zyoonse zitugwasya kuti tulisimye. Wakatupa chipo chankombyo, Bbayibbili, chakulya chiingi chamubukombi abakwesu abachizi batatugwasye muchiindi chamapenzi.
16. Niinzi nzitweelede kuchita kuti Jehova abe andiswe chiindi choonse?
16 Nchilongezyo chipati kuba aaTaateesu uuli kujulu uutulangania. “Myoyo yesu ilakondwa mulinguwe.” (Int. 33:21) Tulakonzya kutondeezya kuti tulamulumba Jehova akaambo kakutulangania munzila yaluyando kwiinda mukuzibelesya kabotu zintu zyoonse nzyaakatupa kuti atugwasye. Zimwi nzitweelede kuchita, nkubeleka changuzu kuti tutazwi mulubeya lwaLeza. Mulaamwi majwi, kuti twachita zintu zyoonse nzitukonzya kuti tuswiilile Jehova, akuchita zibotu mumeso aakwe, unooli aandiswe mane kukabe kutamani.—1 Pet. 3:12.
LWIIMBO 30 Ngu Taata, ngu Leza Wangu, Mweenzuma