Muchiiyo eecho, twakayiya kuti kaambo kapati ngilozi abantu nkibeelede kubikkila maanu, nkusalazigwa kwazina lyaJehova. Nkani iilaatala abweendelezi bwaJehova ilijatikizidwe munkani eeyi mpati. Alubo kusyomeka kwabantu kulijatikizidwe munkani eeyi.

Nkamboonzi lino nitwaamba kuti nkani mpati ili atala azina lyaJehova akusalazigwa kwalyo? Atulange-lange twaambo tutatu.

Kakusaanguna, Saatani wakabisya zina lyaJehova mumuunda wa-Edeni. Mubuzyo Saatani ngwaakabuzya Eva wakali kutondeezya kuti Leza muunyu akuti ulabayumisizya bantu mbayendelezya. Saatani wakaamba zintu zisiyene azyakaambwa aaJehova, wakaamba kuti Leza mubeji. Nkinkaako, Saatani wakabejelezya zina lyaJehova. Kuzwa waawo, Saatani wakaba “Dyabbulosi” chaamba “sikubejelezya.” (Joh. 8:44) Akaambo kakuti Eva wakaasyoma manwa aaSaatani, wakaleka kuswiilila Leza mpawo wakapapila bweendelezi bwaLeza. (Matl. 3:1-6) Kusikila mazubaano, Saatani ulikubejelezya zina lyaLeza, kwiinda mukupupulula manwa aapa kuti bantu bamubone munzila iitali kabotu Jehova. Aabo baswiilila manwa aayo, tabamuswiilili pe Jehova. Bakombi baLeza zilabachisa nzyachita Saatani zyakubejelezya zina lyaLeza lisalala nkaambo nzizyo zilikupa kuti munyika tuswaanane aamapenzi akuti bubi buvule.

Kachibili, kuti zilenge zyoonse zigwasigwe, Jehova uyanda kuzoosalazya zina lyakwe. Eechi nchiichintu chiyandikana loko kulinguwe. Wakaamba kuti: “Masimpe, ndiyoolisalazya zina lyangu lipati.” (Ezk. 36:23) Alubo, Jesu wakazyaamba aantanganana zintu nzibeelede kubikka mubusena bwakusaanguna bakombi baJehova basyomeka munkombyo zyabo, wakati: “Alisalazyigwe zina lyako.” (Mt. 6:9) Kwaziindi zyiingi, Bbayibbili lyaambuula atala ambukuyandikana kulemeka zina lyaJehova. Muchikozyano, ngaya amwi mavesi: “Amupe Jehova bulemu ibweelede zina lyakwe.” (1 Mak. 16:29; Int. 96:8) “Amwiimbe nyimbo zyakutembaula zina lyakwe lilemekwa.” (Int. 66:2) “Ndinoolemeka zina lyako lyoonse mane kukabe kutamani.” (Int. 86:12) Aali chimwi chiindi, Jesu kali kutempele kuJerusalema wakabuzya Jehova kuti: “Taata, pa kuti zina lyako lilemekwe” mpawo Jehova wakasandula kati: “Ndapa kuti lilemekwe alubo ndizoopa kuti lilemekwe lubo.”—Joh. 12:28. a

Kachitatu, makanze aaJehova alaachakuchita azina lyakwe. Niinzi ziyoochitika nikutazooyinde kusunkwa kwamamanino kutakachitike kumamanino aaMinyaka Iili Chuulu yaBweendelezi bwaKkristu? Ngilozi zyoonse abantu bayoomvwa biyeni atala ankani eeyi mpati yakusalazigwa kwazina lyaJehova? Kuti tusandule mubuzyo  ooyu, atulange-lange atala azintu zibili. Zintu eezi nkusyomeka kwabantu alubo abweendelezi bwaLeza. Muchiindi eecho, takunoochiyandikani pe kuti bantu batondeezye kuti balasyomeka kuli Jehova akaambo kakuti banooli bamaninina alubo banooli bazunda kukusunkwa kwamamanino. Ngabajana buumi butamani. Kuchinooyandikana bukamboni bumwi na butondeezya kuti Jehova nguwe weelede kweendelezya bantu? Peepe! Muchiindi eecho, zilenge zinooli kujulu azinooli aanyika ziyoojatana alubo ziyooyendelezegwa aaJehova. Ani kutegwani azina lyaJehova?

Zina lyaJehova liyoosalazigwa chakumaninina alubo talichinoobejelezegwi pe. Nikuba oobo, ngilozi abakombi baJehova basyomeka bachinoolibona kaliyandikana zina lyaJehova. Nkamboonzi? Nkaambo bayoobona Jehova kalikwiinkilila kunembo kuchita zintu zigambya. Akaambo kakuti Jesu uyoolibombya kwiinda mukubweedezya bweendelezi kuli Jehova, Leza uyooba “zintu zyoonse kubantu boonse.” (1 Kor. 15:28) Kuzwa waawo, bantu batanooli aanyika bayoobotelwa akuba “aalwaangunuko lwabulemu bwabana baLeza.” (Rom. 8:21) Alubo Jehova uyoozuzikizya makanze aakwe aakuti bana bakwe bakujulu abatanooli aanyika bakabe mpuli iimwi iijisini.—Ef. 1:10.

Nizyazoochitika zyoonse eezi, mpuli yaJehova yakujulu ayaanyika iyoomvwa biyeni? Kwaamba choonzyo, tuyooba aachiyandisyo chipati loko chakulumbayizya zina lyaJehova. Sintembawuzyo Davida wakazulwidwa kuti alembe kuti: “Aatembaulwe Jehova Leza . . . Alitembaulwe zina lyakwe lilemekwa lyoonse mane kukabe kutamani.” (Int. 72:18, 19) Kwabuumi bwesu boonse, tuyoozumanana kuyanduula zintu zipya atwaambo tupa kuti tutembawule Jehova.

Zina lyaJehova limupandulula mbabede. Alubo kuti twayeeya atala azina lyaJehova, mumizeezo nga kwasika luyando ndwalaalo. (1 Joh. 4:8) Tunookkala katuyeeya kuti akaambo kaluyando lwakwe, Jehova nguwe wakatulenga, wakatupa chinunuzyo alubo wakatutondeezya kuti bweendelezi bwakwe mbubo bululeme. Pesi tuyooyinkilila kunembo katubona zintu zitondeezya kuti Jehova ulatuyanda. Kwabuumi bwesu boonse, tuyooswena aafwiifwi aTaateesu alubo tunooyimba nyimbo zyakutembawula zina lyakwe lilemekwa.—Int. 73:28.