1-2. (a) Ngaali mapobwe asekelelwa abamwi bantu? (Langa kabbokesi kati “ Munyaka waLwaangunuko Niinzi?”) (b) Jesu wakaambilizyaanzi muli Luka 4:16-18?

MULI zimwi zisi, bantu basekelela mapobwe mumunyaka wachi50 kakuli kwachitika chimwi chintu chiyandikana. Balakonzya kusekelela kwabuzuba, kwamviki naakuti kwachiindi chilamfu pesi alamana alubo bantu nga baaluba.

² Tulalanga-langa lwaangunuko ndutukonzya kujana muchiindi eechino amuchiindi chili kunembo lwiinda lwaangunuko lwakali kujanwa amaIsrayeli mumunyaka wachi50. Mumunyaka ooyo maIsrayeli akali kujana lwaangunuko. Nzyiiyoonzi nzitujana kumabambe aaya? Atuyeezya atala alwaangunuko lutamani Jehova ndwatupa mazubaano, alubo Jesu wakaambilizya atala alwaangunuko oolu.​—Bala Luka 4:16-18.

3. Kweendelana amajwi aali muli Levitiko 25:8-12, maIsrayeli akali kugwasigwa biyeni chiindi chaMunyaka waLwaangunuko?

³ Tulamvwisisisya majwi aJesu chiindi nitulanga-langa Lwaangunuko Leza ndwaakapa maIsrayeli. Jehova wakaambila maIsrayeli kuti: “Mweelede kuusalazya mwaka wa 50 akwaambilizya lwaanguluko kubantu boonse bamucisi. Uyoomubeda Mwaka Walwaanguluko, umwi aumwi weelede kupiluka kulukono lwakwe akupiluka umwi aumwi kumukwasyi wakwe.” (Bala Levitiko 25:8-12.) Muchiiyo chakiinda, twakabona maIsrayeli mbaakagwasigwa akubamba Sabata mviki amviki. Munyaka waLwaangunuko wakali kwaagwasya biyeni maIsrayeli? Muchikozyano, atuteedi muIsrayeli wakachilwa kubbadala chikwelete, wakeelede kuuzya muunda  wakwe kuti akonzye kuchibbadala. Pesi muMunyaka waLwaangunuko, muIsrayeli wakali kubweedezegwa muunda wakwe. Alubo muIsrayeli ooyo wakali “kupiluka kulukono lwakwe,” zyaamba kuti bana bakwe bakali kuyoobelesya muunda ooyo. Chimwi chiindi, kuti muIsrayeli wakachilwa kubbadala chikwelete chipati loko wakeelede kuuzya mwanaakwe naakuti kulyuuzya mubuzike kuti akonzye kuchibbadala. Chiindi nikwasika Munyaka waLwaangunuko, muzike ooyo wakali “kupiluka kumukwasyi wakwe.” Taakwe muntu wakali kukkala kali muzike kwabuumi bwakwe boonse! Eezi zitondeezya kuti Jehova ulaaluyando!

4-5. Nkamboonzi nikuyandikana kuti twiiye atala aMunyaka waLwangunuko mazubaano?

⁴ Njiili imwi nzila maIsrayeli njibakali kugwasigwaayo aMunyaka waLwaangunuko? Jehova wakati: “Takweelede kujanika mucete akati kanu pe, nkaambo ncobeni Jehova uyoomulongezya munyika eeyo Jehova Leza wanu njayoomupa kuti ibe lukono lwanu.” (Dt. 15:4) Eezi zili siyene anzitubona mazubaano nkaambo bantu banotede balikwiinkilila kunembo kabanota alubo bantu bafwaba balikufwabisya loko.

⁵ Mazubaano tatuchili aansi aaMulawu waMozesi pe. Eezi zyaamba kuti tatusekeleli Munyaka waLwangunuko wakali kuchitwa amaIsrayeli chiindi nibakali kwaangununa bazike, kulekelela zikwelete akubweedezya myuunda. (Rom. 7:4; 10:4; Ef. 2:15) Pesi tulakonzya kwiiya zyiingi atala alwaangunuko oolu. Nkamboonzi? Nkaambo Jehova ulakonzya kutwaangununa mbuuli mbaakachita maIsrayeli.

6. Muntu woonse uyanda kwaangununwa kubuzike bwanzi?

⁶ Toonse tuyanda kwaangununwa nkaambo tuli bazike bachibi chilaalunya. Tulachiswa, tulachembaala alubo tulafwa akaambo kakuti tulaachibi. Bantu biingi balazibona eezi chiindi nibalilanga mugilazi naakuti nibayinka kuli dokotela. Alubo tulakataazikana kuti twabisya. Mwaapostolo Pawulu wakalyaamba kuti “mwaange wamulawo  wacibi.” Wakayungizya kuti: “Maawe ndemucaangu! Ino nguni utiindivwune kumubili ooyu uunditola kulufwu oolu?”​—Rom. 7:23, 24.

7. Ngaali makani Isaya ngakaambilizya atala alwaangunuko?

⁷ Leza wakatondeezya luyando kwiinda mukutuchitila mabambe akuti twaangununwe muchibi. Jesu nguwe ukonzya kupa kuti tujane lwaangunuko oolu. Kakuchisyeede minyaka iili 700 kuti Jesu aze aanyika, mupolofita Isaya wakaamba atala alwaangunuko lwiinda oolo lwakali kujanwa amaIsrayeli. Wakati: “Muuya wa Mwami Singuzuzyoonse Jehova ulaalindime, akaambo kakuti Jehova wakandinanika kuti ndaambile babombe myoyo makani mabotu. Wakandituma kuti ndaange zilonda zyabaabo batyompedwe mumoyo, kuti ndaambilizye lwaanguluko kubazike.” (Is. 61:1) Majwi aaya akazuzikizigwa kulini?

8. Majwi aaIsaya akazuzikizigwa kulini?

⁸ Bupolofita buyandikana bwakali atala alwaangunuko bwakazuzikizigwa chiindi Jesu naakasaanguna mulimu wakwe aansi aano. Nakayinka kusinagogu lyakali kulimbabo kuNazareta, Jesu wakabala majwi amupolofita Isaya kunembo lyamaJuda. Wakatondeezya kuti majwi aaya abeleka kuli nguwe naakati: “Muuya wa Jehova ulaalindime, nkaambo wakandinanika kuti ndaambile bacete makani mabotu. Wakandituma kuti ndaambilizye kwaangununwa kubaange akupona kuboofwu, ikwaangununa badyaaminidwe, kukambauka mwaka mubotu wa Jehova.” (Lk. 4:16-19) Jesu wakabuzuzikizya biyeni bupolofita oobu?

9. Bantu biingi bakali kulangilila kuti Jesu abaangunune biyeni?

⁹ Lwaangunuko lwakaambwa aIsaya alubo lwakabalwa aJesu lwakasaanguna kubeleka mumwaanda wamunyaka wakusaanguna. Tulakonzya kuzisyoma eezi nkaambo Jesu wakati: “Sunu oolu lugwalo ndomwamvwa lwazuzikizyigwa.” (Lk. 4:21) Chiindi bantu nibakamvwa majwi aaJesu bakayeeya kuti Jesu ulabaangununa kuzwa kumaRoma. Balakonzya kuti bakayeeya mbuuli baalumi babili bakati: “Pele twakali kulangila kuti ooyu muntu ngonguwe ooyo iwakali kuyoofwutula Israyeli.” (Lk. 24:13, 21) Jesu taakabuzya basikwiiya bakwe kuti bataswiilili bweendelezi bwamaRoma pesi wakabalayilila kuti bape “Kaisara zintu zya Kaisara.” (Mt.  22:21) Ani Jesu wakabaangununa biyeni bantu bamuchiindi chakwe?

10. Jesu wakaangununa bantu mubuzike bwanzi?

¹⁰ Mwana waLeza wakaza kuti azoowangunune bantu munzila zibili. Nzila yakusaanguna njakuti, wakaangununa bantu mubuzike bwanjiisyo zyakubeja zyakali kuyiisigwa abapati bazikombelo. MaJuda miingi akali kusungilizigwa kutobela tunsiya-nsiya anjiisyo zyakubeja. (Mt. 5:31-37; 15:1-11) Bantu bakali kuzulwida bakali mbuuli boofu nkaambo taakwe nchibakazi pe. Bakakkala kabali mumudima alubo teebakalekelelwa zibi zyabo nkaambo bakaka kuti Jesu nguMesiya akuti teebakawuswiilila pe mulumbe wakwe. (Joh. 9:1, 14-16, 35-41) Jesu wakatondeezya bantu babombe myoyo mbubakonzya kwaangununwa kwiinda mukubayiisya kasimpe akuba chikozyano chili kabotu.​—Mk. 1:22; 2:23–3:5.

11. Njiili imwi nzila iiyandikana loko Jesu njaangununaayo bantu?

¹¹ Nzila yachibili Jesu njaangununaayo bantu nkwiinda mukupa kuti batabi bazike bachibi. Kwiinda muchinunuzyo chaJesu, Leza ulekelela zibi zyabaabo batondeezya lusyomo mulinguwe alubo batondeezya kuti balachilumba chinunuzyo nchaakatupa. (Heb. 10:12-18) Jesu wakati: ‘Kuti Mwana wamwaangununa, mulaangunuka ncobeni.’ (Joh. 8:36) Lwaangunuko oolu ndupati kwiinda lwaangunuko lwakaliwo muchiindi chamaIsrayeli! Muchikozyano, muIsrayeli wakali kwaangununwa mubuzike muMunyaka waLwaangunuko wakali kukonzya kuba muzike lubo alubo wakali kukonzya kufwa.

12. Mbaani bantu bakusaanguna bakagwasigwa alwaangunuko lwakaambilizigwa aJesu?

¹² MuPentekkoste ya33 C.E., Jehova wakananika baapostolo, banakazi abaalumi amuuya usalala. Bantu aaba bakaba bana bakwe alubo bayoobusigwa kuti bakapone kujulu akweendelezya aamwi aJesu. (Rom. 8:2, 15-17) Aaba mbimbabo bakusaanguna kujana lwaangunuko lwakaambilizigwa aJesu naakali musinagogu lyakulimbabo kuNazareta. Baalumi abanakazi aaba teebakaba bazike banjiisyo zyakubeja amichito iteendelani azili muBbayibbele zyakali kuchitwa abayiisi bachikombelo chachiJuda. Leza wakababona mbuuli kuti balaangunukide kuzwa kubuzike bwachibi. Munyaka waLwaangunuko wakukozyanisya wakatalika aawo basikutobela baKristu nibakananikwa mu33 C.E. alubo mabambe aaya ayoomana bweendelezi bwaKristu bwaminyaka iili 1 000 nibuyoomana. Niinzi zitazoochitike yaakumana minyaka iili 1 000?

13-14. Mbaani bamwi bakonzya kujana lwaangunuko lwakaambilizigwa aJesu?

¹³ “Mbelele zimbi” ziswaanizya mamiliyoni aabantu basyomeka bazwa kuzisi zisiyene-siyene. (Joh. 10:16) Aaba tabakwe bulangilizi bwakuyooyendelezya aJesu kujulu. Pesi bayookkala aansi aano kukabe kutamani. Ulaabulangilizi oobo na anduwe?

¹⁴ Nikuba lino, anduwe ulakonzya kujana zilongezyo zijanwa amaKristu aananikidwe. Ulakonzya kukumbila Jehova kuti akulekelele zibi zyako nkaambo ulaalusyomo muli Jesu Kristu. Eezi zilapa kuti ube abweenzuma bulikabotu aLeza akuti moyo wako utakupi mulandu. (Ef. 1:7; Ciy. 7:14, 15) Yeeya atala azilongezyo nzuulikujana akaambo kakuti wakaangununwa munjiisyo zyakubeja. Jesu wakati: “Muyoozyiba kasimpe, eelyo kasimpe kayoomwaangununa.” (Joh. 8:32) Tulikubotelwa kujana lwaangunuko oolu!

15. Tulangilila kuyoojanaanzi muchiindi chilikunembo?

¹⁵ Kunembo tuyoojana lwaangunuko lupati loko. Muchiindi chifwiifwi, Jesu uyoonyonyoona bukombi boonse bwakubeja abeendelezi babi banyika. Leza uyookwabilila “nkamu mpati” yabantu bamukomba alubo uyoochita kuti bajane zilongezyo muparadayizi. (Ciy. 7:9, 14) Bantu biingi bakafwa bayoobusigwa alubo bayoowangununwa kuzwa muzintu zyoonse zyeetwa achibi chaAdamu.​—Mil. 24:15.

16. Ndwaangunuko luli lupati lutazoojanwe abantu basyomeka?

 ¹⁶ Mubweendelezi bwaminyaka iili 1 000, Jesu abeendelezinyina bayoopa kuti bantu babe amibili iisimide akugwasya bantu kuti babe abweenzuma buli kabotu aLeza. Chiindi eecho chakubambulula zintu achakwaangununwa chiyooba mbuuli chiindi chaMunyaka waLwaangunuko wakali kusekelelwa amaIsrayeli. Alubo bantu basyomeka kuli Jehova bakkala aanyika bayoomaninina alubo tabazoobisyi pe.

17. Majwi ajanika muli Isaya 65:21-23 atondeezya kuti buumi bunooli biyeni aanyika? (Langa chifanikisyo chili achivumbyo.)

¹⁷ Majwi alembedwe muli Isaya 65:21-23 (Bala) atondeezya mbubunoobede buumi aanyika. Bantu tabanookkede luzutu. Pesi Bbayibbele litondeezya kuti bantu baswiilila Leza banoobeleka milimu iisiyene-siyene iipa kuti bakkutisikane akubotelwa. Tulaachoonzyo chakuti kumamanino aaminyaka iili 1 000 “zilenge azyalo ziyakwaangununwa kubuzike bwakubola akuba alwaanguluko lwabulemu bwabana ba Leza.”​—Rom. 8:21.

18. Nkamboonzi nitulaachoonzyo chakuti tuyoobotelwa munyika mpya?

¹⁸ Muchiindi chaminyaka iili 1 000 yakweendelezya kwaKristu, bantu banoojana chiindi chakubeleka achakulyookezya mbuuli mbaakali kuchita maIsrayeli. Tuyoojana chiindi chakukomba. Kukomba Jehova kupa kuti tubotelwe lino amunyika mpya. Tulaachoonzyo chakuti tuyoobotelwa mubweendelezi bwaKristu bwaminyaka iili 1 000 nkaambo tunookkutisikana akubeleka milimu mibotu kuswaanizya amilimu yabukombi.