1. Nkamboonzi bantu bakuBbabbiloni nibakamuyanda mupolofita Daniyele?

 MUPOLOFITA Daniyele wakachili muniini chiindi bantu bakuBbabbiloni nibakamubweza kuti akabe muzike, kule akulimbabo kuJerusalema. Nikuba kuti Daniyele wakachili muniini pesi balupati-pati bakuBbabbiloni bakabona “mbwaboneka” Daniyele nkaambo taakalikwe “kampenda nokaba komwe” alubo wakali ‘aachiwa chibotu.’ Alubo bakalizi kuti Daniyele wakali wamusyobo waJuda. (1 Sam. 16:7) Akaambo katwaambo ootu, bantu bakuBbabbiloni bakasala kuti bamuyiisye kuti abelekele mung’anda yamwaami.—Dan. 1:3, 4, 6.

2. Jehova wakali kumubona biyeni Daniyele? (Ezekiele 14:14)

² Jehova wakali kumuyanda Daniyele kutali akaambo kakuti wakali aachiwa chibotu naakuti wakali kubelekela mung’anda yamwaami, pesi wakamuyanda akaambo kakuti anguwe Daniyele wakali kumuyanda Jehova. Kweelede kuti Daniyele wakachili kusisya minyaka iili kuma20 chiindi Jehova naakaamba kuti Daniyele wakali mbuli Nowa aJobu nkaambo Jehova wakabona kuti Daniyele wakaliluleme mbuli baalumi aaba bakasyomeka kwaminyaka myiingi. (Matl. 5:32; 6:9, 10; Job. 42:16, 17; bala Ezekiele 14:14.) Alubo Jehova wakamuyanda Daniyele kwabuumi bwakwe boonse.—Dan. 10:11, 19.

3. Tulalanga-langaanzi muchiiyo eechi?

³ Muchiiyo eechi, tulabona buntu bubili mbwakalaabo Daniyele bwakapa kuti Jehova amuyande. Chakusaanguna, tulabupandulula buntu oobo mpawo tubone mpaakabutondeezya. Chachibili, tulabona kuti niinzi chakagwasya Daniyele kuti atondeezye buntu oobo. Alubo kumamanino, tulabona mbutukonzya kumutobelezya. Nikuba kuti chiiyo eechi chakalembelwa bachikula, pesi toonse tulakonzya kujana zyiiyo kuzwa kuli Daniyele.

4. Daniyele wakatondeezya biyeni kuti ulaachibindi? Wamba chikozyano.

⁴ Bantu bali aachibindi balakonzya kuyoowa pesi kuyoowa ooko takubakachizyi kuchita zintu zilikabotu. Daniyele wakali mulombe wakali aachibindi. Atulange-lange zyiimo zibili Daniyele mpaakatondeezya chibindi. Mpaakasaanguna kutondeezya chibindi Daniyele, kweelede mpaalya nikwakali kwayinda minyaka iibili bantu bakuBbabbiloni kabali bazunda Jerusalema. Mwaami Nebbukkadinezari wakuBbabbiloni wakalota chiloto chiyoosya chachibumbwa chipati. Alubo wakabuzya baalumi bakwe basongo kuswaanizya aDaniyele kuti wakali kuyoobajaya kuti bakachilwa kumubuzya nzyaakalota abupanduluzi bwachiloto eecho. (Dan. 2:3-5) Daniyele wakeelede kubweza ntaamu chakufwambaana nkaambo bantu biingi bakali kukonzya kujayigwa. Daniyele “wakaunka kumwami akumulomba kuti amupe ciindi cakuti amupandulwide ciloto cakwe.” (Dan. 2:16) Zyakali kuyanda chibindi alusyomo kuti akonzye kuchita zintu eezi. Katanapandulula chiloto eechi, Bbayibbele taakwe mpulyaamba pe kuti Daniyele wakali wazichita eezi. Daniyele wakabuzya beenzinyina, Shadrekki, Mishekki a-Abbedinego kuti “bapaile kuli Leza wakujulu kuti abafwide luse akubagwasya kujatikizya maseseke aaya.” (Dan. 2:18) Jehova wakazisandula nkombyo zyabo. Kwiinda mukugwasigwa aaLeza, Daniyele wakapandulula chiloto chaNebbukkadinezari. Daniyele abeenzinyina teebakazoojayigwa pe.

5. Amba chimwi chiimo Daniyele mpaakatondeezya chibindi.

⁵ Nikwakayinda chiindi Daniyele kali wapandulula chiloto chachibumbwa chipati, kuli zimwi zyakachitika zyakali kuyanda kuti atondeezye kuti ulaachibindi. Nebbukkadinezari wakalota chiloto chimbi chiyoosya. Chiloto eecho chakali atala amunsamu mupati. Katondeezya chibindi, Daniyele wakapandulula nchichakali kwaamba chiloto eecho. Alubo wakabuzya mwaami kuti wakali kuzoopenga akuti wakali kuzoonyanzigwa bwaami mpawo wakali kuzoobupegwa lubo. (Dan. 4:25) Mwaami wakali kukonzya kubonaanga Daniyele wamupapila alubo wakali kukonzya kulayilila kuti Daniyele ajayigwe. Pesi katondeezya chibindi, Daniyele wakapandulula chiloto eecho.

6. Kweelede kuti niinzi zyakagwasya Daniyele kuti abe aachibindi?

 ⁶ Kweelede kuti niinzi chakagwasya Daniyele kuti abe aachibindi kwabuumi bwakwe boonse? Naakachili muniini, Daniyele wakayiya kuzwa kuchikozyano chabazyali bakwe. Bakali kuswiilila malayilile aaJehova ngaakapede bazyali bachi-Israyeli alubo bazyali baDaniyele bakamuyiisya Mulawu waLeza. (Dt. 6:6-9) Daniyele wakaliizi Milawu iili Kkumi azimwi zyiingi zyakaambidwe muMulawu. Muchikozyano, wakalizizi zintu ma-Israyeli nzibakeelede kulya anzibakateelede kulya. b (Lev. 11:4-8; Dan. 1:8, 11-13) Daniyele wakalizizi zintu nzibakaswaana bakombi baLeza azintu zyakabachitikila nibakaleka kupona kweendelana amilawu yaJehova. (Dan. 9:10, 11) Zintu zyakachitika mubuumi bwaDaniyele, zyakamugwasya kuti asyome Jehova angilozi zyakwe kuti zilamugwasilizya.—Dan. 2:19-24; 10:12, 18, 19.

7. Niinzi zimwi zyakagwasya Daniyele kuti abe aachibindi? (Langa chifanikisyo.)

⁷ Daniyele wakali kubala malembe aabapolofita baLeza, aaswaanizya bupolofita bwaJeremiya. Chiindi naakali kubala malembe aayo, Daniyele wakabona kuti nikuba kuti maJuda bakali mubuzike kwachiindi chilamfu kuBbabbiloni pesi bakali baba aafwiifwi kwaangununwa. (Dan. 9:2) Kubona bupolofita oobu kabulikuzuzikizigwa kwakapa kuti Daniyele amusyome Jehova. Alubo aabo basyoma Leza chakumaninina balayungizya kuba aachibindi. (Kozyanisya a Baroma 8:31, 32, 37-39.) Kwiinda zyoonse, Daniyele wakali kukkala kakomba kuli Wisi wakujulu. (Dan. 6:10) Wakalyaambilila zibi zyakwe kuli Jehova, alubo wakamubuzya mbaakali kulimvwa. Wakakumbila kugwasigwa aaJehova. (Dan. 9:4, 5, 19) Daniyele wakali muntu mbuli ndiswe, taakazyalwa kali aachibindi pe pesi wakabubelekela biya buntu oobu kwiinda mukubala, kukomba akusyoma Jehova.

8. Niinzi zikonzya kutugwasya kuti tube aachibindi?

⁸ Niinzi nzitweelede kuchita kuti tube aachibindi? Bazyali besu balakonzya kutusungwaazya kuti tube aachibindi. Tuzibide kasimpi katii, chikoolo chikoolo mwanaansya, watakozya kwanu nkukwawuso, kasimpi aaka takabeleki pe kunkani eeyi, nkaambo tatukonzyi pe kukona chibindi kubazyali besu pesi tweelede kuliyangila mbuli mwana aakwale kuti tube aabuntu oobu. Kuba aachibindi kuli mbuli kwiiya chimwi chintu. Kuti ukonzye kuziba mbuchichitwa weelede kulangisisya muyiisi wako mbalikuchichita mpawo ukkope nzyalikuchita. Munzila iikozyenie, kuti tukonzye kuba aachibindi tweelede kulangisisya bamwi mbubabutondeezya buntu oobo mpawo tukkope chikozyano chabo. Mubufwiifwi, twayiyaanzi kuzwa kuli Daniyele? Atulizibe kabotu Jwi lyaLeza. Atube aabweenzuma busimide aJehova kwiinda mukwaambuulaawe katwaangunukide chiindi choonse. Alubo tumusyome Jehova, katuli aachoonzyo chakuti ulakonzya kutugwasya. Eezi zipa kuti tube aachibindi chiindi lusyomo lwesu nilwasunkwa.

9. Kuba aachibindi kutugwasya biyeni?

⁹ Kuba aachibindi kulatugwasya muzintu zisiyene-siyene. Atulange chikozyano chaBen. Wakayiya kuli chimwi chikolo kuGermany bana bachikolo boonse nkubakali kusyoma kuti zintu zyakalisandukila biya alubo bana aabo bakali kwaamba kuti nzilyaamba Bbayibbili nzyakubeja kuti zintu zyakalengwa biya. Bumwi buzuba, Ben wakapegwa mweenya wakuti apandulwide basichikolonyina kuti nkamboonzi naakali kusyoma kuti zintu zyakalengwa biya. Wakapandulula nzyasyoma kali aachibindi. Njiili  mpindu yakaba? Ben wakaamba kuti, “Muyiisi wangu wakaswiilisisya loko nindakali kupandulula mpawo wakapulinta mabbuku aakali aazyiiyo nzindakali kupandulula, wapa bana bachikolo boonse mbindakali kwiiyaabo makkopi aayo.” Mbaakali kwiiyaabo Ben bakachita biyeni? Ben wakati, “Biingi babo bakayanda kwiiya zyiingi atala ankani eeyi alubo bakaamba kuti bakali kulombozya kuba mbuli ndime.” Zyakachitika kuli Ben zitondeezya kuti bantu bali aachibindi, chiindi chiingi bamwi balabalemeka. Alubo balakonzya kupa kuti bantu bali aamyoyo iibombede baze kuli Jehova. Nkinkaako, tuli aatwaambo tubotu loko tupa kuti tutondeezye chibindi.

10. Kusyomeka chaambaanzi?

¹⁰ MuBbayibbili, bbala lyachiHebberu lyakuti “kusyomeka” naakuti “luyando lutamani” chiindi chiingi lipandulula luyando ndwalaalo Leza kubakombi bakwe. Alubo bbala eeli lilakonzya kupandulula luyando ndubatondeezyania bakombi baLeza. (2 Sam. 9:6, 7) Tulakonzya kubelekela kuti tukkale katusyomeka chiindi choonse. Atubone mbaakazichita Daniyele.

11. Daniyele wakatondeezya biyeni kuti wakali kusyomeka nikuba naakachembaala? (Langa chifanikisyo chili aachivumbyo.)

¹¹ Kusyomeka kwaDaniyele kwakasunkwa mubuumi bwakwe boonse. Pesi naakali aaminyaka iili kuma90 wakaswaanana aasunko pati loko. Aachiindi eecho, Bbabbiloni yakali yeendelezegwa aamaMede amaPersiya alubo yakali kweendelezegwa aaMwaami Dariyasi. Bamunkuta yamwaami teebakali kumuyanda pe Daniyele alubo teebakali kumulemeka pe Jehova. Nkinkaako, bakayanduula nzila yakuti bajaye Daniyele. Bakapa kuti mwaami asayine mulawu wakali kusunka Daniyele kuti aswiilile Leza na naakuti mwaami. Makanze aabo akali aakuti Daniyele asyomeke kumwaami akuti ajatane aabamwi kuti baleke kukomba Jehova kwamazuba aali 30. Pesi Daniyele wakakaka kuchita oobo. Eezi zyakapa kuti awaalilwe mudindi lyabalavu. Jehova wakamulongezya Daniyele akaambo kakusyomeka kwiinda mukumuvuna munkanwa lyabalavu. (Dan. 6:12-15, 20-22) Niinzi nzitweelede kuchita kuti tusyomeke kuli Jehova mbuli mbaakachita Daniyele?

12. Niinzi zyakapa kuti Daniyele asyomeke kuli Jehova?

¹² Mbuli mbukwaambwa aajulu, kuti tusyomeke kuli Jehova tweelede kumuyanda kazizwa  aansi aamoyo. Daniyele wakatondeezya kuti ulasyomeka kuli Wisi wakujulu, Jehova, akaambo kakuti wakali kumuyanda kazizwa aansi aamoyo. Eezi zitondeezya kuti Daniyele wakamuyanda loko Jehova akaambo kakuti wakali kukkala kayeeyesesya atala abuntu mbwalaabo ambaabutondeezya. (Dan. 9:4) Alubo Daniyele wakali kuyeeyesesya akulumba Jehova akaambo kazintu zyoonse zibotu nzyaakamuchitila anzyaakachitila bakombi bakwe.—Dan. 2:20-23; 9:15, 16.

13. (a) Niinzi chikonzya kupa kuti bachikula kubayumine kusyomeka? Amba chikozyano. (Langa chifanikisyo.) (b) Mbuli mbukutondeezedwe muvidiyo, kujana wasandula biyeni kuti umwi wabuzya kuti Bakamboni baJehova balabasapota na bantu boonana bakozyenie zizo?

¹³ Mbuli Daniyele, bachikula baswaanana aabantu batamulemeki pe Jehova amilawu yakwe. Bantu bali boobu, balakonzya kumuzonda muntu uuyanda Leza. Bamwi bachikula balazwinyisigwa kuchitila kuti baleke kusyomeka kuli Jehova. Atulange zyakachitikila umwi uuchikula uutegwa Graeme uuzwa ku-Australia. Wakaswaanana aabuyumu-yumu naakali kusekkondali. Muyiisi wabo wakabuzya bana bachikolo kuti bakali kunoochita biyeni kuti umwi wabo wababuzya atala ankani yakoonana kwabantu bazizo zikozyenie. Muyiisi ooyo wakaamba kuti boonse basapota koonana kwabantu bazizo zikozyenie baye kulilimwi bbazu lyakkilasi mpawo batazisapoti bayinke kubbazu limbi. Graeme wakaamba kuti, “Kkilasi yoonse yakasapota maponeno aayo alubo yakawuumukila kuli limwi bbazu mpawo ime awumwi mweenzuma Kamboni twakayimikila kuli limbi bbazu.” Zimwi zyakazoochitika zyakazoopa kuti kumuyumine loko Graeme kuti atondeezye kuti ulasyomeka kuli Jehova. Graeme wakati, “Kwa-awa, bana bachikolo boonse kuswaanizya amuyiisi bakatutukila akutufubaazya. Ndakeezya kwiiminina nzindisyoma kandibeteme alubo kandaambuula munzila yabulemu, pesi boonse bakasinkide zigwilinti mumatwi, taakwe wakaswiilila pe.” Eezi zyakapa kuti Graeme alimvwe biyeni? Wakaamba kuti, “Majwi ngibakali kwaamba akali kundichisa pesi chakali kundibotezya nkuziba kuti ndakayiminina nzindisyoma.” c

14. Njiili nzila iikonzya kutugwasya kuti tukkale katusyomeka kuli Jehova?

¹⁴ Mbuli Daniyele, tulakonzya kusyomeka kuli Jehova kuti twayungizya kumuyanda. Tulakonzya kuzichita eezi kwiinda mukwiiya atala abuntu bwakwe. Muchikozyano, tulakonzya kwiiya atala azintu nzyaakalenga. (Rom. 1:20) Kuti kuyanda kuyungizya mbumuyanda Jehova akumulemeka, ulakonzya kubala zyiiyo zijanika aachipanzi chitii, “Sena Cakalengwa Buya?” naakuti kweebela mavidiyo. Alubo ulakonzya kubala makani aali mukabbuku katii, Was Life Created? akati, The Origin of Life—Five Questions Worth Asking. Bona zyakaambwa aawumwi muchizi wachiDanish uutegwa Esther atala atubbuku ootu, wakati: “Tubbuku ootu tulanoneezya. Tatukubuzyi nzweelede kusyoma pesi tukubuzya zintu mbuli mbuzibede mpawo nga zyasyaalila kuli nduwe kuti usale zili.” Ben waambwa kumasaangunino wakati: “Tubbuku ootu tusimya lusyomo. Twakandigwasya kuti ndibone kuti Leza nguwe wakalenga zintu.” Chiindi numana kubala tubbuku ootu, ulakonzya kwaamba majwi aakuti: “Uleelela Jehova Leza wesu, kutambula bulemu alulemeko amanguzu, nkaambo wakalenga zintu zyoonse, alubo akaambo kakuyanda kwako, zintu eezi zyakabawo alubo zyakalengwa.”—Chi. 4:11. d

15. Njiili imwi nzila iikonzya kutugwasya kuti tumuyande loko Jehova?

¹⁵ Imwi nzila iikonzya kutugwasya kuti tumuyande  loko Jehova, nkulanga-langa buumi bwaMwanaakwe, Jesu. Umwi muchizi uuchikula uutegwa Samira wakuGermany nzizyo nzyaakachita eezi. Wakaamba kuti: “Ndakamuziba kabotu Jehova kwiinda muli Jesu.” Muchizi Samira naakachili muniini, kwakali kumuyumina kumvwisisisya kuti Jehova ulakonzya kuba mweenzinyina akuti ulamuyanda. Pesi wakalizi Jesu mbaakali kulimvwa muzyiimo zili boobu. Wakaamba kuti, “Ndilamuyanda Jesu nkaambo wakali kunjilika alubo wakali kubayanda bana.” Kwiiya atala aJesu kutugwasya kuti tumuyande loko Jehova. Nkamboonzi? Samira wakaamba kuti: “Nindakali kuyoobwiiya, ndakabona kuti Jesu wakali kutobelezya chikozyano chaWisi munzila iimaninide. Nzyaakachita Jesu wakali kukkopa Wisi. Eezi zyakandigwasya kubona kaambo kakapa kuti Jehova atume Jesu aanyika kuchitila kuti bantu biingi bamuzibe kabotu Jehova.” (Joh. 14:9) Kuti kuyanda kusimya bweenzinyokwe aJehova, jana chiindi chakwiiya atala aJesu. Kuti wachita oobo, ulamuyanda loko Jehova alubo ulakkala kusyomeka kulinguwe.

16. Tugwasigwa biyeni akukkala katusyomeka kuli Jehova? (Intembauzyo 18:25; Mika 6:8)

¹⁶ Kuti katusyomeka, bamwi banooyanda kumvwanana aandiswe. (Rut. 1:14-17) Alubo, bantu basyomeka kuli Jehova balibeteme alubo balakkutisikana. Nkamboonzi? Nkaambo Jehova waamba kuti ulasyomeka kuli baabo basyomeka kulinguwe. (Bala Intembauzyo 18:25; Mika 6:8.) Nikuba kuti taakwe ambutubede pe kuti twalyeezyanisya aaLeza, pesi Mulengi wesu singuzuzyoonse uyanda kuti tube beenzinyina. Kuti twamvwanana aaLeza, taakwe chikonzya kumaninsya luyando oolo, nikuba basikutukazya, sunko naakuti lufu talutwaanzaanisyi pe kuluyando lwaLeza. (Dan. 12:13; Lk. 20:37, 38; Rom. 8:38, 39) Kulayandikana kaka kuti tutobelezye chikozyano chaDaniyele akukkala katusyomeka kuli Jehova.

17-18. Niinzi zimwi nzitukonzya kwiiya kuzwa kuli Daniyele?

¹⁷ Muchiiyo eechi, twalanga-langa buntu bubili kupela mbwakalaabo Daniyele. Pesi kuli zyiingi nzitwiiya kuzwa kulinguwe. Muchikozyano, Jehova wakapa kuti Daniyele abone zilengaano aziloto alubo wakapa kuti akonzye kupandulula nzibwakali kwaamba bupolofita. Bwiingi bwakazuzikizigwa kale. Pesi bumwi buzoozuzikizigwa muchiindi chilikunembo alubo buyoojatikizya bantu boonse batanooli aanyika.

¹⁸ Muchiiyo chitobela, tuzooyiya atala abupolofita bubili bwakalembwa aaDaniyele. Kumvwisisisya bupolofita oobo kuzootugwasya toonse, bapati abaniini kuti tusale kabotu lino. Bupolofita oobo buzootugwasya kuti tube aachibindi akuti tusyomeke kuchitila kuti tulibambile kuzooswaanana aamasunko ngitulangilila kunembo.