1-2. Kweendelana achikozyano chaAngelito, muntu umwi awumwi weelede kuchitaanzi?

BAZYALI bako Mbaakamboni na? Kuti kakuli boobo, weelede kuziba kuti tukonzyi kuba abweenzinyina bulikabotu aLeza akaambo kakuti bazyali bako Mbaakamboni. Chiliwo nchakuti muntu umwi awumwi weelede kubelekela kuti abe abweenzinyina bulikabotu aJehova.

² Atulange-lange chikozyano chamukwesu uutegwa Angelito. Mukwesu ooyu wakakomezegwa aBakamboni. Pesi kachili muniini taakali abweenzinyina buli aafwiifwi aLeza. Wakati: “Ndakali kukomba Jehova kuchitila kuti ndibotezye bazyali bangu.” Nikuba boobo, Angelito wakasala kulipa chiindi chakuti abale Bbayibbele, ayeeyesesye atala anzyaakali kubala akukomba chiindi choonse kuli Jehova. Eezi zyakamugwasya biyeni? Wakati, “Ndakabona kuti chintu chikonzya kundigwasya kuti ndibe abweenzinyina bulikabotu aNdeende Jehova, nkumuziba kabotu.” Chikozyano chaAngelito chipa kuti kube mibuzyo iiyandikana loko yakuti: Kuziba Jehova akumuziba kabotu kusiyene biyeni? Alubo nga tulamuziba biyeni Jehova?

3. Kuziba Jehova akumuziba kabotu kusiyene biyeni?

³ Tulakonzya kwaamba kuti muntu ulimuzi Jehova kuti kazi zina lyakwe azintu nzyaakaamba anzyaakachita. Pesi  kumuziba kabotu Jehova kuswaanizya zintu zyiingi. Tweelede kwiiya atala anguwe abuntu bwakwe bubotu. Kuti twachita oobo tulaziba chipa kuti achite zimwi zintu achipa kuti aambe zimwi zintu. Eezi ziyoopa kuti tubone kuti ulazizumizya na zintu nzituyeeya, nzitusala anzituchita. Kuti twaziziba nzyayanda Jehova, tweelede kuzibelesya mubuumi bwesu.

4. Kulanga-langa zikozyano zili muBbayibbele kulatugwasya biyeni?

⁴ Bamwi bantu balakonzya kukuseka kuti wasala kukomba Jehova alubo balakukazya kuti wasaanguna kunjila miswaangano yambungano. Pesi kuti wasyoma Jehova takakulekelezyi pe. Alubo kuchita oobu kulakonzya kukugwasya kuti ube abweenzinyina busimide aJehova kwabuumi bwako boonse. Zilachita na kuti tumuzibe kabotu Jehova? Iiyi zilachita. MuBbayibbele kuli zikozyano zyabamwi bakazichita. Bantu aaba baswaanizya Mozesi aMwaami Davida. Lino atulange-lange zikozyano zyabo. Alubo tulasandula mibuzyo yakuti: Bakamuziba biyeni Jehova? Twiiyaanzi kuzikozyano zyabo?

5. Mozesi wakasala kuchitaanzi?

⁵ Mozesi wakabelesya zintu nzyaakayiya. Chiindi Mozesi naakali aminyaka iili 40 wakasala kuliswaanizya abakombi baJehova maHebbrayo kwiinda kuti azibwe mbuuli “mwana wamwana musimbi wa Farao.” (Heb. 11:24) Mozesi wakakaka kuba achuuno chilaajulu. Wakatondeezya chibindi kwiinda mukugwasya maHebbrayo bakali bazike kuEgepita nikuba kuti wakalizi kuti Faro mwaami wakuEgepita wakali kubonwa mbuuli leza ulamunyemena. Eezi zitondeezya kuti wakali alusyomo lupati. Mozesi wakali kusyoma Jehova. Kusyoma Jehova kwakapa kuti abe abwenzinyina busimide anguwe.​—Tus. 3:5.

6. Chikozyano chaMozesi chituyiisyaanzi?

⁶ Chikozyano chaMozesi chituyiisyaanzi? Tweelede kusala kubelekela Jehova akuliswaanizya abakombi bakwe. Chimwi chiindi tweelede kulipeda kusiya zimwi zintu kuti tubelekele Jehova alubo tweelede kulisimya nitukazigwa abantu batamuzi. Kuti twasyoma Taateesu uulikujulu tulakonzya kuba aachoonzyo chakuti ulatugwasya.

7-8. Niinzi chimwi Mozesi nchaakayiya?

⁷ Mozesi wakayiya atala abuntu bwaJehova alubo wakachita kuyanda kwakwe. Muchikozyano, chiindi Leza naakabuzya Mozesi kuti akagwisye maIsrayeli mubuzike, Mozesi taakasyoma pe kuti ulawukonzya mulimu ooyu alubo wakakaka kwaziindi zyiingi. Leza wakamweetelela alubo wakamugwasya. (Kul. 4:10-16) Eezi zyakapa kuti Mozesi abe achibindi chakuyoobuzya Faro mulumbe waJehova uyoosya. Mozesi wakabona manguzu aaJehova chiindi naakafutula maIsrayeli akunyonyoona Faro amasoja aakwe muLwizi Lusalala.​—Kul. 14:26-31; Int. 136:15.

⁸ Chiindi maIsrayeli nibakagwisigwa mubuzike bakang’ung’una kwaziindi zyiingi. Pesi Mozesi wakabona kuti Jehova wakali kubatondeezya moyo mulamfu bantu bakwe mbaakagwisya mubuzike. (Int. 78:40-43) Alubo Mozesi wakabona kuti Jehova ulalibombya zitaambiki chiindi naakachincha muzeezo wakwe naakamukumbila kuti atabajayi pe maIsrayeli.​—Kul. 32:9-14.

9. Kweendelana alugwalo lwa Bahebrayo 11:27, niinzi chitondeezya kuti Mozesi wakali abweenzinyina busimide aJehova?

⁹ Kuzwa nibakalonga kuzwa kuEgepita, Mozesi wakaba abweenzinyina busimide  aJehova. Kwakali mbuuli kuti ulamubona Wisi wakujulu. (Bala Bahebrayo 11:27.) Bbayibbele lyaamba kuti: “Jehova wakabandika mulomo mpande a Musa, mbubonya muntu mbwakonzya kubandika amuntunyina.” Eezi zitondeezya kuti wakali abweenzinyina busimide aJehova.​—Kul. 33:11.

10. Tweelede kuchitaanzi kuti tumuzibe kabotu Jehova?

¹⁰ Chikozyano eechi chituyiisyaanzi? Kuti tumuzibe kabotu Jehova tatweelede kuziba buntu bwakwe luzutu pesi tweelede kuchita nzyayanda. Chimwi chintu Jehova nchayanda nchakuti “bantu boonse bafwutulwe akuba aluzyibo lwini-lwini lwakasimpe.” (1 Tim. 2:3, 4) Nkinkaako tulakonzya kuchita kuyanda kwaJehova kwiinda mukuyiisya bantu atala anguwe.

11. Kuyiisya bamwi kutugwasya biyeni kuti tumuzibe kabotu Jehova?

¹¹ Kuyiisya bamwi atala aJehova kulatugwasya kuti andiswe tumuzibe kabotu. Muchikozyano, kuti twabona Jehova kali kutugwasya kujana bantu bayanda kumukomba, zilatugwasya kubona kuti ulaalweetelelo. (Joh. 6:44; Mil. 13:48) Kuti twabona muntu ngutwiiyaawe Bbayibbele kalikuchincha buntu bwakwe akuzwaata buntu bupya nga twabona kuti Jwi lyaLeza lilaamanguzu. (Kol. 3:9, 10) Alubo ngatwabona kuti Leza ulaamoyo mulamfu chiindi nitubweeda kwaziindi zyiingi kubantu kuchitila kuti bakafutuke.​—Rom. 10:13-15.

12. Kweendelana alugwalo lwa Kulonga 33:13, Mozesi wakakumbilaanzi alubo nkamboonzi?

¹² Mozesi wakali kubona kuti bweenzinyina aJehova bulayandikana. Nikuba kuti wakachita milimu miingi kagwasigwa aLeza, Mozesi wakakumbila kuti Jehova amugwasye kuti amuzibe kabotu. (Bala Kulonga 33:13.) Mozesi wakaamba majwi aaya kali waba aminyaka yiinda ku80. Eezi zitondeezya kuti wakalizi kuti wakeelede kwiiya zyiingi atala aLeza.

13. Njiili imwi nzila itondeezya kuti tubona bweenzuma bwesu aLeza kabuyandikana?

¹³ Eezi zituyiisyaanzi? Tweelede kubona bweenzuma mbutulaabo aJehova kabuyandikana nikuba kuti twaba achiindi chilamfu biyeni katumubelekela. Imwi nzila mbutukonzya kutondeezya kuti bweenzuma bwesu aLeza bulayandikana nkwiinda mukukomba kulinguwe.

14. Kukomba kutugwasya biyeni kuti twiiye zyiingi atala aLeza?

¹⁴ Kukkala kuuwambuula awumwi muntu nchintu chiyandikana loko kuti mumvwanane. Nkinkaako kubuzya Leza zili mumoyo kutayoowi akukomba kulinguwe chiindi choonse kulakonzya kupa kuti uswene aafwiifwi anguwe. (Ef. 6:18) Krista uukkala kuTurkey wakati: “Kubuzya Jehova nzindiyeeya kwiinda munkombyo akubona mbandigwasya kupa kuti ndimuyande akuti ndimusyome amoyo woonse. Alubo kubona kasandula nkombyo zyangu kupa kuti ndimubone mbuuli Ndeende aMweenzuma.”

15. Jehova wakali kumubona biyeni Mwaami Davida?

¹⁵ Mwaami Davida wakakomenena muchisi chakali kukomba Jehova Leza. Pesi Davida taakali kukomba Jehova akaambo kakuti wakali kutobelezya bamumpuli yakwe. Wakabeleka changuzu kuti abe abweenzinyina busimide aLeza alubo Jehova wakamuyanda kapati. Jehova wakaamba Davida kuti “imwaalumi weendelana amoyo [wakwe].” (Mil. 13:22) Niinzi chakagwasya Davida kuti aswene aafwiifwi aJehova?

16. Davida wakayiyaanzi atala aJehova kuzwa kuzile- nge?

 ¹⁶ Davida wakayiya atala aJehova muzintu nzyaakalenga. Kachili muniini, Davida wakali kweembela mbelele zyawisi. Kulakonzeka kuti wakali kuyeeyesesya atala azintu Jehova nzyaakalenga. Muchikozyano, taakali kunoneezegwa luzutu naakali kubona nyenyeezi mansiku pesi wakali kumvwisisisya buntu bwaLeza. Eezi zyakapa kuti alembe kuti: “Majulu aambilizya bulemu bwa Leza; mulengalenga uluula milimo yamaanza aakwe.” (Int. 19:1, 2) Kulangisisya kuti bantu bakalengwa munzila iigambya kwakapa kuti Davida abone kuti Jehova ulaabusongo. (Int. 139:14) Kuyeeyesesya atala amilimu yaJehova kwakapa kuti Davida abone kuti Jehova mupati loko kwiinda nguwe.​—Int. 139:6.

17. Kuyeeyesesya atala azintu zyakalengwa kutuyiisyaanzi?

¹⁷ Twiiyaanzi? Tweelede kuba aachiyandisyo chakulanga-langa zintu zyakalengwa. Tatweelede kunoneezegwa akupona munyika eeyi mbotu luzutu pesi tweelede kubona bubotu bwayo. Alubo buzuba abuzuba yeeyesesya nzukonzya kwiiya atala aJehova kuzwa kuzintu nzyaakalenga zili mbuuli zintu zimena aanyika, banyama abantu. Kuti twachita oobu buzuba abuzuba tuyooyiya zyiingi atala aTaateesu ulaaluyando. (Rom. 1:20) Alubo tuyooyanda Jehova amoyo woonse.

18. Kweendelana alugwalo lwa Intembauzyo 18, niinzi Davida nchaakabona?

¹⁸ Davida wakabona kuti Jehova wakali kumugwasya. Muchikozyano, Davida wakabona kuti wakagwasigwa aJehova kuti akonzye kuvuna mbelele zyawisi kumulavu abbeya. Alubo wakabona kuti wakagwasigwa aJehova kuti akonzye kuzunda Goliyati musoja wakali mupati loko. (1 Sam. 17:37) Chiindi naakali kuyanda kujayigwa aSawulu, Mwaami wakali abbivwe, Davida wakabona kuti nguJehova wakamuvuna. (Int. 18, ntalisyo) Nikuli Davida wakali kulisumpula wakali kuyoobonaanga wakachita zintu zyoonse eezi amanguzu aakwe. Pesi kulibombya kwakapa kuti abone kuti wakagwasigwa aJehova.​—Int. 138:6.

19. Chikozyano chaDavida chituyiisyaanzi?

¹⁹ Twiiyaanzi? Tweelede kuchita zyiingi kutali kukumbila kuti Jehova atugwasye luzutu. Tweelede kubona mbasandula nkombyo zyesu akuti utugwasya biyeni. Kuti twazumina kuti kuli zimwi zintu nzitutakonzyi kuchita amanguzu eesu, ziyoopa kuti tubone mbatugwasya Jehova. Alubo kubona mbatugwasya kuyoopa kuti tube abweenzuma busimide anguwe. Umwi mukwesu uutegwa Isaac, uukkala kuFiji waba aminyaka miingi kalikubelekela Jehova wakati: “Kuzwa nindakasaanguna kwiiya Bbayibbele kusikila sunu ndilikubona kuti Jehova ulikundigwasya. Eezi zyapa kuti ndimvwe kandili aafwiifwi anguwe.”

20. Twiiyaanzi kubweenzinyina bwaDavida aLeza?

²⁰ Davida wakali kutobelezya buntu bwaJehova. Jehova wakatulenga katukonzya kutobelezya buntu bwakwe. (Matl. 1:26) Kwiiya zyiingi atala abuntu bwaJehova kulakonzya kupa kuti tumutobelezye. Davida wakalimuzi kabotu Ndeendaakwe wakujulu. Eezi zyakapa kuti amutobelezye munzila njaakali kubajataayo bamwi. Muchikozyano, Davida wakachita chibi chipati aBbatishebba alubo wakapa kuti mulumaakwe ajayigwe. (2 Sam. 11:1-4, 15) Pesi Jehova wakamufwida luzyalo nkaambo Davida wakali kubafwida  luzyalo bamwi. Akaambo kakuti Davida wakali abweenzinyina bulikabotu aLeza, bantu biingi bakali kumuyanda alubo wakaba chikozyano chibotu chakeelede kutobelezegwa amaami aaIsrayeli.​—1 Bam. 15:11; 2 Bam. 14:1-3.

21. Kweendelana a Baefeso 4:24 a 5:1, niinzi chichitika kuti ‘twayiya Leza’?

²¹ Nchiiyoonzi nchitujana? Tweelede ‘kwiiya Leza.’ Kuchita oobu kuyootugwasya alubo kuyoopa kuti tumuzibe kabotu Jehova. Kuti twatobelezya chikozyano chakwe tunootondeezya kuti tuli bana bakwe.​—Bala Baefeso 4:24; 5:1.

22-23. Niinzi chiyoochitika kuti twatobelezya nzitwiiya atala aJehova?

²² Twayiya kuti tulakonzya kuziba Jehova kwiinda mukuyeeyesesya atala azintu nzyaakalenga akubala Jwi lyakwe Bbayibbele. Bbayibbele lilaazikozyano zyabakombi baLeza basyomeka mbitukonzya kutobelezya mbuuli Mozesi aDavida. Jehova wakachita mulimu wakwe, kwasyaalila ndiswe kuti tujule meso, matwi amyoyo yesu kuti twiiye atala anguwe.

²³ Tunooswini katwiiya atala aJehova. (Muk. 3:11) Chintu chiyandikana teekuti tuzi zyiingi biyeni atala aLeza pesi nkuti tulazibelesya na zintu nzituzi. Kuti twazibelesya tunootobelezya Taateesu siluyando alubo uyooswena aafwiifwi andiswe. (Jak. 4:8) Kwiinda muBbayibbele utusyomezya kuti takabalekelezyi pe aabo bamuyanduula amoyo woonse.