1-2. (a) Chibi niinzi alubo ngatulachizunda biyeni? (Langa “Bupanduluzi Bwamabala.”) (b) Tulalanga-langaanzi muchiiyo eechi amuli zimwi zyiiyo zijanika muNgaziyakulinda eeyi? (Langa “Zyeelede Kubikkilwa Maanu Abasikubala” mumagazini eeyi.)

 ULIZIZI na kuti Jehova Leza ukuyanda zisikaali? Nsandulo tulakonzya kwiijana kwiinda mukuziba nzyaakatuchitila kuti atununune kuchibi alufu. Chibi a ngusinkondoma mupati, ngututakonzyi pe kuzunda katuli aatulikke. Toonse tulabisya buzuba abuzuba alubo akaambo kakuti tuli aachibi tulafwa. (Rom. 5:12) Nikuba oobo, kuli makani mabotu. Tulaachoonzyo chakuti Jehova uzootunununa kuchibi alufu!

² Kwaminyaka iisika ku 6 000, Jehova Leza ulookugwasya bantu kuti bazunde chibi. Nkamboonzi? Akaambo kakuti ulatuyanda. Kuzwa kumatalikilo, Jehova wakali kubayanda bantu. Akaambo kakuti ulatuyanda, wakachita zintu zyiingi kuchitila kuti atugwasye chiindi nitwabisya. Leza ulizi kuti chibi cheeta lufu, nkinkaako, tayandi pe kuti tufwe. Uyanda kuti tupone kukabe kutamani. (Rom. 6:23) Eezi nzizyo nzyayanda kukuchitila. Muchiiyo eechi, tulalanga-langa mibuzyo iitatu: (1) Mbuubuli bulangilizi Jehova mbwaakapa bantu balaachibi? (2) Nziizili nzibakachita bantu bakali aachibi balembedwe muBbayibbili kuti babotezye Jehova? (3) Jesu wakachitaanzi kuti anunune bantu kuchibi alufu?

 MBUUBULI BULANGILIZI JEHOVA MBWAAKAPA BANTU BALAACHIBI?

3. Niinzi zyakapa kuti Adamu a-Eva babisye?

³ Chiindi Jehova naakalenga mwaalumi amwanakazi wakusaanguna, wakali kuyanda kuti babotelwe. Wakabapa muunzi mubotu, chipo chalukwatano amulimu uubotezya loko. Bakeelede kuzuzya nyika abana babo akupa kuti nyika yoonse ibe paradayizi mbuli mbuwakabede muunda wa-Edeni. Wakabapa mulawu uumwi luzutu. Alubo wakabachenjezya kuti, kuti basala kutyola mulawu wakwe achaali, bakali kuzoofwa. Tulizizi zyakachitika, ngilozi mbi eeyo yakatali kuyanda Leza abantu, yakeena Adamu a-Eva kuti bataswiilili Leza. Adamu a-Eva bakachita zyakali kuyandwa aangilozi eeyo mbi, Saatani. Kukachilwa kusyoma Wisi siluyando kwakapa kuti babisye. Mbuli mbutuzi, nzyaakaamba Jehova, zyakachitika. Kuzwa mubuzuba oobo kaziya kunembo, bakeelede kutebula nzibakabyala. Bakasaanguna kuchembaala alubo bakazoofwa.—Matl. 1:​28, 29; 2:​8, 9, 16-18; 3:​1-6, 17-19, 24; 5:5.

4. Nkamboonzi Jehova nazonda chibi alubo nkamboonzi nayanda kutugwasya kuti tuzunde chibi? (Baroma 8:​20, 21)

⁴ Jehova wakapa kuti makani aaya alembwe muBbayibbili kuchitila kuti tubone kaambo kayandikana. Makani aaya atugwasya kubona kuti nkamboonzi Jehova nazonda bubi zyiindilide. Chibi chipambanisya bweenzuma mbutulaabo aJehova alubo cheeta lufu. (Is. 59:2) Aaka nkiikaambo kapa kuti Saatani, ooyo wakatweetela mapenzi ayande chibi akuchisumpula. Chiindi Adamu a-Eva nibakabisya, kweelede kuti Saatani wakabonaanga wanyonyoona makanze aaLeza aali atala abantu. Pesi wakali waluba kuti Jehova ulaaluyando. Leza taakwe naakachincha makanze aakwe atala abana ba-Adamu a-Eva. Ulabayanda bantu, nkinkaako, wakafwambaana kubweza ntaamu yakuti bantu babe aabulangilizi. (Bala Baroma 8:​20, 21.) Jehova wakalizi kuti bamwi bana ba-Adamu bakali kuyoosala kumuyanda akumuswiilila alubo bakali kuyooyanda lugwasyo lwakwe kuti bazunde chibi. Mbukunga nguWisi akuti Mulengi wabo, Jehova wakapa kuti bakonzye kuswena aafwiifwi anguwe kuti bafutuke kuchibi alufu. Jehova wakazichita biyeni eezi?

5. Ndiilili Jehova naakapa bulangilizi kubantu balaachibi? Pandulula. (Matalikilo 3:15)

⁵ Bala Matalikilo 3:15. Jehova wakabapa bulangilizi bantu balaachibi chiindi naakaamba zyakali kunoochitikila Saatani. Leza wakaamba kuti kwakali kuzooba ‘mwana’ wakali kuzoofutula bantu. Mwana ooyo wakali kuyoopwayawula Saatani muchiindi chilikunembo akumaninsya mapenzi woonse ngaakeeta mumuunda wa-Edeni. (1 Joh. 3:8) Nikuba oobo, Saatani wakali kuyoomuluma mwana ooyo akupa kuti afwe. Eezi zyakali kunoomuchisa loko Jehova. Pesi Jehova wakalilipedelede kuti achisigwe moyo akuti mwana ooyo apenzegwe kuchitila kuti bantu bafutulwe kuchibi alufu.

NIINZI NZIBAKACHITA BANTU BALAACHIBI BALEMBEDWE MUBBAYIBBILI KUTI BABOTEZYE JEHOVA?

6. Niinzi nzibakachita baalumi bakali aalusyomo mbuli Abbelo aNowa kuti baswene aafwiifwi aJehova?

⁶ Muminyaka yakatobela, Jehova wakali kuyobuzibikka aantanganana bantu mbubakonzya kuswena aafwiifwi anguwe. Abbelo mwana mulombe wachibili wa-Adamu a-Eva, nguwe wakasaanguna kutondeezya lusyomo muli Jehova kuzwa chiindi ba-Adamu a-Eva nibakapapila Leza mumuunda wa-Edeni. Akaambo kakuti Abbelo wakali kuyanda Jehova wakayanduula nzila zyakuti amubotezye akuti aswene aafwiifwi anguwe, nkinkaako, wakapa chipayizyo. Abbelo wakali mweembeli, nkinkaako, wakabweza bana bambelele akubajeya mpawo wakapa kachili chipayizyo kuli Jehova. Jehova wakamvwa biyeni? “Wakamuyanda Abbelo  achipo chakwe.” (Matl. 4:4) Jehova wakazitambula zipayizyo zikozyenie zyakali kupegwa aabantu bakali kumuyanda abakali kumusyoma mbuli Nowa. (Matl. 8:​20, 21) Naakatambula zipayizyo eezyo, Jehova wakatondeezya kuti bantu balaachibi balakonzya kuba aabweenzinyina buli aafwiifwi anguwe. b

7. Twiiyaanzi kuzwa kukulipeda kwa-Abbrahamu kuti ape mwanaakwe uumwi biyo kuti abe chipayizyo?

⁷ Abbrahamu wakali aalusyomo lusimide muli Jehova. Mpawo Jehova wakamukumbila kuti achite chimwi chintu chiyumu loko. Wakamukumbila kuti ape mwanaakwe uumwi kupela Izakka kuti abe chipayizyo. Eezi zyeelede kuti zyakamulebula mumafuwa Abbrahamu. Nikuba oobo, Abbrahamu wakasala kuswiilila Jehova. Chiindi naakali kuyanda kujeya mwanaakwe, Jehova wakamukasya. Nzyaakachita Abbrahamu zitondeezya Jehova nzyaakali kuzoochita muchiindi chilikunembo. Jehova wakali kuyoolipeda kupa Mwaanakwe uumwi biyo, ngwayandisya kuti abe chipayizyo. Oobu mbumbubo Jehova mbwabayanda bantu.—Matl. 22:​1-18.

8. Twiiyaanzi kuzipayizyo zyabanyama zyakali kupegwa kweendelana aMulawu? (Levitikko 4:​27-29; 17:11)

⁸ Mukuya kwachiindi, Jehova wakapa ma-Israyeli Mulawu wakuti bapayizye banyama kuchitila kuti zibi zyabo zilekelelwe. (Bala Levitikko 4:​27-29; 17:11.) Zipayizyo eezyo zyakali kutondeezya kuti Jehova wakali kuyoopa chipayizyo chiinda eezi. Chipayizyo eecho chakali kuzoopa kuti bantu balekelelwe zibi zyabo chakumaninina. Leza wakabuzya bapolofita bakwe kuti balembe atala amwana wakasyomezedwe, kuti wakali kuyoopenzegwa akujayigwa. Mwana wakazoozuzikizya bupolofita oobo nguJesu. Wakali kuyoojayigwa mbuli chipayizyo chambelele. (Is. 53:​1-12) Yeeya eezi, Jehova wakali kuyoopa kuti Mwanaakwe ngwayandisya abe chipayizyo kuchitila kuti anunune bantu kuchibi alufu. Nzyaakachita Jehova zilagambya alubo wakazichitila ndiswe!

MUUNZILAANZI JESU MWAAKANUNUNA BANTU?

9. Johane Mubbabbatizi wakatyeni atala aJesu? (Mahebberu 9:22; 10:​1-4, 12)

⁹ Mumwaanda wamunyaka wakusaanguna, mubelesi waLeza Johane Mubbabbatizi naakabona Jesu wakuNazareta, wakati: “Amubone, Mwanaambelele waLeza, uugwisya chibi chanyika!” (Joh. 1:29) Majwi aaya atondeezya kuti Jesu nguwe mwana wakali kuyandikana wakasyomezedwe aaLeza kakuchili chiindi. Wakali kuyoopa buumi bwakwe mbuli chipayizyo chakasyomezedwe. Kumamanino, chakasika chiindi mwana ooyo waJehova naakali kuyoonununa bantu kuchibi chakumaninina.—Bala Mahebberu 9:22; 10:​1-4, 12.

10. Jesu wakatondeezya biyeni kuti wakazidilide “kuzooyita” basizibi?

¹⁰ Jesu wakali kubikkila maanu kapati kubantu bakakataazikene akaambo kachibi nchibakalaacho. Alubo wakali kubatamba kuti babe basikumutobela. Wakalizi kuti chibi nchicho chipa kuti bantu babe mumapenzi. Nkinkaako, wakagwasya baalumi abanakazi bakali mumapenzi akaambo kachibi. Kabelesya chikozyano, wakapandulula kuti: “Bantu batachiswi tabayandi musilisi pe, pesi bachiswa mbabo bayanda musilisi.” Alubo wakayungizya kuti: “Ndakazida kuzooyita basizibi, kutali bantu baluleme pe.” (Mt. 9:​12, 13) Jesu wakachita kweendelana amajwi aaya. Jesu wakalekelela zibi zyamwanakazi wakatetya mawulu aakwe amisozi yakwe. (Lk. 7:​37-50) Jesu wakayiisya mwanakazi muSamariya kasimpe kayandikana, nikuba kuti wakalizi kuti mwanakazi ooyo wakali kukkala  aamwaalumi wakatali mulumaakwe pe. (Joh. 4:​7, 17-19, 25, 26) Leza wakapa Jesu manguzu aakuti amaninsye mapenzi woonse aayeetwa akaambo kachibi, nkukwaamba lufu. Wakazichita biyeni eezi? Jesu wakabusya baalumi, banakazi, bana abapati.—Mt. 11:5.

11. Niinzi chakali kupa kuti basizibi balimvwe kabaangunukide kwaambuula aaJesu?

¹¹ Tazigambyi pe kuti nikuba bantu bakali kuchita zibi zipati, bakali kulimvwa kabaangunukide kuba aafwiifwi aJesu. Wakabeetelela akubafwida luzyalo. Bakalaangunukide kwaambuula aaJesu. (Lk. 15:​1, 2) Alubo Jesu wakali kubasungwaazya akubalongezya aabo bakali kutondeezya lusyomo mulinguwe. (Lk. 19:​1-10) Nzyaakachita Jesu, zitondeezya kuti Jehova ulaaluzyalo. (Joh. 14:9) Nzila njaakali kwaambuulaayo ambaakali kubajata bantu, ituyiisya kuti Jehova ngusilweetelelo akuti ulabayanda basizibi alubo uyanda kubagwasya. Jesu wakagwasya basizibi kuti bachinche nzila zyabo akuti bamutobele.—Lk. 5:​27, 28.

12. Jesu wakatuyiisyaanzi atala alufu lwakwe?

¹² Jesu wakalizizi zyakali kuyanda kuzoomuchitikila kunembo. Kwaziindi zyiingi, Jesu wakabuzya batobeli bakwe kuti wakali kuzoowuzigwa akugankaminwa aachisamu chakupenzezya. (Mt. 17:22; 20:​18, 19) Wakalizi kuti chipayizyo chakwe chakali kuzoogwisya chibi chanyika, mbuli Johane abamwi bapolofita mbubakali baambilizya. Jesu wakaamba kuti kali wapa buumi bwakwe kuti bube chipayizyo, wakali kuzoobakwelela kulinguwe “bantu bamisyobo yoonse.” (Joh. 12:32) Bantu bali aachibi  balakonzya kubotezya Jehova kwiinda mukuba aalusyomo muli Jesu akweezya kulyata mwaakalyata. Kuti twachita oobo, tulakonzya ‘kwaangununwa kuchibi.’ (Rom. 6:​14, 18, 22; Joh. 8:32) Jesu wakalipeda kuti afwe munzila iichisa loko kuchitila kuti atufutule.—Joh. 10:​17, 18.

13. Jesu wakafwa biyeni alubo lufu lwakwe lutuyiisyaanzi atala aJehova Leza? (Langa chifanikisyo.)

¹³ Jesu wakawuzigwa aamweenzinyina waafwiifwi loko. Basinkondonyina bakamusunga, bakamufubaazya alubo bakamutamikizya milandu iitali yakwe pe. Bakamubetekela lufu alubo bakamupenzya. Kumamanino, masooja bakamugankamina aachisamu chakupenzezya Jesu kuti bamujaye. Chiindi naakali kulisimya kukupenzegwa koonse ooku, Jehova Leza wakali kumvwa kuchisa kwiinda mbaakali kumvwa Jesu. Jehova wakalaazyo nguzu zyakwiimikizya mapenzi ngaakali kuswaana Jesu pesi taakwe naakanjilila pe. Nkamboonzi? Mbukunga Jehova wakali kumuyanda loko Mwanaakwe, nkamboonzi naakamulekela kuti apenzegwe akujayigwa? Akaambo kakuti Jehova ulatuyanda. Jesu wakati: “Leza wakayiyanda loko nyika zyakuti wakapa Mwanaakwe uuzyedwe aalikke, kuchitila kuti muntu woonse uumusyoma atanyonyoonwi pe pesi abe aabuumi butamani.”—Joh. 3:16.

14. Chinunuzyo chaJesu chikuyiisyaanzi?

¹⁴ Chinunuzyo chaJesu mbukamboni bupati butondeezya kuti Jehova ubayanda loko bana ba-Adamu a-Eva. Eezi zitondeezya kuti Jehova ulakuyanda lwako kukugama. Jehova wakachita zyoonse nzyakonzya alubo wakamvwa machise aayindilide kuti akununune kuchibi alufu. (1 Joh. 4:​9, 10) Nichoonzyo, Jehova uyanda kuti umwi awumwi wesu ayinkilile kunembo kumukomba nikuba kuti ulaachibi alubo uyanda kuzoogwisya chibi munzila iimaninide muchiindi chilikunembo.

15. Tweelede kuchitaanzi kuti tugwasigwe aachipo nchaakatupa Leza chachinunuzyo chaJesu?

¹⁵ Chipo nchaakatupa Leza chachinunuzyo chaMwanaakwe simuzyalwaalikke, chipa kuti tukonzye kulekelelwa zibi zyesu. Pesi kuti tulekelelwe zibi zyesu, kuli nzitweelede kuchita. Tweelede kuchitaanzi? Johane Mubbabbatizi aJesu Kkristu lwakwe bakatupa nsandulo, bakati: “Amusanduke, nkaambo Bwaami bwakujulu bwaswena aafwiifwi.” (Mt. 3:​1, 2; 4:17) Nkinkaako, tweelede kusanduka kuzibi zyesu kuti tukonzye kuswena aafwiifwi aJehova akuti tulekelelwe zibi zyesu. Kusanduka nkuchitaanzi alubo kutugwasya biyeni kuti tukonzye kubotezya Jehova nikuba katuli aachibi? Mubuzyo ooyu, uzoosandulwa muchiiyo chitobela.